ထူးခြားတဲ့ဒီမှတ်တမ်းကို ဓမ္မသစ်ကျမ်းလို့လူတွေခေါ်ဆိုကြတဲ့ ဂရိကျမ်းစောင်တွေထဲက ခရစ်ဝင်ကျမ်းလေးကျမ်းမှာ ဖော်ပြထားတယ်။ ဒါတကယ့်အဖြစ်အပျက်လား။ ဒီမေးခွန်းက မေးသင့်မေးထိုက်တဲ့၊ အရေးကြီးတဲ့ မေးခွန်းတစ်ခုပါ။ အဲဒါတွေသာ တကယ်မဖြစ်ခဲ့ရင် ခရစ်ယာန်ယုံကြည်ချက်က အဓိပ္ပာယ်လုံးဝမရှိတော့တဲ့အပြင် သာယာလှပတဲ့ကမ္ဘာမြေကြီးပေါ် ထာဝစဉ်အသက်ရှင်ခွင့်မျှော်လင့်ချက်ကလည်း အိပ်မက်မျှသာ ဖြစ်သွားပါလိမ့်မယ်။ (၁ ကောရိန္သု ၁၅:၁၄) ဒါပေမဲ့ ဒါတွေသာ တကယ်ဖြစ်ခဲ့ရင်တော့ လူသားတွေအတွက် တောက်ပတဲ့မျှော်လင့်ချက်ရှိလာပြီး သင်လည်းပဲ အကျိုးခံစားနိုင်မှာဖြစ်တယ်။ ဒါဆို ခရစ်ဝင်ကျမ်းမှတ်တမ်းတွေက ဖြစ်ရပ်မှန်လား၊ ယုံတမ်းစကားလား။

အချက်အလက်အမှန်က ဘာဖော်ပြ

စိတ်ကူးယဉ်ဒဏ္ဍာရီ ပုံပြင်တွေနဲ့မတူဘဲ ခရစ်ဝင်ကျမ်းမှတ်တမ်းတွေမှာ အသေးစိတ်ကအစ အတိအကျဖော်ပြထားတယ်။ ဥပမာ၊ ကျမ်းစာမှာ တကယ်ရှိခဲ့တဲ့နေရာတွေရဲ့နာမည် အများကြီးပါပြီး အဲဒီနေရာအတော်များများကို ဒီနေ့ထက်တိုင် သွားရောက်လည်ပတ်နိုင်တယ်။ တကယ်တည်ရှိခဲ့တဲ့လူတွေအကြောင်း ဖော်ပြထားပြီး အချက်အလက်တွေဟာ မှန်ကန်ကြောင်း သမိုင်းပညာရှင်တွေလည်း ထောက်ခံတယ်။—လုကာ ၃:၁၊ ၂၊ ၂၃။

ပထမရာစုနဲ့ ဒုတိယရာစုအချိန်က စာရေးဆရာတွေဟာ ယေရှုအကြောင်း ရေးသားဖော်ပြခဲ့ကြတယ်။a ခရစ်ဝင်ကျမ်းတွေမှာ မှတ်တမ်းတင်ထားတဲ့ ယေရှုကွပ်မျက်ခံခဲ့ရပုံနဲ့ အဲဒီခေတ်က ရောမတွေအသုံးပြုတဲ့ ကွပ်မျက်နည်းတွေဟာ တစ်ပုံစံတည်းပဲ။ ဒါ့အပြင် အဖြစ်အပျက်တွေကို အမှန်အတိုင်း ပွင့်လင်းမြင်သာစွာ ဖော်ပြပေးထားတယ်။ တပည့်တချို့ရဲ့ အားနည်းချက်တွေအကြောင်းတောင် ပါတယ်။ (မဿဲ ၂၆:၅၆; လုကာ ၂၂:၂၄-၂၆; ယောဟန် ၁၈:၁၀၊ ၁၁) အဲဒီအချက်တွေအရ ခရစ်ဝင်ကျမ်းရေးသူတွေဟာ ယေရှုအကြောင်း အတိအကျ၊ ရိုးရိုးသားသား ရေးသားဖော်ပြခဲ့မှန်း သိနိုင်တယ်။

ယေရှုရဲ့ ရှင်ပြန်ထမြောက်ခြင်းကကော

ယေရှု အသက်ရှင်နေထိုင်ပြီး သေဆုံးသွားခဲ့တယ်ဆိုတာကို အများစုလက်ခံကြပေမဲ့ အသက်ပြန်ရှင်လာတာကိုတော့ တချို့မယုံကြဘူး။ တမန်တော်တွေတောင်မှ ကိုယ်တော် အသက်ပြန်ရှင်လာတဲ့အကြောင်း စ,စချင်းကြားရချိန်မှာ မယုံနိုင်ခဲ့ကြဘူး။ (လုကာ ၂၄:၁၁) ဒါပေမဲ့ တမန်တော်တွေနဲ့ တခြားတပည့်တွေဟာ ရှင်ပြန်ထမြောက်လာသူယေရှုကို အချိန်နေရာအမျိုးမျိုးမှာ တွေ့မြင်ရတဲ့အခါ လုံးဝသံသယရှင်းသွားတယ်။ တစ်ကြိမ်မှာ ကိုယ်တော်ဟာ မျက်မြင်သက်သေ ၅၀၀ ကျော်ရှေ့ ကိုယ်ထင်ရှားပြခဲ့တယ်။—၁ ကောရိန္သု ၁၅:၆။

ဖမ်းဆီးချုပ်နှောင်၊ ကွပ်မျက်ခံရနိုင်ပေမဲ့ တပည့်တွေဟာ ယေရှုရှင်ပြန်ထမြောက်ပြီဆိုတဲ့အကြောင်း လူအားလုံးကို၊ ယေရှုကို ကွပ်မျက်ခဲ့သူတွေကိုတောင် မကြောက်မရွံ့ ကြွေးကြော်ခဲ့ကြတယ်။ (တမန်တော် ၄:၁-၃၊ ၁၀၊ ၁၉၊ ၂၀; ၅:၂၇-၃၂) ယေရှု ရှင်ပြန်ထမြောက်တာ သိပ်မကျိန်းသေဘူးဆိုရင် ဒီလောက်များတဲ့တပည့်တွေက ခုလို သတ္တိရှိနိုင်ပါ့မလား။ ယေရှု ရှင်ပြန်ထမြောက်ခဲ့တယ်ဆိုတဲ့အမှန်တရားက အဲဒီဖြစ်ရပ်နောက်ပိုင်းနဲ့ ခုချိန်အထိ ကမ္ဘာပေါ်မှာ ခရစ်ယာန်ဘာသာပျံ့နှံ့စေတဲ့ အကြောင်းရင်းဖြစ်တယ်။

ယေရှုသေဆုံးခြင်းနဲ့ ရှင်ပြန်ထမြောက်ခြင်းအကြောင်းဖော်ပြတဲ့ ခရစ်ဝင်ကျမ်းမှတ်တမ်းတွေမှာ သမိုင်းဆိုင်ရာ တိကျမှန်ကန်တဲ့အထောက်အထားတွေ ရှိတယ်။ သေချာဖတ်ရှုကြည့်ရင် အဲဒါတွေက ဖြစ်ရပ်မှန်တွေဆိုတာကို သင် ယုံကြည်စိတ်ချလာပါလိမ့်မယ်။ အဲဒီဖြစ်ရပ်တွေ ဘာကြောင့်ဖြစ်ရမှန်း နားလည်မယ်ဆိုရင် သင် ပိုပြီးယုံကြည်စိတ်ချလာပါလိမ့်မယ်။ ဒီအကြောင်း နောက်ဆောင်းပါးမှာ ရှင်းပြထားပါတယ်။

“ထာဝစဉ်အသက်ရှင်ချင်လား” လို့မေးရင် သင် ဘယ်လိုဖြေမလဲ။ အသက်ရှင်ချင်တာပေါ့ဆိုပြီး အများစု ပြန်ဖြေပါလိမ့်မယ်။ ဒါပေမဲ့ ထာဝစဉ်အသက်ရှင်ဖို့ ဖြစ်မှမဖြစ်နိုင်တာလို့ လူတွေထင်နေကြတယ်။ သေခြင်းတရားဆိုတာ ဓမ္မတာပဲ၊ ဖြစ်ပြီးရင် ပျက်ရမှာပေါ့လို့ လူတွေပြောကြတယ်။

အဲဒီမေးခွန်းနဲ့ဆန့်ကျင်ဘက် “သေချင်လား” လို့ မေးမယ်ဆိုရင်ကော။ ပုံမှန်အားဖြင့်တော့ လူအများစုက မသေချင်ဘူးလို့ ပြန်ဖြေကြလိမ့်မယ်။ ဒါက ဘာကိုဖော်ပြနေသလဲ။ အခက်အခဲပြဿနာတွေကြုံရတာတောင်မှ ဆက်အသက်ရှင်ချင်တာ ကျွန်ုပ်တို့ရဲ့ပင်ကိုစိတ်ပါ။ “လူစိတ်နှလုံးကိုလည်း အနန္တကာလ၌ စွဲလမ်းစေတော်မူပြီ” လို့ကျမ်းစာမှာ ဖော်ပြထားတယ်။—ဒေသနာ ၃:၁၁။

လက်တွေ့မှာ လူသားတွေ ထာဝစဉ်အသက်မရှင်ကြဘူးဆိုတာ မှန်ပါတယ်။ ဒါဆို ဘာများလွဲချော်နေသလဲ။ ဒီအခြေအနေကိုကုစားဖို့ ဘုရားသခင် တစ်ခုခုများလုပ်ဆောင်ခဲ့သလား။ ကျမ်းစာအဖြေက အားရှိစရာပါပဲ။ အဲဒီအဖြေက ယေရှု ဆင်းရဲဒုက္ခခံပြီး အသက်ပေးဆက်သွားတာနဲ့ တိုက်ရိုက်သက်ဆိုင်ပါတယ်။

တစ်ခုခုလွဲချော်သွား

သမ္မာကျမ်းစာထဲက ကမ္ဘာဦးကျမ်း၊ ဦးဆုံးအခန်းကြီး ၃ ခန်းမှာ ပထမလူသားမောင်နှံ အာဒံနဲ့ဧဝတို့ရနိုင်တဲ့ ဘုရားပေးထာဝစဉ်အသက်ရှင်ခွင့်အကြောင်း၊ ထာဝစဉ်အသက်ရှင်နိုင်ဖို့ လုပ်ဆောင်ရမယ့်အရာအကြောင်း ဖော်ပြထားတယ်။ ဒါ့အပြင် သူတို့ ဘုရားစကားနားမထောင်လို့ ထာဝစဉ်အသက်ရှင်ခွင့် ဆုံးရှုံးသွားတဲ့အကြောင်းကိုပါ ဆက်ဖော်ပြတယ်။ အဖြစ်အပျက်က သိပ်ရိုးရှင်းလွန်းလို့ တချို့က ဒါကို ရိုးရာပုံပြင်တစ်ပုဒ်လို သဘောထားကြတယ်။ ဒါပေမဲ့ ခရစ်ဝင်ကျမ်းတွေမှာလိုပဲ ကမ္ဘာဦးကျမ်းမှာလည်း တိကျမှန်ကန်တဲ့ သမိုင်းဆိုင်ရာအထောက်အထားတွေ အသေးစိတ်ပါရှိတယ်။a

အာဒံ မနာခံတဲ့အတွက် ဘာဖြစ်လာသလဲ။ ကျမ်းစာမှာ ခုလိုဖော်ပြထားတယ်– “အပြစ်တရားသည် တစ်ယောက်သောသူ [အာဒံ] အားဖြင့် ဤလောကသို့ ဝင်လာ၏။ သေခြင်းတရားသည်လည်း အပြစ်တရားအားဖြင့် ဝင်လာ၏။ သို့ဖြစ်၍ လူအပေါင်းတို့သည် အပြစ်ရှိသောကြောင့် သေခြင်းတရားသည် လူအပေါင်းတို့ထံ ပြန့်ပွားရ၏။” (ရောမ ၅:၁၂) ဘုရားသခင့်စကားနားမထောင်ဘဲ အာဒံ အပြစ်ကျူးလွန်ခဲ့တယ်။ ဒါကြောင့် သူ ထာဝစဉ်အသက်ရှင်ခွင့်ဆုံးရှုံးပြီး သေဆုံးသွားတယ်။ သူ့သားစဉ်မြေးဆက်တွေဖြစ်တဲ့ ကျွန်ုပ်တို့လည်း အပြစ်တရားကိုအမွေရပြီး မွေးဖွားလာကြတယ်။ ဒါကြောင့် ကျွန်ုပ်တို့ ဖျားနာ၊ အိုမင်းမစွမ်းဖြစ်ပြီး သေဆုံးကြရတယ်။ ကျွန်ုပ်တို့ ဘာကြောင့်သေဆုံးရတယ်ဆိုတဲ့ ဒီရှင်းပြချက်ဟာ အခုခေတ် သိပ္ပံပညာရှင်တွေလက်ခံထားတဲ့ မျိုးရိုးလိုက်ရောဂါနဲ့ သဘောတရားတူတယ်။ ဒါပေမဲ့ ဒီအခြေအနေကို ကုစားပေးဖို့ ဘုရားသခင် တစ်ခုခုလုပ်ဆောင်ခဲ့သလား။

ဘုရားသခင် လုပ်ဆောင်ခဲ့ရာ

အာဒံကြောင့် သူ့သားစဉ်မြေးဆက်တွေဆုံးရှုံးခဲ့ရတဲ့ ထာဝစဉ်အသက်ရှင်ခွင့်ပြန်ရရှိနိုင်ဖို့ ဘုရားသခင် စီစဉ်ခဲ့ပါတယ်။ ကိုယ်တော် ဘယ်လိုလုပ်ဆောင်ခဲ့သလဲ။

“အပြစ်တရား၏အခကား သေခြင်းဖြစ်၏” ဆိုပြီး ရောမ ၆:၂၃ မှာ ဖော်ပြထားတယ်။ အပြစ်ရဲ့ နောက်ဆက်တွဲဆိုးကျိုးက သေခြင်းဖြစ်တယ်။ အပြစ်လုပ်လို့ အာဒံ သေဆုံးခဲ့ရတယ်။ အလားတူ ကျွန်ုပ်တို့လည်း အပြစ်လုပ်ကြတယ်။ ဒါကြောင့် အပြစ်အတွက်အခဖြစ်တဲ့ သေခြင်းကို ရင်ဆိုင်ရတယ်။ ဒါပေမဲ့ ကျွန်ုပ်တို့သေဆုံးရတာက ကိုယ့်အပြစ်ကြောင့်မဟုတ်ဘဲ အပြစ်ရှိအနေအထားနဲ့ မွေးဖွားလာလို့ဖြစ်တယ်။ ကျွန်ုပ်တို့ရဲ့အပြစ်ကြွေးတွေကျေဖို့အတွက် ဘုရားသခင်က သားတော်ယေရှုကို စေလွှတ်ခဲ့တယ်။ ဒါက ဘယ်လိုအကျိုးသက်ရောက်သလဲ။

ပြည့်ဝစုံလင်သူ၊ တစ်ယောက်သောသူ လူသားအာဒံ မနာခံမှုကြောင့် အပြစ်နဲ့သေခြင်းဝင်လာခဲ့တာဖြစ်လို့ ကျွန်ုပ်တို့ကို အပြစ်ကြွေးတွေကနေ လွတ်မြောက်အောင်လုပ်ပေးဖို့ဆိုရင် ပြည့်ဝစုံလင်သူ လူသားတစ်ဦး အသက်သေဆုံးသည့်တိုင် နာခံမှုပြဖို့ လိုအပ်တယ်။ ကျမ်းစာမှာ ဒီလိုဖော်ပြထားတယ်– “တစ်ယောက်သောသူ နာခံမှုမရှိသောကြောင့် လူအများသည် အပြစ်သားများ ဖြစ်ရ၏။ ထိုနည်းတူ တစ်ယောက်သောသူ နာခံသောကြောင့် လူအများသည် ဖြောင့်မတ်ရာသို့ ရောက်ရ၏။” (ရောမ ၅:၁၉) ယေရှုက “တစ်ယောက်သောသူ” ဖြစ်တယ်။ ကိုယ်တော်ဟာ ကောင်းကင်ကိုစွန့်ခွာ၊ စုံလင်သူလူသားတစ်ဦးbဖြစ်လာပြီး ကျွန်ုပ်တို့အတွက် အသက်ပေးဆက်သွားတယ်။ ဒါကြောင့် ကျွန်ုပ်တို့ဟာ ဘုရားသခင်ရှေ့ ဖြောင့်မတ်တဲ့အနေအထားရှိနိုင်ပြီး ထာဝစဉ်အသက်ရှင်ဖို့အခွင့်အလမ်း ပွင့်သွားတယ်။

ဘာကြောင့် ယေရှု ဆင်းရဲဒုက္ခခံပြီး အသက်ပေးဆက်ခဲ့

ယေရှု အသက်ပေးဆက်ဖို့ ဘာကြောင့်လိုအပ်ရတာလဲ။ အနန္တတန်ခိုးရှင်ဘုရားသခင်အနေနဲ့ အာဒံရဲ့သားစဉ်မြေးဆက်တွေ ထာဝစဉ်အသက်ရှင်နိုင်အောင် အမိန့်ထုတ်ပြန်လိုက်လို့ မရဘူးလား။ ဘုရားသခင်မှာ အဲဒီလိုလုပ်နိုင်တဲ့ အခွင့်အာဏာရှိပေမဲ့ အဲဒီလိုလုပ်လိုက်မယ်ဆိုရင် အပြစ်ရဲ့အခက သေခြင်းဖြစ်တယ်ဆိုတဲ့ မိမိထုတ်ပြန်ထားတဲ့ဥပဒေကို မလေးစားရာရောက်ပါလိမ့်မယ်။ ဥပဒေဆိုတာ အခြေအနေပေါ်မူတည်ပြီး ပယ်ဖျက်နိုင်၊ ပြောင်းလဲနိုင်တဲ့ စည်းမျဉ်းတစ်ခု မဟုတ်ပါဘူး။ စစ်မှန်တဲ့တရားမျှတမှုအတွက် မဏ္ဍိုင်ဖြစ်ပါတယ်။—ဆာလံ ၃၇:၂၈။

ဒီကိစ္စမှာ ဘုရားသခင်က တရားမျှတမှုကို ဘေးချိတ်လိုက်မယ်ဆိုရင် တခြားကိစ္စတွေကိုလည်း ဒီလိုလုပ်မှာပဲဆိုပြီး လူတွေ သံသယဝင်ကြပါလိမ့်မယ်။ ဥပမာ– အာဒံရဲ့သားမြေးတွေထဲက ဘယ်သူတွေဟာ ထာဝရအသက် ရထိုက်သူတွေလို့ ဆုံးဖြတ်တဲ့ကိစ္စမှာရော ကိုယ်တော် တရားမျှတပါ့မလား။ ကိုယ်တော့် ကတိတွေကိုရော ယုံကြည်စိတ်ချလို့ရပါ့မလား။ ကျွန်ုပ်တို့ကိုကယ်တင်ဖို့ လုပ်ဆောင်ရာမှာ တရားမျှတမှုကိုမြဲမြဲကိုင်စွဲတဲ့အတွက် ဘုရားသခင့်လုပ်ရပ်တိုင်းဟာ အမြဲမှန်ကန်မယ်ဆိုတာ ယုံကြည်စိတ်ချနိုင်တယ်။

ယေရှုအသေခံခဲ့တာကြောင့် သာယာလှပတဲ့မြေကြီးပေါ်ထာဝစဉ် အသက်ရှင်ခွင့်ကို ဘုရားသခင် လမ်းဖွင့်ပေးနိုင်ခဲ့တယ်။ ယောဟန် ၃:၁၆ ပါ ယေရှုရဲ့စကားတွေကို မှတ်သားပါ– “ဘုရားသခင်၏သားတော်ကို ယုံကြည်ကြောင်းတင်ပြသူအပေါင်းတို့သည် ပျက်စီးခြင်းသို့မရောက်ဘဲ၊ ထာဝရအသက်ကိုရစေရန် ဘုရားသခင်သည် မိမိ၏တစ်ပါးတည်းသော သားတော်ကို စွန့်တော်မူသည်တိုင်အောင် ဤလောကကို ချစ်တော်မူ၏။” ယေရှုရဲ့သေခြင်းက ဘုရားသခင်ရဲ့ မယိမ်းယိုင်တဲ့တရားမျှတမှုကိုသာမက လူသားတွေအပေါ်ထားရှိတဲ့ ဘုရားသခင့်မေတ္တာကြီးမားမှုကိုပါ ဖော်ပြနေတယ်။

ဒါပေမဲ့ ခရစ်ဝင်ကျမ်းဖော်ပြချက်အတိုင်း နာကျင်မှုဝေဒနာ မချိမဆံ့ခံစားပြီး ယေရှု ဘာကြောင့် သေရတာလဲ။ ယေရှုဟာ အပြင်းထန်ဆုံးစမ်းသပ်မှုကြားမှာ သစ္စာတည်ကြည်ခြင်းအားဖြင့် အခက်အခဲကြုံရချိန်မှာ ဘယ်လူသားမှ ဘုရားသခင်အပေါ် သစ္စာမရှိနိုင်ဘူးဆိုတဲ့ မာရ်နတ်ရဲ့စွပ်စွဲချက်မှားကြောင်း တစ်ခါတည်းနဲ့အပြီး ဖြေရှင်းပေးခဲ့တယ်။ (ယောဘ ၂:၄၊ ၅) စုံလင်သူလူသားအာဒံကို အပြစ်ပြုအောင် စာတန်သွေးဆောင်နိုင်ခဲ့လို့ သူ့စွပ်စွဲချက်က မှန်သယောင်ရှိတယ်။ ဒါပေမဲ့ အာဒံလိုပဲ စုံလင်သူလူသားဖြစ်တဲ့ ယေရှုဟာ အကြီးအကျယ်ဝေဒနာခံစားနေရတဲ့ကြားကနေ နာခံမှုတင်ပြခဲ့တယ်။ (၁ ကောရိန္သု ၁၅:၄၅) ဒါကြောင့် ဘုရားသခင်ကိုနာခံဖို့ ရွေးချယ်ခဲ့မယ်ဆိုရင် အာဒံလည်းပဲ နာခံမှုပြနိုင်ကြောင်း ကိုယ်တော် သက်သေပြခဲ့တယ်။ အခက်အခဲစမ်းသပ်မှုတွေကိုခံရပ်ခြင်းအားဖြင့် ကျွန်ုပ်တို့အတွက် ယေရှု ပုံသက်သေထားခဲ့တယ်။ (၁ ပေတရု ၂:၂၁) မြေဝယ်မကျနာခံမှုပြခဲ့တဲ့ သားတော်ကို ဖခင်ဘုရားသခင်က မသေနိုင်တဲ့ကောင်းကင်အသက်ဆု ချခဲ့တယ်။

သင်လည်း အကျိုးခံစားရနိုင်

ယေရှုရဲ့သေခြင်းက တကယ်ဖြစ်ပျက်ခဲ့တာပါ။ ထာဝစဉ်အသက်ရှင်ဖို့ အခွင့်အလမ်းရှိပါတယ်။ သင် ထာဝစဉ်အသက်ရှင်လိုပါသလား။ ကျွန်ုပ်တို့လုပ်ဆောင်ရမယ့်အပိုင်းနဲ့ပတ်သက်ပြီး ယေရှု အခုလိုပြောခဲ့ပါတယ်– “ထာဝရအသက်ရရန် မှန်သောဘုရားသခင် တစ်ဆူတည်းဖြစ်တော်မူသောကိုယ်တော်နှင့် စေလွှတ်ခြင်းခံရသော ယေရှုခရစ်တို့နှင့်ဆိုင်သည့် အသိပညာကို သူတို့ဆည်းပူးနေရမည်။” —ယောဟန် ၁၇:၃။

ဒီမဂ္ဂဇင်းထုတ်ဝေသူတွေက စစ်မှန်တဲ့ဘုရားသခင် ယေဟောဝါနဲ့ သားတော်ယေရှုခရစ်တို့အကြောင်း သင်ပိုသိလာအောင် ကူညီပေးချင်ပါတယ်။ သင့်ဒေသအနီးတစ်ဝိုက်က ယေဟောဝါသက်သေတွေ သင့်ကို ဝမ်းသာအားရ ကူညီပေးပါလိမ့်မယ်။ ထပ်သိချင်တယ်ဆိုရင် ကျွန်ုပ်တို့ရဲ့ဝက်ဘ်ဆိုက် www.pr2711.com/mya ကို ဝင်ရောက်ကြည့်ရှုနိုင်ပါတယ်။