ရှေးဟီဘရူးအက္ခရာနဲ့ ရေးထားတဲ့ ဘုရားနာမည်ကို ရှေးလက်ရေးစာမူတွေမှာ အကြိမ်ကြိမ်တွေ့ရ
သမ္မာကျမ်းစာရှုထောင့်
ဘုရားသခင့်နာမည်
လူသန်းပေါင်းများစွာဟာ ဘုရားသခင်ကို သခင်၊ ထာဝရဘုရား၊ အလ္လာရှင်မြတ်၊ ဘုရားသခင် စတဲ့ ဘွဲ့ထူးတွေတပ်ပြီး ခေါ်ကြတယ်။ ဒါပေမဲ့ ဘုရားသခင်ဆီမှာ နာမည်ရှိတယ်။ အဲဒီနာမည်ကို အသုံးပြုသင့်သလား။
ဘုရားသခင့်နာမည် ဘယ်လိုခေါ်သလဲ။
လူတချို့ပြောဆိုရာ
ခရစ်ယာန်အခေါ်ခံသူအများစုကတော့ ဘုရားနာမည်ဟာ ယေရှုလို့ ပြောကြတယ်။ တချို့ကျတော့ အနန္တတန်ခိုးရှင်တစ်ပါးတည်း ရှိတဲ့အတွက် နာမည်သုံးဖို့ မလိုဘူးလို့ ပြောကြတယ်။ ဘုရားကို နာမည်နဲ့ခေါ်တာ မသင့်တော်ဘူးလို့ ပြောတဲ့သူတွေလည်း ရှိတယ်။
သမ္မာကျမ်းစာ ပြောဆိုရာ
အနန္တတန်ခိုးရှင် ဘုရားသခင့်နာမည်ဟာ ယေရှု မဟုတ်ဘူး။ ယေရှုဟာ အနန္တတန်ခိုးရှင်ဘုရား မဟုတ်လို့ပဲ။ တကယ်တော့ ယေရှုက “အဖ၊ နာမတော် သန့်ရှင်းမြင့်မြတ်ပါစေ” ဆိုပြီး ဘုရားသခင်ဆီ ဆုတောင်းကြဖို့ နောက်လိုက်တွေကို သင်ပေးခဲ့တယ်။ (လုကာ ၁၁:၂) ကိုယ်တိုင်လည်း “အဖ၊ အဖရဲ့နာမည်ကို ဘုန်းထင်ရှားစေပါ” ဆိုပြီး ဆုတောင်းခဲ့တယ်။—ယောဟန် ၁၂:၂၈။
ဘုရားသခင်က “ငါဟာ ယေဟောဝါပဲ။ ဒါဟာ ငါ့နာမည်ပဲ။ ငါ့ရဲ့ဘုန်းအသရေကို ဘယ်သူ့ကိုမှ မပေးဘူး” လို့ ကျမ်းစာမှာ ပြောတယ်။ (ဟေရှာယ ၄၂:၈) ဟီဘရူးဗျည်းလေးလုံး יהוה (ယဟဝဟ) နဲ့ဖော်ပြတဲ့ ဘုရားသခင့်နာမည်ကို မြန်မာလို “ယေဟောဝါ” ဆိုပြီး ပြန်ဆိုထားတယ်။ ဒီနာမည်ကို ဟီဘရူးကျမ်းစောင်တွေမှာ အကြိမ် ၇,၀၀၀ နီးပါး တွေ့ရတယ်။a ဒီနာမည်ဟာ “ဘုရားသခင်၊” “အနန္တတန်ခိုးရှင်၊” “သခင်” စတဲ့ ဘွဲ့တွေထက် အကြိမ်ရေ ပိုများတယ်။ အာဗြဟံ၊ မောရှေ၊ ဒါဝိဒ် စတဲ့ နာမည်တွေထက်လည်း ပိုများတယ်။
ယေဟောဝါက သူ့နာမည် တလေးတစား အသုံးပြုတာကို တားမြစ်တဲ့အကြောင်း ကျမ်းစာမှာ မဖော်ပြထားဘူး။ ဘုရားရဲ့ကျေးကျွန်တွေ ဘုရားနာမည်ကို လွတ်လွတ်လပ်လပ် အသုံးပြုတာကိုပဲ တွေ့ရတယ်။ သားသမီးတွေကို နာမည်ပေးတဲ့အခါမှာလည်း ဘုရားနာမည် ပါတယ်။ ဥပမာ၊ ဧလိယဆိုတာ “ငါ့ဘုရားဟာ ယေဟောဝါ၊” ဇာခရိဆိုတာ “ယေဟောဝါ သတိရပြီ” လို့ အဓိပ္ပာယ်ရတယ်။ အချင်းချင်း စကားပြောတဲ့အခါမှာလည်း ဘုရားနာမည်ကို ထည့်ပြောတတ်ကြတယ်။—ရုသ ၂:၄။
ဘုရားသခင်က သူ့နာမည်ကို အသုံးပြုစေချင်တယ်။ ‘ယေဟောဝါကို ကျေးဇူးတင်ဖို့၊ နာမတော်ကိုခေါ်ပြီး ဆုတောင်းကြဖို့’ တိုက်တွန်းထားတယ်။ (ဆာလံ ၁၀၅:၁) “နာမတော်အကြောင်း တွေးတောဆင်ခြင်သူတွေ” ကိုလည်း ရေးမှတ်ထားတယ်။—မာလခိ ၃:၁၆။
“ယေဟောဝါလို့ နာမည်ရှိတဲ့ ကိုယ်တော် တစ်ပါးတည်းသာ မြေတစ်ပြင်လုံးမှာ အမြင့်မြတ်ဆုံးအရှင် ဖြစ်မှန်း လူတွေသိကြပါစေ။”—ဆာလံ ၈၃:၁၈။
ယေဟောဝါဆိုတဲ့ နာမည်ရဲ့ အဓိပ္ပာယ်ဟာ ဘာလဲ။
ဟီဘရူးဘာသာစကားမှာ ယေဟောဝါဆိုတဲ့ နာမည်ဟာ “ကိုယ်တော် ဖြစ်လာစေတယ်” လို့ အဓိပ္ပာယ်ရတယ်ဆိုပြီး ကျမ်းပညာရှင်တချို့ ယုံကြည်ကြတယ်။ အလိုတော်ပြည့်စုံစေဖို့ ကိုယ်တိုင် ဒါမှမဟုတ် ဖန်ဆင်းရာတွေကို ဘာမဆို ဖြစ်စေနိုင်တယ်ဆိုတဲ့ အဓိပ္ပာယ်ပဲ။ အနန္တတန်ခိုးရှင် ဖန်ဆင်းရှင်တစ်ပါးတည်းသာ ဒီနာမည်နဲ့ ကိုက်ညီတယ်။
သင်နဲ့သက်ဆိုင်ပုံ
ဘုရားသခင့်နာမည်ကို သိထားမယ်ဆိုရင် ဘုရားနဲ့ပတ်သက်တဲ့ သင့်ရဲ့ စဉ်းစားပုံ ပြောင်းလဲသွားမယ်။ ဘုရားသခင်နဲ့ရင်းနှီးဖို့ ပိုလွယ်ကူလာမယ်။ နာမည်မသိတဲ့သူနဲ့ ခင်မင်ရင်းနှီးဖို့ဆိုတာ ဘယ်လိုမှ မဖြစ်နိုင်ဘူး။ ဘုရားသခင်က သူ့နာမည်ကို ပေးသိတယ်ဆိုကတည်းက သူနဲ့ ရင်းနှီးစေချင်မှန်း သိသာတယ်။—ယာကုပ် ၄:၈။
ယေဟောဝါဟာ ကတိမှန်သမျှ ပြည့်စုံစေတဲ့ ဘုရားအနေနဲ့ သူ့နာမည်နဲ့အညီ အမြဲလုပ်ဆောင်မယ်ဆိုတာ စိတ်ချနိုင်တယ်။ ဒါကြောင့် “နာမတော်ကိုသိတဲ့သူတွေ ကိုယ်တော့်ကို ယုံကြည်ကိုးစားကြလိမ့်မယ်” လို့ ကျမ်းစာပြောတယ်။ (ဆာလံ ၉:၁၀) ယေဟောဝါဆိုတဲ့ နာမည်ဟာ ခိုင်မြဲတဲ့မေတ္တာ၊ ကရုဏာ၊ သနားစာနာမှု၊ တရားမျှတမှု စတဲ့ ဘုရားရဲ့ အရည်အသွေးတွေနဲ့ ဆက်စပ်နေမှန်း သိလာတဲ့အခါ ဘုရားသခင်ကို ယုံကြည်ကိုးစားချင်စိတ် ပေါ်လာတယ်။ (ထွက်မြောက်ရာ ၃၄:၅-၇) ယေဟောဝါဟာ ကတိတွေကို အမြဲပြည့်စုံစေမှာဖြစ်သလို သူ့အရည်အသွေးတွေနဲ့ မကိုက်ညီတာကို ဘယ်တော့မှ မလုပ်မှန်း သိရတာ အားရှိစရာပဲ။
အနန္တတန်ခိုးရှင်ဘုရားသခင်ရဲ့ နာမည်ကို သိရတာ တကယ့်အခွင့်ထူးပဲ။ အခုချိန်မှာရော အနာဂတ်မှာပါ ကောင်းချီးတွေ ခံစားရနိုင်တယ်။ “ငါ့နာမည်ကို သိတဲ့အတွက် သူ့ကို ကာကွယ်မယ်” ဆိုပြီး ဘုရား ကတိပေးထားလို့ပဲ။—ဆာလံ ၉၁:၁၄။
“ယေဟောဝါရဲ့နာမည်ကို ခေါ်ပြီး ဆုတောင်းသူတိုင်း ကယ်တင်ခံရမယ်။”—ယောလ ၂:၃၂။
ဘာသာစကားအမျိုးမျိုးနဲ့ ပြန်ဆိုထားတဲ့ ဘုရားနာမည်
a ဘာသာပြန်ကျမ်းအများစုမှာ ဘုရားနာမည်ကို ထုတ်ပယ်ပြီး “သခင်” ဆိုတဲ့ ဘွဲ့နဲ့ အစားထိုးကြတယ်။ တချို့ကျမ်းတွေမှာတော့ အခန်းငယ် ဒါမှမဟုတ် အောက်ခြေမှတ်ချက်တချို့မှာပဲ ဘုရားနာမည်ကို ထည့်ကြတယ်။ ကမ္ဘာသစ်ဘာသာပြန်ကျမ်းမှာတော့ နာမတော်ကို အတော်များများ အသုံးပြုထားတယ်။