ကျွန်ုပ်တို့ မည်သို့ကူညီပေးနိုင်ကြသနည်း

^၁ ယေဟောဝါသက်သေများသည် ကမ္ဘာ့ဒေသအချို့တွင် ကျရောက်သည့် ကပ်ဘေးကို ကြားသိသောအခါ “ကျွန်ုပ်တို့ မည်သို့ကူညီပေးနိုင်ကြသနည်း” ဟူသော မေးခွန်းကို မေးတတ်ကြသည်။ တမန်တော် ၁၁:၂၇-၃၀ တွင်ဖော်ပြထားသည့် မှတ်တမ်းအရ ပထမရာစုရှိခရစ်ယာန်များသည် ယုဒပြည်တွင် အစာခေါင်းပါးမှုဖြစ်ခဲ့ရာ ထိုဒေသရှိညီအစ်ကိုများအတွက် ကယ်ဆယ်ရေးလုပ်ငန်းကို စီစဉ်ဖွဲ့စည်းပေးခဲ့သည်။

^၂ မျက်မှောက်ခေတ်တွင် ကျွန်ုပ်တို့၏အဖွဲ့အစည်းဆိုင်ရာ စည်းမျဉ်းအရ စေတနာ့ဝန်ထမ်းလုပ်ငန်းကို လုပ်ဆောင်ရန်နှင့် သဘာဝဘေးဒဏ်များ သို့မဟုတ် လူကြောင့်ဖြစ်ပေါ်လာသောဘေးဒဏ်များကို ခံစားနေရသူများအား လူသားချင်းစာနာမှု ထောက်ပံ့ပေးရန် ငွေကိုအသုံးပြုခွင့်ပေးထားသည်။

^၃ ဥပမာ၊ ပြီးခဲ့သည့်နှစ်က ညီအစ်ကိုများစွာသည် တောင်အာရှတွင် ဆူနာမီဘေးဒဏ်ခံခဲ့ရသူများကို ငွေကြေးလှူဒါန်းခဲ့ကြသည်။ အဖွဲ့အစည်း၏ကယ်ဆယ်ရေးရန်ပုံငွေသို့ ဤသို့လှိုက်လှိုက်လှဲလှဲ ငွေကြေးလှူဒါန်းခြင်းကို အလွန်ကျေးဇူးတင်ပါသည်။ သို့သော် အချို့နိုင်ငံများတွင် အလှူငွေများကို ဘေးဒဏ်တစ်မျိုးမျိုးအတွက် သတ်သတ်မှတ်မှတ်ထားရှိသည့်အခါ ကျွန်ုပ်တို့ဒေသခံညီအစ်ကိုများ၏လိုအပ်ရာများကို ဖြည့်ဆည်းပေးရာ၌ ပိုလျှံနေသည်ပင်ဖြစ်ပါစေ၊ ထိုငွေများကို အလှူရှင်၏ဆန္ဒအတိုင်း အချိန်အတိုင်းအတာတစ်ခုအတွင်း အသုံးပြုပစ်ဖို့ ဥပဒေရှိသည်။

^၄ ထို့ကြောင့် လူသားချင်းစာနာမှုနှင့် ကယ်ဆယ်ရေးအတွက် အလှူငွေများကို ကမ္ဘာချီလုပ်ငန်းအတွက် ရန်ပုံငွေတွင်ထည့်ရန် အကြံပြုပါသည်။ ဤအလှူငွေများကို ကယ်ဆယ်ရေးလုပ်ငန်းများအပြင် ခရစ်ယာန်ညီအစ်ကိုအသင်းအပင်း၏ ဝိညာဉ်ရေးလိုအပ်ရာများ ဖြည့်ဆည်းပေးရန်လည်း အသုံးပြုသည်။ အကြောင်းတစ်ခုခုကြောင့် ကမ္ဘာချီလုပ်ငန်းအတွက်မဟုတ်ဘဲ ကယ်ဆယ်ရေးအတွက်သာ အလှူငွေထည့်လိုလျှင် ယင်းကို လက်ခံပြီး ကယ်ဆယ်ရေးအထောက်အပံ့ လိုအပ်သော နေရာတိုင်းတွင် အသုံးပြုသွားမည်ဖြစ်သည်။ သို့သော် အလှူငွေများကို အဘယ်နေရာတွင်၊ အဘယ်သို့အသုံးပြုနိုင်သည်ဟု ကန့်သတ်ချက်မပါလျှင် ပိုကောင်းပါလိမ့်မည်။

^၅ ကမ္ဘာချီလုပ်ငန်းကို အဓိကထား၍ လှူဒါန်းရန် ကျွန်ုပ်တို့ညွှန်ကြားရသည့်အကြောင်းမှာ အလှူငွေများကို ကယ်ဆယ်ရေးလိုအပ်ရာများအတွက်သာ သီးသန့်ထားခြင်းထက် နိုင်ငံတော်လုပ်ငန်းနှင့်ဆက်နွှယ်နေသည့် ကဏ္ဍအားလုံးအတွက် အသုံးပြုနိုင်ရန်ဖြစ်သည်။ “မိမိကိုယ်ကိုမေတ္တာ၌ တည်ဆောက်ခြင်းငှာ ကြီးပွားစေ” ဖို့လိုအပ်ရာကို ကျွန်ုပ်တို့ အတူတကွပေးဆက်ကြရာ ယင်းသည် ဧဖက် ၄:၁၆ ၏ဆိုလိုရင်းနှင့် ကိုက်ညီပါသည်။