ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
ဇန်နဝါရီ ၃–၉
ကျမ်းစာထဲက အဖိုးတန်ဘဏ္ဍာများ | တရားသူကြီး ၁၅–၁၆
“သစ္စာဖောက်တာက ရှက်စရာကောင်းတဲ့ လုပ်ရပ် ဖြစ်”
သစ္စာမဲ့ခြင်း နောက်ဆုံးကာလရဲ့ နိမိတ်ဆိုးတစ်ခု
၄ ပထမဆုံး ပုံနမူနာက တရားသူကြီး ရှံဆုန် ချစ်ခဲ့တဲ့ မာယာများတဲ့ ဒေလိလ ဖြစ်တယ်။ ရှံဆုန်က ဘုရားသခင့် လူမျိုးကို ဦးဆောင်ပြီး ဖိလိတ္တိလူတွေကို တိုက်ခိုက်ဖို့ စီစဉ်ထားတယ်။ ဒေလိလက ရှံဆုန်ကို သစ္စာရှိရှိနဲ့ မချစ်ဘူးဆိုတာ ဖိလိတ္တိမင်းကြီး ငါးပါး သိထားပုံရတယ်။ ဒါနဲ့ သူတို့က ရှံဆုန် ဘာကြောင့် အားရှိတယ်ဆိုတဲ့ လျှို့ဝှက်ချက်ကို သိအောင် လုပ်ပေးရင် ငွေအများကြီး ပေးမယ်လို့ ဒေလိလကို စည်းရုံးသိမ်းသွင်းခဲ့တယ်၊ ဒါမှ ရှံဆုန်ကို သူတို့ သတ်လို့ ရမယ်။ ငွေမက်တဲ့ ဒေလိလက သူတို့ ပြောတာကို လက်ခံလိုက်တယ်။ ဒါပေမဲ့ ရှံဆုန်ရဲ့ လျှို့ဝှက်ချက်ကို သိဖို့ ဒေလိယ သုံးကြိမ်တိတိ ကြိုးစားခဲ့တာ မအောင်မြင်ခဲ့ဘူး။ ဒေလိလက “နေ့တိုင်းပူဆာ” လို့ ရှံဆုန် သေချင်စိတ်တောင် ပေါက်လာတယ်။ ဒါနဲ့ ရှံဆုန်က သူ့ရဲ့ ဆံပင်တွေကို တစ်ခါမှ မရိတ်သေးဘူး၊ ဆံပင်တွေကို ရိတ်လိုက်ရင် သူ့မှာ ရှိတဲ့ အားတွေ ပျောက်ဆုံးကုန်မယ်လို့ ပြောပြလိုက်တယ်။ အခု ဒေလိလက လျှို့ဝှက်ချက်ကို သိသွားပြီ ဖြစ်လို့ ရှံဆုန် သူ့ပေါင်ပေါ်မှာ အိပ်နေတုန်း လူတစ်ယောက်ကို ခေါ်ပြီး ဆံပင်တွေကို ရိတ်ခိုင်းလိုက်တယ်။ အဲဒီနောက် ရှံဆုန်ကို လုပ်ချင်သလို လုပ်ဖို့ ရန်သူတွေလက်ထဲ အပ်လိုက်တယ်။ (သူကြီး. ၁၆:၄၊ ၅၊ ၁၅-၂၁) ဘယ်လောက်တောင် ရက်စက်ကောက်ကျစ်လိုက်သလဲ။ ဒေလိလက ငွေမက်တဲ့အတွက်ကြောင့် သူ့ကို ချစ်တဲ့သူကို သစ္စာဖောက်ခဲ့တယ်။
တရားသူကြီးမှတ်စာမှ ပေါ်လွင်ချက်များ
၁၄:၁၆၊ ၁၇; ၁၆:၁၆။ မျက်ရည်ခံထိုး၊ မြည်တွန်တောက်တီးကာ ဖိအားပေးခြင်းသည် ဆက်ဆံရေးကို ပျက်စီးစေနိုင်သည်။—သု. ၁၉:၁၃; ၂၁:၁၉။
သစ္စာမဲ့ခြင်း နောက်ဆုံးကာလရဲ့ နိမိတ်ဆိုးတစ်ခု
၁၅ အိမ်ထောင်သည်တွေက မိမိတို့ရဲ့ အိမ်ထောင်ဖက်အပေါ် ဆက်သစ္စာရှိဖို့ ဘယ်လို လုပ်နိုင်သလဲ။ သမ္မာကျမ်းစာမှာ ဒီလိုပြောတယ်– “အသက်အရွယ် ပျိုစဉ်ကာလ ပေါင်းဖော်သော မယား [သို့မဟုတ် လင်] နှင့်အတူ ပျော်မွေ့လော့၊” “သင် ချစ်သော မယား [သို့မဟုတ် လင်] နှင့် ရွှင်လန်းစွာ အသက်ကာလကို လွန်စေလော့။” (သု. ၅:၁၈; ဒေ. ၉:၉) အိမ်ထောင်ဖက် နှစ်ဦးစလုံး အသက်ကြီးလာတာနဲ့အမျှ ကိုယ်ခန္ဓာအရရော၊ စိတ်လှုပ်ရှားမှုမှာပါ ခိုင်မြဲတဲ့ ရင်းနှီးမှုနှောင်ကြိုး ရှိဖို့ အတတ်နိုင်ဆုံး လုပ်ဆောင်ရမှာ ဖြစ်တယ်။ ဒါက ဘာကို ဆိုလိုတာလဲ။ အိမ်ထောင်သည် မောင်နှံတွေက ကြင်နာမှု ပြခြင်းအားဖြင့် တစ်ဦးနဲ့ တစ်ဦး ရင်းရင်းနှီးနှီး နေရမှာ ဖြစ်တယ်၊ တစ်ယောက်နဲ့ တစ်ယောက် လိုအပ်ရာတွေကို ဂရုစိုက်ပေးရမှာ ဖြစ်တယ်၊ တစ်ယောက်ကို တစ်ယောက် အချိန်ပေးရမှာ ဖြစ်တယ်။ သူတို့ရဲ့ အိမ်ထောင်နဲ့ သူတို့နဲ့ ယေဟောဝါရဲ့ ဆက်ဆံရေးကို ကာကွယ်ဖို့အတွက် ကြိုးစားရမှာ ဖြစ်တယ်။ အဲဒီလိုလုပ်ရာမှာ အတူတကွ ကျမ်းစာ လေ့လာဖို့၊ အမှုဆောင်လုပ်ငန်းမှာ အတူ ပါဝင်ဖို့၊ ယေဟောဝါရဲ့ ကောင်းချီး ရဖို့ အတူ ဆုတောင်းဖို့ လိုတယ်။
ယေဟောဝါအပေါ် သစ္စာရှိပါ
၁၆ အသင်းတော်မှာ ကြီးလေးတဲ့ အမှားတွေကို ကျူးလွန်ပြီး ပြင်းပြင်းထန်ထန် ဆုံးမခံရသူတွေ ရှိတယ်၊ ဒါက သူတို့ကို ယုံကြည်ခြင်း ခိုင်ခံ့လာစေဖို့ ဖြစ်တယ်။ (တိ. ၁:၁၃) တချို့သူတွေက သူတို့ရဲ့ အမူအကျင့်ကြောင့် အသင်းတော်ကနေ နှင်ထုတ်ခံရကြတယ်။ “ဆုံးမခြင်းအားဖြင့် လေ့ကျင့်ခံရသူတို့” အတွက် ဆုံးမမှုက ဘုရားသခင်နဲ့ သူတို့ရဲ့ ဆက်ဆံရေးကို ပြန်ကောင်းလာစေနိုင်တယ်။ (ဟေဗြဲ ၁၂:၁၁) ကျွန်ုပ်တို့မှာ နှင်ထုတ်ခံထားရတဲ့ ဆွေမျိုး ဒါမှမဟုတ် ရင်းနှီးတဲ့ မိတ်ဆွေ ရှိတယ်ဆိုရင် ဘယ်လို လုပ်မလဲ။ နှင်ထုတ်ခံရသူကို သစ္စာရှိမလား၊ ဘုရားသခင်ကို သစ္စာရှိမလားဆိုတဲ့ စမ်းသပ်မှု ကြုံတွေ့ရတဲ့အခါ ကျွန်ုပ်တို့ ဘယ်လိုလုပ်သလဲ။ ကျွန်ုပ်တို့က ယေဟောဝါကို သစ္စာရှိသင့်တယ်။ နှင်ထုတ်ခံထားရသူ ဘယ်သူနဲ့မှ ပေါင်းသင်းဆက်ဆံမှု မပြုပါနဲ့ဆိုတဲ့ ကိုယ်တော့်ပညတ်ကို လိုက်နာနေသလားဆိုတာ ကိုယ်တော် ကြည့်နေတယ်။—၁ ကောရိန္သု ၅:၁၁-၁၃ ကိုဖတ်ပါ။
ဘုရားရေးရာ ရတနာ
ယေဟောဝါ ပေးသော ခွန်အားဖြင့် ရှံဆုန် အောင်ပွဲဆင်
ရှံဆုန်သည် ဖိလိတ္တိလူတို့ကို ဆန့်ကျင်တိုက်ခိုက်ရန် မိမိ၏ ရည်မှန်းချက်ကို တစိုက်မတ်မတ် ပြုလုပ်ခဲ့သည်။ ဂါဇမြို့ရှိ ပြည့်တန်ဆာတစ်ဦး၏ အိမ်၌ သူ နေထိုင်ခဲ့ခြင်းမှာ ဘုရားသခင်၏ ရန်သူများကို ဆန့်ကျင်တိုက်ခိုက်ရန် ဖြစ်၏။ ရန်သူ့မြို့တွင် တစ်ညတာ တည်းခိုဖို့ လိုခဲ့ရာ ပြည့်တန်ဆာအိမ်၌သာ တည်းခိုနိုင်မည် ဖြစ်၏။ အကျင့်ယိုယွင်းဖို့ ရှံဆုန် မရည်ရွယ်ခဲ့ပေ။ ညသန်းခေါင်ယံတွင် ပြည့်တန်ဆာအိမ်မှ သူ ထွက်ခွာပြီး မြို့တံခါးရွက်တို့ကို တံခါးတိုင်၊ ကန့်လန့်ကျင်နှင့်တကွ ယူ၍ ၃၇ မိုင်ခန့် ဝေးသည့် ဟေဗြုန်မြို့ အနီးရှိ တောင်ပေါ်အထိ သယ်ဆောင်သွားလေ၏။ ထိုသို့ပြုရန် ဘုရားသခင် နှစ်သက်လက်ခံတော်မူ၍ သူ့ကို အစွမ်းခွန်အား ပေးခဲ့သည်။—တရားသူကြီး ၁၆:၁-၃။
ဇန်နဝါရီ ၁၀–၁၆
ကျမ်းစာထဲက အဖိုးတန်ဘဏ္ဍာများ | တရားသူကြီး ၁၇–၁၉
“ဘုရားသခင့် ပညတ်တွေကို မနာခံရင် ပြဿနာတွေ ကြုံတွေ့ရ”
it-2 ၃၉၀-၃၉၁
မိက္ခာ
၁။ ဧဖရိမ် အမျိုးသား။ ပညတ်တော် ဆယ်ပါးထဲက ရှစ်ခုမြောက် ပညတ် (ထွ ၂၀:၁၅) ကို ချိုးဖောက်ပြီး မိခင်ဆီက ငွေစ ၁,၁၀၀ ကို ခိုးယူခဲ့သူ ဖြစ်တယ်။ အပြစ်ကို ဝန်ခံပြီး ငွေပြန်ပေးတဲ့အခါ မိခင်က “ငွေတွေကို သားအတွက် ရည်စူးပြီး ယေဟောဝါဘုရားဆီ ဆက်ကပ်လိုက်မယ်။ ပြီးတော့ ဒီငွေစနဲ့ ရုပ်တုတွေ လုပ်ပြီး သားကို အမေ ပြန်ပေးမယ်” လို့ ပြောတယ်။ အဲဒီနောက် မိခင်က ငွေစ ၂၀၀ ကို ယူပြီး ပန်းထိမ်သမားကို အပ်တယ်။ ပန်းထိမ်သမားက “ထွင်းထားတဲ့ ရုပ်တုနဲ့ သွန်းထားတဲ့ ရုပ်တု” လုပ်ပေးတော့ အဲဒီရုပ်တုတွေကို မိက္ခာရဲ့ အိမ်မှာ ထားတယ်။ မိက္ခာရဲ့ အိမ်မှာ “ဘုရားခန်း” တစ်ခန်း ရှိတယ်။ သူက သင်တိုင်းတစ်ခုအပြင် တေရပ်ရုပ်တုတွေကိုလည်း လုပ်ပြီး သူ့သားတစ်ယောက်ကို ပုရောဟိတ် ခန့်လိုက်တယ်။ အဲဒီအစီအစဉ်က ယေဟောဝါကို ဂုဏ်တင်ပုံ ရှိပေမဲ့ တကယ်ကို မသင့်တော်ဘူး။ ရုပ်တုကို ဝတ်မပြုနဲ့ ဆိုတဲ့ ပညတ်ကို ချိုးဖောက်တာ ဖြစ်တယ်။ (ထွ ၂၀:၄-၆) ယေဟောဝါရဲ့ တဲတော်နဲ့ ပုရောဟိတ် အစီအစဉ်ကို မလေးမခန့် လုပ်တာ ဖြစ်တယ်။ (သူ ၁၇:၁-၆။ တရ ၁၂:၁-၁၄) နောက်ပိုင်း မိက္ခာက မောရှေရဲ့ မြေး၊ ဂေရရှုံရဲ့ သား ယောနသန်ကို အိမ်မှာ ခေါ်ထားပြီး အဲဒီ လေဝိအမျိုးသား လူငယ်ကို ပုရောဟိတ် လုပ်ဖို့ ငှားလိုက်တယ်။ (သူ ၁၈:၄၊ ၃၀) “ယေဟောဝါဘုရား ကောင်းချီးပေးမှာ သေချာတယ်” လို့ ပြောပြီး သူ့အစီအစဉ်ကို ကျေနပ်နေတာက မှားတယ်။ (သူ ၁၇:၇-၁၃) ယောနသန်ဟာ အာရုန်ကနေ ဆင်းသက်လာတာ မဟုတ်တဲ့အတွက် ပုရောဟိတ်တာဝန်ကို ထမ်းဆောင်ခွင့် မရှိဘူး။ မိက္ခာဟာ မှားပြီးရင်း ထပ်မှားပြန်တယ်။—တလ ၃:၁၀။
it-2 ၃၉၁ ပိုဒ်. ၂
မိက္ခာ
သိပ်မကြာခင်မှာ မိက္ခာက အိမ်နီးချင်းတွေကို စုပြီး ဒန်အမျိုးသားတွေနောက်ကနေ လိုက်တယ်။ သူတို့ကို မီတဲ့အခါ ဒန်အမျိုးသားတွေက ဘာကိစ္စရှိလို့လဲလို့ မေးတော့ မိက္ခာက “ကျုပ်ရဲ့ ရုပ်တုတွေကို ခင်ဗျားတို့ ယူသွားပြီး ပုရောဟိတ်ကိုပါ ခေါ်သွားမှတော့ ဘာကျန်တော့မှာလဲ” လို့ ပြန်ပြောတယ်။ ဒန်အမျိုးသားတွေက မိက္ခာကို အော်ကြီးဟစ်ကျယ် လုပ်ပြီး သူတို့နောက် ဆက်လိုက်ရင် အသက်ဆုံးရှုံးမယ်လို့ သတိပေးတယ်။ မိက္ခာက ဒန်အမျိုးသားတွေ ပိုအင်အားကြီးမှန်း သိတော့ အိမ်ပြန်သွားတယ်။ (သူ ၁၈:၂၂-၂၆) ဒန်အမျိုးသားတွေက လဲရှမြို့ကို တိုက်ခိုက်ပြီး မီးရှို့ပစ်တယ်။ အဲဒီနေရာမှာ ဒန်မြို့ကို တည်ဆောက်ပြီး နေထိုင်ကြတယ်။ ယောနသန်နဲ့ သားမြေးတွေက ဒန်အနွယ်အတွက် ပုရောဟိတ်တွေ ဖြစ်လာတယ်။ “ရှိလောမြို့မှာ စစ်မှန်တဲ့ ဘုရားသခင်ရဲ့ အိမ်တော် တည်ရှိနေချိန် တစ်လျှောက်လုံး မိက္ခာ လုပ်တဲ့ ရုပ်တုဟာ ဒန်မြို့မှာပဲ ဆက်ရှိနေတယ်။”—သူ ၁၈:၂၇-၃၁။
ဘုရားရေးရာ ရတနာ
ရိုးရှင်းပြီး နားလည်လွယ်တဲ့ ဘာသာပြန်ကျမ်း
၆ ယေဟောဝါရဲ့ နာမည်ကို အသုံးပြုသင့်တဲ့ အထောက်အထားတွေ ဒီနေ့ခေတ်မှာ ပိုများလာတယ်။ ၂၀၁၃ မှာ ပြန်တည်းဖြတ်တဲ့ ကမ္ဘာသစ်ဘာသာပြန်ကျမ်းမှာ ဘုရားသခင့် နာမည်ကို ၇,၂၁၆ ကြိမ် အသုံးပြုထားတယ်။ ဒါက ၁၉၈၄ ခုနှစ်ထုတ် ကမ္ဘာသစ်ဘာသာပြန်ကျမ်းထက် ခြောက်ကြိမ် ပိုများတယ်။ အဲဒီခြောက်ကြိမ်ထဲက ငါးကြိမ်ကို ၁ ဓမ္မရာဇဝင် ၂:၂၅; ၆:၃; ၁၀:၂၆; ၂၃:၁၄၊ ၁၆ မှာ တွေ့ရတယ်။ အဲဒီငါးကြိမ်ကို ထပ်ထည့်ရတဲ့ အကြောင်းရင်းကတော့ ပင်လယ်သေ ကျမ်းလိပ်တွေရဲ့ အဲဒီအခန်းငယ်တွေမှာ ဘုရားသခင့်နာမည် ပါရှိနေလို့ပဲ။ ခြောက်ကြိမ်မြောက် ကျမ်းချက်ကတော့ တရားသူကြီး ၁၉:၁၈ ဖြစ်တယ်။ ယုံကြည်အားထားရတဲ့ ရှေးလက်ရေးကျမ်းမူတွေကို ထပ်ဆင့်လေ့လာတဲ့အခါ ဘုရားသခင့်နာမည်ကို အဲဒီကျမ်းချက်မှာ တွေ့ရှိရလို့ ဖြစ်တယ်။
ဇန်နဝါရီ ၁၇–၂၃
ကျမ်းစာထဲက အဖိုးတန်ဘဏ္ဍာများ | တရားသူကြီး ၂၀–၂၁
“ယေဟောဝါကို ဆက်မေးမြန်းနေပါ”
အခက်အခဲတွေ ရင်ဆိုင်ရတဲ့အခါ သင် ဖိနဟတ်ကို တုပနိုင်မလား
လေဝိလူတစ်ယောက်ရဲ့ မယားငယ်ကို သေတဲ့အထိ ရှုတ်ချခဲ့တဲ့ ဗင်ယာမိန်အနွယ် ဂိဗာမြို့သားတွေကို တခြားအမျိုးအနွယ်တွေက စစ်တိုက်ဖို့ ပြင်တယ်။ (သူကြီး. ၂၀:၁-၁၁) သူတို့တွေက စစ်တိုက်မထွက်ခင် ယေဟောဝါကို ဆုတောင်းခဲ့တယ်၊ ဒါပေမဲ့ နှစ်ကြိမ်တိုင်တိုင် အထိနာပြီး ရှုံးနိမ့်ခဲ့တယ်။ (သူကြီး. ၂၀:၁၄-၂၅) အဲဒီလို ရှုံးနိမ်ခဲ့တဲ့အတွက် သူတို့ စိတ်ဓာတ်ကျခဲ့ပုံ ရတယ်။ သူတို့ရဲ့ ဆုတောင်းချက်ကို ယေဟောဝါ နားမထောင်ဘူး၊ ဒီအပြစ်လုပ်သူတွေကို အပြစ်ပေးဖို့ ယေဟောဝါ သူတို့ကို အသုံးမပြုလိုခဲ့ဘူးလို့ စဉ်းစားမိနိုင်တယ်။
—
—
—
အခက်အခဲတွေ ရင်ဆိုင်ရတဲ့အခါ သင် ဖိနဟတ်ကို တုပနိုင်မလား
ဒီကနေ ကျွန်ုပ်တို့ ဘာသင်ခန်းစာ သင်ယူနိုင်သလဲ။ အသင်းတော်မှာ ရှိတဲ့ ပြဿနာ တချို့က အကြီးအကဲတွေ ဝီရိယရှိရှိ ကြိုးစားပြီး ဆုတောင်းနေတဲ့ကြားကနေ မပြေလည်တာ ဖြစ်နိုင်တယ်။ အဲဒီလိုဖြစ်နေတယ်ဆိုရင် အကြီးအကဲတွေက ယေရှုရဲ့ စကားကို သတိရသင့်တယ်– “တောင်းမြဲ တောင်းကြလော့။ တောင်းလျှင် ရလိမ့်မည်။ ရှာမြဲ ရှာကြလော့။ ရှာလျှင် တွေ့လိမ့်မည်။ ခေါက်မြဲ ခေါက်ကြလော့။ ခေါက်လျှင် တံခါးဖွင့်ပေးလိမ့်မည်။” (လု. ၁၁:၉) အဖြေမရပုံ ပေါက်နေတယ် ဆိုရင်တောင် ယေဟောဝါ သတ်မှတ်ထားချိန်မှာ အဖြေပေးမယ်လို့ အကြီးအကဲတွေ ယုံကြည်စိတ်ချနိုင်ပါတယ်။
ဘုရားရေးရာ ရတနာ
သင် သိပါသလား
ရှေးခေတ်စစ်ပွဲတွေမှာ လောက်လွှဲတွေကို ဘယ်လို အသုံးပြုခဲ့သလဲ
ကျမ်းစာမှာ ပါတဲ့ လူငယ် ဒါဝိဒ်ဟာ လူထွားကြီး ဂေါလျတ်ကို လောက်လွှဲနဲ့ သတ်နိုင်ခဲ့တယ်။ လောက်လွှဲကို သိုးကျောင်းသား ဘဝကတည်းက ဒါဝိဒ် ကျွမ်းကျွမ်းကျင်ကျင် အသုံးပြုတတ်လာတာ ဖြစ်နိုင်တယ်။—၁ ဓမ္မရာဇဝင် ၁၇:၄၀-၅၀။
ကျမ်းစာခေတ်က ရေးဆွဲခဲ့တဲ့ အီဂျစ်နဲ့ အဆီးရီးယား ပန်းချီတွေမှာ လောက်လွှဲကို တွေ့ရပါတယ်။ လောက်လွှဲဆိုတာ ကြိုးနှစ်ချောင်းကို သားရေအိတ် ဒါမှမဟုတ် အဝတ်အိတ်နဲ့ တွဲချည်ထားတဲ့ လက်နက် ဖြစ်တယ်။ ဒီလက်နက်ကိုင်တဲ့သူဟာ သားရေအိတ် ဒါမှမဟုတ် အဝတ်အိတ်ထဲမှာ အချင်း ၂ လက်မ၊ ၃ လက်မလောက် ရှိပြီး ၉ အောင်စလောက် အလေးချိန်ရှိတဲ့ ချောမွတ်လုံးဝိုင်းတဲ့ ခဲလုံးကို ထည့်လိုက်တယ်။ လောက်လွှဲကို ဝှေ့ယမ်းပြီး ကြိုးတစ်ချောင်းကို လွှတ်လိုက်တဲ့အခါ ခဲလုံးဟာ ပစ်မှတ်ကို အရှိန်ပြင်းပြင်းနဲ့ ထိမှန်သွားတယ်။
ရှေးခေတ်စစ်ပွဲတွေမှာ လောက်လွှဲနဲ့ တွဲသုံးခဲ့တဲ့ ခဲလုံးအတော်များများကို အရှေ့အလယ်ပိုင်း ဒေသတွေမှာ တူးဖော်တွေ့ရှိရတယ်။ ကျွမ်းကျင်တဲ့ စစ်သားတွေဟာ အဲဒီခဲလုံးတွေကို တစ်နာရီ မိုင် ၁၀၀ ကနေ ၁၅၀ နှုန်းနဲ့ ပစ်လွှတ်နိုင်တယ်။ လောက်လွှဲနဲ့ ပစ်လိုက်တဲ့ ခဲလုံးဟာ လေးနဲ့ ပစ်လိုက်တဲ့ မြားရဲ့ အကွာအဝေးလောက် ရောက်နိုင် မရောက်နိုင်ဆိုတာ အတိကျ မသိနိုင်ပေမဲ့ လောက်လွှဲကြောင့် လူသေနိုင်တယ်ဆိုတာကတော့ သေချာပါတယ်။—တရားသူကြီး ၂၀:၁၆။
ဇန်နဝါရီ ၂၄–၃၀
ကျမ်းစာထဲက အဖိုးတန်ဘဏ္ဍာများ | ရုသ ၁–၂
“ခိုင်မြဲတဲ့ မေတ္တာ ရှိကြပါ”
ယေဟောဝါရဲ့ မိတ်ဆွေတွေကို တုပပါ
၅ ရုသရဲ့ မိသားစုဟာ မောဘပြည်မှာ နေထိုင်တယ်။ သူတို့ဆီ ပြန်သွားရင် သူ့ကို ကူညီစောင့်ရှောက်ကြမှာပေါ့။ သူ့လူမျိုး၊ သူ့ဘာသာစကား၊ သူ့ယဉ်ကျေးမှု ဖြစ်နေတာကိုး။ ဘက်သလီဟင်မြို့မှာ အဲဒါတွေကို ရုသ ရမယ်လို့ နောမိ အာမ,မခံနိုင်ဘူး။ ရုသကို နောက်အိမ်ထောင် မပြုပေးနိုင်မှာ၊ နေစရာ မစီမံပေးနိုင်မှာကို နောမိ စိတ်ပူတယ်။ ဒါကြောင့် မောဘပြည်ကို ပြန်ဖို့ တိုက်တွန်းတယ်။ သိတဲ့အတိုင်း ဩရပကတော့ ‘အမျိုးသားရင်း၊ ဘုရားရင်းတွေဆီ ပြန်သွားပြီ။’ (ရု. ၁:၉-၁၅) ဒါပေမဲ့ ရုသကတော့ သူ့လူမျိုးနဲ့ သူတို့ ကိုးကွယ်တဲ့ မှားယွင်းတဲ့ ဘုရားတွေဆီ ပြန်မသွားဖို့ ဆုံးဖြတ်ထားတယ်။
ယေဟောဝါရဲ့ မိတ်ဆွေတွေကို တုပပါ
၆ ရုသဟာ ခင်ပွန်းဖြစ်သူ မဟာလုန်ဆီက ဒါမှမဟုတ် နောမိဆီကနေ ယေဟောဝါအကြောင်း သိခဲ့တာ ဖြစ်နိုင်တယ်။ ယေဟောဝါဟာ မောဘဘုရားတွေနဲ့ မတူမှန်း ရုသ သိတယ်။ ယေဟောဝါကို သူ ချစ်တယ်။ သူ့ရဲ့ မေတ္တာနဲ့ ဝတ်ပြုမှုကို ယေဟောဝါ ရထိုက်မှန်းလည်း သိတယ်။ ဒါပေမဲ့ အသိပညာ ရှိရုံနဲ့ မလုံလောက်ဘူး။ ပညာရှိရှိ ရွေးချယ်ဆုံးဖြတ်ခဲ့တယ်။ ‘အမေ့လူမျိုးဟာ ကျွန်မလူမျိုး။ အမေ့ဘုရားဟာ ကျွန်မဘုရားပါပဲ’ လို့ နောမိကို ရုသ ပြောတယ်။ (ရု. ၁:၁၆၊ ကဘ) နောမိအပေါ် ထားတဲ့ ရုသရဲ့ မေတ္တာအကြောင်း စဉ်းစားတဲ့အခါ သိပ်နှလုံးထိမိတယ်။ ပိုအထင်ကြီး လေးစားစရာ ကောင်းတာက ယေဟောဝါအပေါ် ထားတဲ့ ရုသရဲ့ မေတ္တာပဲ။ ဗောဇလည်း အဲဒီအချက်ကို အထင်ကြီး လေးစားသွားပြီး ယေဟောဝါရဲ့ ‘အတောင်တော်အောက်မှာ ခိုလှုံ’ ရာ ရှာတဲ့အတွက် နောက်ပိုင်းမှာ ရုသကို ချီးမွမ်းခဲ့တယ်။ (ရုသ ၂:၁၂ ကိုဖတ်ပါ။) ဗောဇရဲ့ စကားက အကာအကွယ် ရရှိဖို့ မိခင်ငှက်မကြီးရဲ့ အတောင်အောက်မှာ ခိုလှုံတဲ့ ငှက်ပေါက်စလေးကို မြင်ယောင်မိစေနိုင်တယ်။ (ဆာ. ၃၆:၇; ၉၁:၁-၄) အဲဒီမိခင် ငှက်မကြီးလိုပဲ ယေဟောဝါလည်း ရုသကို မေတ္တာပါပါ ကာကွယ်ပေးပြီး သူ့ရဲ့ ယုံကြည်ခြင်းအတွက် ဆုချခဲ့တယ်။ သူ့ဆုံးဖြတ်ချက်အတွက် နောင်တရစရာအကြောင်း လုံးဝ မရှိခဲ့ဘူး။
ဘုရားရေးရာ ရတနာ
ရုသဝတ္ထုမှ ပေါ်လွင်ချက်များ
၁:၁၃၊ ၂၁ [ကဘ]—ဘုရားသခင်သည် နောမိ၏ ဘဝကို ခါးသီးစေပြီး ဘေးဆိုး သက်ရောက်စေခဲ့သလော။ မဟုတ်ပါ။ နောမိသည် ဘုရားသခင်ကို အဘယ် အပြစ်မျှ မတင်ခဲ့ပါ။ သို့သော် သူ ကြုံတွေ့ခဲ့ရာများကြောင့် ယေဟောဝါ၏ မျက်နှာသာ မရဟု ယူဆခဲ့ပုံ ရှိသည်။ ထို့ကြောင့် ယူကျုံးမရ၊ စိတ်ပျက်လျက် နေသည်။ ထို့ပြင် ထိုအချိန်က သားသမီး မွေးဖွားခြင်းကို ဘုရားသခင့် ကောင်းချီး၊ မြုံနေခြင်းကို ကျိန်ခြင်းအဖြစ် ယူဆကြသည်။ မြေးမရှိဘဲ သားနှစ်ဦး သေဆုံးသွားရာ ယေဟောဝါသည် မိမိအား နှိမ့်ချလေပြီဟု တွေးထင်မိစရာပင်။
ဇန်နဝါရီ ၃၁–ဖေဖော်ဝါရီ ၆
ကျမ်းစာထဲက အဖိုးတန်ဘဏ္ဍာများ | ရုသ ၃–၄
“နာမည်ကောင်း ရှိအောင် လုပ်ပြီး ထိန်းသိမ်းထားပါ”
‘မွန်မြတ်သော အမျိုးသမီး’
ဗောဇဟာ ရုသကို နူးညံ့ညင်သာတဲ့ လေသံနဲ့ ပြောဆိုပြီး နှစ်သိမ့်မှာ သေချာတယ်။ သူ ဒီလိုပြောခဲ့တယ်– ‘ငါ့သမီး၊ ထာဝရဘုရားသခင် ကောင်းချီး ပေးတော်မူပါစေသော။ သင်သည် ငွေရတတ်သော လူပျို၊ ဆင်းရဲသော လူပျို တစ်စုံတစ်ယောက်ကို မမှီဝဲဘဲ နေ၍ အရင်ပြုသော ကျေးဇူးထက် နောက်ပြုသော ကျေးဇူး သာ၍ ကြီး၏။’ (ရုသ ၃:၁၀) “အရင်ပြုသော ကျေးဇူး” ဆိုတာက နောမိနဲ့အတူ အစ္စရေးပြည်ကို ရုသ လိုက်လာပြီး နောမိကို ကြည့်ရှုစောင့်ရှောက်ပေးတဲ့ သူ့ရဲ့ တည်မြဲသော မေတ္တာကို ရည်ညွှန်းတယ်။ “နောက်ပြုသော ကျေးဇူး” ဆိုတာကတော့ ရုသရဲ့ လက်ရှိ အခြေအနေကို ပြောတာ ဖြစ်တယ်။ ရုသလို အမျိုးသမီးငယ် တစ်ယောက်ဟာ သူ လက်ထပ်မယ့် အမျိုးသားကို ဆင်းရဲချမ်းသာမရွေး၊ သူနဲ့ သက်တူရွယ်တူတွေထဲမှာ လွယ်လွယ်ကူကူ ရှာတွေ့နိုင်တယ်ဆိုတာ ဗောဇ သိပါတယ်။ ရုသကျတော့ နောမိကိုသာမက နောမိရဲ့ ကွယ်လွန်သူ ခင်ပွန်းသည်ရဲ့ နာမည်ကို ဆက်ခံဖို့ ကူညီပေးချင်တယ်။ ရုသရဲ့ ကိုယ်ကျိုးစွန့် စိတ်ဓာတ်ကို ဗောဇ ဘာကြောင့် အရမ်း အထင်ကြီးသွားတယ်ဆိုတာ အလွယ်တကူ သိမြင်နိုင်ပါတယ်။
‘မွန်မြတ်သော အမျိုးသမီး’
သူဟာ အစ္စရေးလူတွေ ကြားထဲမှာ ‘မွန်မြတ်တဲ့ အမျိုးသမီး’ ဆိုပြီး နာမည်ကြီးနေတယ်လို့ ဗောဇ ပြောခဲ့တာတွေကို ရုသ ပြန်စဉ်းစားရင်း အရမ်းကို ပီတိဖြစ်နေမှာပါ။ ရုသ နာမည်ကောင်း ရတာက ယေဟောဝါ ဘုရားသခင်ကို သိကျွမ်းပြီး ဝတ်ပြုကိုးကွယ်ချင်တဲ့ သူ့ရဲ့ စိတ်ထက်သန်မှုနဲ့ အများကြီး သက်ဆိုင်နေတယ်။ ဒါ့အပြင် သူဟာ နောမိနဲ့ သူ့လူမျိုးအပေါ် အရမ်းကို ကြင်နာပြီး စာနာတတ်တယ်၊ အစိမ်းသက်သက် ဖြစ်နေတဲ့ ဓလေ့ထုံးစံတွေနဲ့အညီ နေထိုင်ဖို့ တလိုတလား ရှိတယ်။ ရုသရဲ့ ယုံကြည်ခြင်းကို ကျွန်ုပ်တို့ တုပမယ်ဆိုရင် တခြားသူတွေနဲ့ သူတို့ရဲ့ ဓလေ့ထုံးတမ်းတွေကို လေးစားဖို့ ကြိုးစားကြမှာ ဖြစ်တယ်။ အဲဒီလိုဆိုရင် ကျွန်ုပ်တို့လည်း နာမည်ကောင်း ရရှိလာပါလိမ့်မယ်။
‘မွန်မြတ်သော အမျိုးသမီး’
ဗောဇနဲ့ ရုသတို့ လက်ထပ်လိုက်ကြပါပြီ။ အဲဒီနောက် ကျမ်းစာမှာ ဒီလိုဖတ်ရပါတယ်– “ရုသသည် ပဋိသန္ဓေယူ၍ သားယောက်ျားကို ဖွားမြင်လေ၏။” ဘက်သလီဟင် မြို့သူတွေဟာ နောမိကို ကောင်းချီးပေးပြီး သားခုနစ်ယောက်ထက် နောမိအပေါ် ပိုကောင်းတဲ့ ရုသကို ချီးမွမ်းခဲ့ကြတယ်။ နောက်ပိုင်းမှာ ရုသရဲ့ သားဟာ ဘုရင်ဒါဝိဒ်ရဲ့ ဘိုးဘေးတစ်ဦး ဖြစ်လာတယ်။ (ရုသ ၄:၁၁-၂၂) တစ်ခါ ဒါဝိဒ်ကလည်း ယေရှုခရစ်ရဲ့ ဘိုးဘေးတစ်ဦး ဖြစ်လာတယ်။—မဿဲ ၁:၁။
ဘုရားရေးရာ ရတနာ
ရုသဝတ္ထုမှ ပေါ်လွင်ချက်များ
၄:၆—ရွေးပိုင်သော အမျိုးသားချင်း တစ်ဦးသည် ရွေးခြင်းဖြင့် ကိုယ်အမွေဥစ္စာကို အဘယ်နည်းဖြင့် “ဖျက်” ရာ ရောက်သနည်း။ ဦးဆုံးအနေနှင့် လူတစ်ဦးသည် ဆင်းရဲ၍ မိမိအမွေမြေကို ရောင်းချခဲ့လျှင် ရွေးပိုင်သူသည် နောင်ယုဘိလနှစ်အထိ ကျန်ရှိသေးသည့် နှစ်များအရ မြေတန်ဖိုးကို တွက်ချက်ပြီး ငွေချေရမည် ဖြစ်သည်။ (ဝတ်ပြုရာ ၂၅:၂၅-၂၇) ထိုသို့ပြုခြင်းဖြင့် မိမိကိုယ်ပိုင်မြေ၏ တန်ဖိုးကို လျော့နည်းစေနိုင်သည်။ ထို့ပြင် ရုသသည် သားဖွားမြင်မည်ဆိုလျှင် ဝယ်ယူထားသည့် မြေကို ရွေးပိုင်သူ၏ ဆွေမျိုးများအစား ထိုသားက အမွေရလိမ့်မည် ဖြစ်သည်။
ဖေဖော်ဝါရီ ၇–၁၃
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၁–၂
“ယေဟောဝါဆီ ရင်ဖွင့်ဆုတောင်းပါ”
ဘုရားသခင်ဆီ သူ ရင်ဖွင့်ဆုတောင်းခဲ့
၁၂ ဒီလိုနည်းနဲ့ ဟန္နဟာ ဆုတောင်းချက်နဲ့ ပတ်သက်ပြီး ဘုရားသခင့် ကျေးကျွန် အားလုံးအတွက် စံနမူနာကောင်း ဖြစ်ပါတယ်။ မေတ္တာပြည့်ဝတဲ့ မိဘကို အားကိုးယုံကြည်တဲ့ ကလေးငယ် တစ်ယောက်လိုပဲ ကျွန်တော်တို့လည်း ယေဟောဝါဘုရားဆီ ရင်ဖွင့် ပြောဆိုသင့်တယ်။ ဒီလိုလုပ်ဖို့ ယေဟောဝါဘုရား ဖိတ်ခေါ်ထားတယ်။ (ဆာလံ ၆၂:၈။ ၁ သက်သာလောနိတ် ၅:၁၇ တို့ကိုဖတ်ပါ။) တမန်တော် ပေတရုဟာ ယေဟောဝါ ဘုရားဆီ ဆုတောင်းတာနဲ့ ပတ်သက်လို့ နှစ်သိမ့်မှု ဖြစ်စေတဲ့ ဒီစကားတွေကို ရေးသားဖို့ စွမ်းအားတော် အကူအညီ ရခဲ့တယ်– “စိုးရိမ်ပူပန်စရာ ရှိသမျှကို ဘုရားသခင်ဆီ ပုံအပ်ထားလိုက်ပါ။ ဘုရားသခင်ဟာ ခင်ဗျားတို့ကို ဂရုစိုက်တဲ့အရှင် ဖြစ်လို့ပဲ။”—၁ ပေ. ၅:၇။
ဟန္န စိတ်ငြိမ်သက်မှု ခံစားခဲ့ရပုံ
ယင်းတို့မှ ကျွန်ုပ်တို့ အဘယ်အရာ သင်ယူနိုင်သနည်း။ ကျွန်ုပ်တို့၏ ပူပင်သောကများကို ယေဟောဝါထံ ရင်ဖွင့်ဆုတောင်းရာတွင် မိမိခံစားချက်ကို ပြောပြကာ လှိုက်လှိုက်လှဲလှဲ ဆုတောင်းနိုင်သည်။ ကျွန်ုပ်တို့ ဘာမျှ မတတ်နိုင်သော အခြေအနေ ဖြစ်ပါက ကိုယ်တော်ထံ လုံးလုံးလျားလျား အပ်နှံထားသင့်သည်။ ယင်းက အကောင်းဆုံး လမ်းစဉ် ဖြစ်၏။—သု. ၃:၅၊ ၆။
ဘုရားရေးရာ ရတနာ
ဓမ္မရာဇဝင် ပထမစောင်မှ ပေါ်လွင်ချက်များ
၂:၁၀—ဣသရေလ နိုင်ငံတွင် ရှင်ဘုရင် မရှိလျက်နှင့် ယေဟောဝါသည် “ရှင်ဘုရင်ကို ခွန်အားနှင့် ပြည့်စုံစေ” ရန် ဟန္န အဘယ်ကြောင့် ဆုတောင်းခဲ့ရသနည်း။ ဣသရေလ လူမျိုးတွင် ရှင်ဘုရင် ရှိလိမ့်မည်ကို မောရှေပညတ်တွင် ကြိုဟောထား၏။ (တရားဟောရာ ၁၇:၁၄-၁၈) ယာကုပ် သေဆုံးခါနီးတွင် ဤသို့ ပရောဖက်ပြုခဲ့၏– ‘ရာဇလှံတံ [ရာဇအာဏာ ရှိသည့် အမှတ်လက္ခဏာ] သည် ယုဒထံမှ မရွေ့ရ။’ (ကမ္ဘာဦး ၄၉:၁၀) ထို့အပြင်၊ ဣသရေလ လူမျိုးတို့၏ ဘေးမ စာရာနှင့်စပ်လျဉ်း၍ ယေဟောဝါ ဤသို့ မိန့်တော်မူခဲ့သည်– “သူ၏ အမျိုးအနွယ်၌လည်း အပြည်ပြည်သော ရှင်ဘုရင် ဖြစ်ရကြလိမ့်မည်။” (ကမ္ဘာဦး ၁၇:၁၆) ထို့ကြောင့် ဟန္နသည် မင်းလောင်းတစ်ပါးအတွက် ဆုတောင်းနေခြင်း ဖြစ်သည်။
ဖေဖော်ဝါရီ ၁၄–၂၀
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၃–၅
“ယေဟောဝါဟာ ထောက်ထားစာနာသူ ဖြစ်”
စာနာစိတ် ရှိတဲ့ အနန္တတန်ခိုးရှင်
၃ ရှမွေလဟာ တဲတော်မှာ ငယ်ငယ်လေးကတည်းက “ယေဟောဝါအတွက် အမှုဆောင်နေတယ်။” (၁ ရှ. ၃:၁) တစ်ည၊ ရှမွေလ အိပ်နေတုန်း ထူးဆန်းတာတစ်ခု ဖြစ်ခဲ့တယ်။ (၁ ရှမွေလ ၃:၂-၁၀ ကိုဖတ်ပါ။) သူ့နာမည် ခေါ်သံ ကြားလိုက်ရတယ်။ အသက်ကြီး ပုရောဟိတ်မင်း ဧလိ ခေါ်တယ် ထင်လို့ ပြေးသွားပြီး “ကျွန်တော့်နာမည် ခေါ်သံကြားလို့ လာတာပါ” လို့ ပြောတယ်။ ဧလိက မခေါ်ဘူးလို့ ငြင်းတယ်။ အဲဒီလို နှစ်ကြိမ် ထပ်ဖြစ်တော့ ရှမွေလကို ယေဟောဝါ ခေါ်နေမှန်း ဧလိ ရိပ်မိပြီး ဘယ်လို ပြန်ထူးရမယ်ဆိုတာ သင်ပေးတယ်။ ရှမွေလလည်း နာခံတယ်။ ဒါပေမဲ့ အစကတည်းက ရှမွေလကို ခေါ်တာ မိမိ ဖြစ်ကြောင်း ယေဟောဝါ ဘာကြောင့် မပြောတာလဲ။ ကျမ်းစာမှာ မဖော်ပြထားပေမဲ့ ရှမွေလကို စာနာမှု ပြလို့ ဖြစ်တယ်။ ဘယ်နည်းနဲ့လဲ။
စာနာစိတ် ရှိတဲ့ အနန္တတန်ခိုးရှင်
၄ ၁ ရှမွေလ ၃:၁၁-၁၈ ကိုဖတ်ပါ။ အသက်ကြီးသူတွေ၊ အထူးသဖြင့် ခေါင်းဆောင်တွေကို လေးစားပါလို့ ယေဟောဝါ မိန့်မှာတယ်။ (ထွ. ၂၂:၂၈။ ဝတ်. ၁၉:၃၂) ဒါကြောင့် မနက် ရောက်တဲ့အခါ ဘုရားရဲ့ ပြင်းထန်တဲ့ စီရင်ချက်အကြောင်း ဧလိကို ရှမွေလ သွားပြောရဲပါ့မလား။ “မြင်ရတဲ့ စိတ်အာရုံအကြောင်း ဧလိကို မပြောပြရဲဘူး” လို့ ကျမ်းစာ ပြောတယ်။ ဒါပေမဲ့ ရှမွေလကို ခေါ်သူဟာ ယေဟောဝါ ဖြစ်ကြောင်း ဧလိကို အသိပေးပြီးသား ဖြစ်လို့ “ဘုရားသခင် ဘာတွေ ပြောခဲ့သလဲ။ တစ်ခွန်းမကျန် ပြန်ပြောပြပါ” ဆိုပြီး ဧလိ အတင်း ပြောခိုင်းမှ ရှမွေလ အကုန် ပြောပြလိုက်တယ်။
ဘုရားရေးရာ ရတနာ
ဓမ္မရာဇဝင် ပထမစောင်မှ ပေါ်လွင်ချက်များ
၃:၃—ရှမွေလသည် အသန့်ရှင်းဆုံး ဌာနထဲတွင် အမှန်တကယ် အိပ်ခဲ့သလော။ မအိပ်ပျော်ခဲ့ပါ။ ရှမွေလသည် ယဇ်ပုရောဟိတ် မဟုတ်သည့် ကောဟတ် အမျိုးအနွယ်မှ လေဝိသားတစ်ဦး ဖြစ်သည်။ (၁ ရာဇဝင်ချုပ် ၆:၃၃-၃၈) သို့ဖြစ်၍ သူသည် ‘အထဲသို့ ဝင်၍ သန့်ရှင်းသော အရာများကို ကြည့်’ ခွင့် မရှိပေ။ (တောလည်ရာ ၄:၁၇-၂၀၊ သမ္မာ) တဲတော်ရင်ပြင်ထဲတွင်သာ ရှမွေလ ဝင်ထွက်သွားလာခွင့် ရှိသည်။ ထိုနေရာတွင် သူ အိပ်စက်ခဲ့ရပေမည်။ ဧလိသည်လည်း ရင်ပြင်အတွင်း တစ်နေရာရာတွင် အိပ်စက်ခဲ့ပုံ ရှိမည်။ “ဘုရားသခင်၏ သေတ္တာတော် ရှိရာ” နေရာ ဟူသော အသုံးအနှုန်းက တဲတော်ဧရိယာကို ရည်ညွှန်းကြောင်း ထင်ရှား၏။
ဖေဖော်ဝါရီ ၂၁–၂၇
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၆–၈
“သင့်ဘုရင်က ဘယ်သူလဲ”
it-2 ၁၆၃ ပိုဒ်. ၁
ဘုရားသခင့် နိုင်ငံတော်
လူသားဘုရင်တစ်ပါး တောင်းဆိုကြ။ အီဂျစ်ပြည်ကနေ ထွက်လာပြီး အနှစ် ၄၀၀ နီးပါး၊ အာဗြဟံနဲ့ ဘုရားသခင် ပဋိညာဉ်ဖွဲ့ပြီး အနှစ် ၈၀၀ ကျော်မှာ အစ္စရေးတွေဟာ လူသားဘုရင် တောင်းဆိုကြတယ်။ တခြားလူမျိုးတွေမှာ ဘုရင် ရှိသလို သူတို့တွေမှာလည်း ရှိချင်ကြတယ်။ ဘုရင် တောင်းဆိုတာက ယေဟောဝါရဲ့ အုပ်ချုပ်မှုကို ငြင်းပယ်ရာ ရောက်တယ်။ (၁ရှ ၈:၄-၈) အာဗြဟံနဲ့ ယာကုပ်ကို ယေဟောဝါ ပေးခဲ့တဲ့ ကတိတော်အတိုင်း နိုင်ငံတော်ကို သူတို့ စောင့်မျှော်နေကြတာတော့ သင့်လျော်ပါတယ်။ ယာကုပ် မသေခင် ယုဒနဲ့ပတ်သက်ပြီး ပေးတဲ့ ပရောဖက်ပြုချက် (က ၄၉:၈-၁၀)၊ အီဂျစ်ပြည်ကနေ ထွက်လာပြီးနောက် အစ္စရေးတွေကို ယေဟောဝါ ပြောတဲ့စကား (ထွ ၁၉:၃-၆)၊ ပညတ်ပဋိညာဉ်မှာ ပါတဲ့ စကား (တရ ၁၇:၁၄၊ ၁၅)၊ ပရောဖက် ဗာလမ်ကို ပြောစေတဲ့ စကား (တလ ၂၄:၂-၇၊ ၁၇) တွေက အဲဒီမျှော်လင့်ချက်ကို ပိုခိုင်မာစေတယ်။ ရှမွေလရဲ့ မိခင် ဟန္နလည်း ဆုတောင်းတဲ့အခါ အဲဒီမျှော်လင့်ချက်ကို ထည့်တောင်းခဲ့တယ်။ (၁ရှ ၂:၇-၁၀) ဒါပေမဲ့ ယေဟောဝါက နိုင်ငံတော်နဲ့ပတ်သက်တဲ့ “မြင့်မြတ်တဲ့ လျှို့ဝှက်ချက်” ကို အပြည့်အဝ မဖော်ပြသေးဘူး။ နိုင်ငံတော် ဘယ်တော့ တည်ထောင်မလဲ၊ နိုင်ငံတော်ဟာ မြေကြီးနဲ့ ဆိုင်သလား၊ ကောင်းကင်နဲ့ ဆိုင်သလား၊ အုပ်ချုပ်မှုကို ဘယ်လို ဖွဲ့စည်းထားသလဲ ဆိုတာတွေကိုလည်း မဖော်ပြသေးဘူး။ အဲဒါကြောင့် လူသားဘုရင် ရှိဖို့ တောင်းဆိုတာဟာ ရောင့်တက်ရာ ရောက်တယ်။
စိတ်ပျက်ခဲ့ရပေမဲ့ သူ ခံနိုင်ရည် ရှိခဲ့
ဒီကိစ္စကို ဘုရားသခင်ဆီ ရှမွေလ ဆုတောင်း တင်ပြတဲ့အခါ ဘုရားသခင် ဒီလို ဖြေကြားပေးခဲ့တယ်– “သင့်အား လူများတို့ ပြောဆိုသမျှသော စကားကို နားထောင်လော့။ သူတို့သည် သင့်ကိုသာ မပယ်၊ ငါသည် သူတို့ကို မအုပ်စိုးစေခြင်းငှာ ငါ့ကိုလည်း ပယ်ကြပြီ။” အတိုင်းအဆမဲ့ တန်ခိုးရှင် ဘုရားသခင်ကို အစ္စရေးလူတွေ စော်ကားတာ အရမ်းကို ဆိုးရွားလှပေမဲ့ ဘုရားသခင်ရဲ့ စကားကြောင့် ရှမွေလ စိတ်သက်သာရာ ရသွားတယ်။ အစ္စရေးလူတွေဟာ လူသားရှင်ဘုရင် တောင်းဆိုတဲ့အတွက် အကြီးအကျယ် ပေးဆပ်ရလိမ့်မယ်လို့ ရှမွေလကို ဘုရားသခင် သတိပေးခိုင်းခဲ့တယ်။ ဘုရားသခင် ပြောခိုင်းတဲ့အတိုင်း ရှမွေလ ပြောပြတဲ့အခါ အစ္စရေးလူတွေက “မဟုတ်ပါ။ အုပ်စိုးသော ရှင်ဘုရင်ကို လိုချင်ပါ၏” ဆိုပြီး မရမက တောင်းဆိုခဲ့ကြတယ်။ ဘုရားသခင်ရဲ့ စကားကို အမြဲနာခံခဲ့တဲ့ ရှမွေလဟာ ဘုရားသခင် ရွေးချယ်ပေးခဲ့တဲ့ အစ္စရေး အမျိုးသားဆီ သွားပြီး ရှင်ဘုရင်အဖြစ် ခန့်အပ်လိုက်တယ်။—၁ ရာ. ၈:၇-၁၉။
ယေဟောဝါ၏ အုပ်ချုပ်ပုံနည်းလမ်း မှန်ကန်ကြောင်း သက်သေထင်ရှားပြီ
၉ ယေဟောဝါ၏ သတိပေးချက် မှန်ကန်ကြောင်း သမိုင်းက သက်သေထူသည်။ အထူးသဖြင့် ဘုရင်သည် သစ္စာမရှိသောအခါ လူသားဘုရင်တစ်ပါး အုပ်စိုးခြင်းသည် အစ္စရေးလူမျိုးအဖို့ ကြီးလေးသော ပြဿနာများ ဖြစ်ပေါ်စေခဲ့သည်။ အစ္စရေးလူမျိုး၏ ပုံနမူနာကို စိတ်စွဲမှတ်ကာ ခေတ်ကာလတစ်လျှောက် ယေဟောဝါကို မသိသည့် လူသားများ လက်ထဲရှိ အုပ်ချုပ်ရေးသည် တည်မြဲသော ကောင်းကျိုးကို မဆောင်ကြဉ်းပေးနိုင်သည်မှာ အံ့အားသင့်စရာ မဟုတ်ပေ။ မှန်ပါသည်၊ နိုင်ငံရေးသမား အချို့သည် ငြိမ်သက်မှုနှင့် လုံခြုံမှု ရရှိရန် သူတို့၏ လုပ်ဆောင်မှုများအပေါ် ဘုရားသခင် ကောင်းချီးပေးဖို့ တောင်းလျှောက်ကြသည်။ သို့သော် ကိုယ်တော်၏ အုပ်ချုပ်ပုံ နည်းလမ်းအား လက်အောက်မခံသူတို့ကို ဘုရားသခင် မည်သို့ ကောင်းချီးပေးနိုင်ပါမည်နည်း။—ဆာ. ၂:၁၀-၁၂။
ဘုရားရေးရာ ရတနာ
အဘယ်ကြောင့် နှစ်ခြင်းခံရသနည်း
၁၃ ယေဟောဝါသက်သေများအဖြစ် ကျွန်ုပ်တို့ နှစ်ခြင်းမခံမီ ပြုပြင်ပြောင်းလဲရမည်။ ခရစ်တော် ယေရှု၏ နောက်လိုက် ဖြစ်ရန် စိတ်နှလုံး အကြွင်းမဲ့ ဆုံးဖြတ်ချက် ချသူသည် မိမိအကျင့်များကို စိတ်လိုကိုယ်လျောက် ပြုပြင်ပြောင်းလဲသည်။ ထိုသို့သော သူတို့သည် သူတို့၏ ယခင် မှားယွင်းသော လမ်းစဉ်ကို ငြင်းပယ်ပြီး ဘုရားသခင့် ရှေ့မှောက် မှန်ရာကို ပြုလုပ်ရန် ဆုံးဖြတ်ကြသည်။ သမ္မာကျမ်းစာပါ ပြောင်းလဲခြင်းနှင့် စပ်ဆိုင်သော ဟေဗြဲနှင့် ဂရိကြိယာများသည် နောက်ပြန်ဆုတ်ခြင်း၊ ပြန်လှည့်လာခြင်း သဘောရှိသည်။ ယင်းလုပ်ဆောင်မှုသည် မှားသော လမ်းစဉ်မှ ဘုရားသခင်ထံ ပြန်လှည့်လာခြင်း သဘောဆောင်၏။ (၃ ဓမ္မရာဇဝင် ၈:၃၃၊ ၃၄) ပြောင်းလဲခြင်းတွင် “နောင်တရခြင်းနှင့် ထိုက်တန်သော အကျင့်များ” ရှိဖို့ လိုသည်။ (တမန်တော် ၂၆:၂၀) ယင်းတွင် မှောက်မှားသော ကိုးကွယ်မှုကို စွန့်လွှတ်ရန်၊ ဘုရားသခင် မိန့်တော်မူချက်များနှင့်အညီ လုပ်ဆောင်ရန်၊ ယေဟောဝါအား အကြွင်းမဲ့ ဆည်းကပ်ကိုးကွယ်ရန် လိုသည်။ (တရားဟောရာ ၃၀:၂၊ ၈-၁၀; ၁ ဓမ္မရာဇဝင် ၇:၃) ပြုပြင်ပြောင်းလဲခြင်းကြောင့် ကျွန်ုပ်တို့၏ အတွေးအခေါ်၊ ရည်ရွယ်ချက်များနှင့် စိတ်နေသဘောထားပင် ပြောင်းလဲသွားသည်။ (ယေဇကျေလ ၁၈:၃၁) ဘုရားသခင်ရေးရာ မဆန်သော အမူအကျင့်များအစား ဥပဓိရုပ်သစ်ကို ယူတင်ဝတ်ဆောင်ခြင်းဖြင့် ကျွန်ုပ်တို့ “ပြောင်းလဲ” လာကြသည်။—တမန်တော် ၃:၁၉၊ ၂၀; ဧဖက် ၄:၂၀-၂၄; ကောလောသဲ ၃:၅-၁၄။
ဖေဖော်ဝါရီ ၂၈–မတ် ၆
ကျမ်းစာထဲက အဖိုးတန်ဘဏ္ဍာများ | ၁ ရှမွေလ ၉–၁၁
“ရှောလုဟာ အစပိုင်းမှာ နှိမ့်ချ၊ ကျိုးနွံခဲ့”
ဘုရားသခင်နဲ့အတူ နှိမ့်ချကျိုးနွံစွာ လျှောက်လှမ်းပါ
၁၁ ဘုရင် ရှောလုအကြောင်း စဉ်းစားကြည့်ပါ။ အစပိုင်းမှာတော့ ရှောလုဟာ ကျိုးနွံမှု ရှိတယ်။ ကိုယ့်မှာ ကန့်သတ်ချက်တွေ ရှိမှန်း အသိအမှတ်ပြုပြီး ထပ်ဆင့်တာဝန်တွေ ယူရမှာ တွန့်ဆုတ်ခဲ့တယ်။ (၁ ရှ. ၉:၂၁။ ၁၀:၂၀-၂၂) ဒါပေမဲ့ ဘုရင် ဖြစ်ပြီး သိပ်မကြာခင်မှာတော့ ရောင့်တက်လာတယ်။ တစ်ကြိမ်မှာ ပရောဖက် ရှမွေလကို စောင့်ရင်း စိတ်မရှည် ဖြစ်လာတယ်။ လူမျိုးတော်အတွက် ယေဟောဝါ လုပ်ဆောင်ပေးမှာကို ကျိုးနွံစွာ ယုံကြည်ကိုးစားမယ့်အစား မီးရှို့ရာ ပူဇော်သက္ကာကို အခွင့်မရှိဘဲ ဆက်သလိုက်တယ်။ ဒါကြောင့် ယေဟောဝါရဲ့ မျက်နှာသာရော နောက်ပိုင်း ထီးနန်းကိုပါ ဆုံးရှုံးသွားတယ်။ (၁ ရှ. ၁၃:၈-၁၄) ဒီသတိပေး ပုံနမူနာကနေ သင်ခန်းစာ ယူပြီး ရောင့်တက်တဲ့ လုပ်ရပ်တွေကို ရှောင်မယ်ဆိုရင် ပညာရှိရာ ရောက်ပါလိမ့်မယ်။
ကိုယ်ကျိုးစွန့်စိတ်ဓာတ် အမြဲ ရှိနေအောင် လုပ်ဆောင်နိုင်ပုံ
၈ ကိုယ်ကျိုးရှာလိုတဲ့ သဘောထားက ကိုယ်ကျိုးစွန့် စိတ်ဓာတ်ကို ပျက်စီးစေနိုင်တယ်ဆိုတာ ဘုရင် ရှောလုရဲ့ ပုံနမူနာက သတိပေးတယ်။ ရှောလုဟာ ဘုရင်အဖြစ် စတင်အုပ်စိုးချိန်မှာ နှိမ့်ချကျိုးနွံတဲ့ စိတ်သဘော ရှိခဲ့တယ်။ (၁ ရာ. ၉:၂၁) သူ ဘုရင်အဖြစ် အုပ်ချုပ်မှာကို အစ္စရေးလူတချို့က မလိုလားကြဘူး၊ သူ့ကို ဘုရား ပေးထားတဲ့ အခွင့်အာဏာကိုတောင် အန်တုခဲ့ကြတယ်။ ရှောလုဟာ အဲဒီလူတွေကို အပြစ်မပေးခြင်းအားဖြင့် နှိမ့်ချမှု ပြခဲ့တယ်။ (၁ ရာ. ၁၀:၂၇) ဘုရင် ရှောလုဟာ အမ္မုန်လူတွေအပေါ် အောင်ပွဲဆင်ခဲ့တဲ့ တိုက်ပွဲမှာ အစ္စရေးလူတွေကို ဦးဆောင်ခြင်းအားဖြင့် ဘုရားသခင့် စွမ်းအားတော် လမ်းပြမှုကို ခံယူခဲ့တယ်။ အဲဒီနောက်မှာ သူဟာ အောင်မြင်မှုအတွက် ယေဟောဝါကို ဂုဏ်တင်ခြင်းအားဖြင့် နှိမ့်ချမှု ပြခဲ့တယ်။—၁ ရာ. ၁၁:၆၊ ၁၁-၁၃။
အမ္မုန်အမျိုးသားများ—ကြင်နာမှုကို ရန်လိုမှုဖြင့် တုံ့ပြန်သော လူမျိုး
နောက်တစ်ဖန် အမ္မုန်အမျိုးသားတို့သည် ယေဟောဝါ၏ ကြင်နာမှုကို ရန်လိုမှုဖြင့် တုံ့ပြန်ခဲ့သည်။ ဤဆိုးညစ်သော ခြိမ်းခြောက်မှုကို ယေဟောဝါ လျစ်လျူမရှုခဲ့ပါ။ “[နာဟတ်၏] ထိုသတင်းကို ရှောလု ကြားသောအခါ ဘုရားသခင်၏ ဝိညာဉ်တော် သက်ရောက်၍ သူသည် ပြင်းစွာ အမျက်ထွက်” လေသည်။ ဘုရားသခင်၏ ဝိညာဉ်တော် ညွှန်ကြားမှုအောက်၌ ရှောလုသည် တိုက်ခိုက်ရေးသမား ၃၃၀,၀၀၀ ရှိသော အင်အားကို စုစည်းကာ အမ္မုန်အမျိုးသားတို့ကို လမ်းခရီးတစ်လျှောက်လုံး တိုက်ခိုက်ခဲ့ရာ “ကျန်ကြွင်းသောသူ တစ်ယောက်နှင့် တစ်ယောက် ပေါင်း၍ မနေရသည် တိုင်အောင်” ပင် ဖြစ်သည်။—၁ ဓမ္မရာဇဝင် ၁၁:၆၊ ၁၁။
ဘုရားရေးရာ ရတနာ
ဓမ္မရာဇဝင် ပထမစောင်မှ ပေါ်လွင်ချက်များ
၉:၉—“ပရောဖက်ဟူ၍ ယခုခေါ်ဝေါ်သောသူကို ရှေးကာလ၌ မြင်သောသူ” ဟု သုံးနှုန်းခြင်းက အဘယ် အထူးအဓိပ္ပာယ် ရှိသနည်း။ ရှမွေလခေတ်နှင့် ဣသရေလ ဘုရင်များ ခေတ်အတွင်း ပရောဖက်များ ပိုပေါ်လွင်ထင်ရှားလာသည့်အခါ “ပရောဖက်” ဟူသော အသုံးအနှုန်းအစား “မြင်သောသူ” ဟူသည့် စကားလုံးကို အစားထိုး အသုံးပြုခဲ့ကြောင်း အဆိုပါ စကားများက ဖော်ပြပုံ ရှိသည်။ ရှမွေလသည် ပရောဖက် မျိုးရိုးတွင် အဦးဆုံး ဖြစ်သည်ဟု ယူမှတ်ကြ၏။—တမန်တော် ၃:၂၄။