အမ္မုန်အမျိုးသားများ—ကြင်နာမှုကို ရန်လိုမှုဖြင့် တုံ့ပြန်သောလူမျိုး

ဂျော်ဒန်နိုင်ငံ၊ ဟာရှင်အမျိုးသား၏မြို့တော်ဖြစ်သော အမ္မန်အမည်ရှိ မျက်မှောက်ခေတ်မြို့တော်သည် ကမ္ဘာ့ဇာတ်ခုံမှပျောက်ကွယ်သွားပြီဖြစ်သည့် လူမျိုးတစ်မျိုးကို အမှတ်ရစေသည်။ သူတို့ကို အမ္မုန်အမျိုးသားများဟုခေါ်သည်။ သူတို့ကား မည်သူများနည်း။ သူတို့၏ကျရှုံးမှုမှ ကျွန်ုပ်တို့မည်သည့်သင်ခန်းစာရရှိနိုင်သနည်း။

အမ္မုန်အမျိုးသားများသည် ဖြောင့်မတ်သောသူ လောတမှ ဆင်းသက်လာသူများဖြစ်သည်။ (ကမ္ဘာဦး ၁၉:၃၅-၃၈) လောတသည် အာဗြဟံ၏တူတစ်ယောက်ဖြစ်သောကြောင့် အမ္မုန်အမျိုးသားများသည် ဣသရေလလူမျိုးနှင့် ဝမ်းကွဲညီအစ်ကိုမောင်နှမတော်သည်ဟု ဆိုနိုင်သည်။ သို့သော် လောတ၏သားစဉ်မြေးဆက်တို့သည် မှားယွင်းသောဘုရားများကို ဝတ်ပြုခြင်းဘက်သို့လှည့်သွားလေသည်။ သို့တိုင် ယေဟောဝါဘုရားသခင်သည် သူတို့အပေါ်၌ စိတ်ဝင်စားမှုဆက်ရှိခဲ့သည်။ ဣသရေလလူမျိုးများ ကတိထားရာပြည်သို့ ချဉ်းကပ်လာစဉ် သူတို့ကို ဘုရားသခင်ဤသို့သတိပေးခဲ့သည်– “အမ္မုန်အမျိုးသားတို့အနီးသို့ရောက်သောအခါ သူတို့ကို မနှောင့်ယှက်နှင့်၊ အလျှင်းမပြုနှင့်။ အမ္မုန်အမျိုးသားနေသောပြည်ကို သင့်အား ငါအပိုင်မပေး၊ ထိုပြည်ကို လောတအမျိုးသားတို့အား ငါအပိုင်ပေးပြီ။”—တရားဟောရာ ၂:၁၉။

ဤကဲ့သို့သော ကြင်နာမှုကို အမ္မုန်အမျိုးသားတို့ တန်ဖိုးထားကြသလော။ ဆန့်ကျင်ဘက်အနေနှင့် ယေဟောဝါသည် သူတို့အားတစ်စုံတစ်ရာပေးခဲ့သည်ကို အသိအမှတ်ပြုရန် သူတို့ငြင်းဆန်ကြသည်။ ဘုရားသခင်သည် သူတို့အပေါ်၌ ကြင်နာစွာစိတ်ဝင်စားမှုပြခဲ့ခြင်းကို ဘုရားသခင်၏လူမျိုးဖြစ်သော ဣသရေလလူမျိုးအပေါ် တစ်ချိန်လုံးရန်လိုမုန်းထားခြင်းဖြင့် သူတို့တုံ့ပြန်ခဲ့ကြသည်။ ဣသရေလအမျိုးသားတို့သည် ယေဟောဝါ၏အမိန့်တော်ကိုအလေးထားကြပြီး သူတို့ကို မကျူးကျော်မတိုက်ခိုက်ခဲ့ကြသော်လည်း အမ္မုန်အမျိုးသားများနှင့် သူတို့၏မောဘအမျိုးသားညီအစ်ကိုများတို့သည် ခြိမ်းခြောက်ခံရသည်ဟု ခံစားနေကြရသည်။ မှန်ပါသည်၊ အမ္မုန်အမျိုးသားတို့သည် စစ်မှုဖြင့် တိုက်ခိုက်ခဲ့ခြင်းမရှိသော်လည်း ဗာလမ်အမည်ရှိသောပရောဖက်ကိုငှားကာ ဣသရေလတို့ကို ကျိန်ဆဲစေခဲ့သည်တကား!—တောလည်ရာ ၂၂:၁-၆; တရားဟောရာ ၂၃:၃-၆။

ထိုတွင် ထူးဆန်သောအရာဖြစ်ပျက်ခဲ့သည်။ ဗာလမ်သည် သူ၏ကျိန်ဆိုမှုကို မပြောနိုင်ဘဲဖြစ်နေသည်ဟု သမ္မာကျမ်းစာက ဖော်ပြသည်။ သူသည် သူတို့အပေါ်သို့ ကောင်းချီးသာ ကြေညာပေးနိုင်ခဲ့သည်။ သူဤသို့ဆိုသည်– “သင့်ကို ကောင်းချီးပေးသောသူသည် ကောင်းချီးမင်္ဂလာရှိ၏။ သင့်ကို ကျိန်ဆဲသောသူသည် ကျိန်ဆဲခြင်းကိုခံရသည်။” (တောလည်ရာ ၂၄:၉) အမ္မုန်အမျိုးသားများအပါအဝင် ပါဝင်ပတ်သက်နေသောသူတို့သည် ယင်းမှ ကြီးမားသောသင်ခန်းစာ ရယူသင့်သည်– ဘုရားသခင့်လူမျိုးတော်ပါဝင်ပတ်သက်နေသောအခါ သူတို့၏အကျိုးအတွက် ဝင်စွက်ဖက်ရန် ကိုယ်တော်အဆင်သင့်ရှိပေသည်!

သို့သော် အမ္မုန်အမျိုးသားတို့သည် ဣသရေလတို့ကိုဆန့်ကျင်ရန် နည်းလမ်းများကို ဆက်လက်ရှာကြံနေခဲ့သည်။ တရားသူကြီးများခေတ်ကာလတွင် အမ္မုန်သည် မောဘ၊ အာမလက်တို့နှင့် ပူးပေါင်းကာ ကတိထားရာပြည်သို့ကျူးကျော်ဝင်ရောက်ပြီး ယေရိခေါမြို့အထိတိုင်လိုက်လံတိုက်ခိုက်ခဲ့သည်။ သို့သော်လည်း ဣသရေလလူမျိုး တရားသူကြီးဧဟုဒက ကျူးကျော်သူများကို ပြန်တိုက်ထုတ်ခဲ့သောကြောင့် အောင်မြင်မှုသည် တစ်ခဏသာဖြစ်ခဲ့သည်။ (တရားသူကြီး ၃:၁၂-၁၅၊ ၂၇-၃၀) မတည်ငြိမ်သောစစ်ဆိုင်းငံ့မှုသည် တရားသူကြီးယေဖသအချိန်အထိသာ ကြာရှည်ခံခဲ့သည်။ ထို့နောက် ဣသရေလလူမျိုးတို့သည် ရုပ်ကိုးကွယ်ခဲ့ကြသောကြောင့် ယေဟောဝါသည် မိမိ၏ကာကွယ်စောင့်ရှောက်မှုကို ရုပ်သိမ်းခဲ့သည်။ သို့ဖြင့် ဘုရားသခင်သည် ၁၈ နှစ်ခန့် သူတို့ကို “အမ္မုန်အမျိုးသားတို့၌ . . . ရောင်းတော်မူ” ခဲ့သည်။ (တရားသူကြီး ၁၀:၆-၉) ဣသရေလအမျိုးသားတို့သည် ရုပ်ကိုးကွယ်မှုကိုစွန့်လွှတ်ပြီး ယေဖသ၏ဦးဆောင်မှုအောက် ပြန်လည်စုစည်းလာကြသောအခါ အမ္မုန်အမျိုးသားတို့သည် နောက်တစ်ဖန် ကြီးစွာရှုံးနိမ့်ကြရပြန်သည်။—တရားသူကြီး ၁၀:၁၆–၁၁:၃၃။

တရားသူကြီးများဖြင့်အုပ်ချုပ်သော ဣသရေလခေတ်ကာလသည် ယင်းတို့၏ပထမဦးဆုံးဘုရင် ရှောလု၏ ဘိသိက်အခမ်းအနားတွင် အဆုံးတိုင်သွားလေသည်။ ရှောလု စတင်အုပ်ချုပ်၍မကြာမမြင့်မီ အမ္မုန်တို့၏ရန်လိုမှု တစ်ဖန်ပေါ်ပေါက်လာပြန်သည်။ ဘုရင်နာဟတ်သည် ဣသရေလလူမျိုး၏ ယာဗက်-ဂိလဒ်မြို့ကို လျှပ်တစ်ပြက်တိုက်ခိုက်ခဲ့သည်။ ထိုမြို့မှလူများက ငြိမ်းချမ်းရေးအတွက် ပြောလာသောအခါ အမ္မုန်အမျိုးသားနာဟတ်က ဤတုန်လှုပ်ချောက်ချားဖွယ်ကောင်းသောတောင်းဆိုချက်ကို ဆင့်ဆိုခဲ့သည်– “သင်တို့၌ လက်ယာမျက်စိရှိသမျှကိုဖောက် . . . ရသောအခွင့်ကို ပေးမှသာ မိတ်သဟာယဖွဲ့မည်။” ယင်းကို တစ်စိတ်တစ်ဒေသအနေနှင့် ကာကွယ်မှုအတွက်ပြုခြင်းဖြစ်ပြီး ထိုသို့ပြုမှသာ “သူတို့၏ဒိုင်းလွှားများက လက်ဝဲမျက်စိကို ဖုံးကွယ်နေသောအခါ စစ်မှုတွင် လုံးလုံးအသုံးမဝင်တော့ဘဲဖြစ်ကောင်းဖြစ်မည်” ဟု သမိုင်းဆရာဖလေးဗီးယပ် ဂျိုစီဖတ်စ်ကဆိုသည်။ သို့သော် ဤရက်စက်သောရာဇသံ၏ ရည်ရွယ်ချက်အစစ်မှာ ဤဣသရေလအမျိုးသားများကို အရှက်ခွဲသည့်နမူနာအဖြစ် လုပ်ဆောင်ခြင်းဖြစ်သည်။—၁ ဓမ္မရာဇဝင် ၁၁:၁၊ ၂။

နောက်တစ်ဖန် အမ္မုန်အမျိုးသားတို့သည် ယေဟောဝါ၏ကြင်နာမှုကို ရန်လိုမှုဖြင့် တုံ့ပြန်ခဲ့သည်။ ဤဆိုးညစ်သောခြိမ်းခြောက်မှုကို ယေဟောဝါလျစ်လျူမရှုခဲ့ပါ။ “[နာဟတ်၏] ထိုသတင်းကို ရှောလုကြားသောအခါ ဘုရားသခင်၏ဝိညာဉ်တော်သက်ရောက်၍ သူသည် ပြင်းစွာအမျက်ထွက်” လေသည်။ ဘုရားသခင်၏ဝိညာဉ်တော်ညွှန်ကြားမှုအောက်၌ ရှောလုသည် တိုက်ခိုက်ရေးသမား ၃၃၀,၀၀၀ ရှိသောအင်အားကိုစုစည်းကာ အမ္မုန်အမျိုးသားတို့ကို လမ်းခရီးတစ်လျှောက်လုံးတိုက်ခိုက်ခဲ့ရာ “ကျန်ကြွင်းသောသူတစ်ယောက်နှင့်တစ်ယောက်ပေါင်း၍ မနေရသည်တိုင်အောင်” ပင်ဖြစ်သည်။—၁ ဓမ္မရာဇဝင် ၁၁:၆၊ ၁၁။

အမ္မုန်အမျိုးသားများသည် မိမိတို့အကျိုးအတွက်သာ တစ်ကိုယ်ကောင်းဆန်စွာအာရုံဝင်စားနေမှု၊ ရက်စက်ကြမ်းကြုတ်မှုနှင့် လောဘကြီးမှုတို့က အဆုံး၌ သူတို့အတွက်လုံးလုံးပျက်စီးမှုသာဖြစ်စေခဲ့သည်။ ယေဟောဝါ၏ပရောဖက်ဖြစ်သော ဇေဖနိကြိုဟောခဲ့သကဲ့သို့ပင် သူတို့သည် မည်သို့ဖြစ်လာခဲ့သနည်းဟူမူ “အစဉ်အမြဲပျက်စီးရာအရပ်ဖြစ်၍၊ . . . သူတို့သည် . . . ကဲ့ရဲ့လျက်၊ ကောင်းကင်ဗိုလ်ခြေအရှင်ထာဝရဘုရား၏လူမျိုးတစ်ဖက်၌ ဝါကြွားသောကြောင့် ထိုသို့သောအပြစ်ကိုခံရကြလိမ့်မည်။”—ဇေဖနိ ၂:၉၊ ၁၀။

ကမ္ဘာ့ခေါင်းဆောင်များသည် အမ္မုန်တို့၌ ဖြစ်ပျက်ခဲ့သည့်အရာကို သတိပြုသင့်သည်။ ဘုရားသခင်သည် မိမိ၏ခြေတင်ရာခုံဖြစ်သောကမ္ဘာပေါ်တွင် နေထိုင်ရန်ခွင့်ပြုထားခြင်းဖြင့် လူမျိုးတို့အား ထပ်တူကြင်နာမှုအတန်အရာကို တင်ပြသည်။ သို့သော်လည်း ကမ္ဘာမြေကြီးကိုဂရုစိုက်စောင့်ရှောက်မည့်အစား တစ်ကိုယ်ကောင်းဆန်သောလူမျိုးတို့သည် ယင်းကိုဖျက်ဆီးနေကြပြီး နျူကလီးယားပျက်စီးမှုဖြင့်ပင် ကမ္ဘာဂြိုဟ်ကြီးကို ခြိမ်းခြောက်မှုပြုကြသည်။ ကမ္ဘာမြေပေါ်ရှိ ယေဟောဝါကိုဝတ်ပြုသူများအား ကြင်နာမှုတင်ပြမည့်အစား မကြာခဏပင် လူမျိုးတို့သည် ရန်လိုမှုကိုတင်ပြကြပြီး သူတို့ကို ရက်စက်ကြမ်းကြုတ်စွာနှိပ်စက်ညှဉ်းပန်းကြသည်။ ထို့ကြောင့် အမ္မုန်အမျိုးသားတို့မှရသောသင်ခန်းစာမှာ ကိုယ်တော်၏ကြင်နာမှုအား ရန်လိုမှုဖြင့်တုံ့ပြန်ခြင်းကို ကိုယ်တော် ခပ်ပေါ့ပေါ့ယူမှတ်လိမ့်မည်မဟုတ် ဟူ၍ဖြစ်သည်။ ထို့ပြင် ရှေးအချိန်က ကိုယ်တော်လုပ်ခဲ့သကဲ့သို့ပင် ကိုယ်တော်၏အချိန်ကျရောက်တော်မူသောအခါ အရေးယူဆောင်ရွက်လိမ့်မည်ဖြစ်သည်။—ဆာလံ ၂:၆-၁၂ နှိုင်းယှဉ်။

[စာမျက်နှာ ၉ ပါ ရုပ်ပုံ]

အမ္မုန်အမျိုးသားများ၏မြို့တော် ရဗ္ဗတ်မြို့တည်နေရာဖြစ်ခဲ့သည့် အမ္မန်မြို့မှ ရောမအပျက်အယွင်းများ

[Credit Line]

Pictorial Archive (Near Eastern History) Est.

[စာမျက်နှာ ၁၀ ပါ ရုပ်ပုံ]

အမ္မုန်အမျိုးသားများ ဤဒေသ၌ နေထိုင်ခဲ့ကြသည်

[Credit Line]

Pictorial Archive (Near Eastern History) Est.

[Picture Credit Line on page 8]

Pictorial Archive (Near Eastern History) Est.