ဗိမာန်တော်အကြောင်း ယေဇကျေလစိတ်အာရုံမှ သင်ခန်းစာများ

စင်ကြယ်တဲ့ ဝတ်ပြုကိုးကွယ်မှု မြှင့်တင်ခံရပြီး ကာကွယ်ခံရ

စိတ်အာရုံပါ ဗိမာန်တော်ဟာ ‘မြင့်မားလှတဲ့တောင်ပေါ်’ (၁) မှာ ချီးမြှောက်ခံရတယ်။ ကိုယ့်အသက်တာမှာ စင်ကြယ်တဲ့ ဝတ်ပြုကိုးကွယ်မှုကို ဦးစားထားခြင်းအားဖြင့် ချီးမြှောက်နေရဲ့လား။

မြေကွက်လပ်ကြီး (၃) ရဲ့ အလယ်မှာရှိတဲ့ ဗိမာန်တော်အဆောက်အအုံကို ကာရံထားတဲ့ ပတ်လည်တံတိုင်း (၂) က ယေဟောဝါရဲ့ ဝတ်ပြုရေးကို ညစ်ညမ်းစေတဲ့ ဘယ်အရာကိုမှ ခွင့်မပြုဖို့ ကျွန်တော်တို့ကို သတိပေးနေတယ်။ “လူအများနဲ့ဆိုင်တဲ့” အရာတွေကိုတောင် စင်ကြယ်တဲ့ ဝတ်ပြုကိုးကွယ်မှုကနေ ဖယ်ရှားရမယ်ဆိုရင် ဒီနေ့အချိန်မှာ ယေဟောဝါကို ဝတ်ပြုကိုးကွယ်သူတွေရဲ့ အသက်တာကနေ မသန့်ရှင်းမှု၊ ကိုယ်ကျင့်တရားယိုယွင်းမှုတွေကို ပိုလို့တောင် ဖယ်ထုတ်ပစ်သင့်တယ်။—ယေဇ. ၄၂:၂၀။

အဆုံးမဲ့ ကောင်းချီးများ

ဗိမာန်တော်သန့်ရှင်းရာဌာနကနေ ပြည်ထဲ (၄) ကို မြစ်တစ်စင်း အရှိန်နဲ့ စီးဆင်းလာပြီး အသက်နဲ့ သီးပွင့်ဖြစ်ထွန်းမှုတွေ ဆောင်ကြဉ်းလာတယ်။ အဲဒီကောင်းချီးတွေအကြောင်း အခန်း ၁၉ မှာ ဆွေးနွေးပါမယ်။

အားလုံးအတွက် တူညီတဲ့ စံနှုန်းများ

စင်ကြယ်တဲ့ ဝတ်ပြုကိုးကွယ်မှုမှာ ပါဝင်သူအားလုံးအတွက် ချမှတ်ထားတဲ့ ကိုယ်ကျင့်တရားဆိုင်ရာ ယေဟောဝါရဲ့ စံနှုန်းတွေဟာ မြင့်မားကြောင်း မြင့်မားလှတဲ့ အပြင်တံခါးတွေ (၅) နဲ့ အတွင်းတံခါးတွေ (၉) က အမှတ်ရစေတယ်။ အတွင်း၊ အပြင် တံခါးတွေရဲ့ အတိုင်းအတာအားလုံး အတူတူပဲဆိုတာ သတိပြုပါ။ တာဝန်၊ အမှုဆောင်နိုင်စွမ်းတွေပေါ် မမူတည်ဘဲ ကျေးကျွန်အားလုံးအတွက် ယေဟောဝါရဲ့ ဖြောင့်မတ်တဲ့ တောင်းဆိုချက်တွေဟာ အတူတူပဲမို့ တကယ်ပဲ သင့်လျော်ပါတယ်။

ယေဟောဝါရဲ့ စားပွဲတော်

ရှေးခေတ်က ဗိမာန်တော်ကို ယူဆောင်လာတဲ့ ပူဇော်သက္ကာတွေကို အတူဝေမျှ ကြကြောင်း၊ တစ်နည်းအားဖြင့် ယေဟောဝါနဲ့အတူ စားသောက်ကြကြောင်းကို စားသောက်ခန်းတွေ (၈) က အမှတ်ရစေတယ်။ ဒီနေ့အချိန်မှာ ခရစ်ယာန်တွေဟာ ပုံဆောင်ဗိမာန်တော်မှာ ဝတ်ပြုကိုးကွယ်နေကြပြီး “ပူဇော်သက္ကာတစ်ခုတည်း” ဆက်သခဲ့ပြီးဖြစ်လို့ ကွာတော့ကွာတယ်။ (ဟီ. ၁၀:၁၂) ဒါပေမဲ့ ကျွန်တော်တို့လည်း ချီးမွမ်းခြင်းပူဇော်သက္ကာကို ဆက်သနေကြတုန်းပါပဲ။—ဟီ. ၁၃:၁၅။

ဘုရားသခင့် အာမခံချက်

စိတ်အာရုံပါ အသေးစိတ်ကျတဲ့ အတိုင်းအတာအားလုံးက စိတ်ထိမိစေပါလိမ့်မယ်။ စိတ်အာရုံပါ အတိုင်းအတာတွေ မပြောင်းလဲဘဲ တိကျသေချာသလို စင်ကြယ်တဲ့ ဝတ်ပြုကိုးကွယ်မှုကို ပြန်လည်တည်ထောင်မယ်ဆိုတဲ့ ယေဟောဝါရဲ့ ရည်ရွယ်ချက်ဟာလည်း အကြွင်းမဲ့ သေချာတယ်ဆိုတဲ့ အဓိကအချက်ကို သင်ပေးတယ်။ စိတ်အာရုံထဲမှာ လူတွေ တွေ့ရတယ်ဆိုပြီး ယေဇကျေလ မဖော်ပြပေမဲ့ ပုရောဟိတ်တွေ၊ အကြီးအမှူးတွေ၊ လူတွေကို ယေဟောဝါ ပြင်းပြင်းထန်ထန် သတိပေးတဲ့အကြောင်းကိုတော့ မှတ်တမ်းတင်ထားတယ်။ ဖြောင့်မတ်တဲ့ စံနှုန်းတွေကို ဘုရားကျေးကျွန်အားလုံး လိုက်နာကြရမယ်။