Milamin-tsaina na eo aza ny Ady
Tao amin’ny tafika i Gary taloha, dia izao no lazainy: “Tamin’izaho mbola tsy nianatra Baiboly dia tsy azoko mihitsy hoe nahoana no be dia be ny habibiana, ny tsy rariny, ary ny korontana eran-tany. Milamin-tsaina anefa aho izao. Fantatro hoe hataon’i Jehovah Andriamanitra milamina ny tany.”
Tsy i Gary irery no mahatsapa hoatr’izany. Diniho hoe ahoana no nanampian’ny Baiboly ny olon-kafa.
HOY NY BAIBOLY: “Tsara toetra sy vonona hamela heloka ... ianao, Jehovah ô!”—Salamo 86:5.
SOA AZO: “Manome toky ahy io andininy io hoe mamindra fo i Jehovah. Fantatro hoe vonona hamela an’izay rehetra nataoko tamin’izaho nandray anjara tamin’ny ady izy.”—Wilmar, Kolombia.
HOY NY BAIBOLY: “Hamorona lanitra vaovao sy tany vaovao aho. Dia tsy hotsaroana intsony ny zavatra taloha, sady tsy handreraka fo.”—Isaia 65:17.
SOA AZO: “Noho ny zavatra niainako tao amin’ny tafika dia kivy lava aho sady tratran’ilay aretina hoe tahotra vokatry ny zavatra nanjo. Mampahatsiahy ahy anefa io andininy io hoe kely sisa dia hataon’i Jehovah hadinoko tanteraka ireny fahatsiarovana ratsy ireny. Tena tiako be ilay hoe tsy hahatsiaro an’ireny intsony aho!”—Zafirah, Etazonia.
HOY NY BAIBOLY: “Amin’ny andro anjakany, dia ho be dia be ny olo-marina, ary ho be ny fiadanana mandra-paha tsy hisy volana intsony.”—Salamo 72:7.
SOA AZO: “Mieritreritra matetika an’ireo teny ireo aho. Kely sisa dia tsy hisy ady mahatsiravina hoatr’izao intsony, dia tsy hitaintaina intsony aho hoe sao dia maninomaninona ny havako sy ny namako.”—Oleksandra, Ukraine.
HOY NY BAIBOLY: “Ho velona ny olonao efa maty. ... Mifohaza ka mihobia, ianareo izay mipetraka ao anaty vovoka!”—Isaia 26:19.
SOA AZO: “Efa ho ny havako rehetra no maty tamin’ny fandripahana ny foko tutsi. Manome toky ahy anefa io andinin-teny io hoe mbola hahita an-dry zareo indray aho. Efa tsy andriko ny haheno ny feon’izy ireo falifaly rehefa hatsangana amin’ny maty ry zareo!”—Marie, Rwanda.
HOY NY BAIBOLY: “Kely sisa dia tsy hisy intsony ny ratsy fanahy. ... Fa ny mpandefitra kosa no handova ny tany, ka ho faly be mihitsy satria tena hiadana.”—Salamo 37:10, 11.
SOA AZO: “Na dia tapitra aza ilay ady dia mbola misy foana ny tsy rariny sy ny olon-dratsy. Tena nanatanjaka ahy ireo andininy ireo. Mahita ny zava-drehetra i Jehovah dia azony tsara ny zavatra iainako. Mampanantena izy hoe kely sisa dia tsy hisy intsony sady tsy hotsaroana intsony ny fijaliana.”—Daler, Tadjikistan.
Anisan’ny Vavolombelon’i Jehovah an-tapitrisany nampian’ny Baiboly hilamin-tsaina ny olona voaresaka tato. Nianatra tsy hankahala olona avy amin’ny foko sy firenena hafa ry zareo, ary nianatra ny tsy hitana alahelo amin’olona. (Efesianina 4:31, 32) Tsy manao politika ny Vavolombelon’i Jehovah ary tsy mandray anjara amin’ny herisetra mihitsy.—Jaona 18:36.
Mifanohana sy mifankatia hoatran’ny mpirahalahy koa ny Vavolombelon’i Jehovah eran-tany. (Jaona 13:35) Tsy maintsy nandositra niaraka tamin’ny rahavaviny tany an-tany hafa, ohatra, i Oleksandra, ilay voaresaka terỳ aloha, noho ny ady. Hoy izy: “Vao tafampita ny sisin-tany mihitsy izahay dia nahita Vavolombelon’i Jehovah nandray tsara anay. Nanampy anay ry zareo mba hizatra ny fiainana vaovao tany.”
Asainay ianao hivory hiaraka aminay. Ianarana any hoe ahoana no atao mba hilamin-tsaina dieny izao. Resahina any koa ny fampanantenan’ny Baiboly hoe hilamina ny fiainana amin’ny hoavy. Midira ao amin’ny jw.org raha te hitady ny toeram-pivoriana akaiky anao ianao, na te hangataka hianatra Baiboly maimaim-poana amin’ny Vavolombelon’i Jehovah, amin’ny bokikely Ankafizo Mandrakizay ny Fiainana!