N’alit toj lew’en n’ot’ekhahyaj toj matche

DIOS ifwenho lakawos toj n’o’yelhthiyehena che matche toj t’ekhahyaj ihiche. Lhomtes yok: «U’amehen wet yej mähen. Tsi atayhfwa ahättaj ilunlhi tä ichowalhch’oye elhpej hin’o yämthilek ilän, mälhyej iwoye t’owalhaj tä fwitsaj» (1 Pedro 5:8). ¿Chi iwoyneje Satanás hopkhilak itayhat n’ot’ekhahyaj toj matche?

Ch’athiyejak ichumyenlhi iyhaj wichi, malhyej haw’et lheley hopkhilak iwoyej ame awit’ayhyajay toj iwatlak leleyej toj letetshan N’olhamethi. Jesús yome p’ante toja wet yo p’antek: «Hin’o letayhfwas häpkhila t’at lew’et lheley» (Mateo 10:36). Haw’et lheley wet akalay’is t’ukwe p’iya m’ak che aisej, mat ihanhiyejt’a toj matche toj lhay’e lhip toj isis m’ayhay toj ihi Dios Lhomtes. Wok nowaye p’iya m’ayhay toj iyhaj wichi yome toj lewoye. Mat Dios Lhomtes ikalelhat: «Elh chik nowaye hin’ol, lewit’äyhyaj t’at täjtso. Mat häp elh tä lechayaj iyeji Lhawuk, lewit’äyhyaj ihiyejt’ala» (Proverbios 29:25). Che leleyej toj alechufwenej Dios Lhomtes hop toj lewatlak lewo kajyaja iyhaj wichi, ¿ha lewohla kajyaja Dios? Kalelhoj toj malhnhiyejatso. Hote, che nan’alit lhat’ekhahyaj toj matche, Dios tach’ot namehen. «N’amel n’ahäpkhihent’a iyhäj tä yäpilche tä tälhche wet tatäyhen. Mat lhat’ekhahyaj ihi wet y’atfwayhen» (Hebreos 10:39).

Tichunche m’ak toj Dumas ihi p’ante. Toj ichun, lech’efwa ilokwlhi toj t’ekhahyaj ihi, mat toj paj atsinhana hote iwatla p’ante che itafwelej N’olhamethi. Malhyej t’at iwoye, che lhekatchufwi toj lewoye m’ak toj is alhoho, akalay’is wet haw’et lheley iwoyek iten m’ak toj lewoye. Iche wujpe m’ayhay toj in’alit toj iche wichi toj ikalhi che lew’et lheley tach’ahuye m’ak toj matche, malhyej toj N’olhamethi yome: «Häpkhilek elh che nit’ekhayaye Lhawuk lhämet, ileyej lakachuhanyaj. Tsi tej che newache ämet che lefwenho [...] isila amej tä hiw’en m’ak tä is tä lewoye lhäy’e tä ka’ena w’et m’ayeka» (1 Pedro 3:1, 2).

Satanás hote lhaikhajyenej hopkhilak wichi fwetaj lew’et ihiyejit’a che lhaichufwenej N’olhamethi. Matche toj ihumin toj hiw’en toj wichi lewit’ayhyajay ihi —m’ayhay toj yen lelhakliya wok toj niw’ena chinaj t’oj— «hip’o’pe Dios lhämet» wet lhamel t’ekhahyaj «ihanhiyejt’a che iwo lhaya» (Marcos 4:19). ¡Kawayhla n’otichunhayajtso toj ni’isa wet yej wahnej che nipayena ame m’ayhay toj isis toj tatay alhoho! Dios Lhomtes ikalelhat toja: «N’ow’atshancheyaj tä t’un häpe t’at tä lhamel nitäfwel amej tä ahäpe Dios tä weihalha lhäy’e tä matche, lhäy’e tä nitäfwel n’oyej tä ohäpe achenek Jesucristo» (Juan 17:3). Is che lhekatchufwi toj alechufwenej atsi toj hope Dios wet Jesús hop Mesías, hopkhilak lekatej haw’atshancheyaj toj t’un che lhehi Honhat toj isilataj.

Tichunla Moisés, toj hope p’ante Egipto kaniyat lew’et lhele. Iwoye p’ante che hope elh toj hiw’en m’ak, elh toj matche toj n’otafwelej wet elh toj matche toj len’ohyaj ihi. Mat, itshupyene p’ante toj «tek t’uhläk iwo kotsayej m’ayhay tä nit’una tä n’och’isukyajay ikänch’oye. Mat tatshupiye wet lhaitan’istej Dios leles leteläythayajay». ¿Atsi toj tamenej? «Lhaikhajyenej m’ak tä iwoye, hätet iwoyek hiw’en t’at Dios tä nin’äla» (Hebreos 11:24, 25, 27). Lham hiw’en p’ante t’ekhahyaj toj takhajay toj itiyej Dios. Ichunkat p’ante Dios lenech’ethayaj toj iwoye, iti’pe m’ak toj lham t’at toj ikone, wet Dios matche toj ikopfwaye p’ante. Hote am, che lewoye toja Dios lakopfwayaj ihla amej.

Tej toj Satanás, yelhte wujpe m’ayhay hopkhilak ikat amej, yej wahnej che lechatho lekweyey. Dios Lhomtes inityen namejen toja: «Tayhlä ahättaj wet lham yikhila hach’oyehen» (Santiago 4:7). ¿Chi lewoyneje toj letatayhlo Ahottaj?

Is che lhekatchufwi toj alechufwenej Dios Lhomtes. Yahyen N’olhamethi ifwalapej. Alechufwenej lechufwenyajay. Woye m’ak toj alechufwenej. Toj malhyejtso, letaw’uyhihla «nilhokej aka’tshayajchal tä Dios hiw’en amhohen», hopkhilak letumla m’ayhay toj Satanás iwoyej ame (Efesios 6:13).

Is che let’ukwe akalay’is toj hiw’en n’ot’ekhahyaj toj matche. Alep’ajtej wichi toj iyahyen, lhaichufwenejen wet iwoye m’ak toj Dios Lhomtes yome. Wichina tach’otla ame hopkhilak t’aytsi ekhahyaj, hop toj lhamel iwoye n’olhomtesna: «N’at’ukwe lhakey tä is yämlek y’ahumin n’amehen wet y’atch’otej n’amehen lhachumtes tä isen [...] n’anityen lhamejen» (Hebreos 10:24, 25).

Is che lhamwhaye Heowa. Alheje lech’otyaj wet ekhaye. Yej p’ethatla toj Heowa iwatlak tach’ot ame. Lhomtes yok: «Ti’pe lham nilhokej m’ak tä lhen alhakliya, tsi aihumnhen» (1 Pedro 5:6, 7). «Dios tek tach’anlhahiyela yämlek nichät amehen n’olhelhtshayaj che katumahlä. Mat häte che nichät amehen n’olhelhtshayaj, Dios itäfwnhatla amejen m’ak che lewoye yämlek letumlä» (1 Corintios 10:13).

Satanás tatayhlo Dios, yome toj ihichet’ala n’oelh che yikchufwi che tachumhoplhi Dios che n’otiyej n’olhelhtshayaj. Mat am iwoyek len’alit toj Satanás hope elh toj w’etahuylhi. Dios yok: «Yäs, is chik ahäpe elh tä lehusek ihi, häpkhilek okäjyaj in’oyej wet ohanhiyeja owoyneje olhämet chik onchulho elh chik fwetaj ilätyenlhi n’oyej lhämet» (Proverbios 27:11). Yej kachu, am iwoyek len’alit toj ekhahyaj hope n’ot’ekhahyaj toj matche.