ကင်းမျှော်စင် အွန်လိုင်း စာကြည့်တိုက်
ကင်းမျှော်စင်
အွန်လိုင်း စာကြည့်တိုက်
မြန်မာ
  • သမ္မာကျမ်းစာ
  • စာအုပ်စာစောင်များ
  • အစည်းအဝေးများ
  • bt အခန်း ၇ စာ. ၅၂-၅၉
  • “ယေရှုအကြောင်း သတင်းကောင်းကို” ဟောပြောခြင်း

ဒီအပိုင်းအတွက် ဗီဒီယို မရှိပါ။

ဗီဒီယို ဖွင့်တာ အမှားရှိနေပါတယ်။

  • “ယေရှုအကြောင်း သတင်းကောင်းကို” ဟောပြောခြင်း
  • ဘုရားသခင့် နိုင်ငံတော်အကြောင်း ‘စေ့စေ့စပ်စပ် သက်သေခံပါ’
  • ခေါင်းစ‎ဥ်ငယ်များ
  • ဆင်တူတဲ့ အကြောင်းအရာ
  • “အရပ်ရပ် ကွဲလွင့်သွားတဲ့ တပည့်တွေ” (တ. ၈:၄-၈)
  • “ကျွန်တော့်ကိုလည်း ဒီတန်ခိုးမျိုး ပေးပါလား” (တ. ၈:၉-၂၅)
  • “ဖတ်နေတာကို နားလည်ရဲ့လား” (တ. ၈:၂၆-၄၀)
  • ဖိလိပ္ပု—စိတ်အားထက်သန်သော ဧဝံဂေလိဟောပြောသူတစ်ဦး
    ကင်းမျှော်စင် ယေဟောဝါ၏နိုင်ငံတော်ကိုကြေညာခြင်း—၁၉၉၉
  • အဲသယောပိအရာရှိတစ်ဦးကို ဖိလိပ္ပုနှစ်ခြင်းပေးခဲ့ခြင်း
    ကင်းမျှော်စင် ယေဟောဝါ၏နိုင်ငံတော်ကိုကြေညာခြင်း—၁၉၉၆
  • ရှေ့ဆောင်စိတ်ဓာတ်တင်ပြပါ
    ကျွန်ုပ်တို့၏နိုင်ငံတော်ဓမ္မအမှု—၂၀၀၄
  • သင် သိပါသလား
    ကင်းမျှော်စင် ယေဟောဝါရဲ့နိုင်ငံတော်ကိုကြေညာခြင်း (လေ့လာရန် စာစောင်)—၂၀၂၄
နောက်ထပ် ကြည့်ပါ
ဘုရားသခင့် နိုင်ငံတော်အကြောင်း ‘စေ့စေ့စပ်စပ် သက်သေခံပါ’
bt အခန်း ၇ စာ. ၅၂-၅၉

အခန်း ၇

“ယေရှုအကြောင်း သတင်းကောင်းကို” ဟောပြောခြင်း

သတင်းကောင်း ဟောပြောသူအဖြစ် ဖိလိပ္ပု ပုံသက်သေပြ

တမန်တော် ၈:၄-၄၀ ကို အခြေခံ

၁၊ ၂။ ပထမရာစုမှာ ဟောပြောခြင်းလုပ်ငန်း ရပ်တန့်သွားဖို့ ကြိုးစားတာတွေ ဘယ်လို ပြောင်းပြန်ဖြစ်သွားသလဲ။

ညှဉ်းပန်းနှိပ်စက်မှု လှိုင်းဂယက် ထန်လာပြီ။ ရှောလုဟာ အသင်းတော်ကို “အကြီးအကျယ် ဒုက္ခပေးတော့တယ်။” မူရင်းစကားမှာ ဒီအသုံးအနှုန်းကို ရက်စက်ကြမ်းကြုတ်မှုလို့ ဖော်ပြထားတယ်။ (တ. ၈:၃) တပည့်တွေ ထွက်ပြေးကြတယ်။ ခရစ်ယာန်တွေ ဆက်မဟောနိုင်အောင် နှိမ်နင်းမယ်ဆိုတဲ့ ရှောလုရဲ့ ပန်းတိုင် အောင်မြင်တော့မယ့် ပုံပဲ။ ဒါပေမဲ့ ခရစ်ယာန်တွေ ကွဲလွင့်သွားလို့ မမျှော်လင့်တာတွေ ဖြစ်လာတယ်။

၂ အရပ်ရပ် ကွဲလွင့်သွားသူတွေဟာ ရောက်ရာအရပ်မှာ “တရားစကားတော်မှာ ပါတဲ့ သတင်းကောင်းကို ဟောပြောကြတယ်။” (တ. ၈:၄) စဉ်းစားကြည့်ပါ။ ညှဉ်းပန်းနှိပ်စက်မှုကြောင့် ဟောပြောခြင်းလုပ်ငန်း မရပ်တန့်တဲ့အပြင် ပျံ့တောင် ပျံ့နှံ့သွားတယ်။ ညှဉ်းပန်းနှိပ်စက်သူတွေကြောင့် တပည့်တွေ ကွဲလွင့်သွားတဲ့အခါ ဝေးလံတဲ့ ဒေသမှာ ရှိတဲ့သူတွေ သတင်းကောင်း ကြားခွင့် ရသွားကြတယ်။ ဒီနေ့ခေတ်မှာလည်း အဲဒီလို အဖြစ်အပျက်တွေ ရှိတယ်။

“အရပ်ရပ် ကွဲလွင့်သွားတဲ့ တပည့်တွေ” (တ. ၈:၄-၈)

၃။ (က) ဖိလိပ္ပုဟာ ဘယ်သူလဲ။ (ခ) ရှမာရိမြို့က လူအများစု ဘာကြောင့် သတင်းကောင်း မကြားဖူးသလဲ။ ဒါပေမဲ့ ယေရှု ဘာကြိုဟောထားသလဲ။

၃ “ကွဲလွင့်သွားတဲ့ တပည့်တွေ” ထဲက တစ်ယောက်ကတော့ ဖိလိပ္ပုပါ။a (တ. ၈:၄။ စာမျက်နှာ ၅၃ မှာပါတဲ့ “‘သတင်းကောင်း ဟောပြောသူ’ ဖိလိပ္ပု” လေးထောင့်ကွက်ကို ကြည့်ပါ။) ရှမာရိမြို့ကို ဖိလိပ္ပု ရောက်သွားတယ်။ “ရှမာရိမြို့တွေထဲ မဝင်ကြနဲ့။ အစ္စရေးအမျိုးထဲက ပျောက်နေတဲ့ သိုးတွေဆီကိုပဲ သွားကြပါ” လို့ တစ်ချိန်က ယေရှု မှာခဲ့လို့ အဲဒီမြို့က လူအများစုဟာ သတင်းကောင်း မကြားဖူးကြဘူး။ (မ. ၁၀:၅၊ ၆) ဒါပေမဲ့ အချိန်တန်ရင် ရှမာရိမြို့သားတွေ သတင်းကောင်း ကြားရမယ်ဆိုတာ ယေရှု သိတယ်။ “ဂျေရုဆလင်မြို့၊ ယုဒပြည်တစ်ဝန်းလုံး၊ ရှမာရိပြည်၊ ကမ္ဘာမြေအစွန်အဖျားအထိ ကျွန်တော့်အကြောင်း သက်သေခံကြလိမ့်မယ်” လို့ ကောင်းကင် မတက်ခင် ပြောခဲ့လို့ပဲ။—တ. ၁:၈။

၄။ ဖိလိပ္ပု ဟောတာကို ရှမာရိလူတွေ ဘယ်လို တုံ့ပြန်ကြသလဲ။ ဘာကြောင့်လဲ။

၄ ရှမာရိမြို့မှာ “ရိတ်စရာစပါးတွေ မှည့်ဝင်းနေပြီ” ဆိုတာ ဖိလိပ္ပု တွေ့တယ်။ (ယော. ၄:၃၅) ဖိလိပ္ပု ဟောတဲ့ သတင်းစကားကြောင့် အဲဒီအရပ်သားတွေ လန်းဆန်းသွားကြတယ်။ ဘာကြောင့်လဲ။ ဂျူးတွေဟာ ရှမာရိလူတွေကို အဆက်အဆံ မလုပ်တဲ့အပြင် နှိမ်ကြတယ်။ လူတန်းစားခွဲပြီး အမြင်ကျဉ်းတဲ့ ဖာရိရှဲတွေ ထင်သလို မဟုတ်ဘဲ သတင်းကောင်းက လူအားလုံးကို မျှော်လင့်ချက် ပေးတယ်ဆိုတာ ရှမာရိလူတွေ သိသွားကြတယ်။ မျက်နှာမလိုက်ဘဲ ထက်ထက်သန်သန် ဟောခြင်းအားဖြင့် ဖာရိရှဲတွေလို မဟုတ်ကြောင်း ဖိလိပ္ပု ပြတယ်။ ဒါကြောင့် ဖိလိပ္ပုရဲ့ စကားကို ရှမာရိလူတွေ နားထောင်ကြတာ။—တ. ၈:၆။

၅-၇။ ခရစ်ယာန်တွေ ကွဲလွင့်သွားလို့ သတင်းကောင်း ဘယ်လို ပျံ့နှံ့သွားလဲ။ ဥပမာပေးပါ။

၅ ပထမရာစုမှာလို ဒီနေ့လည်း ဘုရားသခင့်လူမျိုး နှိပ်စက်ခံရပေမဲ့ ဟောပြောခြင်းလုပ်ငန်း ရပ်မသွားဘူး။ ခရစ်ယာန်တွေကို အကျဉ်းထောင်တစ်ခုကနေ တစ်ခု၊ တစ်နိုင်ငံကနေ တစ်နိုင်ငံ အတင်းအကျပ် ပြောင်းရွှေ့ခိုင်းတဲ့အတွက် နေရာသစ်တွေဆီ နိုင်ငံတော်သတင်း ရောက်သွားတယ်။ ဥပမာ၊ ဒုတိယ ကမ္ဘာစစ်အတွင်း ယေဟောဝါသက်သေတွေဟာ နာဇီချွေးတပ်စခန်းတွေမှာ တခြားသူတွေကို သက်သေခံနိုင်ခဲ့တယ်။ အဲဒီစခန်းတွေမှာ သက်သေခံတွေနဲ့ ဆုံခဲ့တဲ့ ဂျူးတစ်ယောက် ဒီလိုပြောတယ်– “ယေဟောဝါသက်သေ အကျဉ်းသားတွေရဲ့ ကြံ့ခိုင်တဲ့ စိတ်ဓာတ်ကြောင့် သူတို့ရဲ့ ယုံကြည်ချက်ဟာ ကျမ်းစာအပေါ် အခြေပြုတယ်ဆိုတာကို ယုံကြည်လက်ခံလာတယ်။ နောက်ပိုင်း၊ ကျွန်တော်လည်း သက်သေခံတစ်ယောက် ဖြစ်လာတယ်။”

၆ အခြေအနေတချို့မှာ နှိပ်စက်သူတွေတောင် သတင်းကောင်း ကြားပြီး လက်ခံသွားကြတယ်။ ဥပမာ၊ ဖရန့် ဒီချ်ဆိုတဲ့ သက်သေခံတစ်ယောက်ဟာ သြစတြီးယားက ဂူဇန် ချွေးတပ်စခန်းကို ပြောင်းရွှေ့ပြီးနောက် အဲဒီက စစ်အရာရှိကို ကျမ်းစာသင်ပေးခဲ့တယ်။ နှစ်အတော်ကြာပြီးနောက် ယေဟောဝါသက်သေတွေရဲ့ ခရိုင်အစည်းအဝေးတစ်ခုမှာ သူတို့ ပြန်ဆုံကြလို့ သိပ်ပျော်ကြတယ်။ နှစ်ယောက်စလုံး သတင်းကောင်း ဟောပြောသူတွေ ဖြစ်နေကြပြီ။

၇ ညှဉ်းပန်းနှိပ်စက်မှုကြောင့် ခရစ်ယာန်တွေ တခြားနိုင်ငံကို ထွက်ပြေးရတဲ့အခါမှာလည်း အဲဒီလို ဖြစ်ခဲ့တယ်။ ဥပမာ၊ ၁၉၇၀ ပြည့်လွန်နှစ်တွေမှာ မာလာဝီက သက်သေခံတွေ မိုဇမ်ဘစ်ကို ထွက်ပြေးရတုန်းက အဲဒီမှာ ကောင်းကောင်း သက်သေခံနိုင်ခဲ့ကြတယ်။ နောက်ပိုင်း၊ မိုဇမ်ဘစ်မှာ အတိုက်အခံ ကြုံရပေမဲ့ ဟောပြောခြင်းလုပ်ငန်း ရပ်တန့်မသွားဘူး။ ဖရန်စ္စကို ဂိုအာနာ ဒီလိုပြောတယ်– “တချို့ဆိုရင် ဟောလို့ ခဏခဏ အဖမ်းခံရတယ်။ ဒါပေမဲ့ သတင်းကောင်းကို လူတွေ လက်ခံကြလို့ ပထမရာစု ခရစ်ယာန်တွေကို ကူညီပေးသလို ကျွန်တော်တို့ကိုလည်း ဘုရား ကူညီပေးနေတယ်ဆိုတာ ထင်ရှားတယ်။”

၈။ နိုင်ငံရေးနဲ့ စီးပွားရေး အပြောင်းအလဲတွေဟာ ဟောပြောခြင်းလုပ်ငန်းကို ဘယ်လို အကျိုးသက်ရောက်သလဲ။

၈ ညှဉ်းပန်းနှိပ်စက်မှု တစ်ခုတည်းကြောင့်ပဲ ခရစ်ယာန်ဘာသာ ပျံ့နှံ့သွားတာ မဟုတ်ဘူး။ လွန်ခဲ့တဲ့ ဆယ်စုနှစ်အတွင်း နိုင်ငံရေးနဲ့ စီးပွားရေး အပြောင်းအလဲတွေကြောင့်လည်း ဘာသာစကား အမျိုးမျိုး ပြောတဲ့ လူတွေဆီ သတင်းကောင်း ပျံ့နှံ့ဖို့ အခွင့်အရေး ပေါ်လာတယ်။ စစ်ဖြစ်နေတဲ့၊ ဆင်းရဲတဲ့ ဒေသက လူတချို့ဟာ ပိုလုံခြုံတဲ့ နေရာတွေကို ပြောင်းရွှေ့ပြီး ရောက်တဲ့ နိုင်ငံမှာ သတင်းကောင်း ကြားခွင့် ရသွားကြတယ်။ အစုလိုက်အပြုံလိုက် ရောက်လာတဲ့ ဒုက္ခသည်တွေကြောင့် ဘာသာခြားစကားပြော ရပ်ကွက်တွေ ပေါ်လာတယ်။ ရပ်ကွက်မှာရှိတဲ့ “လူမျိုးတွေ၊ မျိုးနွယ်တွေ၊ လူစုတွေ၊ ဘာသာစကားအမျိုးမျိုး ပြောဆိုသူတွေ” ကို သက်သေခံဖို့ သင် ကြိုးစားနေသလား။—ဗျာ. ၇:၉။

“ကျွန်တော့်ကိုလည်း ဒီတန်ခိုးမျိုး ပေးပါလား” (တ. ၈:၉-၂၅)

မှော်ဆရာ ဖြစ်ဖူးသူ ရှိမုန် ငွေအိတ် ကိုင်ပြီး တမန်တော်နား ရပ်နေ။ ခရစ်ယာန်တစ်ယောက်ရဲ့ ပခုံးပေါ် တမန်တော် လက်တင်ထား။ သူတို့ အနောက်မှာ ခြေထောက်ဆာနေတဲ့ ကလေးမလေးကို နောက်ခရစ်ယာန်တစ်ယောက် ကုပေးနေ။ တခြားသူတွေ ကြည့်နေကြ။

‘တမန်တော်တွေ လက်တင်တဲ့အခါ စွမ်းအားတော် သက်ရောက်လာတာကို ရှိမုန် မြင်တော့ ငွေပေးတယ်။’—တမန်တော် ၈:၁၈

၉။ ရှိမုန်ဟာ ဘယ်သူလဲ။ ဖိလိပ္ပုကို ဘာကြောင့် အထင်ကြီးသွားသလဲ။

၉ ရှမာရိမြို့မှာ ဖိလိပ္ပု အံ့ဖွယ်အမှုတွေ လုပ်ပြတယ်။ ဥပမာ၊ မသန်စွမ်းသူတွေ၊ နတ်ဆိုးပူးသူတွေကို ကုပေးတယ်။ (တ. ၈:၆-၈) ဖိလိပ္ပုရဲ့ အံ့ဖွယ်ဆုကျေးဇူးတွေကို အထင်ကြီးသွားသူတစ်ယောက်ကတော့ မှော်ဆရာ ရှိမုန်ပါ။ သူ့ကို လူတွေ လေးစားလွန်းလို့ “ ဒီလူဟာ . . . ဘုရားရဲ့တန်ခိုးတော်ပဲ” လို့ ခေါ်ကြတယ်။ ဒါပေမဲ့ ဖိလိပ္ပု လုပ်ပြတဲ့ အံ့ဖွယ်အမှုတွေကြောင့် ဘုရားရဲ့ စစ်မှန်တဲ့ တန်ခိုးကို တွေ့မြင်ပြီး ယုံကြည်သူ ဖြစ်လာတယ်။ (တ. ၈:၉-၁၃) နောက်ပိုင်း၊ ရှိမုန်ရဲ့ စိတ်ထား စမ်းသပ်ခံရတယ်။ ဘယ်နည်းနဲ့လဲ။

၁၀။ (က) ရှမာရိမြို့မှာ ပေတရုနဲ့ ယောဟန် ဘာလုပ်သလဲ။ (ခ) ပေတရုနဲ့ ယောဟန် လက်တင်တဲ့အခါ တပည့်သစ်တွေ သန့်ရှင်းသော စွမ်းအားတော် ရကြောင်း ရှိမုန် မြင်တော့ ဘာလုပ်သလဲ။

၁၀ တမန်တော်တွေဟာ ရှမာရိမြို့ရဲ့ တိုးတက်မှုကို သတိပြုမိတဲ့အခါ ပေတရုနဲ့ ယောဟန်ကို လွှတ်လိုက်တယ်။ (“‘ကောင်းကင်နိုင်ငံရဲ့ သော့တွေ’ ကို ပေတရု အသုံးပြု” လေးထောင့်ကွက်ကို ကြည့်ပါ။) တမန်တော် နှစ်ယောက် ရောက်လာတဲ့အခါ တပည့်သစ်တွေအပေါ် လက်တင်တာနဲ့ သန့်ရှင်းသော စွမ်းအားတော် ရကြတယ်။b ဒါကို ရှိမုန် မြင်တော့ အံ့သြသွားတယ်။ အဲဒီအခါ “ကျွန်တော် လက်တင်တဲ့အခါ လူတွေ သန့်ရှင်းသော စွမ်းအားတော် ရနိုင်အောင် ကျွန်တော့်ကိုလည်း ဒီတန်ခိုးမျိုး ပေးပါလား” လို့ တောင်းဆိုတယ်။ ရှိမုန်ဟာ ဒီအခွင့်ထူးကို ဝယ်လို့ ရမယ် အထင်နဲ့ တမန်တော်တွေကို ငွေပေးတယ်။—တ. ၈:၁၄-၁၉။

၁၁။ ရှိမုန်ကို ပေတရု ဘယ်လို ဆုံးမသလဲ။ ရှိမုန် ဘယ်လို တုံ့ပြန်သလဲ။

၁၁ “ဘုရားသခင် ပေးတဲ့ ဆုလက်ဆောင်ကို ငွေနဲ့ ဝယ်လို့ ရမယ် ထင်နေတာကိုး။ ဒါကြောင့် ခင်ဗျားရော ငွေပါ ပျက်စီးပါစေ။ ဘုရားသခင်ရှေ့မှာ စိတ်ရင်း မမှန်တဲ့အတွက် ဒီအလုပ်မှာ ခင်ဗျား လုံးဝ ပါဝင်လို့ မရဘူး” လို့ ရှိမုန်ကို ပေတရု ပြတ်ပြတ်သားသား ပြောလိုက်တယ်။ အဲဒီနောက် “မကောင်းတဲ့ အကြံအစည်ကို ခွင့်လွှတ်ပေးဖို့ ယေဟောဝါဘုရားဆီ တိုးလျှိုးအသနားခံပါ” လို့ ဆက်ပြောတယ်။ ခွင့်လွှတ်ခံရဖို့ နောင်တယူပြီး ဆုတောင်းပါလို့ အားပေးနေတာ။ ရှိမုန်ဟာ ဆိုးညစ်တဲ့သူ မဟုတ်ပါဘူး။ မှန်ရာကို ပြုလုပ်လိုသူ ဖြစ်ပေမဲ့ တစ်ခဏ အတွေး ချော်သွားတယ်။ ဒါကြောင့် “ခင်ဗျားတို့ ပြောတာတွေ ကျွန်တော့်အပေါ် မသက်ရောက်ရလေအောင် ယေဟောဝါဘုရားဆီ အသနားခံ ဆုတောင်းပေးပါ” လို့ တမန်တော်တွေကို ရှိမုန် တောင်းပန်တယ်။—တ. ၈:၂၀-၂၄။

၁၂။ “ဆိုင်မွန်နီ” ဟာ ဘာလဲ။ ဒါကို ခရစ်ယာန်ဘောင်မှာ ဘယ်လို တွေ့ရသလဲ။

၁၂ ရှိမုန်အတွက် ပေတရုရဲ့ ဆုံးမစကားဟာ ဒီနေ့ခေတ် ခရစ်ယာန်တွေအတွက် သတိပေးချက်ပဲ။ အင်္ဂလိပ်စကားလုံး “ဆိုင်မွန်နီ” ဟာ ဒီဖြစ်ရပ်ကြောင့် ပေါ်လာတာ။ “ဆိုင်မွန်နီ” ဟာ အထူးသဖြင့် ဘာသာရေးနဲ့ ဆက်နွှယ်တဲ့ ရာထူး ရောင်းဝယ်ခြင်းကို ဆိုလိုတယ်။ အယူဖောက်ပြန်တဲ့ ခရစ်ယာန်ဘောင်သမိုင်းမှာ အဲဒီလိုလုပ်ခဲ့တဲ့ သာဓကများစွာ ရှိတယ်။ နဝမ အကြိမ်မြောက် ဗြိတိန်နစ်ကာစွယ်စုံကျမ်း (၁၈၇၈) က ဒီလိုဖော်ပြတယ်– “ပုပ်ရဟန်းမင်း ရွေးကောက်ပွဲသမိုင်းကို လေ့လာတဲ့အခါ ဆိုင်မွန်နီနဲ့ ကင်းတဲ့ ရွေးကောက်ပွဲ မရှိကြောင်း၊ ဆိုင်မွန်နီ ကျင့်သုံးခြင်းက အဆိုးဆုံး၊ သိက္ခာအမဲ့ဆုံး၊ ဗြောင်အကျဆုံး ဖြစ်ကြောင်း တွေ့ရှိခဲ့တယ်။”

၁၃။ ခရစ်ယာန်တွေ ဘယ်နည်းတွေနဲ့ ဆိုင်မွန်နီကို ရှောင်ရမလဲ။

၁၃ ခရစ်ယာန်တွေဟာ ဆိုင်မွန်နီအပြစ် မကျူးလွန်သင့်ဘူး။ ဥပမာ၊ အသင်းတော်မှာ ထပ်ဆင့် အခွင့်အရေး ပေးနိုင်ပုံရှိသူကို လက်ဆောင် ပေးခြင်း၊ မြှောက်ပင့်ပြောဆိုခြင်းအားဖြင့် အခွင့်ထူးတွေ ရဖို့ မကြိုးစားသင့်ဘူး။ အခွင့်ထူး ပေးနိုင်တဲ့ အနေအထား ရှိသူတွေကလည်း ချမ်းသာသူတွေကို မျက်နှာမလိုက်သင့်ဘူး။ အဲဒီလုပ်ရပ် နှစ်ခုစလုံးဟာ ဆိုင်မွန်နီနဲ့ ဆက်နွှယ်နေတယ်။ ဘုရားသခင့် ကျေးကျွန်အားလုံးဟာ “အနှိမ့်ချဆုံး” လူတွေလို ကျင့်ကြံသင့်တယ်။ စွမ်းအားတော်အားဖြင့် အခွင့်ထူးတွေ ခန့်အပ်ခံရမယ့် အချိန်ကို စောင့်သင့်တယ်။ (လု. ၉:၄၈) ဘုရားသခင့် အဖွဲ့အစည်းမှာ “ကိုယ့်ဂုဏ်ကိုယ်ဖော်” သူတွေအတွက် နေရာ မရှိပါဘူး။—ပညာ. ၂၅:၂၇။

“ကောင်းကင်နိုင်ငံရဲ့ သော့တွေ” ကို ပေတရု အသုံးပြု

“ခင်ဗျားကို ကောင်းကင်နိုင်ငံရဲ့ သော့တွေ ပေးမယ်” လို့ ပေတရုကို ယေရှု ပြောတယ်။ (မ. ၁၆:၁၉) ဘာကို ဆိုလိုသလဲ။ “သော့” ဆိုတာ လူအမျိုးမျိုး နိုင်ငံတော်သတင်း ကြားဖို့၊ ယေရှုနဲ့အတူ ကောင်းကင်နိုင်ငံတော်မှာ အုပ်ချုပ်ခွင့် ရဖို့ ပေတရု လမ်းဖွင့်ပေးလိုက်တာကို ဆိုလိုတယ်။ သော့တွေကို ဘယ်အချိန်မှာ ပေတရု သုံးသလဲ။

  • ဂျူးတွေနဲ့ ဂျူးဘာသာဝင်တွေကို နောင်တယူပြီး နှစ်ခြင်းခံဖို့ တိုက်တွန်းချိန် အေဒီ ၃၃၊ ပင်တေကုတ္တေပွဲနေ့မှာ ပထမသော့ကို ပေတရု သုံးတယ်။ လူ ၃,၀၀၀ လောက် နှစ်ခြင်းခံပြီး နိုင်ငံတော်မှာ အုပ်ချုပ်ဖို့ မျှော်လင့်ချက် ရှိလာကြတယ်။—တ. ၂:၁-၄၁။

  • သတေဖန် ကွပ်မျက်ခံရပြီး မကြာခင် ဒုတိယသော့ကို ပေတရု သုံးတယ်။ နှစ်ခြင်းခံပြီးခါစ ရှမာရိလူတွေအပေါ် ပေတရုနဲ့ ယောဟန် လက်တင်ပြီးနောက် အဲဒီလူသစ်တွေ သန့်ရှင်းသော စွမ်းအားတော် ရကြတယ်။—တ. ၈:၁၄-၁၇။

  • အေဒီ ၃၆ မှာ တတိယသော့ကို ပေတရု သုံးတယ်။ အရေဖျားမဖြတ်ထားတဲ့ လူမျိုးခြားတွေ ကောင်းကင် မျှော်လင့်ချက် ရဖို့ပါ။ ကော်နေလိကို တမန်တော် ပေတရု သက်သေခံချိန်မှာ ဒီသော့ကို သုံးခဲ့တယ်။ ကော်နေလိဟာ အရေဖျားမဖြတ်တဲ့ လူမျိုးခြားတွေထဲက ဦးဆုံး ခရစ်ယာန် ဖြစ်လာတယ်။—တ. ၁၀:၁-၄၈။

“ဖတ်နေတာကို နားလည်ရဲ့လား” (တ. ၈:၂၆-၄၀)

၁၄၊ ၁၅။ (က) “အီသီယိုးပီးယား မိန်းမစိုး” ဟာ ဘယ်သူလဲ။ သူ့ကို ဖိလိပ္ပု ဘယ်လို တွေ့သလဲ။ (ခ) ဖိလိပ္ပုရဲ့ သတင်းတရားကို အီသီယိုးပီးယားလူ ဘယ်လို တုံ့ပြန်သလဲ။ စိတ်ကူးပေါက်လို့ နှစ်ခြင်းခံတာ မဟုတ်ကြောင်း ဘာကြောင့် ပြောနိုင်သလဲ။ (အောက်ခြေမှတ်ချက်ကို ကြည့်ပါ။)

၁၄ အခု၊ ဖိလိပ္ပုကို ဂျေရုဆလင်မြို့ကနေ ဂါဇာမြို့ကို သွားတဲ့ လမ်းအတိုင်း သွားဖို့ ယေဟောဝါရဲ့ ကောင်းကင်တမန် ညွှန်ကြားတယ်။ “ပရောဖက် ဟေရှာယကျမ်းကို အကျယ်ကြီး ဖတ်နေ” တဲ့ အီသီယိုးပီးယား မိန်းမစိုးကို တွေ့ပြီးနောက်မှ အဲဒီနေရာကို သွားရတဲ့ အကြောင်းရင်း ဖိလိပ္ပု သိသွားတယ်။ (“ဘယ်သဘောနဲ့ ‘မိန်းမစိုး’ ဖြစ်သလဲ” လေးထောင့်ကွက်ကို ကြည့်ပါ။) ရထားဆီ သွားဖို့ ဖိလိပ္ပုကို သန့်ရှင်းသော စွမ်းအားတော် လှုံ့ဆော်တယ်။ ရထားဘေးမှာ ပြေးလိုက်ရင်း “ဖတ်နေတာကို နားလည်ရဲ့လား” လို့ ဖိလိပ္ပု မေးတဲ့အခါ “ရှင်းပြမယ့်သူ မရှိဘဲ ဘယ်လို နားလည်မှာလဲ” လို့ အီသီယိုးပီးယားလူ ဖြေတယ်။—တ. ၈:၂၆-၃၁။

၁၅ ဖိလိပ္ပုကို မြင်းရထားပေါ် တက်ဖို့ အီသီယိုးပီးယားလူ ခေါ်တယ်။ အားရပါးရ ဆွေးနွေးနေကြမယ့်ပုံကို မြင်ယောင်ကြည့်ပါ။ ဟေရှာယ ပရောဖက်ပြုချက်မှာ ပါတဲ့ “သိုး” ဒါမှမဟုတ် “ကျွန်” ဟာ ဘယ်သူ ဖြစ်ကြောင်း အီသီယိုးပီးယားလူ မသိဘူး။ (ဟေရှာ. ၅၃:၁-၁၂) အဲဒီပရောဖက်ပြုချက်ဟာ ယေရှုခရစ်ကို ဆိုလိုကြောင်း အီသီယိုးပီးယား မိန်းမစိုးကို ဖိလိပ္ပု ရှင်းပြတယ်။ အေဒီ ၃၃၊ ပင်တေကုတ္တေပွဲနေ့မှာ နှစ်ခြင်းခံခဲ့သူတွေလို ဂျူးဘာသာဝင် အီသီယိုးပီးယားလူဟာ ဘာလုပ်ရမယ်ဆိုတာ ချက်ချင်း သိလာတယ်။ “ဒီမှာ ရေရှိတာပဲ။ ကျွန်တော် နှစ်ခြင်းမခံရအောင် ဘာက တားဆီးနေလို့လဲ” လို့ ပြောတော့ ဖိလိပ္ပု ချက်ချင်း နှစ်ခြင်းပေးလိုက်တယ်။c (“‘ရေ’ မှာ နှစ်ခြင်းခံခြင်း” လေးထောင့်ကွက်ကို ကြည့်ပါ။) အဲဒီနောက် ဖိလိပ္ပုဟာ အာဇုတ်မြို့မှာ တာဝန်အသစ် ရပြီး သတင်းကောင်း ဆက်ဟောတယ်။—တ. ၈:၃၂-၄၀။

ဘယ်သဘောနဲ့ “မိန်းမစိုး” ဖြစ်သလဲ

“မိန်းမစိုး” လို့ ပြန်ဆိုတဲ့ ဂရိစကားလုံး ယူနူးကော့စ်ဟာ မျိုးပွားနိုင်စွမ်း မရှိသူ ဒါမှမဟုတ် အဆင့်မြင့် နန်းတွင်းအရာရှိကို ရည်ညွှန်းနိုင်တယ်။ ရှင်ဘုရင်ရဲ့ မောင်းမမိဿံတွေကို စောင့်ကြပ်ရတဲ့ နန်းတွင်းအရာရှိတွေဟာ သင်းကွပ်ထားတယ်။ ဖလားတော်ဝန်၊ ဘဏ္ဍာထိန်းစတဲ့ အရာရှိတွေကတော့ သင်းကွပ် မထားဘူး။ ဖိလိပ္ပု နှစ်ခြင်းပေးခဲ့တဲ့ အီသီယိုးပီးယား မိန်းမစိုးဟာ နန်းတွင်းဘဏ္ဍာထိန်း ဖြစ်လို့ သင်းကွပ်မခံရတဲ့ အရာရှိ ဖြစ်နိုင်တယ်။ သူဟာ ဘဏ္ဍာရေးဝန်ကြီး ဖြစ်တယ်။

အီသီယိုးပီးယားအမတ်ဟာ ယေဟောဝါကို သက်ဝင်ယုံကြည်တဲ့ ဂျူးဘာသာပြောင်းဝင်လာသူပါ။ ယေဟောဝါကို ဝတ်ပြုဖို့ ဂျေရုဆလင်မြို့ကို သွားတယ်။ (တ. ၈:၂၇) ဒါကြောင့် သူဟာ သင်းကွပ်ထားတဲ့ မိန်းမစိုး မဟုတ်ဘူးလို့ ပြောနိုင်တယ်။ မောရှေပညတ်အရ သင်းကွပ်ထားသူတွေဟာ အစ္စရေး လူအစုအဝေးထဲ ပါဝင်ခွင့် မရှိလို့ပဲ။—တရား. ၂၃:၁။

“ရေ” မှာ နှစ်ခြင်းခံခြင်း

ခရစ်ယာန်တွေ ဘယ်လို နှစ်ခြင်းခံကြသလဲ။ ခေါင်းပေါ် ရေလောင်းရုံ၊ ရေဖျန်းရုံနဲ့ လုံလောက်ပြီလို့ တချို့ ယူဆကြတယ်။ ဒါပေမဲ့ အီသီယိုးပီးယားအမတ်က “ရေ” မှာ နှစ်ခြင်းခံတယ်။ သူနဲ့ ဖိလိပ္ပု “နှစ်ယောက်သား ရေထဲ ဆင်း” တယ်လို့ ကျမ်းစာမှာ ဖော်ပြတယ်။ (တ. ၈:၃၆၊ ၃၈) ရေလောင်းရုံ၊ ရေဖျန်းရုံပဲဆိုရင် မိန်းမစိုးဟာ ရေရှိတဲ့နေရာမှာ မြင်းရထားကို ရပ်ခိုင်းမှာ မဟုတ်ဘူး။ သားရေဘူးမှာပါတဲ့ ရေနဲ့ လုံလောက်မှာပဲ။ “သဲကန္တာရလမ်း” ပေါ်မှာ ခရီးနှင်နေတဲ့အတွက် ရေဘူး ပါလာမှာ သေချာတယ်။—တ. ၈:၂၆။

လစ်ဒဲလ်နဲ့ စကော့တို့ရဲ့ ဂရိ-အင်္ဂလိပ် အဘိဓာန်အရ ဂရိစကားလုံး ဗာတီဇိုဟာ “နှစ်တယ်၊ နစ်မြုပ်စေတယ်” လို့ အဓိပ္ပာယ်ရတယ်။ နှစ်ခြင်းနဲ့ပတ်သက်ပြီး ကျမ်းစာမှာ ဖော်ပြထားတာတွေဟာ ဒီအဓိပ္ပာယ်ဖွင့်ဆိုချက်နဲ့ ကိုက်တယ်။ ယောဟန်ဟာ “ရှာလိမ်မြို့အနီး အဲနုန်အရပ်မှာ ရှိတဲ့ ရေအိုင်ကြီးတစ်အိုင်မှာ နှစ်ခြင်းပေးနေ” တယ်လို့ ယောဟန် ၃:၂၃ က ဖော်ပြတယ်။ ယေရှု နှစ်ခြင်းခံခြင်းနဲ့ပတ်သက်ပြီး ‘[ယေရှု] ရေထဲကနေ ပေါ်လာတာနဲ့ ကောင်းကင် ပွင့်လာတာကို မြင်ရတယ်’ လို့ ကျမ်းစာ ဆိုတယ်။ (မာ. ၁:၉၊ ၁၀) ဒါကြောင့် ခရစ်ယာန်စစ်တွေဟာ ရေမှာ စုံးစုံးနှစ်မြှုပ်ပြီး နှစ်ခြင်းခံသင့်တယ်။

၁၆၊ ၁၇။ ဒီနေ့ ဟောပြောခြင်းလုပ်ငန်းမှာ ကောင်းကင်တမန်တွေ ဘယ်လို ပါဝင်နေသလဲ။

၁၆ ဖိလိပ္ပုလိုပဲ ဒီနေ့ ခရစ်ယာန်တွေလည်း ဟောပြောခြင်း လုပ်ငန်းမှာ ပါဝင်ခွင့် ရထားကြတယ်။ အခွင့်အရေး ရတိုင်း အလွတ်သဘော သက်သေခံကြတယ်။ အခြေအနေ တော်တော်များများမှာ စိတ်ဝင်စားသူတွေနဲ့ တွေ့ကြတယ်။ ဒါ တိုက်ဆိုင်လို့တော့ မဟုတ်ဘူး။ “လူမျိုး၊ လူမျိုးနွယ်၊ ဘာသာစကားအမျိုးမျိုး ပြောတဲ့လူတွေ” ဆီ သတင်းကောင်း ရောက်ဖို့ ကောင်းကင်တမန်တွေ ဟောပြောခြင်းလုပ်ငန်းကို လမ်းညွှန်နေကြောင်း ကျမ်းစာမှာ ပြောထားတယ်။ (ဗျာ. ၁၄:၆) ဒီအကြောင်း ဂျုံစပါးနဲ့ ပေါင်းပင် ပုံဥပမာမှာ ယေရှုလည်း ပြောတယ်။ ရိတ်သိမ်းချိန် ဖြစ်တဲ့ လောကစနစ်နိဂုံးပိုင်းမှာ ‘ရိတ်သိမ်းသူတွေဟာ ကောင်းကင်တမန်တွေ’ ဖြစ်တယ်၊ ကောင်းကင်တမန်တွေဟာ “အပြစ်ကျူးလွန်စေသူတွေနဲ့ မတရားမှု ပြုသူတွေကို ကောင်းကင်နိုင်ငံထဲကနေ နုတ်ယူ” မယ်လို့ ပြောတယ်။ (မ. ၁၃:၃၇-၄၁) ဒါ့အပြင် ကောင်းကင်တမန်တွေကို သုံးပြီး နိုင်ငံတော် အမွေခံဖြစ်လာမယ့်သူတွေကိုရော “တခြားသိုး” အဝင် “လူအုပ်ကြီး” ကိုပါ ယေဟောဝါ စုသိမ်းနေတယ်။—ဗျာ. ၇:၉။ ယော. ၆:၄၄၊ ၆၅။ ၁၀:၁၆။

၁၇ ဘုရားအကူအညီ ရဖို့ ဆုတောင်းနေတာလို့ အမှုဆောင်မှာ ဆုံရသူတချို့ ပြောကြတယ်။ ကြေညာသူနှစ်ယောက်နဲ့ ကလေးတစ်ယောက်ရဲ့ တွေ့ကြုံမှုကို သုံးသပ်ကြည့်ပါ။ နေ့လယ်ရောက်တော့မှာ ဖြစ်လို့ ကြေညာသူနှစ်ယောက် အမှုဆောင် ရပ်ချင်ပေမဲ့ ကလေးက နောက်တစ်အိမ်ကို သွားချင်နေတယ်။ ဒါနဲ့ အဲဒီအိမ်ကို ကလေး သွားပြီး တံခါးခေါက်လိုက်တယ်။ အဲဒီအခါ မိန်းကလေးတစ်ယောက် ထွက်လာတော့ သက်သေခံနှစ်ယောက် သွားစကားပြောကြတယ်။ ကျမ်းစာကို နားလည်အောင် ရှင်းပြပေးနိုင်မယ့်သူ လာပါစေလို့ ဆုတောင်းနေကြောင်း အဲဒီမိန်းကလေး ပြောပြတော့ သူတို့ အံ့အားသင့်သွားတယ်။ ဒီလိုနဲ့ ကျမ်းစာသင်အံမှု စကြတယ်။

အမှုဆောင်ထွက်နေတဲ့ မောင်နှံတစ်စုံ ဘဲလ် တီးနေ။ အိမ်ထဲမှာ အမျိုးသမီးတစ်ယောက် ဆုတောင်းနေ။

“ဘုရားသခင်၊ ကိုယ်တော် ဘယ်သူပဲဖြစ်ဖြစ် ကျွန်မကို ကူညီပေးပါ”

၁၈။ အမှုဆောင်လုပ်ငန်းကို ဘာကြောင့် ပေါ့ပေါ့တန်တန် သဘောမထားသင့်သလဲ။

၁၈ ဒီနေ့အချိန်မှာ တစ်ခါမှ မကြုံဖူးတဲ့ အတိုင်းအတာနဲ့ ဟောပြောနေကြတယ်။ သင်လည်း ခရစ်ယာန် အသင်းသား တစ်ယောက်အဖြစ် ကောင်းကင်တမန်တွေနဲ့အတူ အလုပ်လုပ်ခွင့် ရထားတယ်။ ဒီအခွင့်ထူးကို ဘယ်တော့မှ ပေါ့ပေါ့တန်တန် သဘောမထားပါနဲ့။ “ယေရှုအကြောင်း သတင်းကောင်းကို” ထက်ထက်သန်သန် ဆက်ဟောနေပါ။ ဒါဆိုရင် သင် ပျော်ရွှင်ကြည်နူးရပါလိမ့်မယ်။—တ. ၈:၃၅။

“သတင်းကောင်း ဟောပြောသူ” ဖိလိပ္ပု

နှိပ်စက်ညှဉ်းပန်းမှုကြောင့် ခရစ်တော်ရဲ့ နောက်လိုက်တွေ ကွဲလွင့်သွားတဲ့အခါ ဖိလိပ္ပုဟာ ရှမာရိမြို့ကို ရောက်သွားတယ်။ “ဘုရားသခင်ရဲ့ တရားစကားကို ရှမာရိလူတွေ လက်ခံကြပြီဆိုတဲ့ သတင်းကို” ပထမရာစု အုပ်ချုပ်ရေးအဖွဲ့ဆီ ဖိလိပ္ပု ပြောပြပုံရတယ်။ ဒါကြောင့် “ဂျေရုဆလင်မြို့မှာ ရှိတဲ့ တမန်တော်တွေ ကြားတဲ့အခါ ပေတရုနဲ့ ယောဟန်ကို လွှတ်လိုက်” တယ်။ ရလဒ်အနေနဲ့ ယုံကြည်သူ လူသစ်တွေ သန့်ရှင်းသော စွမ်းအားတော် ဆုကျေးဇူး ရကြတယ်။—တ. ၈:၁၄-၁၇။

ရထားပေါ်မှာ အီသီယိုးပီးယား မိန်းမစိုးနဲ့အတူ ဖိလိပ္ပု ထိုင်နေ။

တမန်တော် အခန်းကြီး ၈ မှာ မှတ်တမ်းတင်ထားတဲ့ ဖြစ်ရပ်တွေ ပြီးနောက် ဖိလိပ္ပုအကြောင်း နောက်ထပ်တစ်ကြိမ်ပဲ ဖော်ပြတော့တယ်။ ရှမာရိမြို့မှာ ဖိလိပ္ပု စဟောပြီးနောက် အနှစ် ၂၀ လောက် ကြာသွားပြီ။ ဒါဟာ တမန်တော်ပေါလုနဲ့ ခရီးဖော်တွေရဲ့ တတိယ သာသနာပြုခရီးစဉ် အကုန်ပိုင်း ဖြစ်တယ်။ ဂျေရုဆလင်မြို့ဆီ ခရီးနှင်ရင်း ပတောလမဲမြို့ကို ပေါလုနဲ့ ခရီးဖော်တွေ ရောက်လာကြတယ်။ “နောက်တစ်နေ့မှာ ထွက်ခွာပြီး ကဲသရိမြို့ကို ရောက်လာတော့ သတင်းကောင်း ဟောပြောသူ ဖိလိပ္ပုရဲ့ အိမ်မှာ ဝင်ပြီး တည်းခိုကြတယ်။ သူဟာ ဂျေရုဆလင်မြို့မှာ တမန်တော်တွေ ရွေးချယ်ခဲ့တဲ့ အမျိုးသား ခုနစ်ယောက်ထဲက တစ်ယောက်အဝင် ဖြစ်တယ်။ သူ့မှာ အိမ်ထောင်မပြုသေးတဲ့ သမီး ၄ ယောက် ရှိတယ်။ သူတို့ဟာ ပရောဖက်မတွေ ဖြစ်တယ်” လို့ လုကာ ပြောတယ်။—တ. ၂၁:၈၊ ၉။

ဖိလိပ္ပုဟာ မိမိဟောတဲ့ဒေသမှာ အိမ်ထောင်ကျပြီး အခြေချခဲ့ပုံပဲ။ ဖိလိပ္ပုကို “သတင်းကောင်း ဟောပြောသူ” အဖြစ် လုကာ ရည်ညွှန်းတာ ထူးခြားတယ်။ ဒီအသုံးအနှုန်းကို သတင်းကောင်း မဟောရသေးတဲ့ ဒေသတွေမှာ သွားဟောဖို့ ဇာတိမြေကို စွန့်သွားသူတွေအတွက် ကျမ်းစာမှာ အသုံးပြုတယ်။ ဖိလိပ္ပုဟာ အမှုဆောင်လုပ်ငန်းမှာ ဇွဲထက်သန်ကြောင်း ထင်ရှားတယ်။ ဖိလိပ္ပုမှာ ပရောဖက်မ သမီးပျိုလေးဦး ရှိတယ် ဆိုတဲ့အချက်က ယေဟောဝါကို ချစ်ပြီး အမှုဆောင်ဖို့ မိသားစုကို သွန်သင်ပေးကြောင်း ထင်ရှားတယ်။

a ဒီမှာဖော်ပြထားတဲ့ ဖိလိပ္ပုဟာ ဒီစာအုပ် အခန်း ၅ မှာ ပါတဲ့ ဂျေရုဆလင်မြို့က ဂရိစကားပြော၊ ဟီဘရူးစကားပြော ခရစ်ယာန် မုဆိုးမတွေကို နေ့စဉ် အစာဝေဖို့ ခန့်အပ်ခံရတဲ့ “နာမည်ကောင်းရှိသူ . . . အမျိုးသား ၇ ယောက်” ထဲက တစ်ဦးပါ။ တမန်တော် ဖိလိပ္ပု မဟုတ်ဘူး။—တ. ၆:၁-၆။

b ပုံမှန်အားဖြင့် တပည့်သစ်တွေဟာ နှစ်ခြင်းခံချိန်မှာ သန့်ရှင်းသော စွမ်းအားတော်နဲ့ ဘိသိက်ပေးခံရတယ်။ စွမ်းအားတော် ရကြတယ်။ ဒါကြောင့် သူတို့ဟာ ကောင်းကင်မှာ ယေရှုနဲ့အတူ ဘုရင်တွေ၊ ပုရောဟိတ်တွေအဖြစ် အုပ်ချုပ်ဖို့ မျှော်လင့်ချက် ရှိတယ်။ (၂ ကော. ၁:၂၁၊ ၂၂။ ဗျာ. ၅:၉၊ ၁၀။ ၂၀:၆) ဒါပေမဲ့ ရှမာရိမြို့က ဒီတပည့်သစ်တွေဟာ နှစ်ခြင်းခံချိန်မှာ ဘိသိက်ပေး မခံရဘူး။ ပေတရုနဲ့ ယောဟန် လက်တင်ပြီးနောက်မှသာ သန့်ရှင်းသော စွမ်းအားတော်၊ စွမ်းအားတော်နဲ့ ဆက်နွှယ်တဲ့ အံ့ဖွယ် ဆုကျေးဇူးတွေ ရကြတယ်။

c အီသီယိုးပီးယားလူဟာ စိတ်ကူးပေါက်လို့ နှစ်ခြင်းခံလိုက်တာ မဟုတ်ဘူး။ ဂျူးဘာသာ ပြောင်းဝင်လာသူ ဖြစ်တဲ့အတွက် မေရှိယဆိုင်ရာ ပရောဖက်ပြုချက်တွေ အပါအဝင် ကျမ်းစာအသိပညာ အတော်အတန် သိထားတယ်။ အခု၊ ဘုရားရည်ရွယ်ချက်မှာ ယေရှုရဲ့ အခန်းကဏ္ဍကို သိသွားလို့ ချက်ချင်း နှစ်ခြင်းခံလိုက်တာ။

    မြန်မာ စာစောင်များ (၁၉၈၄-၂၀၂၅)
    ထွက်ပါ
    ဝင်ပါ
    • မြန်မာ
    • ဝေမျှပါ
    • နှစ်သက်ရာ ရွေးချယ်ပါ
    • Copyright © 2025 Watch Tower Bible and Tract Society of Pennsylvania
    • လိုက်နာရန် စည်းကမ်းများ
    • ကိုယ်ရေးလုံခြုံမှု မူဝါဒ
    • ကိုယ်ရေးလုံခြုံမှု ဆက်တင်မျာ
    • JW.ORG
    • ဝင်ပါ
    ဝေမျှပါ