ကျွန်ုပ်တို့၏မဟာဖန်ဆင်းရှင်သည် ကျွန်ုပ်တို့ကိုဂရုစိုက်တော်မူ၏!

^၁ နာခံမှုမရှိသောဣသရေလလူမျိုးနှင့် ဆင်ခြင်နှီးနှောရန်ကြိုးစားရာတွင် ယေဟောဝါက ဤသို့မေးခဲ့သည်– “ထာဝရဘုရား [“ယေဟောဝါ၊” ကဘ] သည် အစဉ်အမြဲတည်တော်မူသောဘုရားသခင်ဖြစ်ကြောင်းကိုလည်းကောင်း၊ မြေကြီးစွန်းတိုင်အောင်ဖန်ဆင်းတော်မူသောအရှင်ဖြစ်ကြောင်းကိုလည်းကောင်း . . . သင်သည်မသိမကြားဖူးသလော။” (ဟေရှာ. ၄၀:၂၈) ကျွန်ုပ်တို့သည် မိမိတို့၏မဟာဖန်ဆင်းရှင်ကိုသိရှိကြပြီး ကျွန်ုပ်တို့အပေါ် ကိုယ်တော်၏မေတ္တာပါသောဂရုစိုက်မှုကို တွေ့ မြင်ကြသည်။ သို့ရာတွင် သန်းပေါင်းများစွာသောသူတို့သည် ကိုယ်တော်၏တည်ရှိမှုကို သံသယဝင်ကြသည် သို့မဟုတ် ကိုယ်တော်နှင့်ပတ်သက်၍ သမ္မာကျမ်းစာတွင်ဖော်ပြထားရာများနှင့် ကိုက်ညီမှုမရှိသောယူဆချက်များရှိကြသည်။ သူတို့အား ကျွန်ုပ်တို့ မည်သို့ကူညီနိုင်သနည်း။

^၂ ထိုသို့သောသူတို့အားကူညီရန် ယခုအင်္ဂလိပ်လိုသာရှိသည့် သင့်ကိုဂရုစိုက်တော်မူသောဖန်ဆင်းရှင်တစ်ပါးရှိသလောစာအုပ်အသစ်ကို စီစဉ်ထားပါသည်။ ယင်းစာအုပ်က စဉ်းစားတွေးခေါ်တတ်သူများအား ဖြစ်ရပ်မှန်များအပေါ် ဆင်ခြင်သုံးသပ်ရန်ဖိတ်ခေါ်သည်။ ဤစာအုပ်တွင်ပါသည့် စိတ်ဝင်စားစရာအကြောင်းအရာနှင့် နားဝင်အောင်အချေအတင် တင်ပြနိုင်စွမ်းများက ယင်းကိုဖတ်ရှုသူများအား အာရုံဖမ်းစားစေသင့်သည်။

^၃ ဖန်ဆင်းခြင်းစာအုပ်နှင့် အကျွမ်းတဝင်ရှိပါ– ၎င်းတွင်ပါရှိသည့်အကြောင်းအရာများ၏ အခြေခံအကြမ်းဖျင်းကို သိထားပါ။ အခန်း ၂ မှ ၅ က စကြဝဠာ၊ အသက်နှင့် လူသားသည် မည်သို့တည်ရှိလာကြောင်းနှင့် ယင်းတို့အားလုံး၏နောက်ကွယ်တွင် မည်သည့်အရာရှိကြောင်းကို သုံးသပ်ထားသည်။ အခန်း ၆ မှ ၉ က သမ္မာကျမ်းစာနှင့် ယင်း၏အာဘော်ရှင်၊ အထူးသဖြင့် ဖန်ဆင်းခြင်းဆိုင်ရာကမ္ဘာဦးကျမ်းမှတ်တမ်းသည် ယုံကြည်စိတ်ချ၍ရမရကို စူးစမ်းရှာဖွေထားသည်။ အခန်း ၁၀ က လူတို့မေးကြသည့် “ဖန်ဆင်းရှင်သည် ဂရုစိုက်တော်မူလျှင် ဆင်းရဲဒုက္ခ အဘယ်ကြောင့်ဤမျှများပြားရသနည်း” ဟူသောစိတ်အရှုပ်ထွေးဆုံးမေးခွန်းများမှတစ်ခု၏ ကျေနပ်လောက်သောအဖြေကိုပေးသည်။

^၄ သံသယရှိသူများနှင့်ဆင်ခြင်နှီးနှောရန် ကြိုးစားပါ– ဖန်ဆင်းခြင်းစာအုပ်၊ စာမျက်နှာ ၇၈-၉ ကအခြားသူများအား ဘုရားသခင်နှင့်ပတ်သက်၍ မှန်ကန်သောကောက်ချက်ချနိုင်ရန်ကူညီပေးဖို့ သင်အသုံးပြုနိုင်သည့် အကြောင်းပြချက်ကိုတင်ပြထားသည်။ “စကြဝဠာမှာ အစရှိသလား” ဟုသူတို့ကိုမေးပါ။ အများစုက အစရှိသည်ဟု သဘောတူကြမည်။ ထိုသို့သဘောတူပါက “အဲဒီအစဟာ အလိုလိုဖြစ်လာတာလား ဒါမှမဟုတ် တစ်ခုခုကြောင့်ဖြစ်လာတာလား” ဟုမေးပါ။ အများစုက တစ်ခုခုကြောင့်ဖြစ်လာသည်ဟု အသိအမှတ်ပြုကြ၏။ ယင်းက “စကြဝဠာရဲ့အစဟာ ထာဝရအရာတစ်ခုခုကြောင့်ဖြစ်လာသလား ဒါမှမဟုတ် ထာဝရပုဂ္ဂိုလ်တစ်ဦးဦးကြောင့်ဖြစ်လာသလား” ဟူသည့်နောက်ဆုံးမေးခွန်းသို့ဦးတည်ပေးသည်။ ဤချဉ်းကပ်နည်းက များစွာသောသူတို့အား ဖန်ဆင်းရှင်တစ်ပါးရှိရမည်ဟု သိမြင်စေနိုင်သည်။

^၅ ဖန်ဆင်းခြင်းစာအုပ်သည် လူအများလိုအပ်သည့်အရာပင်ဖြစ်၏။ ယင်းကို သင့်ဆွေမျိုးများ၊ အလုပ်ဖော်များ၊ ကျောင်းနေဖက်များနှင့် အခြားအသိအကျွမ်းများကို ဝေငှပါ။ သင်နှင့်တွေ့ဆုံသည့် ဘုရားသခင့်တည်ရှိမှုနှင့်ပတ်သက်၍ သံသယဝင်သူများကိုဝေငှနိုင်ရန် ယင်းစာအုပ်ကို ဓမ္မအမှုတွင် သင်နှင့်တစ်ပါတည်းယူသွားပါ။ ဤစာအုပ်နှင့်ပို၍အကျွမ်းတဝင်ရှိလေ ကျွန်ုပ်တို့၏ ဖန်ဆင်းရှင်ကိုချစ်သည့်မေတ္တာသည် ပို၍သန်စွမ်းလေဖြစ်ပြီး ကိုယ်တော်၏မြင့်မြတ်သောစံနှုန်းများနှင့်အညီ ဆက်လက်လျှောက်လှမ်းရန် လှုံ့ဆော်ပေးသည်။—ဧ. ၅:၁; ဗျာ. ၄:၁၁။