Dios yenlhi hinʼu wet atsinha toj ichun

Toj ihi lhip toj lhey Edén, Heowa yenlhi pʼante honhat toj matche toj isilataj. Toj ihi pʼante lhiptso iche wujpe flores, halʼoy wet itshatay. Toj paj Dios yenlhi hinʼu toj ichun, Adán. Tachuma honhat lhip wet yafwutche lenhus. ¿Ha lehanej mʼak toj iche toj paj? ¡Iwo tesa toj ilay hinʼutso! Heowa ifwenho pʼante Adán toj is che tʼuye lhiptso wet iwo lheyisa nilhokej itshatay.

Heowa tʼalhe pʼante Adán che iwoye mʼak toj matche toj laha ihi. Yok: «Iwoyek letuj nilhokej halʼo lhay toj ihi lhipna. Mat iche elh toj hatehitʼa iwoye iyhaj wet isitʼa che tuj. Che letuj, leyʼinhila».

Toj paj, Heowa yok: «Oyenhilhila lechʼotfwa hop Adán». Wet imayen pʼante Adán wet ichumyenlhi lesij tʼaj elh, toj yenlhi lechʼefwa. Atsinhana lhey Eva. Adán wet Eva hopehen nʼowʼet lheley toj ichun toj iche. ¿Chi malhyej (Ep hote) toj Adán ilat lhame toj hiwʼen lechʼefwa? Matche toj kajlhi wet yok: «¡Yahin mʼak toj Heowa yenlhi toj tachuma osij tʼaj lhip elh! ¡Nechʼe iche elh toj hate iwoye olham!».

Heowa ifwenho Adán wet Eva toj is che iwo lelesa wet yam tapoyej Honhat. Tʼupʼantehlak lhamel lakajyaj ihi toj tachʼot lhamehen toj yam isilataj Honhat. Hopkhila Honhat toj isilataj, malhyej Edén. Mat malhnhiyejatso mʼayhay. ¿Atsi mʼak toj tamenej? Nawʼenla toj ihi nʼochufwenyaj elh.