စီးပွားရေးကိစ္စတွေမှာ အငြင်းပွားမှုကို ဖြေရှင်းခြင်း

တမန်တော်ပေါလုက ယုံကြည်သူအချင်းချင်း တရားစွဲဆိုမှုအကြောင်း ၁ ကောရိန္သု ၆:၁-၈ မှာ ဆွေးနွေးထားတယ်။ ကောရိန္သုမြို့မှာရှိတဲ့ ခရစ်ယာန်တချို့ “တရားရုံးမှာရှိတဲ့ မဖြောင့်မတ်သူတွေဆီ သွားဝံ့” တာကို သူအံ့သြမိတယ်။ (အခန်းငယ် ၁) ခရစ်ယာန်တွေဟာ တရားရုံးမှာ အချင်းချင်း တရားစွဲမယ့်အစား အငြင်းပွားမှုတွေကို အသင်းတော်မှာပဲ ဖြေရှင်းသင့်တဲ့ အကြောင်းရင်းကောင်းတချို့ကို ပေါလု ဖော်ပြတယ်။ အဲဒီလို အကြံဉာဏ်ပေးရတဲ့ အကြောင်းရင်းတချို့ကို သုံးသပ်ပြီးနောက် အဲဒီအကြံဉာဏ်နဲ့ မသက်ဆိုင်တဲ့ အခြေအနေအနည်းငယ်ကို ဆွေးနွေးကြစို့။

စီးပွားရေးကိစ္စမှာ ယုံကြည်သူတစ်ဦးနဲ့ အငြင်းပွားစရာ ပေါ်လာရင် ကိုယ့်နည်းကိုယ့်ဟန်နဲ့ မဖြေရှင်းဘဲ ယေဟောဝါရဲ့ နည်းလမ်းအတိုင်း ဖြေရှင်းဖို့ ကြိုးစားရမယ်။ (ပညာအလိမ္မာ ၁၄:၁၂) ယေရှုဖော်ပြတဲ့အတိုင်း ပြဿနာ ပိုကြီးမလာခင် မကျေနပ်စရာတစ်ခုကို ချက်ချင်းဖြေရှင်းတာ အကောင်းဆုံးပဲ။ (မဿဲ ၅:၂၃-၂၆) ဝမ်းနည်းစရာက ခရစ်ယာန်တချို့ဟာ အကြီးအကျယ်အငြင်းပွားပြီး တရားစွဲတဲ့အထိ ဖြစ်ကြတယ်။ “အချင်းချင်း တရားစွဲဆိုတာဟာ ခင်ဗျားတို့အတွက် ရှုံးနိမ့်ခြင်းပဲ” လို့ ပေါလုပြောတယ်။ ဘာကြောင့်လဲ။ အဓိကအကြောင်းရင်းက တရားစွဲဆိုတာဟာ အသင်းတော်ရဲ့ နာမည်ကောင်းကိုသာမက ကျွန်တော်တို့ ကိုးကွယ်တဲ့ ဘုရားရဲ့ နာမည်ကိုပါ ရှုတ်ချစရာ ဖြစ်စေတယ်။ ဒါကြောင့် “မတရားမှုကို ကိုယ်တိုင်ပဲ ခံလိုက်ပါလား” လို့ ပေါလုပြောခဲ့တာကို နှလုံးသွင်းသင့်တယ်။​—အခန်းငယ် ၇။

ဒါ့အပြင် ဘုရားသခင်ဟာ အငြင်းပွားမှုများစွာကို အသင်းတော်မှာ ဖြေရှင်းဖို့ နည်းလမ်းကောင်းတွေ ပေးထားကြောင်း ပေါလု ပြောပြတယ်။ အကြီးအကဲတွေဟာ ကျမ်းစာအမှန်တရားကို သိကျွမ်းတဲ့ ဉာဏ်ပညာရှိ ခရစ်ယာန်အမျိုးသားတွေပဲ။ သူတို့ဟာ “ဒီဘဝမှာ ကြုံရတဲ့ အမှုကိစ္စတွေ” နဲ့ပတ်သက်ပြီး “ညီအစ်ကိုအချင်းချင်း . . . တရားစီရင်နိုင်” သူတွေဖြစ်တယ်လို့ ပေါလုဆိုတယ်။ (အခန်းငယ် ၃-၅) အသရေဖျက်ခြင်း၊ ကလိမ်ကျခြင်းတို့လို ကြီးလေးတဲ့အပြစ်တွေနဲ့ဆိုင်တဲ့ အငြင်းပွားမှုတွေကို အဆင့်သုံးဆင့်နဲ့ ဖြေရှင်းသင့်တယ်လို့ ယေရှု ပြောတယ်။ ပထမ၊ အငြင်းပွားသူအချင်းချင်း သီးသန့်ဖြေရှင်းဖို့ ကြိုးစားမယ်။ ဒုတိယ၊ ပထမအဆင့် မအောင်မြင်ရင် သက်သေတစ်ဦးနှစ်ဦး ခေါ်ပြီး ဖြေရှင်းမယ်။ တတိယ၊ ဒီအဆင့် မအောင်မြင်ရင် အသင်းတော်ကို ကိုယ်စားပြုတဲ့ အကြီးအကဲတွေဆီ အသိပေးဖြေရှင်းစေမယ်။​—မဿဲ ၁၈:၁၅-၁၇။

ခရစ်ယာန်အကြီးအကဲတွေဟာ ရှေ့နေတွေ၊ စီးပွားရေးသမားတွေ မဟုတ်တဲ့အတွက် အဲဒီလူတွေလို ဖြေရှင်းပေးမှာ မဟုတ်ဘူး။ ညီအစ်ကိုအချင်းချင်း စီးပွားရေးကိစ္စ အငြင်းပွားမှုတွေကို ဖြေရှင်းပေးရာမှာ စည်းကမ်းချက်တွေ ထုတ်ပေးမှာ မဟုတ်ဘူး။ အဲဒီအစား ပါဝင်ပတ်သက်သူအားလုံး ကျမ်းစာအတိုင်း ကျင့်သုံးပြီး ပြေပြေလည်လည် ဖြေရှင်းနိုင်ဖို့ ကူညီပေးတယ်။ ရှုပ်ထွေးတဲ့ကိစ္စတွေ ဖြေရှင်းရာမှာ တိုက်နယ်ကြီးကြပ်မှူး ဒါမှမဟုတ် ယေဟောဝါသက်သေတွေရဲ့ ဌာနခွဲရုံးနဲ့ တိုင်ပင်ချင်မှာပဲ။ ဒါပေမဲ့ ပေါလုပေးတဲ့ အကြံဉာဏ်နဲ့ ဖြေရှင်းလို့မရနိုင်တဲ့ အခြေအနေတွေ ရှိတယ်။ ဘယ်လို အခြေအနေတွေလဲ။

အခြေအနေတချို့မှာ တရားစွဲဆိုမှုဟာ ကိုယ်ကျိုးအတွက် မဟုတ်ဘဲ ပြေလည်ဖို့အတွက် ထုံးစံအရ ဒါမှမဟုတ် ဥပဒေအရ ပြုလုပ်တဲ့ နည်းတစ်နည်း ဖြစ်မယ်။ ဥပမာ၊ ကွာရှင်းပြတ်စဲကြောင်း ရုံးတော်အမိန့် ရဖို့၊ ကလေးထိန်းသိမ်းစောင့်ရှောက်ခွင့် ရဖို့၊ ထောက်ပံ့ငွေ ရဖို့၊ အာမခံလျော်ကြေး ရဖို့၊ ဒေဝါလီခံရာမှာ ကြွေးမြီရလိုသူစာရင်းဝင်ဖို့၊ သေတမ်းစာမှန်ကြောင်း အတည်ပြုချက်ရဖို့ တရားစွဲရတာတွေ ရှိနိုင်တယ်။ ညီအစ်ကိုတစ်ဦး တရားစွဲခံရတဲ့အတွက် ကိုယ့်ကိုယ်ကိုယ် ကာကွယ်ဖို့ တန်ပြန်တရားစွဲရတဲ့ အခြေအနေမျိုးလည်း ရှိနိုင်တယ်။a

ရန်လိုစိတ် မပါဘဲ တရားစွဲတာဟာ ပေါလုရဲ့ အကြံဉာဏ်ကို မလိုက်နာရာ မရောက်ဘူး။b ခရစ်ယာန်တစ်ဦးဟာ ယေဟောဝါရဲ့နာမည် သန့်ရှင်းမြင့်မြတ်ဖို့၊ အသင်းတော် ငြိမ်သက်စည်းလုံးဖို့ အဓိကထားသင့်တယ်။ ခရစ်တော်နောက်လိုက်တွေရဲ့ အဓိက အမှတ်အသားဟာ ချစ်ခြင်းမေတ္တာပဲ။ “မေတ္တာဟာ . . . ကိုယ်ကျိုး မရှာတတ်ဘူး။”​—၁ ကောရိန္သု ၁၃:၄၊ ၅။ ယောဟန် ၁၃:၃၄၊ ၃၅။