သင်အံမှုများစရန် တောင်းဆို ဘရိုရှာကို သင် အသုံးပြုနေသလော

^၁ စိတ်ဝင်စားသူတစ်ဦးနှင့် တိုတုတ်သော်လည်း ပုံမှန်နှင့် စနစ်တကျ ကျမ်းစာဆွေးနွေးမှုများပြုလုပ်ကာ အကြံပြုထားသည့်စာပေများအနက် တစ်ခုတွင်ပါသည့် အကြောင်းအရာကို သုံးသပ်မည်ဆိုလျှင် သင်သည် ကျမ်းစာသင်အံမှုတစ်ခုကျင်းပနေကြောင်း သဘောပေါက်ပါသလော။ မှန်ပါသည်၊ သင်အံမှုကို တံခါးဝတွင် သို့မဟုတ် တယ်လီဖုန်းဖြင့်ပြုလုပ်လျှင်ပင် ယင်းကို ကျမ်းစာသင်အံမှုတစ်ခုဟု ယူမှတ်ရသည်။ တောင်းဆို ဘရိုရှာကိုအသုံးပြု၍ ထိုသို့သောသင်အံမှုတစ်ခုစရန် မေလနှင့် ဇွန်လအတွင်း အထူးကြိုးစားကြပါလေ။

^၂ အောင်မြင်မှုရရန်ပြင်ဆင်ပါ– တောင်းဆို ဘရိုရှာကိုဝေငှသည့်အခါ သင်ဆွေးနွေးလိုသည့်အရာကို စဉ်းစားထားပါ။ သင်သည် ပြန်လည်ပတ်မှုပြုလုပ်မည်ဆိုလျှင် ဦးဆုံးအကြိမ်သွားခဲ့စဉ်က ပြောခဲ့သည့်စကားကို စဉ်းစားပါ။ ‘အဲဒီဆွေးနွေးခန်းကို ဆက်ဆွေးနွေးပြီးတော့ ကျမ်းစာသင်အံမှုတစ်ခုအဖြစ်ဦးတည်ဖို့ ဘရိုရှာမှာပါတဲ့ ဘယ်အပိုဒ်တွေကို ငါအထူးအာရုံစိုက်နိုင်သလဲ’ ဟူ၍သင့်ကိုယ်သင်မေးပါ။ သင်သည် တစ်အိမ်မှတစ်အိမ်သွားနေပါက မည်သည့်အကြောင်းအရာများသည် ဆယ်ကျော်သက်တစ်ဦး၊ သက်ကြီးရွယ်အိုတစ်ဦး၊ အမျိုးသားတစ်ဦး သို့မဟုတ် အမျိုးသမီးတစ်ဦးအတွက် နှစ်သက်စရာဖြစ်စေမည်ကို သုံးသပ်ပါ။ ဘရိုရှာ၏အဓိကအကြောင်းအရာများကို သုံးသပ်ကာ စိတ်ဝင်စားစရာအကြောင်းတစ်ခုကိုရွေးပါ။ ချဉ်းကပ်နည်းတစ်ခုကို ဆုံးဖြတ်ပြီးနောက် အကြိမ်ကြိမ်လေ့ကျင့်ပါ။ ယင်းကား အောင်မြင်မှုရရန်သော့ချက်များမှ တစ်ခုဖြစ်သည်။

^၃ ဇန်နဝါရီ ၂၀၀၂ ကျွန်ုပ်တို့၏နိုင်ငံတော်ဓမ္မအမှု ကြားညှပ်က “တောင်းဆို ဘရိုရှာတင်ဆက်နည်းအတွက် အကြံပြုချက်” ရှစ်ခုပေးထားသည်။ “တိုက်ရိုက်ချဉ်းကပ်နည်း” လေးထောင့်ကွက်က သင်အံမှုများစရန် ဘရိုရှာအသုံးပြုပုံကို ဖော်ပြသည်။ သင်သည် ပထမအကြံပြုချက်ကို အောက်ပါအတိုင်း ပြုပြင်ပြောင်းလဲနိုင်သည်–

◼ “မိနစ်အနည်းငယ်အတွင်းမှာ အရေးကြီးတဲ့ကျမ်းစာမေးခွန်းတစ်ခုရဲ့အဖြေကို ရနိုင်တယ်ဆိုတာ မိတ်ဆွေသိပါသလား။ ဥပမာအနေနဲ့ ခရစ်ယာန်လို့အမည်ခံတဲ့ ဘာသာအမြောက်အမြား ဘာကြောင့်ရှိရသလဲ ဆိုတဲ့မေးခွန်းမျိုးပေါ့။ အဲဒီအကြောင်းကို မိတ်ဆွေစဉ်းစားဖူးသလား။” ထိုသူတုံ့ပြန်ပြီးနောက် သင်ခန်းစာ ၁၃ ကိုဖွင့်ကာ ပထမနှစ်ပိုဒ်ကိုဆွေးနွေးပါ။ အချိန်ရသရွေ့ ကျမ်းချက်တစ်ချက်နှစ်ချက် ဖတ်ပြီးဆွေးနွေးပါ။ ထို့နောက် စာမျက်နှာအပေါ်ဘက်တွင်ရှိသည့် နောက်ဆုံးမေးခွန်းကိုဖတ်ကာ ဤသို့ပြောပါ– “သင်ခန်းစာရဲ့ကျန်အပိုင်းက စစ်မှန်တဲ့ဘာသာကို ခွဲခြားသိမြင်စေတဲ့ အမှတ်အသားငါးခုကို ပေါ်လွင်စေပါတယ်။ ကျွန်တော်ပြန်လာပြီး အဲဒါတွေကို မိတ်ဆွေနဲ့အတူ သုံးသပ်ချင်တယ်။”

^၄ စွဲစွဲမြဲမြဲရှိပါ– တောင်းဆို ဘရိုရှာဖြင့် ကျမ်းစာသင်အံမှုလုပ်ပြရန် အခွင့်အရေးတိုင်းကို အသုံးချပါ။ ယေဟောဝါ၏ကောင်းချီးကို တောင်းခံပါ။ (မ. ၂၁:၂၂) စွဲစွဲမြဲမြဲကြိုးပမ်းအားထုတ်ခြင်းဖြင့် သင်သည် သတင်းကောင်းကို တုံ့ပြန်သူတစ်စုံတစ်ဦးအား ကူညီပေးခြင်းမှ ရွှင်လန်းမှု ခံစားရပေမည်!