ကျမ်းစာသင်အံမှုများ ကျင်းပရာတွင် “ဘုရားသခင့် မေတ္တာတော်” စာအုပ်ကို မည်သို့အသုံးပြုနိုင်ပုံ

၁။ “ဘုရားသခင့် မေတ္တာတော်” စာအုပ်၏ ရည်ရွယ်ချက်မှာ အဘယ်နည်း။

^၁ ကျွန်ုပ်တို့သည် “ဘုရားသခင့်စွမ်းအားတော် ဦးဆောင်လမ်းပြမှု” ခရိုင်စည်းဝေးကြီးတွင် “ဘုရားသခင့်မေတ္တာတော်၌ တည်နေကြလော့” စာအုပ်သစ်ကို ရရှိခဲ့သည့်အတွက် အလွန်ဝမ်းမြောက်ခဲ့ကြသည်။ ကြေညာခဲ့သည့်အတိုင်း ထိုစာအုပ်သည် ကျမ်းစာအခြေခံအယူဝါဒများကို သွန်သင်ပေးရန်မဟုတ်ဘဲ ယေဟောဝါ၏ကျင့်ဝတ်စံနှုန်းများကို သိရှိပြီး မြတ်နိုးလာစေရန် ရည်ရွယ်ထားသည်။ ဤစာအုပ်ကို တစ်အိမ်မှတစ်အိမ် ဓမ္မအမှုတွင် ဝေငှမည်မဟုတ်ပါ။

၂။ ဤစာအုပ်ကို မည်သို့အသုံးပြုမည်နည်း၊ မည်သူတို့နှင့်နည်း။

^၂ ဤစာအုပ်သည် ကျမ်းစာသင်သားများနှင့် သမ္မာကျမ်းစာသွန်သင်ရာ စာအုပ်ကိုလေ့လာပြီးနောက် ဆက်လေ့လာရန် ဒုတိယစာအုပ်ဖြစ်ပါလိမ့်မည်။ ဝိညာဏတိုးတက်မှုနှုန်းသည် တစ်ဦးနှင့်တစ်ဦး တူညီမည်မဟုတ်ကြောင်း စိတ်စွဲမှတ်ထားပါ။ သင်အံမှုတိုင်းကို ကျမ်းစာသင်သားလိုက်နိုင်သည့်နှုန်းဖြင့် ပြုလုပ်သင့်ပါသည်။ ဆင်ခြင်သုံးသပ်နေသည့် အကြောင်းအရာကို ကောင်းစွာ နားလည်သဘောပေါက်ကြောင်း သေချာစေပါ။ အများအားဖြင့် ယခင်က စာအုပ်များစွာဖြင့် လေ့လာခဲ့ပြီးဖြစ်သော်လည်း အသင်းတော်အစည်းအဝေးများကို မတက်ရောက်သူများ၊ သင်ယူခဲ့သော ကျမ်းစာအမှန်တရားများနှင့်အညီ အသက်ရှင်ရန် လုံးဝစိတ်မဝင်စားသူများနှင့် ကျမ်းစာသင်အံမှုများစတင်ရာတွင် ဤစာအုပ်ကို အသုံးမပြုသင့်ပါ။

၃။ လောလောဆယ်တွင် ဘုရားသခင်ကို ကိုးကွယ်လော့ စာအုပ်ဖြင့် သင်အံမှုပြုလုပ်နေပါက အဘယ်အရာပြုလုပ်သင့်သနည်း။

^၃ အကယ်၍ သင်သည် လောလောဆယ်တွင် ဘုရားသခင်ကို ကိုးကွယ်လော့ စာအုပ်ဖြင့် သင်အံမှုပြုလုပ်နေပြီး အခန်းအနည်းငယ်သာ ကျန်တော့သည်ဆိုလျှင် ထိုစာအုပ်ကို ပြီးဆုံးအောင်လေ့လာရန် ဆုံးဖြတ်နိုင်ပြီး ကျမ်းစာသင်သားအား “ဘုရားသခင့် မေတ္တာတော်” စာအုပ်ကို မိမိဘာသာဖတ်ရန် အားပေးနိုင်ပါသည်။ သို့မဟုတ်ပါက စာအုပ်အသစ်ပြောင်း၍ အစမှလေ့လာခြင်းက အကောင်းဆုံးဖြစ်ပါလိမ့်မည်။ သမ္မာကျမ်းစာသွန်သင်ရာ စာအုပ်ကဲ့သို့ပင် နောက်ဆက်တွဲမှ အကြောင်းအရာများကို ဆွေးနွေးလိုပါက ဆွေးနွေးနိုင်ပါသည်။

၄။ ကျွန်ုပ်တို့၏ကျမ်းစာသင်သားသည် သမ္မာကျမ်းစာသွန်သင်ရာနှင့် “ဘုရားသခင့်မေတ္တာတော်” စာအုပ်တို့ဖြင့် လေ့လာ၍မပြီးဆုံးမီ နှစ်ခြင်းခံခဲ့သည်ဆိုလျှင် ကျွန်ုပ်တို့ အဘယ်အရာပြုလုပ်သင့်သနည်း။

^၄ သင်သားတစ်ဦးသည် စာအုပ်နှစ်အုပ်စလုံး မပြီးဆုံးမီ နှစ်ခြင်းခံခဲ့သည်ဆိုလျှင် ယင်းနောက်ပိုင်း “ဘုရားသခင့် မေတ္တာတော်” စာအုပ်ကို ပြီးဆုံးသည်အထိ ဆက်လက်လေ့လာသင့်ပါသည်။ အဆိုပါသင်သားသည် နှစ်ခြင်းခံပြီးဖြစ်သော်လည်း သင်သည် နာရီ၊ လည်ပတ်မှုနှင့် ကျမ်းစာသင်အံမှုတို့တွင် မှတ်တမ်းသွင်းနိုင်ပါသည်။ သင်နှင့်အတူလိုက်ပါလာသော ကြေညာသူတစ်ဦးသည် သင်အံမှုတွင် ပါဝင်သည်ဆိုလျှင် အချိန်ယူနိုင်ပါသည်။

၅။ ဓမ္မအမှုတွင် မပါဝင်သည်မှာ အချိန်အတန်ကြာပြီဖြစ်သော ကြေညာသူများအားကူညီရန် “ဘုရားသခင့်မေတ္တာတော်” စာအုပ်ကို မည်သို့အသုံးပြုနိုင်သနည်း။

^၅ ဟောပြောခြင်းလုပ်ငန်းတွင် မလှုပ်မရှားဖြစ်နေသူတစ်ဦးဦးနှင့် ကျမ်းစာသင်အံမှုပြုလုပ်ရန် အသင်းတော်လုပ်ငန်းတော်ကော်မတီဝင်တစ်ဦးက သင့်ကိုတာဝန်ပေးသည်ဆိုလျှင် “ဘုရားသခင့်မေတ္တာတော်” စာအုပ်မှ သတ်သတ်မှတ်မှတ်အခန်းများကို သုံးသပ်ရန် တောင်းဆိုခံရနိုင်ပါသည်။ ထိုကဲ့သို့သော သင်အံမှုများကို အချိန်အတော်ကြာကြာ လုပ်နေစရာမလိုပါ။ ကျွန်ုပ်တို့ကို “ဘုရားသခင့်မေတ္တာတော်၌” ဆက်လက်တည်နေစေရန် ရည်ရွယ်ထားသော ဤစာအုပ်အသစ်ဖြင့် အလွန်ကောင်းမွန်လှသည့် ပြင်ဆင်ပေးမှုကို ကျွန်ုပ်တို့ရရှိထားကြပါသည်။​—ယုဒ ၂၁။