ခရစ်တော်၏သေခြင်းဆိုင်ရာ အထိမ်းအမှတ်ပွဲကိုကမ္ဘာချီကျင်းပခြင်း

^၁ ယေဟောဝါသည် ကျွန်ုပ်တို့အား လက်ဆောင်မြောက်မြားစွာကို အလျှံပယ်ပေးထားသည်။ ကိုယ်တော်၏ကောင်းမြတ်ခြင်းနှင့် ချစ်ခင်ကြင်နာခြင်းရှိရှိသမျှကို “ကိုယ်တော်၏ မဖော်ပြနိုင်လောက်သော အခမဲ့လက်ဆောင်” ဟူ၍ ကွက်ကွက်ကွင်းကွင်းဖော်ပြထားသည်။ မှန်ပါသည်၊ “ဘုရားသခင်၏မခံစားထိုက်သောကြင်နာမှု” သည်အလွန်အံ့ဖွယ်ကောင်းကာ ကျွန်ုပ်တို့၏ဖော်ပြနိုင်စွမ်းထက် သာလွန်ပါသည်။—၂ ကော. ၉:၁၄၊ ၁၅၊ ကဘ။

^၂ ကိုယ်တော်၏အကြီးမားဆုံးလက်ဆောင်– လူသားတို့၏ရွေးနုတ်ရှင်အနေနှင့် ယေရှုခရစ်သည် လက်ဆောင်အားလုံးတွင် အကြီးမားဆုံးလက်ဆောင်ဖြစ်သည်။ လူသားလောကအပေါ် ကိုယ်တော်၏ကြီးမားသောမေတ္တာကိုပြရာတွင် ယေဟောဝါသည် မိမိချစ်မြတ်နိုးသည့် တစ်ပါးတည်းသောသားတော်ကို စွန့်တော်မူခဲ့သည်။ (ယော. ၃:၁၆) ဘုရားသခင်ထံမှမခံစားထိုက်သည့် ထိုကဲ့သို့သောကောင်းချီးအတွက် ကမ္ဘာချီအထိမ်းအမှတ်ပွဲကိုကျင်းပထိုက်သည်။ မည်သည့်အချိန်တွင်နှင့် မည်သို့အားဖြင့်နည်း။ ကမ္ဘာတစ်ဝန်းရှိခရစ်ယာန်များသည် စွန့်လွှတ်သမျှတို့တွင်အကြီးမားဆုံးသောစွန့်လွှတ်မှုဆိုင်ရာ သတိရအောက်မေ့ပွဲကိုကျင်းပသည့်အနေဖြင့် ၁၉၉၉၊ ဧပြီ ၁ ရက်၊ ကြာသပတေးညနေတွင် သခင့်ညစာစားပွဲကို ကျင်းပကြမည်ဖြစ်သည်။—၁ ကော. ၁၁:၂၀၊ ၂၃-၂၆။

^၃ ‘ကျွန်ုပ်တို့သည် အပြစ်သားဖြစ်နေစဉ်’ ပင်ခရစ်တော်သည် ကျွန်ုပ်တို့အတွက် အသေခံခဲ့ရာ ကိုယ်တော်၏သေခြင်းဆိုင်ရာ သတိရအောက်မေ့ပွဲကိုကျင်းပခြင်း၊ ဤအရေးကြီးသောအခါသမယတွင် ကျွန်ုပ်တို့နှင့်အတူတက်ရောက်ရန် အခြားသူများကိုဖိတ်ခေါ်ခြင်းတို့ဖြင့် ကျွန်ုပ်တို့တစ်ဦးစီကျေးဇူးတင်ကြောင်း တင်ပြနိုင်သည်။—ရော. ၅:၈။

^၄ အရေးအကြီးဆုံးဖြစ်ရပ်– ခရစ်တော်၏သေခြင်းဆိုင်ရာ အထိမ်းအမှတ်ပွဲကျင်းပခြင်းက ကိုယ်တော်သည် ဘုရားသခင်၏အချုပ်အခြာအာဏာကို ခြွင်းချက်မရှိထောက်ခံကြောင်း အဓိကပေါ်လွင်စေသည်။ ယေရှု၏ပူဇော်သကာကို ယုံကြည်ကြောင်းတင်ပြခြင်းဖြင့် ယေဟောဝါရှေ့မှောက်တွင် သန့်ရှင်းသောအနေအထားကိုရရှိကာ ဤသို့ဖြင့် ကယ်တင်ခြင်းရရန် သေချာစေနိုင်ကြောင်းကိုလည်း ကျွန်ုပ်တို့အား ပြန်အမှတ်ရစေသည်။ (တ. ၄:၁၂) မှန်ပါသည်၊ ၎င်းသည် နှစ်၏အရေးအကြီးဆုံးဖြစ်ရပ်ဖြစ်သည်!

^၅ သခင့်ညစာစားပွဲကို ကျွန်ုပ်တို့နှင့်အတူကျင်းပရန် ဖိတ်ခေါ်ခြင်းဖြင့် အိမ်နီးချင်းများအပေါ်ချစ်သည့်မေတ္တာကို ကျွန်ုပ်တို့တင်ပြကြသည်။ ယင်း၏ထူးမြတ်လှသောတန်ဖိုးကို သိရှိသူသန်းပေါင်းများစွာအတွက် ရွေးနုတ်ဖိုး၏အကျိုးကျေးဇူးများသည် ဆက်လက်တည်ရှိနေပါသည်။ (ဖိ. ၃:၈-၁၀) ခရစ်တော်၏ပူဇော်သကာကို ယုံကြည်ကြောင်းတင်ပြသူများသည် ခိုင်မြဲသောထာဝရအသက်မျှော်လင့်ချက်ကိုရရှိနိုင်ပါသည်။—ယော. ၁၇:၃။

^၆ သတိရအောက်မေ့ပွဲအချိန်အခါက သာလွန်ထူးကဲသည့် ဘုရားသခင်၏မခံစားထိုက်သောကြင်နာမှုကို လေးမြတ်ကြောင်းပြရန် ကျွန်ုပ်တို့အတွက် အထူးအခွင့်အလမ်းများကိုပေးပါသည်။ ယင်းအချိန်အခါသည် ဘုရားသခင့်နိုင်ငံတော်သတင်းကောင်းကို ဟောပြောရာတွင် ဇွဲနပဲဖြင့်ပါဝင်ရန် အလွန်ကောင်းသောအချိန်ဖြစ်သည်။ ယေဟောဝါ၏မဖော်ပြနိုင်လောက်သော အခမဲ့လက်ဆောင်နှင့်စပ်လျဉ်း၍ အလေးအနက်ဆုတောင်းသုံးသပ်ကာ ဤနှစ်သခင့်ညစာစားပွဲတွင် တက်ရောက်ရန်စီစဉ်သူအားလုံးကို ကြီးမားသောအကျိုးကျေးဇူးများက အသင့်စောင့်ကြိုနေပါသည်!