ဆေးဝါးများ

အဓိပ္ပာယ်သတ်မှတ်ချက်– “ဆေးဝါး” ဟူသောစကားလုံး၏ဖွင့်ဆိုချက်အများအပြားရှိသည်။ ယခုဆွေးနွေးခန်း၌ ဆေးဝါးသည် ဆေးအဖြစ်သုံးရန်မလိုသော်လည်း ဘဝပြဿနာများကိုမေ့ပျောက်ပြီး အိပ်မက်ဆန်ဆန်ခံစားချက်၊ စိတ်စည်းစိမ် သို့မဟုတ် စိတ်အားတက်ကြွမှုခံစားနိုင်ရန်အသုံးပြုသော၊ အစာမဟုတ်သောပစ္စည်းကိုဆိုလိုသည်။

မူးယစ်ဆေးများအပျော်သုံးခြင်းကို သမ္မာကျမ်းစာတကယ်ပင်တားမြစ်သလော

သမ္မာကျမ်းစာ၌ဘိန်းဖြူ၊ ကိုကင်း၊ အယ်လ်အက်စ်ဒီ၊ ပီစီပီ (နတ်မှုန့်)၊ ဆေးခြောက်၊ ဆေးလိပ် စသည့်အမည်များကိုမတွေ့ရပါ။ သို့သော် ဘုရားသခင့်စိတ်တော်နှင့်တွေ့နိုင်ရန် ဘာကိုလုပ်ပြီး ဘာကိုရှောင်ရမည်နှင့်ပတ်သက်၍လိုအပ်သောစည်းမျဉ်းများကိုမူချမှတ်ထားပေသည်။ သေနတ်ကိုသုံး၍လူကိုမသတ်ရဟု မဆိုထားသော်လည်း လူမသတ်ရဟုပညတ်ထားသည့်နည်းတူပင်။

လု. ၁၀:၂၅-၂၇– “‘ထာဝရအသက်ကိုအမွေခံရအံ့သောငှာ အကျွန်ုပ်သည်အဘယ်အမှုကိုပြုရပါမည်နည်း။’ . . . ‘“သင်၏ဘုရားသခင်ထာဝရဘုရားကို စိတ်နှလုံးအကြွင်းမဲ့၊ [“စိုးလ်အကြွင်းမဲ့၊” ကဘ] အစွမ်းသတ္တိရှိသမျှ၊ ဉာဏ်ရှိသမျှနှင့်ချစ်လော့။ ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့။”’” (လူသည် မလိုအပ်ဘဲနှင့်မိမိအသက်ကိုတိုအောင်၊ မိမိ၏စိတ်ကိုမှုန်ဝါးဝါးဖြစ်အောင်လုပ်လျှင် ဘုရားသခင်ကို စိုးလ်အကြွင်းမဲ့၊ စိတ်အကြွင်းမဲ့ဖြင့်ချစ်ရာရောက်မည်လော။ မိမိ၏မူးယစ်ဆေးစွဲအကျင့်ကိုရှင်သန်လျက်နေစေရန် သူ့ဥစ္စာကိုခိုးလျှင် သူတစ်ပါးကိုချစ်ရာရောက်မည်လော။)

၂ ကော. ၇:၁– “ချစ်သူတို့၊ [ယေဟောဝါကို ကျွန်ုပ်တို့၏ဘုရားသခင်နှင့်အဘအဖြစ် ပိုင်ဆိုင်နိုင်မည်ဟူသော] ထိုကတိတော်များနှင့်ငါတို့သည်ဆိုင်ကြသည်ဖြစ်၍ ကိုယ်ခန္ဓာ၏အညစ်အကြေး၊စိတ်ဝိညာဉ်၏အညစ်အကြေးရှိသမျှတို့နှင့်ကိုယ်ကိုကိုယ်ကင်းစင်စေလျက် ဘုရားသခင်ကိုကြောက်ရွံ့၍ သန့်ရှင်းခြင်းပါရမီနှင့်ပြည့်စုံကြကုန်အံ့။” (ကျွန်ုပ်တို့၏ကိုယ်ခန္ဓာကို တမင်ညစ်ညူးအောင်လုပ်လျှင် ဘုရားသခင့်စိတ်တော်နှင့်တွေ့ဖို့မျှော်လင့်နိုင်မည်လော။)

တိ. ၂:၁၁-၁၃၊ သက– “ထာဝရဘုရားသည် လူသားအပေါင်းတို့အား မိမိ၏ကယ်တင်ခြင်းကျေးဇူးတော်ကို ပေါ်လွင်ထင်ရှားစေတော်မူလေပြီ။ ငါတို့သည် . . . ဘုရားမဲ့တရားမဲ့ ပြုကျင့်ခြင်းနှင့်လောကတပ်မက်ခြင်းတို့ကို စွန့်ပစ်ကြရန်လည်းကောင်း၊ ဣန္ဒြေစောင့်စည်းခြင်း [“စိတ်မာချာမှု၊” ကဘ။ “ကိုယ်ကိုထိန်းချုပ်၊” JB; “ကိုယ်ကိုချုပ်တည်းလျက်နေထိုင်၊” TEV] ရိုးသားဖြောင့်မတ်ခြင်း၊ ဘုရားဝတ်၌မွေ့လျော်ခြင်းတို့ဖြင့် ဤလောက၌အသက်ရှင်ကြစေရန်လည်းကောင်း ထိုကျေးဇူးတော်က ငါတို့အားဆုံးမသွန်သင်လျက်ရှိ၏။” (မူးယစ်ဆေးဝါးသုံးစွဲမှုသည် စိတ်၏ပိုင်းဖြတ်ဉာဏ်ကိုပျက်ယွင်းဖောက်ပြန်စေ၍ လူကိုချုပ်တည်းမှုလက်လွတ်စေသည်ဖြစ်၍ အထက်သြဝါဒနှင့်ညီညွတ်သလော။)

ဂလ. ၅:၁၉-၂၁– “ဇာတိပကတိအကျင့်တို့သည် ထင်ရှားကြ၏။ ထိုအကျင့်တို့မူကား၊ . . . သူတစ်ပါးကိုပြုစားခြင်း [“စုန်းအတတ်ဖြင့်ပြုစားခြင်း၊” သက။ “နတ်ဝိဇ္ဇာအတတ်လိုက်စားခြင်း၊” ကဘ] . . . ပွဲလုပ်ခြင်း [“အပျော်ကြူးခြင်း၊” ကဘ] မှစ၍ထိုသို့သောအကျင့်ပေတည်း။ ထိုသို့သောအကျင့်ကိုကျင့်သောသူတို့သည် ဘုရားသခင်၏နိုင်ငံတော်ကိုအမွေမခံရကြ။” (“နတ်ဝိဇ္ဇာအတတ်လိုက်စားခြင်း” ဟူ၍ဘာသာပြန်သော ဂရိစကားလုံး phar·ma·kiʹa (ဖာမကီယာ) ၏ပကတိစာသားအဓိပ္ပာယ်မှာ “ဆေးခတ်ခြင်း” ဖြစ်သည်။ ဒဗ္ဗလျူ. အီး. ဗိုင်းပြုစုသော ဓမ္မသစ်ကျမ်းစကားဆိုင်ရာအဖွင့်အဘိဓာန် က ဤဂရိစကားလုံးနှင့်ပတ်သက်၍ဤသို့ဆို၏– “စုန်းအတတ်တွင်၊ သာမန်မူးယစ်ဆေးကိုဖြစ်စေ၊ ထက်မြက်သောမူးယစ်ဆေးကိုဖြစ်စေ၊ အသုံးပြုသောအခါ၊ အဆောင်၊ လက်ဖွဲ့စသည်တို့နှင့်တကွမန်းမှုတ်ခြင်း၊ နတ်ပင့်ခြင်းပြုလေ့ရှိသည်။ အသုံးပြုသူ၊ သို့မဟုတ် လူနာအား မကောင်းဆိုးဝါးရန်တန်ခိုးမှ ကင်းဝေးစေရန်ရည်သန်သည်ဆိုသော်လည်း အမှန်မှာ သုံးစွဲသူအား အောက်လမ်းအတတ်၏လျှို့ဝှက်ဆန်းကြယ်သောအင်အားတန်ခိုးကို အထင်ကြီးစေလို၍သာဖြစ်သည်။” [လန်ဒန်၊ ၁၉၄၀၊ အတွဲ ၄၊ စ. ၅၁၊ ၅၂] အလားတူ ယနေ့လည်း မူးယစ်ဆေးသုံးစွဲသူအမြောက်အမြားတို့သည် နတ်ဝိဇ္ဇာအတတ်နှင့်ပတ်သက်လေ့ရှိသည်။ သို့မဟုတ်၊ စိတ်ကိုဗလာဖြစ်အောင်ထား၍ဖြစ်စေ၊ သွေးလေချောက်ချား၍ဖြစ်စေ နတ်ဆိုးများ၏စက်ကွင်းသို့အကျလွယ်သောသူတို့နှင့်ပေါင်းဖော်တတ်သည်။ လုကာ ၁၁:၂၄-၂၆ နှင့်နှိုင်းယှဉ်ပါ။)

တိ. ၃:၁၊ သက– “တိုင်းပြည်အုပ်ချုပ်သူများနှင့်အာဏာပိုင်များ၏အုပ်စိုးခြင်းကိုဝန်ခံ [ပါ။]” (တစ်မျိုးတစ်မည်သောမူးယစ်ဆေးများကိုလက်ဝယ်ထားရှိခြင်း၊ သို့မဟုတ် သုံးစွဲခြင်းသည် ဒေသများစွာတို့၌ ဥပဒေနှင့်မကင်းချေ။)

အချို့သောမူးယစ်ဆေးများသည် လူကိုနေပျော်ထိုင်ပျော်စေနိုင်သည်ဖြစ်ရကား၊ တကယ်ပင်လူကိုဥပဒ်ပေးသလော

၂ တိ. ၃:၁-၅၊ သမ္မာ– “နောက်ဆုံးသောနေ့ရက်များ၌ ခဲယဉ်းသောကာလများဖြစ်မည်။ . . . အကြောင်းမူကား၊ လူတို့သည် . . . ဘုရားသခင်ကိုနှစ်သက်သည်ထက်ပျော်မွေ့ခြင်းကိုသာနှစ်သက်သောသူ . . . ဖြစ်ကြလိမ့်မည်။ ထိုသို့သောသူတို့ကိုရှောင်လော့။” (ဘုရားသခင့်နှုတ်ကပါဌ်တော်ပါ ဖြောင့်မတ်သောမူများကို ကျင့်သုံးခြင်းဖြင့်စိတ်တော်နှင့်တွေ့ဖို့ထက်၊ အပျော်အပါးကိုဦးစားပေးကာ ရမ္မက်တကြီး သာယာမှုကိုတောင့်တခြင်းမရှိရန် သမ္မာကျမ်းစာက ရှင်းလင်းစွာသတိပေးထားပေသည်။)

အချို့ထိုင်းမှိုင်းဆေးများသည် အနာကိုသက်သာစေပြီး တင်းတိမ်သောစိတ်ကိုဖြစ်ပေါ်စေသော်လည်း ဆေးစွဲစေနိုင်ပြီး ဆေးလွန်လျှင်သေစေနိုင်သည်။ အချို့ဖျော်ရည်များကိုရှူလျှင် စိတ်ကြွစေသော်လည်း စကားဗလုံးဗထွေးပြောခြင်း၊ အမြင်မှားခြင်း၊ကြွက်သားကိုမထိန်းချုပ်နိုင်ခြင်းအပြင်၊ ကုမရနိုင်လောက်အောင် ဦးနှောက်၊ အသည်းနှင့်ကျောက်ကပ်များပျက်စီးခြင်းဖြစ်စေနိုင်သည်။ သွေးလေချောက်ချားစေသောဆေးများသည် “နတ်နန်းစံသလို” ခံစားစေပြီး ပန်းဟိုက်မှုကို ပြယ်ပျောက်စေသယောင်ရှိသော်လည်း အနီးအဝေးဝေခွဲမရ၊ ယုတ္တိတန်တန်စဉ်းစား၍မရဖြစ်စေနိုင်သည့်ပြင် ပြန်လည်ပြုပြင်၍မရနိုင်အောင် စရိုက်ကိုပြောင်းလဲစေနိုင်သည်။ ထို့ပြင် သေကြောင်းကြံလိုသော၊ လူသတ်လိုသောစိတ်ကိုဖြစ်ပေါ်စေနိုင်သည်။

ဆေးခြောက်ကော​—ဥပဒ်ပေးတတ်သလော။ အချို့ဆရာဝန်များကပေးတတ်သည်ဆို၏

ဘားကလီမြို့ရှိ ကယ်လီဖိုးနီးယားပြည်နယ်တက္ကသိုလ် ကောင်းဝဲဆေးရုံမှ ယခင်စိတ်ရောဂါကုပညာဌာနမှူးဒေးဗစ်ပါဝယ်စင်သည် တစ်ချိန်က ဆေးခြောက်သုံးစွဲမှုကို တရားဝင်ဖြစ်စေရန် ထောက်ခံခဲ့သည်။ နောက်ပိုင်း၌ သာဓကပို၍ရရှိလာသောအခါ ဤသို့ရေးသားလိုက်သည်– “ဆေးခြောက်သည် ကျွန်ုပ်တို့ရင်ဆိုင်သတ်ပုတ်ရမည့် အန္တရာယ်အကြီးမားဆုံးသောမူးယစ်ဆေးဖြစ်ကြောင်း ယခုကျွန်ုပ်ယုံကြည်ပြီ။ ၁။ သုံးစွဲစ၌ ဘာမျှမဖြစ်သလိုပင်။ သုံးစွဲသူသည် စည်းစိမ်တစ်မျိုးကိုခံစားရသယောင်ရှိသည်။ မိမိ၏စိတ်နှင့်ဇီဝကမ္မဖြစ်စဉ် ယိုယွင်းလျက်ရှိသည်ကို သူ့ခမျာမသိနိုင်ရှာ။ ၂။ ဆက်၍သုံးစွဲပါက ထင်မိယောင်မှားတွေးတောလာမည်။ တစ်နှစ်မှသုံးနှစ်အထိဆက်တိုက်သုံးစွဲသည့်နောက်၌ စိတ္တဇနာအတွေးက စဉ်းစားမှုအစဉ်ကိုလွှမ်းမိုးသွားလေတော့သည်။”​—စီမံခွင့်ပိုင်ကျန်းမာရေးအစီရင်ခံချက်၊ ၁၉၇၇၊ အောက်တိုဘာ၊ စ. ၈။

အမေရိကန်ပြည်၊မူးယစ်ဆေးအလွဲသုံးစွဲမှုဆိုင်ရာအမျိုးသားအဖွဲ့ ဒါရိုက်တာဟောင်း ဒေါက်တာ ရောဘတ် အယ်လ်ဒူပေါင်ကလည်း သတင်းအရ၊ ယခင်က ဆေးခြောက်အန္တရာယ်ကိုအထင်သေး၍ပြောဆိုခဲ့သော်လည်း နောက်ပိုင်း၌ အောက်ပါအတိုင်းပြောကြားခဲ့သည်– “တကယ့်ပြဿနာကြီးမှာ ဤကူးစက်ရောဂါ [သက်ငယ်ပိုင်းဆေးခြောက်သုံးစွဲမှု] ကြောင့်ဖြစ်သော ကျန်းမာရေးဆိုင်ရာဥပဒ်ပင်ဖြစ်သည်။ အနည်းဆုံး ဥပဒ်နှစ်မျိုးရှိသည်။ တစ်မျိုးမှာ၊ မူးယစ်ခြင်းဖြစ်၍ အသက်အန္တရာယ်ပြုသောကားမောင်းမှုမှသည် အရာရာတိုင်းကိုအရေးမလုပ်ခြင်းအထိအကျုံးဝင်သည်။ နောက်တစ်မျိုးမှာ ကာယဆိုင်ရာသက်သက်ဖြစ်၍ ဆေးခြောက်သုံးစွဲသူများနာတာရှည်အဆုတ်ပြွန်ရောင်ရမ်းနာဖြစ်လေ့ရှိခြင်းမှစ၍ ဟော်မုန်းဆိုင်ရာဥပဒ်ဖြစ်စေနိုင်သော အကျိုးသက်ရောက်မှုများ၊ ရောဂါပြီးအဖွဲ့အပေါ်သက်ရောက်သောအကျိုးများသာမက ကင်ဆာဖြစ်စေနိုင်သော ကြီးမားသည့်အလားအလာအထိ စိုးရိမ်ဖွယ်နယ်ပယ်ကျယ်ဝန်းလှသည်။​—မွန်ထရီအော်မြို့ထုတ် အစိုးရပြန်တမ်း၊ ၁၉၇၉၊ မတ်လ ၂၂၊ စ. ၉။

သိပ္ပံအကျဉ်းချုပ်က အောက်ပါအသေးစိတ်အချက်များတင်ပြလိုက်သည်– “ဆေးခြောက်မှန်မှန်ရှူလျှင် မှတ်ဉာဏ်၊ စိတ်လှုပ်ရှားမှုနှင့်အပြုအမူစသော အလွန်အရေးပါသောလုပ်ဆောင်ချက်များအတွက်လိုအပ်သော နဗ်ကြောဆုံးများသည် တစ်ခုနှင့်တစ်ခု အလှမ်းဝေးသွားနိုင်သည်။ နဗ်ကြောချင်းဆက်သွယ်မှုရှိမှသာ မိမိတို့အလုပ်ကိုမိမိတို့လုပ်ဆောင်ကြမည်ဖြစ်သည်။” ထိုဆောင်းပါးက ဆက်လက်၍ တိရစ္ဆာန်များအပေါ်စမ်းသပ်ရာမှ ရရှိသောရလဒ်များအကြောင်းကို ဤသို့တင်ပြလိုက်သည်– “အသိသာဆုံးအကျိုးသက်ရောက်မှုကို စိတ်လှုပ်ရှားမှုဆိုင်ရာ အကန့်နယ်ပယ်တွင်လည်းကောင်း၊ မှတ်ဉာဏ်ဖြစ်ပေါ်ခြင်းဆိုင်ရာ ဟစ်ပိုကင်းပတ်၌လည်းကောင်း၊ အချို့သောအပြုအမူဆိုင်ရာလုပ်ဆောင်ချက်များကိုတာဝန်ယူသော အမစ်ဒါလာ၌လည်းကောင်းတွေ့နိုင်သည်။”​—၁၉၈၁၊ မတ်လ၊ စ. ၁၀၄။

ဆေးခြောက်သုံးစွဲခြင်းသည် အရက်သောက်ခြင်းထက်ပို၍ဆိုးသလော

အရက်သည် အစာတစ်မျိုးဖြစ်ပြီး ကိုယ်ခန္ဓာက ဓာတ်ပြောင်း၍စွမ်းအားဖြစ်စေပြီး အဆုံးဒြပ်ကိုစွန့်ထုတ်သည်။ သို့သော်၊ စိတ်ဆေးဝါးဗေဒပညာရှင်တစ်ဦးက ဤသို့ဆို၏– “ဆေးခြောက်သည် အလွန်ပြင်းသောဆေးဝါးဖြစ်ပြီး ကျွန်ုပ်တို့၏အကြီးဆုံးအမှားမှာ ၎င်းကိုအရက်နှင့်နှိုင်းခြင်းပင်တည်း။ မော်လီကျူးချင်းယှဉ်လျှင်၊ [ဆေးခြောက်ထဲမှ] THC သည် ယစ်မူးစေနိုင်စွမ်းတွင် အရက်ထက် အဆ ၁၀,၀၀၀ ပို၍ ပြင်းသည်။ . . . ကိုယ်ခန္ဓာသည် THC ကိုဖယ်ထုတ်ရာ၌နှေးကွေး၏။ လပေါင်းများစွာကြာမှ ၎င်း၏အာနိသင်နှင့်လွတ်ကင်းနိုင်သည်။ (စီမံခွင့်ပိုင်ကျန်းမာရေးအစီရင်ခံချက်၊ ၁၉၇၇၊ အောက်တိုဘာ၊ စ. ၃) ဖန်ဆင်းရှင်သည် ကျွန်ုပ်တို့၏ဆောက်တည်ပုံကို ကောင်းစွာနားလည်၏။ နှုတ်ကပါဌ်တော်က အရက်ကိုသင့်တော်သလောက် သောက်သုံးခွင့်ပြုတော်မူပေသည်။ (ဆာ. ၁၀၄:၁၅; ၁ တိ. ၅:၂၃) သို့ရာတွင် စားကြူးခြင်းကိုပြစ်တင်သကဲ့သို့ အရက်သောက်ကြူးခြင်းကိုလည်း အပြင်းအထန်ရှုတ်ချတော်မူသည်။​—သု. ၂၃:၂၀၊ ၂၁; ၁ ကော. ၆:၉၊ ၁၀။

ယေဟောဝါသက်သေများက ဆေးလိပ်သောက်ခြင်းကို ကြီးလေးသောအပြစ်အဖြစ် အဘယ်ကြောင့်ယူမှတ်ကြသနည်း

အသက်ဆုကျေးဇူးကိုမလေးစားရာရောက်သောကြောင့်

တ. ၁၇:၂၄၊ ၂၅– “လောကဓာတ်မှစ၍ . . . ရှိသမျှသောအရာတို့ကိုဖန်ဆင်းတော်မူသောဘုရားသခင်သည် . . . ခပ်သိမ်းသောသူတို့အား ဇီဝအသက်နှင့်တကွထွက်သက်ဝင်သက်မှစ၍ ခပ်သိမ်းသောအရာတို့ကိုပေးတော်မူ [၏။]”

စီးကရက်သည် အသက်တိုစေနိုင်သည်မှာ အထောက်အထားပြည့်လျှံလျက်နေသည်။ ၎င်း၏အကျိုးနှင့်အကြောင်းဆက်သွယ်မှုမှာလည်း ဆေးဝါးလောကထဲမှ မည်သည့်အရာကဲ့သို့မဆို ခိုင်လုံသည်။”​—သိပ္ပံ ၈၀၊ စက်တင်ဘာ/အောက်တိုဘာ၊ စ. ၄၂။

အစီရင်ခံချက်များအရ၊ ဆေးလိပ်သောက်၍ နှစ်စဉ်သေဆုံးသူဦးရေသည် အမေရိကန်ပြည်၌ ၃၀၀,၀၀၀၊ ဗြိတိန်နိုင်ငံ၌ ၅၀,၀၀၀၊ ကနေဒါ၌ ၅၀,၀၀၀ တွက်ချက်ရရှိကြောင်းသိရသည်။ ဆေးလိပ်သောက်ခြင်းနှင့်ဆက်နွှယ်သောရောဂါကြောင့် နှစ်စဉ်လူတစ်သန်းမကသေဆုံးလျက်ရှိသည်။ ကမ္ဘာတစ်ဝန်း ဆေးလိပ်သုံးစွဲမှု၏ ၅၂ ရာနှုန်းဝင်သော ဖွံ့ဖြိုးဆဲနိုင်ငံများသည် သေနှုန်းအချိုးအဆ၌ အရှိန်အဟုန်ဖြင့်ကြီးထွားလျက်နေသည်။”​—ဂျာနယ် (တိုရန်တိုမြို့)၊ ၁၉၈၃၊စက်တင်ဘာ ၁၊ စ. ၁၆။

အမေရိကန်ပြည်၊ ကျန်းမာရေး၊ ပညာရေးနှင့်လူမှုဖူလုံရေးဆိုင်ရာအတွင်းရေးမှူးဟောင်း ဂျိုးဇက် ကယ်လီဖာနို ဤသို့ပြောကြားခဲ့သည်– “ဆေးလိပ်သောက်ခြင်းသည် ကိုယ်ကိုတစ်စစသတ်ခြင်းဖြစ်သည်မှာ ယနေ့ ယုံမှားသံသယမရှိ။”​—သုခမိန်သိပ္ပံလောက၊ ၁၉၈၀၊ စက်တင်ဘာ ၁၊ စ. ၁၆။

ခရစ်ယာန်များဘုရားသခင်အားပေးရမည့် ဘုရားသခင်တောင်းဆိုသောအရာနှင့်မလိုက်ဖက်သောကြောင့်

ရော. ၁၂:၁၊ သက– “သို့ဖြစ်၍ညီအစ်ကိုတို့၊ ထာဝရဘုရားသည် ငါတို့အား လွန်စွာကရုဏာထားတော်မူသောကြောင့် ကိုယ်တော်အမှုတော်ကိုဆောင်ရွက်ရန်နှင့် ကိုယ်တော်နှစ်သက်သောသက်ရှိယဇ်ကောင်သဖွယ်ဖြစ်ရန် သင်တို့၏ကိုယ်ကိုဆက်ကပ်ပူဇော်ကြလော့ဟု ငါတိုက်တွန်းနှိုးဆော်ပါ၏။ သို့မှသာလျှင် သင်တို့သည် ကိုယ်တော်အား မှန်ကန်စွာဝတ်ပြုကိုးကွယ်နိုင်ကြမည်။”

အမေရိကန်ပြည်၏ပြည်သူ့ကျန်းမာရေးဌာနဆေးမှူးချုပ် စီ. အဲဗရက် ကူ့က ဤသို့ဆိုသည်– “စီးကရက်သောက်ခြင်းသည် ကျွန်ုပ်တို့၏လူ့အဖွဲ့အစည်းအတွင်း လူကိုသေစေသောအကြောင်းတစ်ရပ်ဖြစ်သော်လည်း တားဆီး၍ရနိုင်ကြောင်း သိသာထင်ရှားပါသည်။” (နယူးယောက်တိုင်းမ်စ်၊ ၁၉၈၂၊ ဖေဖော်ဝါရီ ၂၃၊ စ. အေ ၁) ”ဆေးဝါးသုတေသနပြုချက်အရ၊ . . . ဆေးလိပ်သောက်သူ၏ပျမ်းမျှသက်တမ်းသည် မသောက်သူ၏သက်တမ်းထက် သုံးလေးနှစ်ခန့် ပို၍တိုသည်။ ဆေးလိပ်ချိုးကပ်သူ​—တစ်ရက်အနည်းဆုံးနှစ်ဘူးသောက်သူ​—ဖြစ်လျှင် ရှစ်နှစ်ပို၍တိုဖွယ်ရှိသည်။ (ကမ္ဘာ့စာအုပ်စွယ်စုံကျမ်း၊ ၁၉၈၄၊ အတွဲ ၁၇၊ စ. ၄၃၀) လူသည် မိမိဘဝကို ဘုရားသခင့်အတွက်အပ်နှံပြီးနောက် ဘဝကိုတစ်စစဖျက်ဆီးလျှင်သင့်တော်မည်လော။

“ဆေးလိပ်သောက်ခြင်းသည် အထူးသဖြင့် နှလုံးနှင့်အဆုတ်ကိုဖျက်ဆီးနိုင်လွန်းသဖြင့် လူတစ်ယောက် ဆေးလိပ်သောက်လျှင် ရောဂါကာကွယ်မှု၏အခြားကဏ္ဍပိုင်းများသည် အဓိပ္ပာယ်မရှိသလောက်ဖြစ်သွားသည်။” (တောင်ပိုင်းကယ်လီဖိုးနီးယားပြည်နယ် တက္ကသိုလ်သတင်းဌာန၊ ၁၉၈၂၊ ဖေဖော်ဝါရီ ၁၈) “ဆေးလိပ်သောက်ခြင်းသည် ကမ္ဘာ့ကျန်းမာရေးချို့တဲ့မှု၏အဓိက တစ်ပင်တိုင်တရားခံဖြစ်သော်လည်း တားဆီး၍ရနိုင်သောအကြောင်းဖြစ်သည်။” (၁၉၈၀၊ ဖေဖော်ဝါရီ/မတ်ထုတ် ကမ္ဘာ့ကျန်းမာရေး၊ စ. ၃ ပါ ကမ္ဘာ့ကျန်းမာရေးအဖွဲ့ အထွေထွေညွှန်ကြားရေးမှူး ဒေါက်တာ အိပ်ချ်မားလာ) လူတစ်ယောက် မိမိကိုယ်ကို ဘုရားသခင့်အမှုတော်မြတ်ထမ်းရွက်ရန်ဆက်သပြီးမှ မိမိကျန်းမာရေးကိုတမင်ဖျက်ဆီးလျှင် ရှေ့နောက်ညီသလော။

ဆေးလိပ်သောက်ခြင်းသည် ကိုယ်နှင့်စပ်ဆိုင်သူကိုချစ်ရမည်ဟူသော ဘုရားသခင့်တောင်းဆိုချက်ကို ချိုးဖောက်၏

ယာ. ၂:၈– “ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့။”​—မဿဲ ၇:၁၂ နှင့်နှိုင်းယှဉ်။

“မကြာမီကသုတေသနပြုချက်အရ၊ . . . ဆေးလိပ်မသောက်သောဇနီးများသည် ဆေးလိပ်သောက်သောခင်ပွန်းကြောင့် ဆေးလိပ်မသောက်သောယောက်ျားများ၏ဇနီးများထက် ပျမ်းမျှလေးနှစ်အသက်တို၏။” (နယူးယောက်တိုင်းမ်စ်၊ ၁၉၇၈၊ နိုဝင်ဘာ ၂၂၊ စ. စီ ၅) “ကိုယ်ဝန်ဆောင်စဉ်ဆေးလိပ်သောက်လျှင် သန္ဓေသားအင်္ဂါချို့တဲ့မှုမည်မျှတိုင်ပြင်းထန်သနည်းဟူမူ၊ ကလေးသည် သန္ဓေသားဘဝတွင်သေလျှင်သေ၊ မသေလျှင်တောင်မွေးပြီးနောက်မကြာမီသေဆုံးရရှာသည်။” (မိသားစုကျန်းမာရေး၊ ၁၉၇၉၊ မေလ၊ စ. ၈) အိမ်သားများအပေါ်ထိုသို့ပြုသည်မှာ ခရစ်ယာန်မပီသကြောင်းသိသာလှ၏။​—၁ တိ. ၅:၈။

“သုတေသနပြုချက်အရ၊ သာမန်ဆေးလိပ်သောက်သူတစ်ယောက် တကယ်ဆေးလိပ်သောက်သောအချိန်မှာ မီးညှိထားသောအချိန်၏သေးငယ်သောအပိုင်းလောက်သာရှိတတ်ရာ၊ ဆေးလိပ်မသောက်သူသည် မိမိဘေးဘက်ရှိ သောက်သူနှင့်အမျှ၊ ကာဗွန်မိုနိုအောက်ဆိုဒ်၊ ကတ္တရာစေးနှင့်နစ်ကိုတင်းကို မရှူချင်ဘဲရှူရှိုက်ရဖွယ်ရှိသည်။” (ယနေ့ကျန်းမာရေး၊ ၁၉၇၂၊ ဧပြီ၊ စ. ၃၉) လူချင်းပေါ် ဤမျှတိုင်မေတ္တာမဲ့သောသူသည် ဘုရားသခင်ကိုချစ်ကြောင်းလည်း သက်သေမပြချေ။​—၁ ယောဟန် ၄:၂၀ ကိုရှု။

မူးယစ်ဆေးများကိုမသုံးသင့်လျှင် ၎င်းတို့ကိုထုတ်လုပ်နိုင်သောအပင်များကို ဘုရားသခင် အဘယ်ကြောင့်ဖန်ဆင်းခဲ့သနည်း

လူတို့အလွဲသုံးသောပစ္စည်းများသည် အသုံးကျသောအပိုင်းလည်းရှိတတ်သည်။ လူ့မျိုးပွားခြင်းသတ္တိသည် သာဓကတစ်ရပ်ဖြစ်၏။ ဝိုင်အရက်လည်းထို့အတူပင်။ ဆေးခြောက်ကို ပိုက်ဆံလျှော်ပင်၏ရွက်ခြောက်နှင့် ပန်းပွင့်များမှထုတ်လုပ်သည်။ သို့ရာတွင် ပိုက်ဆံလျှော်မှ ကြိုးနှင့်ပိတ်များပြုလုပ်နိုင်သောလျှော်မျှင်ကိုရယူနိုင်ပေသည်။ ဆေးလိပ်သောက်သူများအလွဲသုံးသော ဆေးရွက်မှလည်း ပိုးသတ်ဆေးနှင့် အင်းဆက်ပိုးသတ်ဆေးများထုတ်လုပ်နိုင်သည်။ ကမ္ဘာ့သယံဇာတများကို အကျိုးရှိရှိမည်သို့အသုံးချနိုင်သည်နှင့်ပတ်သက်၍ လေ့လာသင်အံစရာများစွာရှိသေးသည်။ ပေါင်းပင်များပင်လျှင် ရေတိုက်စားမှုကာကွယ်ရာ၌လည်းကောင်း၊ လယ်မြေမထွန်ယက်သောအခါ မြေငွေ့ပြန်ထိန်းပစ္စည်းအဖြစ်လည်းကောင်း အသုံးဝင်ပေသည်။

ဆေးလိပ်နှင့်မူးယစ်ဆေးဖြတ်ဖို့ကြိုးစားသော်လည်း မအောင်မြင်ခဲ့လျှင် မည်သို့ပြုနိုင်သနည်း

ရှေးဦးစွာသမ္မာကျမ်းစာလေ့လာမှုနှင့် အလေးအနက်ဆင်ခြင်မှုဖြင့် ဘုရားသခင့်စိတ်တော်ကို ရွှင်လန်းစေလိုသောဆန္ဒ၊ ကိုယ်တော့်ဖြောင့်မတ်သောစနစ်သစ်တွင်နေထိုင်လိုသောပြင်းပြသည့်ဆန္ဒတို့ကို မွေးမြူရန်လိုသည်။ အထံတော်သို့ချည်းကပ်လျှင် သင့်ထံချည်းကပ်တော်မူမည်။ သင့်အား လိုအပ်သောအကူအညီပေးတော်မူမည်။​—ယာ. ၄:၈။

ထိုအကျင့်စွဲများ မည်မျှဆိုးရွားကြောင်း တထစ်ချယုံကြည်ပြီး ၎င်းတို့ကိုတကယ်မုန်းတီးသောစိတ် မွေးမြူရန်အရေးကြီး၏။ (ဆာ. ၉၇:၁၀) ဤအပိုင်းမှအချက်အလက်များကို ပြန်လည်သုံးသပ်ပါက ထိုမုန်းတီးစိတ်ကိုမွေးမြူနိုင်မည်။ ထို့ပြင် ထိုအကျင့်စွဲများမှခံစားရသော တဒင်္ဂသာယာမှုအစား ဘုရားသခင်နှစ်သက်သောအရာများကိုလည်းကောင်း၊ ထိုအကျင့်ဆိုးများ၏ စက်ဆုပ်ဖွယ်ဆိုးကျိုးများကိုလည်းကောင်း တွေးတောဆင်ခြင်ရမည်။

ဆေးလိပ် သို့မဟုတ် မူးယစ်ဆေးသုံးစွဲလိုသောဆန္ဒပြင်းပြလျှင် ဘုရားသခင်မစပါရန် ထက်သန်စွာဆုတောင်းပါ။ (လု. ၁၁:၉၊ ၁၃; ဖိလိပ္ပိ ၄:၁၃ နှင့်နှိုင်းယှဉ်။) ချက်ချင်းဆုတောင်းပါ။ ကျမ်းစာကိုထုတ်ပြီး ကျယ်လောင်စွာဖတ်ပါ။ သို့မဟုတ် ရင့်ကျက်သောခရစ်ယာန်တစ်ဦးနှင့် ဆက်သွယ်ပါ။ သူ့အား အဖြစ်အပျက်ကိုပြောပြပြီးအကူအညီယူပါ။