ပရောဖက်ပြုချက်စာအုပ်

အနာဂတ်ကို လူတို့စိတ်ဝင်စားကြသည်။ မိုးလေဝသကြိုတင်ခန့်မှန်းချက်များမှသည် စီးပွားရေးအားသာအားနည်းချက်ပြစာရင်းများအထိ အကြောင်းများစွာနှင့်ပတ်သက်၍ အားထားလောက်ဖွယ် ဟောကိန်းများကို သူတို့ရှာဖွေကြသည်။ သို့သော် ကြိုတင်ခန့်မှန်းချက်နှင့်အညီ လုပ်ဆောင်လိုက်သည့်အခါ များသောအားဖြင့် စိတ်ပျက်လက်ပျက်ဖြစ်သွားရကြသည်။ ကျမ်းစာတွင် ဟောကိန်းများ သို့မဟုတ် ပရောဖက်ပြုချက်များ များစွာပါရှိသည်။ ထိုပရောဖက်ပြုချက်များသည် မည်မျှတိကျမှန်ကန်သနည်း။ ယင်းတို့သည် တင်ကြိုရေးသားထားသည့် သမိုင်းမှတ်တမ်းများလော။ သို့တည်းမဟုတ် ပရောဖက်ပြုချက်ပုံဖမ်းထားသည့် သမိုင်းမှတ်တမ်းများလော။

နိုင်ငံ့ခေါင်းဆောင် ကေတို (ဘီ.စီ.အီး. ၂၃၄-၁၄၉) က “ဗေဒင်ဆရာတစ်ယောက်နဲ့တစ်ယောက် တွေ့ကြတဲ့အခါ မရယ်ကြတာကို ကျုပ်အံ့သြမိတယ်ဗျာ” ဟုဆိုခဲ့သည်။^၁ အမှန်ပင်၊ ယနေ့ထိတိုင် လူများစွာတို့သည် လက္ခဏာဆရာများ၊ နက္ခတ်ဗေဒင်ဆရာများနှင့် အခြားအခြားသော ဗေဒင်ဆရာများအပေါ် သံသယဝင်နေကြသည်။ သူတို့၏ဟောကိန်းများသည် မရေရာသည့်စကားမျိုးဖြစ်လေ့ရှိပြီး အဓိပ္ပာယ်အမျိုးမျိုးဆောင်သည်။

သို့သော် ကျမ်းစာပါပရောဖက်ပြုချက်များကော အသို့နည်း။ သံသယဝင်စရာအကြောင်း ရှိပါသလော။ သို့မဟုတ် ယုံကြည်စိတ်ချစရာ အခြေအမြစ်ရှိသလော။

ပညာရှိခန့်မှန်းချက်များမျှသာမဟုတ်

အသိပညာကြွယ်သူများသည် ခေတ်ရေစီးကြောင်းကို မျက်စိရှင်ရှင်ထားကြည့်ကာ အနာဂတ်နှင့်ပတ်သက်ပြီး တိကျမှန်ကန်သော မှန်းဆချက်များကို ဖော်ထုတ်တင်ပြဖို့ ကြိုးစားကောင်းကြိုးစားကြမည်ဖြစ်သော်လည်း တစ်ချိန်လုံးမမှန်ကြပါ။ အနာဂတ်သိမ့်ခါမှုစာအုပ်က ဤသို့မှတ်ချက်ချသည်– “လူ့အဖွဲ့အစည်းတိုင်းသည် ဆက်တိုက်ဖြစ်ပေါ်နေသည့် ဖြစ်ဖွယ်ရှိသော အနာဂတ်များကိုမျှသာမက ဖြစ်နိုင်သော အနာဂတ်တစ်ပုံတစ်ပင်နှင့် ဖြစ်စေချင်သော အနာဂတ်များနှင့်ပတ်သက်သည့် သဘောထားကွဲလွဲမှုကိုပါ ရင်ဆိုင်ကြရသည်။ ၎င်းစာအုပ်တွင် ဤသို့ထပ်ဆင့်သည်– “မည်သူမျှ အနာဂတ်ကို လုံးလုံးလျားလျားမ ‘သိ’ နိုင်။ ကျွန်ုပ်တို့၏ယူဆချက်များကို စည်းစနစ်တကျဖြစ်စေခြင်း၊ ပို၍ပြင်းပြလာစေခြင်းနှင့် ယင်းတို့တွင် မည်သည်က ဖြစ်နိုင်ဖွယ်ရှိသည်ကို ဆုံးဖြတ်ရန်ကြိုးစားခြင်းတို့ကိုသာ ပြုနိုင်ပါသည်။”^၂

သို့သော် ကျမ်းရေးသူများသည် အနာဂတ်နှင့်စပ်လျဉ်းသော “ယူဆချက်များ” ကို “ဖြစ်နိုင်ဖွယ်ရာများဟုသတ်မှတ်” ခြင်းမျှမဟုတ်ပါ။ သူတို့၏ဟောကိန်းများကိုလည်း အဓိပ္ပာယ်အမျိုးမျိုးဆောင်သည့် မသဲကွဲသောအဆိုများအဖြစ်လည်း ပယ်မပစ်နိုင်ပါ။ ယင်းနှင့်ဆန့်ကျင်လျက် သူတို့၏ပရောဖက်ပြုချက်အများကို သူမတူအောင် ရှင်းရှင်းလင်းလင်း မြွက်ကြားခဲ့ကြသည့်အပြင် အတိအကျဖြစ်လေ့ရှိကာ မကြာခဏပင် မျှော်လင့်ထားသည်နှင့် လုံးဝဆန့်ကျင်ဘက်အရာကို ဟောကိန်းထုတ်ထားခြင်းဖြစ်သည်။ ရှေးဗာဗုလုန်မြို့အကြောင်း ကျမ်းစာတင်ကူးပြောထားသည့်အရာကို နမူနာအဖြစ်သုံးသပ်ပါလေ။

“ဖျက်ဆီးခြင်း၏တံမြက်စည်းဖြင့်လှည်း” ခံရမည်

ရှေးဗာဗုလုန်သည် “တိုင်းနိုင်ငံတို့၏ရတနာ” ဖြစ်လာလေသည်။ (ဟေရှာယ ၁၃:၁၉၊ အမေရိကန်ကျမ်းစာသစ်) ပြန့်ကျဲနေသော အဆိုပါမြို့သည် ပါရှန်ပင်လယ်ကွေ့မှသည် မြေထဲပင်လယ်အထိ ကုန်သွယ်ရေးလမ်းကြောင်းပေါ်တွင် အချက်အချာကျကျတည်ရှိသည်၊ အရှေ့နှင့်အနောက် ကုန်းကြောင်းရေကြောင်းနှစ်ခုစလုံးအတွက် ကူးသန်းရောင်းဝယ်ရေးဂိတ်တစ်ခုဖြစ်နေသည်။

ဘီ.စီ.အီး. သတ္တမရာစု၌ ဗာဗုလုန်သည် ဘေဘီလိုးနီးယန်းအင်ပါယာ၏ ဖြိုဖျက်၍မရနိုင်ပုံရှိသော မြို့တော်ကြီးဖြစ်ခဲ့သည်။ ထိုမြို့သည် ယူဖရေးတီးမြစ်ပေါ်တွင် ခွ၍ဆောက်ထားပြီး ၎င်းမြစ်ရေကို ကျယ်၍နက်သော ကျုံးနှင့် တူးမြောင်းကွန်ရက်တို့အတွက် အသုံးပြုခဲ့သည်။ ထို့အပြင် မြို့ကို ခံတပ်မျှော်စင်များစွာဖြင့် ကျားကန်ထားသည့် ထုကောင်းသော မြို့ရိုးနှစ်ထပ်စနစ်က အကာအကွယ်ပေးထားသည်။ ၎င်း၏မြို့သူမြို့သားများက စိတ်အေးလက်အေးရှိကြသည်မှာ အံ့ဩစရာမဟုတ်ပေ။

သို့သော် ဗာဗုလုန်သည် ဘုန်းတန်ခိုးလျှမ်းလျှမ်းမတောက်မီ ဘီ.စီ.အီး. အဋ္ဌမရာစုတွင် ပရောဖက်ဟေရှာယက ဗာဗုလုန်သည် “ဖျက်ဆီးခြင်း၏တံမြက်စည်းဖြင့်လှည်း” ခြင်းခံရမည်ဟု တင်ကူးပြောခဲ့သည်။ (ဟေရှာယ ၁၃:၁၉; ၁၄:၂၂၊ ၂၃) ဗာဗုလုန်ကျရှုံးမည့်ပုံ အတိအကျကိုလည်း ဟေရှာယဖော်ပြခဲ့သည်။ ဝင်ရောက်ကျူးကျော်သောစစ်တပ်သည် ကျုံးကဲ့သို့သော ခံတပ်၏အရင်းအမြစ်ဖြစ်သည့် မြစ်ရေများကို “ခန်းခြောက်” အောင်လုပ်ကာ မြို့ကို အားနည်းစေမည်ဖြစ်သည်။ ဟေရှာယသည် အောင်နိုင်သူ—ကြီးမြတ်သော ပါးရှားဘုရင် “ကုရု” ၏နာမည်ကိုပင် ဖော်ပြပေးခဲ့သည်၊ “ထိုသူရှေ့တွင် ဂိတ်များပွင့်နေကာ တံခါးများ မပိတ်ဘဲရှိနေမည်။”—ဟေရှာယ ၄၄:၂၇–၄၅:၂၊ အင်္ဂလိပ်ကျမ်းစာသစ်။

ယင်းတို့သည် ရဲရင့်စွာပြုရသော ဟောကိန်းများဖြစ်သည်။ သို့သော် ယင်းတို့ အမှန်ဖြစ်ပျက်ခဲ့သလော။ သမိုင်းက အဖြေပေးသည်။

‘စစ်တစ်ပွဲမျှ မနွှဲရ’

ဟေရှာယသည် မိမိ၏ပရောဖက်ပြုချက်ကို မှတ်တမ်းတင်ပြီး ရာစုနှစ်ခုအကြာ ဘီ.စီ.အီး. ၅၃၉၊ အောက်တိုဘာ ၅ ရက်နေ့ညတွင် မဟာကုရုလက်အောက်ရှိ မီဒို-ပါးရှားတပ်များသည် ဗာဗုလုန်အနီးတွင် တပ်ချထားသည်။ သို့သော် ဗာဗုလုန်လူမျိုးတို့သည် စိတ်အေးလက်အေးပင်။ ဂရိသမိုင်းဆရာ ဟီရိုဒိုးတပ်စ် (ဘီ.စီ.အီး. ပဉ္စမရာစု) ၏အဆိုအရ သူတို့တွင် နှစ်များစွာအတွက်သိုထားသည့် ရိက္ခာအလုံအလောက်ရှိသည်။^၃ သူတို့ကိုကာကွယ်ပေးဖို့ ယူဖရေးတီးမြစ်နှင့် ဗာဗုလုန်မြို့၏ခိုင်ခံ့သောမြို့ရိုးများလည်းရှိသည်။ မည်သို့ပင်ရှိပါစေ နဘိုနိုက်ဒတ်စ်ရာဇဝင်မှတ်တမ်းအရ ထိုညချင်းတွင်ပင် “ကုရု၏တပ်သည် ဗာဗုလုန်ကို စစ်မနွှဲလိုက်ရဘဲ ဝင်ရောက်” ခဲ့သည်။ မည်သို့ဖြစ်နိုင်ခဲ့သနည်း။

မြို့တွင်း၌ လူများသည် “ပွဲခံ၍ ကခုန်ပျော်ပါးနေကြ” သည်ဟု ဟီရိုဒိုးတပ်စ်ကရှင်းပြသည်။^၅ မြို့ပြင်တွင်မူ ကုရုသည် ယူဖရေးတီးမြစ်ရေများကို ရေလွှဲလိုက်သည်။ ရေတိမ်လာသည့်အခါ သူ၏တပ်သည် သူတို့၏ပေါင်အထိရေရှိသည့် မြစ်ကြမ်းပြင်အတိုင်း ချီတက်ခဲ့ကြသည်။ မြင့်မားသည့်မြို့ရိုးများကို ဖြတ်သန်းချီတက်ကာ “မြစ်ဘက်တွင်ဖွင့်ထားသည့် ဂိတ်ဝများ” ဟု ဟီရိုဒိုးတပ်စ်ကင်ပွန်းတပ်သည့် နမော်နမဲ့ဖွင့်ထားသည့် ဂိတ်ဝများအတိုင်း ဝင်ရောက်ခဲ့ကြသည်။^၆ (ဒံယေလ ၅:၁-၄; ယေရမိ ၅၀:၂၄; ၅၁:၃၁၊ ၃၂ နှိုင်းယှဉ်။) ဇီနိုဖုန်း (ဘီ.စီ.အီး. ၄၃၁ ခန့်မှ ၃၅၂ ခန့်အထိ) အပါအဝင် အခြားသမိုင်းပညာရှင်များအပြင် ရှေးဟောင်းသုတေသနပညာရှင်များတွေ့ရှိထားသည့် သုံးထောင့်ချွန်စာချပ်များကပါ ဗာဗုလုန်သည် ကုရုလက်တွင်းသို့ ရုတ်တရက်ကျသွားကြောင်း အခိုင်အမာတင်ပြသည်။^၇

သို့ဖြင့် ဗာဗုလုန်နှင့်ပတ်သက်သည့် ဟေရှာယပရောဖက်ပြုချက်သည် ပြည့်စုံခဲ့ပါသည်။ ယင်းသည်ဟုတ်မှဟုတ်ပါ၏လော။ ယင်းသည် ဟောကိန်းတစ်ခုမဟုတ်ဘဲ အမှန်မှာ ဖြစ်ပျက်ပြီးနောက်မှရေးသားခြင်းမဖြစ်နိုင်ပေလော။ ကျမ်းစာပါအခြားပရောဖက်ပြုချက်များနှင့်ပတ်သက်၍လည်း အလားတူမေးနိုင်ပါသည်။

ပရောဖက်ပြုချက်ပုံဖမ်းထားသည့် သမိုင်းမှတ်တမ်းလော

ဟေရှာယအပါအဝင် ကျမ်းစာပရောဖက်တို့သည် ပရောဖက်ပြုချက်ပုံထွက်စေရန် ပြန်ပြင်ရေးရိုးမှန်လျှင် ဤသူများသည် လည်ဝယ်သော ကလိမ်ကျသူများမှလွဲ၍အခြားမဖြစ်နိုင်ပေ။ သို့သော် ဤသို့သူတို့ကလိမ်ကျခြင်း၏ရည်ရွယ်ချက်ကား အဘယ်ဖြစ်မည်နည်း။ မိမိတို့ကို လာဘ်ထိုး၍မရနိုင်ကြောင်း စစ်မှန်သောပရောဖက်တို့က မဆိုင်းမတွပင် အသိပေးခဲ့ကြသည်။ (၁ ဓမ္မရာဇဝင် ၁၂:၃; ဒံယေလ ၅:၁၇) ထို့အပြင် (ပရောဖက်များစွာပါဝင်သော) ကျမ်းရေးသူများသည် အရှက်ရစေသော မိမိတို့၏အမှားများကိုပင် တင်ပြဖို့အသင့်ရှိသည့် ယုံကြည်စိတ်ချထိုက်သော အမျိုးသားများဖြစ်ကြောင်း မငြင်းသာသည့်သာဓကကို ကျွန်ုပ်တို့သုံးသပ်ခဲ့ပြီးပြီဖြစ်သည်။ ဤသို့သော လူစားမျိုးသည် သမိုင်းကို ပရောဖက်ပြုချက်ပုံထွက်စေရန် ကလိမ်ကျမှုများကို ပိပိရိရိပြုမည့် အလားအလာမရှိနိုင်ပေ။

သုံးသပ်စရာ နောက်တစ်ခုရှိပါသေးသည်။ ကျမ်းစာပရောဖက်ပြုချက်အများတွင် ယဇ်ပုရောဟိတ်နှင့် ဘုရင်များအပါအဝင် ပရောဖက်ပြုသူတို့၏လူမျိုးရင်းနှင့်ပတ်သက်ပြီး ပြင်းထန်သည့် စွပ်စွဲရှုတ်ချစကားများပါရှိသည်။ ဥပမာ၊ ဟေရှာယသည် သူ့ခေတ်ရှိ ဣသရေလလူမျိုးတို့—ခေါင်းဆောင်ပိုင်းကော ပြည်သူများပါ—၏အလွန်ဆိုးရွားသော အကျင့်ပျက်အခြေအနေကို ရှုတ်ချပြောဆိုခဲ့သည်။ (ဟေရှာယ ၁:၂-၁၀) အခြားပရောဖက်များမူ ယဇ်ပုရောဟိတ်တို့၏အပြစ်များကို အားမာန်ပါပါဖြင့် ဖော်ထုတ်ခဲ့ကြသည်။ (ဇေဖနိ ၃:၄; မာလခိ ၂:၁-၉) သူတို့သည် မိမိ၏လူမျိုးရင်းတစ်ဖက်၌ တွေးမိသမျှ အပြင်းထန်ဆုံးအပြစ်တင်စကားများပါဝင်သည့် ပရောဖက်ပြုချက်များကို သူတို့အဘယ့်ကြောင့် လုပ်ကြံတင်ပြကြကြောင်းနှင့် ယဇ်ပုရောဟိတ်တို့သည် ဤကဲ့သို့သောစဉ်းလဲမှုမျိုးတွင် အဘယ်ကြောင့် ပူးပေါင်းလိုက်နာကြသည်ကို နားလည်ရခက်နေသည်။

ထို့အပြင် ထိုပရောဖက်တို့သည် ကလိမ်ကျသူများသာဖြစ်ပါမူ ဤကဲ့သို့သော လိမ်လည်တုပမှုကို အထမြောက်အောင် မည်သို့စွမ်းဆောင်နိုင်ခဲ့မည်နည်း။ ဣသရေလနိုင်ငံတွင် စာပေတတ်ကျွမ်းမှုကို အားပေးသည်။ ကလေးများကို ငယ်ငယ်ကတည်းက အရေးအဖတ်သင်ပေးသည်။ (တရားဟောရာ ၆:၆-၉) ကျမ်းစာကို မိမိဘာသာဖတ်ရှုဖို့ တိုက်တွန်းသည်။ (ဆာလံ ၁:၂) ပတ်စဉ်ဥပုသ်နေ့၌ တရားဇရပ်များတွင် ကျမ်းစာကို လူအများရှေ့ဖတ်ခြင်းလည်းရှိသည်။ (တမန်တော် ၁၅:၂၁) ကျမ်းစာကို ကောင်းကောင်းကျွမ်းပြီး စာတတ်ပေတတ်နိုင်ငံတစ်နိုင်ငံသည် ဤကဲ့သို့သောလိမ်လည်မှုမျိုးဖြင့် လှည့်စားခံလိုက်ရသည်ဟုဆိုခြင်းမှာ ဖြစ်နိုင်ဖွယ်မရှိပေ။

ထို့အပြင် ဗာဗုလုန်ကျဆုံးခြင်းဆိုင်ရာ ဟေရှာယ၏ပရောဖက်ပြုချက်တွင် သိစရာရှိပါသေးသည်။ ယင်း၌ ပြည့်စုံပြီးနောက်မှရေးသားခြင်း လုံးဝမဖြစ်နိုင်သည့် အသေးစိတ်အချက်တစ်ချက်ပါဝင်သည်။

‘ထိုမြို့၌ အဘယ်သူမျှမနေရ’

ဗာဗုလုန်ကျဆုံးပြီးနောက် မည်သည့်အရာဖြစ်ပျက်လာမည်နည်း။ ဟေရှာယက “ထိုမြို့၌ကာလအစဉ်၊ လူမျိုးအဆက်ဆက် အဘယ်သူမျှမနေရ။ ထိုမြို့၌ အာရပ်လူသည်တဲကိုမျှမဆောက်ရ။ သိုးထိန်းတို့သည် သိုးခြံကိုမျှမလုပ်ရကြ” ဟုတင်ကူးပြောခဲ့သည်။ (ဟေရှာယ ၁၃:၂၀) ဤကဲ့သို့သော နေရာကောင်းတွင်တည်ရှိသည့် မြို့တစ်မြို့သည် ထာဝစဉ်လူသူကင်းမဲ့သွားမည်ဟု စကားအပိုအလိုမပါဘဲပြောခြင်းသည် ထူးဆန်းနေပုံရပေမည်။ ဟေရှာယ၏စကားများသည် လွင်တီးခေါင်ဗာဗုလုန်ကို သူတွေ့ပြီးမှ ရေးသားခဲ့ခြင်း ဖြစ်နိုင်ပါမည်လော။

ကုရုလွဲပြောင်းတာဝန်ယူပြီးနောက် လူနေထိုင်သော ဗာဗုလုန်သည် တန်ခိုးမှေးမှိန်သွားသော်လည်း ရာစုနှစ်နှင့်ချီ၍ ဆက်တည်ရှိနေသေးသည်။ ပင်လယ်သေကျမ်းလိပ်များတွင် ဘီ.စီ.အီး. ဒုတိယရာစုနေ့စွဲတပ်ထားသည့် ဟေရှာယကျမ်းတစ်စောင်လုံး၏ မိတ္တူတစ်စောင်ပါရှိကြောင်း သတိရပါ။ ဤစာလိပ်ကို ကူးယူသည့်အချိန်ခန့်တွင် ပါသီးယန်းတို့က ဗာဗုလုန်ကို ထိန်းချုပ်သိမ်းပိုက်ခဲ့သည်။ စီ.အီး. ပထမရာစု၌ ဗာဗုလုန်တွင် အခြေချနေထိုင်သည့် ဂျူးများရှိနေရာ ကျမ်းရေးသူ ပေတရုသည် ထိုမြို့သို့ သွားရောက်လည်ပတ်ခဲ့သည်။ (၁ ပေတရု ၅:၁၃) ထိုအချိန်တွင် ပင်လယ်သေဟေရှာယကျမ်းလိပ်တည်ရှိခဲ့သည်မှာ အနှစ်နှစ်ရာနီးပါးကြာပြီဖြစ်သည်။ ထို့ကြောင့် စီ.အီး. ပထမရာစုတွင် ဗာဗုလုန်သည် လုံးလုံးပျက်ပြုန်းမသွားသေးဘဲတည်ရှိနေဆဲဖြစ်သော်လည်း ဟေရှာယကျမ်းမှာမူ ထိုအချိန်မတိုင်မီကြာမြင့်စွာကတည်းက ရေးသားပြီးစီးခဲ့သည်။a

တင်ကူးပြောထားသည့်အတိုင်း ဗာဗုလုန်သည် နောက်ဆုံးတွင် “ကျောက်ပုံများ” သာဖြစ်သွားတော့သည်။ (ယေရမိ ၅၁:၃၇၊ ကဘ) ဟေဗြဲကျမ်းဂန်ပညာရှင် ဂျရုမ်း (စီ.အီး. စတုတ္ထရာစု) အဆိုအရ သူ့အချိန်တွင် ဗာဗုလုန်သည် “သားရဲမျိုးစုံ” ကျက်စားရာ အမဲလိုက်ကွင်းတစ်ခု ဖြစ်နေသည်။ ဗာဗုလုန်သည် ယနေ့အချိန်အထိ လူသူကင်းမဲ့လျက်ရှိသည်။

ဗာဗုလုန်မြို့ လူဆိတ်ညံရာဖြစ်သွားခြင်းကို ဟေရှာယ လုံးဝမြင်မသွားခဲ့ရပါ။ သို့သော် ယနေ့ အီရတ်နိုင်ငံ ဘက်ဂဒက်မြို့တောင်ဘက် မိုင် ၅၀ ခန့်အကွာရှိ တစ်ချိန်က တန်ခိုးကြီးမြို့၏အပျက်အယွင်းများက “ထိုမြို့၌ . . . အဘယ်သူမျှမနေရ” ဟူသည့် သူ၏စကားများပြည့်စုံကြောင်း အသံတိတ်သက်သေခံနေသည်။ ကမ္ဘာလှည့်ခရီးသည်များအတွက် ဆွဲဆောင်မှုတစ်ခုအဖြစ် ဗာဗုလုန်ကို တစ်နည်းနည်းဖြင့် ပြန်ပြုပြင်ခြင်းက ဧည့်သည်တော်များကို ဆွဲဆောင်နိုင်ကောင်းသော်လည်း ဗာဗုလုန်၏ “သားမြေး” တို့မူကား ထာဝစဉ်အစပျောက်သွားလေပြီ။—ဟေရှာယ ၁၃:၂၀; ၁၄:၂၂၊ ၂၃။

ထို့ကြောင့် ပရောဖက်ဟေရှာယသည် မည်သည့် အနာဂတ်အဖြစ်အပျက်တစ်ခုခုနှင့်မဆို အံဝင်သွားစေနိုင်သည့် မသဲကွဲသော ဟောကိန်းများကို မမြွက်ကြားခဲ့ပါ။ သမိုင်းမှတ်တမ်းကို ပရောဖက်ပြုချက်ပုံထွက်စေရန် ပြုပြင်ရေးသားခဲ့ခြင်းလည်းမရှိပါ။ စဉ်းစားကြည့်ပါလေ– ကလိမ်ကျသူတစ်ဦးသည် အင်အားကြီးမားလှသည့် ဗာဗုလုန်မြို့တွင် မည်သည့်အခါမျှ လူနေရတော့မည်မဟုတ်ဟူသည့် မိမိလုံးဝချုပ်ကိုင်မရသောအခြင်းအရာတစ်ခုကို အဘယ်ကြောင့် အရဲစွန့်၍ “ပရောဖက်ပြုနေ” ပါမည်နည်း။

ဗာဗုလုန်ကျဆုံးခြင်းဆိုင်ရာ ဤပရောဖက်ပြုချက်သည် ကျမ်းစာထဲမှ နမူနာတစ်ခုမျှသာဖြစ်သည်။b ကျမ်းစာပရောဖက်ပြုချက်များပြည့်စုံခြင်းက ယင်းစာအုပ်သည် လူ့ထက်သာလွန်မြင့်မြတ်သောအရင်းအမြစ်မှ လာရမည်ဟု ညွှန်ပြကြောင်း လူအများသိမြင်ရကြသည်။ ယုတ်စွအဆုံး ဤပရောဖက်ပြုချက်စာအုပ်ကို ဆန်းစစ်ထိုက်ကြောင်း သင်သဘောတူပေမည်။ သေချာသည့်အရာတစ်ခုမှာ မျက်မှောက်ခေတ်ဗေဒင်ဆရာများ၏ မသဲကွဲသော၊ စိတ်ချောက်ချားဖွယ်ကောင်းသော ဟောကိန်းများသည် ရှင်းလင်းပြီး အပိုအလိုမပါသည့် တိကျသော ကျမ်းစာပါ ပရောဖက်ပြုချက်များနှင့် အခြားကြီးခြားပါသည်။

[အောက်ခြေမှတ်ချက်များ]

[စာမျက်နှာ ၂၈ ပါ အကျဉ်းဖော်ပြချက်]

ကျမ်းရေးသူများသည် တိကျသော ပရောဖက်များလော၊ ကျင်လည်သော ကလိမ်ကျသူများလော

[စာမျက်နှာ ၂၉ ပါ ရုပ်ပုံ]

ရှေးဗာဗုလုန်၏အပျက်အယွင်းများ