သင် သိပါသလား
ထွက်မြောက်ရာကျမ်းမှာ မကြာမကြာ တွေ့ရတဲ့ ‘အနီရောင်ချည်’ ကို ရှေးခေတ်ကလူတွေ ဘယ်လိုရရှိတာလဲ။
▪ ရှေးခေတ်အစ္စရေးလူတွေရဲ့ ဝတ်ပြုကိုးကွယ်ရာနေရာဖြစ်တဲ့ တဲတော်ရဲ့ဝင်းနဲ့ ဂိတ်အတွက် အသုံးပြုတဲ့ ရွက်ထည်တွေကို ‘အပြာရောင်၊ အမောင်း၊ အနီရောင်ချည်၊ လျှော်ချည်’ တွေနဲ့ ရက်လုပ်တယ်လို့ သမ္မာကျမ်းစာမှာ ဖော်ပြထားပါတယ်။ (ထွက်မြောက်ရာ ၂၆:၁; ၃၈:၁၈၊ သမ္မာ) ယဇ်ပုရောဟိတ်တွေရဲ့ “သန့်ရှင်းသောအဝတ်” ကို ရက်တဲ့အခါမှာလည်း ‘အနီရောင်ချည်’ ကိုအသုံးပြုကြပါတယ်။—ထွက်မြောက်ရာ ၂၈:၁-၆၊ သမ္မာ။
ချည်က အနီရောင်ထွက်နေတာဟာ အနီရောင်တောက်တောက် ဆိုးဆေးနဲ့ ဆိုးထားလို့ဖြစ်ပါတယ်။ အဲဒီဆိုးဆေးကို ကော့စီဒေး အင်းဆက်မျိုးရင်းထဲမှာပါတဲ့ အင်းဆက်ပိုးအမရဲ့ ကိုယ်ထဲကနေ ရရှိတာပါ။ အဲဒီအတောင်မဲ့ အင်းဆက်ပိုးတွေဟာ အရှေ့အလယ်ပိုင်းဒေသနဲ့ မြေထဲပင်လယ် ကမ်းရိုးတန်းဒေသမှာပေါက်တဲ့ ဝက်သစ်ချပင် (Quercus coccifera) တွေမှာ တွယ်ကပ်နေထိုင်တတ်ပါတယ်။ အင်းဆက်ပိုးအမရဲ့ ဥတွေထဲမှာ အနီရောင်ပါတယ်။ ဥတွေရှိနေတဲ့ အင်းဆက်ပိုးက ပဲစေ့အရွယ် ပုံသဏ္ဌာန်ရှိတဲ့ ဘယ်ရီသီးနဲ့တူပြီး ဝက်သစ်ချပင်ရဲ့ အရွက်တွေနဲ့ အကိုင်းအခက်တွေမှာ တွယ်ကပ်နေတတ်တယ်။ အဲဒီအင်းဆက်ပိုးတွေကို ရွေးထုတ်ပြီး ဖိညှစ်လိုက်ရင် အနီရောင်အရည်တွေ ထွက်လာပါတယ်။ အဲဒီအနီရောင်အရည်တွေကို ရေထဲမှာ ဖျော်လိုက်တဲ့အခါ အထည်ကိုဆိုးတဲ့ ဆိုးဆေး ရပါပြီ။ အင်းဆက်ပိုးကရတဲ့ အနီရောင်အကြောင်း၊ သူ့ခေတ်အခါက ရေပန်းစားတဲ့ အရောင်တွေထဲမှာ အဲဒီအနီရောင်လည်းပါကြောင်း ရောမသမိုင်းပညာရှင် ပလင်နီအကြီးက ဖော်ပြခဲ့ပါတယ်။
ခရစ်ယာန်ဂရိကျမ်းစောင်တွေကို ရေးတဲ့သူတွေထဲမှာ ဘယ်သူတွေက စီအီး ၃၃၊ ပင်တေကုတ္တေပွဲမှာ ရောက်ရှိနေကြသလဲ။
▪ ဂရိကျမ်းစောင်တွေကို ရေးသားတဲ့သူ ရှစ်ယောက်ထဲက ခြောက်ယောက်ပဲ အဲဒီပွဲမှာ ရောက်ရှိနေကြတာ ဖြစ်နိုင်ပါတယ်။
“ဂျေရုဆလင်မြို့မှ မထွက်သွားကြနှင့်။ ငါ့ထံမှ သင်တို့ ကြားသိရသော၊ ခမည်းတော် ကတိထားတော်မူသောအရာကို စောင့်နေကြလော့” ဆိုပြီး တပည့်တွေကို ယေရှု ညွှန်ကြားခဲ့တယ်လို့ တမန်တော်ကျမ်းမှာ ဖော်ပြထားပါတယ်။ (တမန်တော် ၁:၄) ကျမ်းရေးသူတွေ ဖြစ်လာကြမယ့် မဿဲ၊ ယောဟန်၊ ပေတရု တို့က အဲဒီညွှန်ကြားချက်ကို နာခံပြီး တခြားတပည့်တွေနဲ့အတူ “တစ်နေရာတည်း” မှာစုဝေးနေကြတယ်လို့လည်း ဖော်ပြထားပါသေးတယ်။ အဲဒီပွဲမှာ ယေရှုရဲ့ မိတူဖကွဲညီတွေလည်း ရောက်ရှိနေပါတယ်။ (တမန်တော် ၁:၁၂-၁၄; ၂:၁-၄) မိတူဖကွဲညီတွေထဲက ယာကုပ်နဲ့ ယုဒဟာ နောက်ပိုင်းမှာ သူတို့ နာမည်တပ်ထားတဲ့ ကျမ်းစောင်နှစ်စောင်ကို ရေးသားခဲ့ကြတယ်။—မဿဲ ၁၃:၅၅; ယာကုပ် ၁:၁; ယုဒ ၁။
မာကုက မိမိနာမည်တပ်ထားတဲ့ ခရစ်ဝင်ကျမ်းထဲမှာ ယေရှု အဖမ်းခံရတဲ့ညက ထွက်ပြေးသွားတဲ့ လူငယ်တစ်ယောက်အကြာင်း ဖော်ပြထားတယ်။ တခြားတပည့်တွေအားလုံး ယေရှုကိုစွန့်ပြီး ထွက်ပြေးသွားပြီဖြစ်တဲ့အတွက် သူ့ကိုယ်သူပဲ မာကု ရည်ညွှန်းနေတယ်ဆိုတာ သိသာပါတယ်။ (မာကု ၁၄:၅၀-၅၂) ဒါကြောင့် မာကုဟာ ကနဦးတပည့်တစ်ဦး ဖြစ်ခဲ့ပုံရတဲ့အတွက် ပင်တေကုတ္တေပွဲမှာ ရောက်ရှိနေတာ ဖြစ်နိုင်တယ်။
ကျန်တဲ့ကျမ်းရေးသူနှစ်ဦးက ပေါလုနဲ့ လုကာတို့ဖြစ်ပါတယ်။ စီအီး ၃၃၊ ပင်တေကုတ္တေပွဲနေ့မှာ ပေါလုဟာ ခရစ်တော်ရဲ့ နောက်လိုက်တစ်ဦး မဖြစ်သေးပါဘူး။ (ဂလာတိ ၁:၁၇၊ ၁၈) ယေရှုရဲ့လုပ်ဆောင်မှုတွေကို တွေ့ဖူးတဲ့ “မျက်မြင်သက်သေ” တွေထဲမှာ လုကာ မပါတဲ့အတွက် အဲဒီပွဲမှာ သူလည်း ရှိပုံမရပါဘူး။—လုကာ ၁:၁-၃။
[စာမျက်နှာ ၂၂ ပါရုပ်ပုံ]
ဆိုးဆေးလုပ်ရာမှာ အသုံးပြုတဲ့ အင်းဆက်ပိုးများ
[Credit Line]
Courtesy of SDC Colour Experience (www.sdc.org.uk)
[စာမျက်နှာ ၂၂ ပါရုပ်ပုံ]
စီအီး ၃၃၊ ပင်တေကုတ္တေပွဲနေ့မှာ ဟောပြောနေတဲ့ ပေတရု