ရှေ့ဆောင်တစ်ဦးအနေနှင့် ယေဟောဝါအမှုတော် သင်ထမ်းဆောင်နိုင်မည်လော

^၁ “အလင်းဆောင်သူများ” ခရိုင်စည်းဝေးပွဲကြီးတွင် ဟောပြောသူတစ်ဦးက “ရှေ့ဆောင်နိုင်မည်လော။ ရှေ့ဆောင်လိုသလော” ဟုမေးမြန်းခဲ့ပါသည်။ အာမဂေဒုန်နီးကပ်နေသည့်အတွက် ဤမေးခွန်းများမေးသင့်နေကြောင်း၊ ဟောပြောခြင်းလုပ်ငန်းကို ယခင်ကထက် ပိုအရေးကြီးစေကြောင်း သူသတိပြုစေခဲ့ပါသည်။​—၁ ကော၊ ၇:၂၉က။

^၂ ရှေ့ဆောင်ခြင်းသည် ကြိုးပမ်းရသည့်လုပ်ငန်းဖြစ်သည်ကား အမှန်ပင်။ ကိုယ့်ကိုယ်ကိုပဲ့ပြင်ခြင်းနှင့် စည်းစနစ်ကျကျစီစဉ်ပေးမှုလိုအပ်ပါသည်။ သို့ ဖြစ်စေကာမူ ဓမ္မအမှုတွင် ကျွန်ုပ်တို့၏ကြိုးစားမှုသည် “အကျိုးကြီး” ပါသည်။ (၁ ကော၊ ၁၅:၅၈) ကျွန်ုပ်တို့အချိန်နှင့်ခွန်အား အကုန်ခံ၍ ရွေးချယ်ပြုလုပ်ဆောင်ရွက်သော အခြားလုပ်ငန်းများအကြောင်း ထပ်တူပင်ပြောဆိုနိုင်ပါမည်လော။ ယေဟောဝါအားချစ်မြတ်နိုးခြင်းက လုပ်ငန်းတော်တွင် ဇွဲလုံ့လရှိရန် ခရစ်ယာန်များကို တိုက်တွန်းအားပေးသည်။ ယေဟောဝါ၏လုပ်ငန်းတွင် စိတ်အားထက်သန်မှုကလည်း များစွာသောသူတို့ကို ရှေ့ဆောင်စေခဲ့ပေပြီ။​—၁ ယောဟန် ၅:၃။ ဗျာ၊ ၄:၁၁။

^၃ ကျောင်းပြီးခါစ ယေဟောဝါ၏ကျေးကျွန်ငယ် မြောက်မြားစွာတို့သည် ရှေ့ဆောင်ခြင်းကို အလေးအနက်သဘောထားနေကြပါသည်။ ယင်းသည်လည်း အလွန်သင့်တော်လျောက်ပတ်၏။ အချိန်ပြည့်ဓမ္မအမှုထက် အခြားအရေးကြီးသည့်လုပ်ငန်း ရှိနိုင်ပါဦးမည်လော။ (မ၊ ၆:၃၃) ဘုရားသခင့်နိုင်ငံတော်သတင်းကောင်းကို ဟောပြောရမည်။ ယင်းသည် ယေဟောဝါ၏လုပ်ငန်းတော်ဖြစ်ပြီး ငယ်စဉ်ကပင် ဤလုပ်ငန်းတွင် စုံးစုံးမြုပ်ပါဝင်နေခြင်းသည် အခွင့်ထူးလှသည်တကား။​—မ၊ ၂၄:၁၄။

^၄ အသင်မိဘများအချိန်ပြည့်လုပ်ငန်းကိုထမ်းဆောင်ရန် သင့်သားသမီးများကို တိုက်တွန်းပေးပါသလော။ ဤအကျိုးကြီးမားသောလုပ်ငန်းတွင် စိတ်နှလုံးအကြွင်းမဲ့၊ စိုးလ်နှင့်ခွန်အားအပြည့် အသင်ပါဝင်စေလိုကြောင်းကို သားသမီးများ ကောင်းစွာသဘောပေါက်ကြပါသလော။ (မာကု ၁၂:၃၀) ကျောင်းနေစဉ် အခွင့်အရေးရတိုင်း အရန်ရှေ့ဆောင်ခြင်းအားဖြင့် ကြေညာသူလူငယ်များစွာသည် မှန်မှန်ရှေ့ဆောင်လုပ်ငန်းအတွက် ကိုယ့်ကိုယ်ကိုအသင့်ပြင်ဆင်ပေးကြပါသည်။ ယေဟောဝါအား ဤသို့ချစ်မြတ်နိုးဝတ်ပြုခြင်းသည် ကိုယ်တော်နှလုံးကို အမှန်ရွှင်လန်းစေမည်။​—သု၊ ၂၇:၁၁။

^၅ ရှေ့ဆောင်နိုင်သောအခွင့်အရေး လူတိုင်း၌ရှိမည်မဟုတ်ပါ။ သို့ရာတွင် အိမ်ထောင်ရှိသည်ဖြစ်စေ၊ အပျိုလူပျို၊ ကြီးသည်ငယ်သည်မရွေး သတင်းကောင်းဟောပြောသူ ရှေ့ဆောင်အဖြစ် ယေဟောဝါအမှုတော်ထမ်းခြင်းကို အလေးအနက်ဆုတောင်းစဉ်းစားခဲ့ဖူးပြီလော။ (ကော၊ ၃:၂၃) အနည်းဆုံးတစ်ယောက်၊ သို့မဟုတ် နှစ်ယောက်စလုံးပင် ရှေ့ဆောင်ခြင်းဖြင့် မိမိတို့ဓမ္မအမှုကိုတိုးချဲ့ပေးရန် ငယ်ရွယ်သောအိမ်ထောင်သည် မောင်နှံစုံများစွာကြိုးစားခဲ့ကြပြီ။

^၆ လတ်တလောအချိန်တွင် မှန်မှန်ရှေ့ဆောင်မဖြစ်နိုင်သေးလျှင် အရန်ရှေ့ဆောင်နိုင်မည်လော။ မတ်လနှင့်ဧပြီလအတွင်း သင့်အသင်းတော်ရှိကြေညာသူများစွာ ထိုသို့ပြုရန် စဉ်းစားနေကြပေမည်။ သူတို့နှင့် သင်ပါဝင်နိုင်မည်လော။ ယေဟောဝါ၏သစ္စာရှိကျေးကျွန်အားလုံး ကောင်းချီးများစွာခံစားနေကြရသည်မှန်သော်လည်း သိုးကဲ့သို့သောသူများကို ရှာဖွေခြင်းငှာ နိုင်ငံတော်လုပ်ငန်း၌ အချိန်ပိုပေးနိုင်သူများအတွက် ထပ်ဆင့်ကောင်းချီးများ စောင့်ဆိုင်းနေပါသည်။​—တမန်တော် ၂၀:၃၅။