N’OCHUFWENYAJ 6

¿Atsi toj Dios nech’ethayaj toj itiyej Honhat?

DIOS yenlhi p’ante Honhat hopkhilak wichi yen lew’eta. Lhomtes ikalelhat: «Pule lewuk t’at Lhawuk, wet hiw’enho wichi häp honhat» (Salmo 115:16).

Toj kamaj newache p’ante hin’u toj ichun, toj lhey Adán, Dios itshupyene p’ante Honhat lhip toj lhamsaj toj yen p’ante lheya Edén wet itihi p’ante yachuyajw’et. N’olhamethi in’alit toj tewok lhayis Éufrates wet Tigris (Hidequel) talho t’at lhip toj ihi Edén.a Iche wichi toj fwetaj yachuyajw’et Edén ihi p’ante honhat lhip toj athana hope Turquía. Matche t’at toj yachuyajw’ettso Edén iche p’ante.

Dios yenlhi p’ante Adán wet itihi p’ante yachuyajw’et Edén hopkhilak «tachumlhi wet t’uye» (Génesis 2:15). Toj paj Dios yenlhi p’ante Adán lech’efwa, toj lhey Eva. Dios ifwenho p’ante lhameltso: «Woyay alesa, a’ämay wujpey häpkhilek tapoyej honhat. A’en niyatayej honhat» (Génesis 1:28). Toj malhyejtso, Dios «yenhit’a ts’anisa [honhat] mat iwo lheleya tä häpe wichi» (Isaías 45:18).

Mat, Adán wet Eva tach’ahuhiyet’a p’ante Dios laka ley wet tatayhlo Dios. Hop toj tamenej toj Dios itiyej kanhi toj ihi p’ante yachuyajw’et Edén. Honhattso toj w’atshan wet isilataj tatay p’ante. Hote Adán lech’isukyaj iwo p’ante wit’aya lham wet leles.Dios Lhomtes yok: «Iche hin’o tefwajni tamenej p’ante tä n’och’isukyaj ihi honhat, wet n’och’isukyajna iton alhoho n’ot’ilek, wet n’ot’ilek y’aje nilhokej wichi tsi nilhokej iwo lech’isukyaja» (Romanos 5:12).

¿Ha ileche p’iya Heowa lenech’ethayaj toj nech’enyaya toj itiyej Honhat? Ilehichet’a, kamaj ihumin t’at che wichi ihi honhat toj nech’ayek wet lekajyaj ihiche. Dios ikalelhat namhohen: «Häp tä mälhyej’attso olhämtes tä owoye, häpkhit’ala olhämtes tä m’ak nitälhaye, mat yenhilhila m’ak tä olham ohuminche, wet yämla wak’alh lechumet tä ochene» (Isaías 55:11). Honhatna yachajohlak hope honhat toj isilataj.

¿Chihla malhyej wichi toj ihi lhiptso? Natetshan m’ayhay toj yome N’olhamethi toj ihi librofwajna lew’oley toj ihon elhna.

a Génesis 2:10-14 yok: «Iche tewok tä tälho t’at Edén yämthilek ipumyen yachuyajw’ettso. Wet häp tewoktso lhaich’esajen wet iche cuatro tewok lhayis tä lhachal. Elh tä ichun lhey Pisón; [...] tewok elh lhey Gihón; [...] tewok elh lhey Tigris [Hidequel], wet häp tä tiyäjche honhat tä Asiria lhip tä tumej hichä. Wet tewok elh lhey Éufrates». Wujit’a che n’otafwelej lhip toj ihi dos tewok lhayistso toj ichun.

Tatay alhoho Honhat toj w’atshan wet isilataj

N’op’itseyhay inuhikwephola: «Nilhokhiyeja n’op’itseyhay iläthiyela lechos wet inuhikwephäla tä tälhomche lep’itsekhis» (Juan 5:28, 29).

Nemla iche n’ot’inhayajay, n’ot’ilek wet wichi toj hich’uthen: «Ihichet’ala elh chik [...] yohlak: ‹Ot’inhayaj ilänn’o›» (Isaías 33:24). Dios «ilejihena nilhokej tatet’ilis, wet nemla iche n’ot’ilek lhäy’e n’olhakli, n’olhafwyhayaj, n’oteläythayaj» (Apocalipsis 21:4).

Wichi lhok hopkhila m’ak toj is wet wujla’pe: «Iche t’at häp lhay tä ihi honhat. Lhaka Dios takäpfwayej namehen m’ak tä is» (Salmo 67:6).

Ihichela n’owukwey toj isis wet n’ochumtes toj isen: «Yenlawethä lewukwey wet ihlachufwi [...] lhamel iwohla kotsayej m’ak tä tälho lechumtes» (Isaías 65:21, 22).

Ihichet’ala n’ofwitsayaj, n’olanyaj wet n’oka’tshayajay: Heowa «itäyhat n’oka’tshayajay, yäk nichäte honhat lhip tä lepes tä nem n’oka’tshayaj ihi» (Salmo 46:9). «Häp lhamel tä iwoye m’ak tä ni’isa wet ileche Dios len’äyij, õ’tihiyeja kanhihlä honhat tä ihi» (Proverbios 2:22).