စာရှုသူများထံမှမေးခွန်းလွှာ
▪ ယေရမိ ၄:၁၀ နှင့် ၂၀:၇ တင်ပြပုံရသည့်အတိုင်း ယေဟောဝါသည်မိမိ၏ကျေးကျွန်များအပါအဝင်လူများကို ပရိယာယ်သုံးခြင်း သို့မဟုတ် လှည့်စားခြင်းပြုသလော။
မပြုပါ။ ဖန်ဆင်းရှင်သည် မိမိ၏ဆက်ဆံပုံတွင် လှည့်စား၊ ကောက်ကွေ့၊ ကလိမ်ကျခြင်းမရှိချေ။ သို့သော်ကိုယ်တော်သည် လူသားများ မည်သို့မျှော်လင့်ပါစေ မိမိ၏ဖြောင့်မတ်သော အလိုတော်ကို ပြီးမြောက်စေရန် လုပ်ဆောင်နိုင်၍ လုပ်လည်းလုပ်ဆောင်သည်။
ယေရမိ ၄:၁၀ တွင်ဤအချက်နှင့်စပ်လျဉ်း၍ ကျွန်ုပ်တို့တွေ့နိုင်သည်။ “အိုအရှင်ထာဝရဘုရား၊ သန်လျက်သည် အသက်ကိုထိသည်တိုင်အောင်ခွင်းသော်လည်း ‘သင်တို့သည်ငြိမ်သက်ခြင်းရှိကြလိမ့်မည်’ ဟုကိုယ်တော်မိန့်တော်မူသောအားဖြင့် ဤလူမျိုးနှင့်တကွ ယေရုရှလင်မြို့သားတို့ကို အလွန်လှည့်စားပါပြီတကားဟု လျှောက်ဆို၏။”
ယေဟောဝါသည် မိမိအားဝတ်ပြုနေရာမှ ခွဲထွက်သွားသော လူမျိုးအပေါ် ဆိုက်ရောက်လာမည့်ဘေးဒုက္ခကို ယေရမိအားအသုံးပြု၍ ကြိုဟောစေခဲ့သည်။ (ယေရမိ ၁:၁၀၊ ၁၅-၁၉။ ၄:၅-၈။ ၅:၂၀-၃၀) ပရောဖက်ဟု အခေါ်ခံသူ အခြားသူများလည်းရှိကြသည်။ (ယေရမိ ၄:၉) ထိုသို့သော ပရောဖက်များထံမှ လူများဘာကြားရသနည်း။ သူတို့ကိုဘုရားဤသို့သတ်မှတ်ခဲ့သည်။ “ပရောဖက်တို့သည် မဟုတ်မမှန် ဟောပြောကြ၏။ . . . ထိုသို့သောအမှုကို ငါ၏လူတို့သည် နှစ်သက်ကြ၏။”—ယေရမိ ၅:၃၁။ ၂၀:၆။
ထိုမှောက်မှားသောပရောဖက်များကို ယေဟောဝါမစေလွှတ်ဘဲ “သင်တို့သည်ငြိမ်ဝပ်ခြင်း ရှိကြလိမ့်မည်၊” “သင်တို့သည်ဘေးဥပဒ်နှင့် မတွေ့ရကြ” စသည့်အကြောင်းများကို သူတို့ဖြန့်ရာတွင်လည်း ကိုယ်တော်မတားမြစ်ခဲ့ချေ။ (ယေရမိ ၂၃:၁၆၊ ၁၇၊ ၂၅-၂၈၊ ၃၂) လူများရွေးချယ်ရမည်ခက်သော်လည်း ယေရမိအားဖြင့်ဖေါ်ပြသော စစ်မှန်သည့်ပရောဖက်ပြုချက်များကို လက်ခံမည်လော၊ သို့မဟုတ် ဟာနနိနှင့်ရှေမာယကဲ့သို့သော မှောက်မှားသည် ကိုယ့်ဟာကိုယ်ပရောဖက်တင်မြှောက်သူများကို နားထောင်မည်လော။ (ယေရမိ ၂၈:၁-၄၊ ၁၁၊ ၂၉:၃၀-၃၂) ဘုရားသည် ဤလှည့်စားသော ပရောဖက်များကို မရပ်ဆိုင်းစေခဲ့သောကြောင့် ကိုယ်တော်ကိုဤသို့ပြောပေမည်။ “‘သင်တို့သည်ငြိမ်သက်ခြင်းရှိကြလိမ့်မည်’ ဟုကိုယ်တော်သည်မိန့်တော်မူသောအားဖြင့် ဤလူများနှင့်တကွ ယေရုရှလင်မြို့သားတို့ကို အလွန်လှည့်စားပါပြီတကားဟုလျှောက်ဆို၏။”
နောက်တစ်နည်းအားဖြင့်ပြောရလျှင် ယေရမိသွေးဆောင်ခံရ၏။ “အိုထာဝရဘုရား ကိုယ်တော်သည် ကျွန်ုပ်ကိုသွေးဆောင်တော်မူသည်အတိုင်း ကျွန်ုပ်လိုက်ပါပြီ။ ကိုယ်တော်သည် ကျွန်ုပ်ထက်အားကြီး၍ နိုင်တော်မူပြီ။ အကျွန်ုပ်သည် ကဲ့ရဲ့ခြင်းကိုနေ့တိုင်းခံရပါ၏။ လူတိုင်းပြက်ပြယ်ခြင်းကိုပြုတတ်ကြပါ၏။”—ယေရမိ ၂၀:၇။
ထင်းရှားသောယဇ်ပုရောဟိတ်ပါရှုရသည် ယေရမိကိုလူသူရှေ့ရိုက်ပုတ်ကာ ထိပ်ခတ်လိုက်သည်။ လူ့ရှုထောင့်မှကြည့်လျှင် ယေရမိအနေနှင့်မိမိသည်မတတ်နိုင်တော့ကြောင်း ဂရုမစိုက်ခြင်း၊ စွန့်ပယ်ခြင်း၊ ကဲ့ရဲ့ခြင်းနှင့် ရိုက်နှက်မှုများကို ဆက်ခံရပ်ရန် ခွန်အားမရှိတော့ဟု ယူမှတ်မည်။ သို့သော်မဟုတ်ချေ။ ယေဟောဝါသည် မိမိ၏ခွန်အားကို ယေရမိ၏ဆန္ဒတစ်ဖက် (သို့မဟုတ် ဆန့်ကျင်လျက်) သုံးခဲ့သည်။ ပရောဖက်သည် သူ့ခွန်အားဖြင့် မပြုလုပ်နိုင်သော အရာကိုပြီးမြောက်စေရန် ဘုရားသည် ဤမစုံလင်သောလူကို အသုံးပြုခြင်းဖြင့် ကိုယ်တော်သည် ယေရမိကိုသွေးဆောင်ခဲ့သည်။ ယေရမိအနေနှင့် သွေးဆောင်ခံရ သို့မဟုတ် အံ့သြသွားခဲ့သော်လည်း နိဂုံးချုပ်ကောင်းခဲ့သည်။ သူ့အားနှိပ်စက်သူများ အရှက်ကွဲခဲ့ပြီး၊ ဘုရားသတင်းတော် ကြေညာခဲ့ရသည်။—ယေရမိ ၂၀:၁၁။
ထို့ကြောင့် ယေရမိ ၄:၁၀ နှင့် ၂၀:၇ သည် ဧလိဟုဆိုခဲ့သည်နှင့် ညီသည်။ “ဘုရားသခင်သည်ဒုစရိုက်ကို ပြုတော်မမူ။ အနန္တတန်ခိုးရှင်သည် မတရားသဖြင့် စီရင်တော်မမူ။”—ယောဘ ၃၄:၁၂။