ရှေ့ဆောင်စိတ်ဓာတ်တင်ပြပါ

၁။ ရှေ့ဆောင်စိတ်ဓာတ်ကို သင်မည်သို့ဖော်ပြမည်နည်း။

^၁ လောလောဆယ် ရှေ့ဆောင်လုပ်နိုင်သည်ဖြစ်စေ၊ မလုပ်နိုင်သည်ဖြစ်စေ နိုင်ငံတော်ကြေညာသူအားလုံးသည် ရှေ့ဆောင်စိတ်ဓာတ်တင်ပြနိုင်သည်။ သူတို့သည် ဟောပြော၍ တပည့်ဖြစ်စေကြလော့ဟူသောအမိန့်တော်ကို အလွန်အလေးထားကြ၏။ (မ. ၂၈:၁၉၊ ၂၀; တ. ၁၈:၅) သူတို့သည် လူတို့ကိုဂရုစိုက်ကာ မိမိတို့၏ဓမ္မအမှုပြီးမြောက်စေရန် ကိုယ်ကျိုးစွန့်ကြသည်။ (မ. ၉:၃၆; တ. ၂၀:၂၄) ယေဟောဝါ၏ကျေးကျွန်များသည် အခြားသူတို့အား သမ္မာတရားရရှိရန်ကူညီပေးဖို့ လိုအပ်သမျှကို လုပ်ဆောင်ရန် တလိုတလားရှိကြသည်။ (၁ ကော. ၉:၁၉-၂၃) ထိုသို့သောစိတ်ဓာတ်တင်ပြခဲ့သည့် ဧဝံဂေလိတရားဟောပြောသူဖိလိပ္ပု၏ ပုံသက်သေကို သုံးသပ်ကြည့်ကြစို့။

၂။ အကြီးအကဲများနှင့် ဓမ္မအမှုထမ်းများသည် ဓမ္မအမှုအတွက် ဖိလိပ္ပု၏စိတ်ထက်သန်မှုကို မည်သို့တုပနိုင်သနည်း။

^၂ ဟောပြောခြင်းနှင့် သွန်သင်ခြင်း– ဖိလိပ္ပုသည် ပထမရာစုအသင်းတော်တွင် ကြီးလေးသောတာဝန်များကို ထမ်းဆောင်ခဲ့သည်။ (တ. ၆:၁-၆) သို့သော် သူသည် အဓိကအားဖြင့် စိတ်ထက်သန်သော သတင်းကောင်းဟောပြောသူတစ်ဦးဖြစ်သည်။ (တ. ၈:၄၀) ထို့ကြောင့် ယနေ့ အကြီးအကဲများနှင့် ဓမ္မအမှုထမ်းများသည် မိမိတို့ရရှိထားသောတာဝန်များကို ထမ်းဆောင်စဉ် ဓမ္မအမှုတွင် အားတက်သရောဦးဆောင်ခြင်းဖြင့် ရှေ့ဆောင်စိတ်ဓာတ်တင်ပြနိုင်သည်။ ယင်းက အသင်းတော်၏စိတ်ဓာတ်ကို များစွာတက်ကြွစေသည်တကား!—ရော. ၁၂:၁၁။

၃။ စမ်းသပ်မှုများခံရသည့်အခါ ရှေ့ဆောင်စိတ်ဓာတ်ကို ကျွန်ုပ်တို့ မည်သို့တင်ပြနိုင်သနည်း။

^၃ သတေဖန်သေပြီးနောက် နှိပ်စက်ညှဉ်းပန်းမှုလှိုင်းဂယက်ကြောင့် တပည့်တော်များ အကြီးအကျယ် ဖရိုဖရဲဖြစ်ကုန်ကြသည်။ သို့သော် ဖိလိပ္ပုသည် ဆက်၍ဟောပြောကာ ရှမာရိလူမျိုးအလယ်တွင် လုပ်ငန်းစတင်ရာ၌ အဓိကအခန်းကဏ္ဍမှပါဝင်ခဲ့သူဖြစ်သည်။ (တ. ၈:၁၊ ၄-၆၊ ၁၂၊ ၁၄-၁၇) စမ်းသပ်မှုများခံရသည့်အခါ သတင်းကောင်းကို ဆက်လက်ကြေညာကာ ကျွန်ုပ်တို့တွေ့ရသူအားလုံးကို မျက်နှာမလိုက်ဘဲ ဟောပြောခြင်းဖြင့် သူ၏ပုံသက်သေကို တုပနိုင်သည်။—ယော. ၄:၉။

၄။ ဖိလိပ္ပုသည် သွန်သင်သူတစ်ဦးအနေနှင့် အဘယ်ပုံသက်သေထားခဲ့သနည်း။

^၄ ဘုရားသခင့်နှုတ်ကပါဌ်တော် သွန်သင်သူတစ်ဦးအနေနှင့် ဖိလိပ္ပု၏စွမ်းရည်ကို အဲသယောပိအမတ် ဘာသာပြောင်းသည့်မှတ်တမ်းတွင် တွေ့ရှိနိုင်သည်။ (တ. ၈:၂၆-၃၈) ကျမ်းစာကိုအသုံးပြုသည့်စွမ်းရည်နှင့် ‘ကျမ်းစာဖြင့် ကျိုးကြောင်းဆင်ခြင်’ နိုင်စွမ်းတို့ကို တိုးတက်စေခြင်းသည် ရှေ့ဆောင်စိတ်ဓာတ်တင်ပြသည့် နောက်တစ်နည်းဖြစ်၏။ (တ. ၁၇:၂၊ ၃၊ ကဘ) ဖိလိပ္ပုကဲ့သို့ ကျွန်ုပ်တို့သည် လူတို့အား တွေ့နိုင်သည့်နေရာတိုင်းနှင့် သင့်လျော်သည့်အခါတိုင်းတွင် သတင်းကောင်းဝေငှရန် ကြိုးစားကြသည်။

၅။ မိမိတို့၏သားသမီးများတွင် ရှေ့ဆောင်စိတ်ဓာတ်သွင်းပေးရန် ခရစ်ယာန်မိဘများအား အဘယ်အရာက ကူညီပေးနိုင်သနည်း။

^၅ မိသားစုနှင့် အသင်းတော်– ဖိလိပ္ပု၏သဘောထားနှင့် ပုံသက်သေသည် သူ၏သမီးများအတွက် လှုံ့ဆော်မှုဖြစ်စေခဲ့မည်မှာသေချာသည်။ (တ. ၂၁:၉) အလားတူပင်၊ မိမိတို့၏အသက်တာတွင် နိုင်ငံတော်အကျိုးစီးပွားကို အဓိကထားကြသော ခရစ်ယာန်မိဘများသည် မိမိတို့၏သားသမီးများအား ထိုအတိုင်းလုပ်ဆောင်ရန် အားပေးကြသည်။ တစ်ပတ်တာအလုပ်များ၍ ပင်ပန်းကြသော်လည်း အခြားသူများကို ထက်သန်စွာဟောပြောသည့် မိဘတစ်ဦးသည် ကလေးတစ်ဦး၏နှလုံးတွင် ထာဝစဉ်စွဲမှတ်စရာဖြစ်စေနိုင်သည်။—သု. ၂၂:၆။

၆။ ကျွန်ုပ်တို့၏အသင်းတော်ရှိ ရှေ့ဆောင်များအား ကျေးဇူးတင်လေးမြတ်ကြောင်း မည်သို့ပြနိုင်သနည်း။

^၆ ဖိလိပ္ပုသည် ယေဟောဝါ၏လုပ်ငန်းတွင် အသုံးတော်ခံခဲ့ကြသည့် ထက်သန်သောခရစ်ယာန်များဖြစ်သော ပေါလုနှင့် လုကာတို့ကို ဧည့်ဝတ်ပြုခဲ့သည်။ (တ. ၂၁:၈၊ ၁၀) ယနေ့ ထက်သန်သူများကို ကျေးဇူးတင်လေးမြတ်ကြောင်းနှင့် ထောက်ခံကြောင်း မည်သို့တင်ပြနိုင်သနည်း။ ကျွန်ုပ်တို့သည် ဓမ္မအမှုတွင် ပါဝင်သူနည်းသည့်နေ့တစ်နေ့၌ နံနက်ပိုင်း သို့မဟုတ် မွန်းလွဲပိုင်းတစ်ချိန်တွင် ရှေ့ဆောင်များနှင့်အတူ အမှုဆောင်ရန် ကမ်းလှမ်းနိုင်သည်။ (ဖိ. ၂:၄) ထို့ပြင် တည်ဆောက်မှုဖြစ်စေသောပေါင်းသင်းမှုပြုရန် သူတို့အား ကျွန်ုပ်တို့၏အိမ်များသို့ ဖိတ်ခေါ်နိုင်သည်။ ကျွန်ုပ်တို့၏အခြေအနေသည် မည်သို့ပင်ဖြစ်ပါစေ၊ ကျွန်ုပ်တို့အားလုံး ရှေ့ဆောင်စိတ်ဓာတ်ကို ကြိုးစားတင်ပြနိုင်ကြပါစေ။