ဘုရားသခင်ကို အမည်နှင့်တကွ သိကျွမ်းနိုင်ပါသလော

စစ်မှန်သော ဘုရားသခင်သည် သမ္မာကျမ်းစာတွင် ဤသို့မိန့်ဆိုတော်မူ၏– ‘ငါသည် ယေဟောဝါ ဘုရားသခင် ဖြစ်၏။ ထိုနာမသည် ငါ့နာမ ဖြစ်၏။’ (ဟေရှာယ ၄၂:၈) ကိုယ်တော်၌ “ဖန်ဆင်းရှင်၊” “အတိုင်းအဆမဲ့ တန်ခိုးရှင်၊” “အချုပ်အခြာအာဏာရှင်” အစရှိသော ဘွဲ့နာမ များစွာရှိသော်လည်း မိမိအား အမည်နှင့်တကွ ခေါ်ဆိုစေခြင်းအားဖြင့် သစ္စာရှိကျေးကျွန်များကို အမြဲဂုဏ်တင်တော်မူသည်။

ဥပမာ၊ ပရောဖက်မောရှေသည် တစ်ချိန်တွင် ဘုရားသခင်အား ‘အို ယေဟောဝါ ဘုရားသခင်’ ဟူ၍ အသနားခံခဲ့သည်။ (ထွက်မြောက်ရာ ၄:၁၀) ဘုရင်ရှောလမုန်သည် ဂျေရုဆလင်မြို့ရှိ ဝတ်ပြုရာအိမ်တော်ကို အပ်နှံချိန်၌ ‘အို ယေဟောဝါ ဘုရားသခင်’ ဟူ၍ အစချီကာ ဆုတောင်းခဲ့သည်။ (၃ ဓမ္မရာဇဝင် ၈:၂၂၊ ၂၃) ပရောဖက်ဟေရှာယသည် အစ္စရေးလူမျိုး အကျိုးအတွက် ဘုရားသခင်ကို ဤသို့လျှောက်ဆိုခဲ့သည်– ‘အို ယေဟောဝါ ဘုရားသခင်၊ ကိုယ်တော်သည် အကျွန်ုပ်တို့အဘ ဖြစ်တော်မူ၏။’ (ဟေရှာယ ၆၃:၁၆) ကျွန်ုပ်တို့၏ ကောင်းကင်ခမည်းတော်သည် မိမိအား အမည်နှင့်တကွ ခေါ်ဆိုခွင့်ပြုနေသည်မှာ ရှင်းနေပါသည်။

ယေဟောဝါ ဘုရားသခင်အား အမည်တပ် ခေါ်ဆိုခြင်းက အရေးကြီးသော်လည်း ကိုယ်တော့်ကို အမည်နှင့်တကွ သိကျွမ်းရန် ပို၍အရေးကြီးသည်။ ယေဟောဝါ ဘုရားသခင်ကိုချစ်ပြီး ယုံကြည်ကိုးစားသူကို ကိုယ်တော် ဤသို့ ကတိပြုတော်မူသည်– “ငါ၏နာမကို သိကျွမ်းသောကြောင့် ဘေးကင်းရာအမြင့်သို့ ရောက်စေမည်။” (ဆာလံ ၉၁:၁၄၊ သမ္မာ) ဘုရားသခင့်နာမတော်ကို သိကျွမ်းခြင်းတွင် အဓိပ္ပာယ်များစွာရှိရမည်မှာ ထင်ရှားသည်။ အကြောင်းမှာ ဘုရားသခင့် ကာကွယ်မှုကို ရရှိရန် ယင်းသည် အဓိကကျသောကြောင့် ဖြစ်သည်။ သို့ဖြစ်လျှင် ယေဟောဝါ ဘုရားသခင်ကို အမည်နှင့်တကွ သိကျွမ်းရန် အဘယ်အရာ လိုအပ်သနည်း။