N’ot’ekhahyaj toj matche ihan ame akajyaj toj naj lepesa

N’OLHAMETHI yok: «Häp elh tä t’ekhahyaj tamenej tä Dios hi’isyen, häp tä lew’atshancheyaj ihihila» (Romanos 1:17). N’olhomtesna yome n’osilotyaj toj matche toj isilataj toj iwoyek aisej. ¿Chi malhyej toj aisej?

Toj noj p’ante lechumet toj ihi Honhat, Jesús, Mesías, ihoye p’ante pele hopkhilak iyej Dios. Toj kamaj lechufwenkay iyahin p’ante, «õ’chäjphä Jesús, wet pule hip’o’pe, wet nemhit lhamel hiw’en» (Apóstoles Lhenhay 1:9). Toj ihi pele, Dios hiw’enho p’ante len’ohyaj toj wuj wet yen p’ante Niyata. Atofwiyet’a wet Jesús namla «ihihila lewujyaj, lhäy’e nilhokej ángeles, lham itayhiphäla’pe leniyatyaj tä isilataj. Wet wichi tä ihiche nilhokej honhates lhaihutlawek tä ihi tä lham itayche, wet hiw’enhatla, mälhhiyeja iwoye tson’ataswo tä hiw’enhat leläy tson’atas tä iyej kayla lhayis» (Mateo 25:31, 32). ¿Atsihila lewhay che iche toja?

Biblia pajche p’ante yome lewhay toj ihichela n’owit’ayhyajay toj iche toj i’pe Honhat toj hopkhila n’otetnek toj in’alit toj matche toj ilafwel toj nek ifwala toj Mesías itihiyeja lekalelhthayaj honhatil. Jesús y’ithat p’ante n’otetnektso toj hip’akhiyeja iyhaj m’ayhay: «Wet niyatey iwohla laka’tshayajayej niyatey iyhäj. Wet ihichela honhat w’ahu tä äytesiche, lhäy’e nehläs lhäy’e t’inhayajay tä ihiche honhates. Wet wichi hiw’enla m’ayhay tä tanhoch’ay» (Lucas 21:7, 10, 11).

Athana kalemlhajfwaj toj n’al Jesús lhomtestso. Lham atofwiyet’a che nam hopkhilak itayhat wichi toj fwitses. Hote itayhthila Satanás wet nilhokla’pe Honhat hopkhila honhat toj w’atshan wet isilataj. Wichi letamsekis ihihla wet lhay’e itshatay. «Tson’ataj lhäs ihlawhäye m’awotaj wet letamsek ihi t’at. Wet kayla lhäs iwohlat t’elakw’etawhäye hay’äj, wet w’asetaj lhäs lhäy’e t’owalhaj ihlawek tä lhaichihelthen, wet tach’anlhahiyela han’äfwaj chik yikchufwi». Wet «ihichet’ala elh chik häpe häp lhamel tä ihi chenaj tä ot’amajchet chik iwit’äyen m’ak at chik häpe» (Isaías 11:6, 9). Ihichet’ala elh che yok: «Ot’inhayaj ilänn’o». Hote, «asnamis hiw’enhichehena honhat, wet ch’otech’ol iläthichehena honhat» (Isaías 33:24; 35:5). Lhay’e toj n’op’itseyhay yachajohla toj ilayhiche. Heowa «ilejihena nilhokej tatet’ilis, wet nemla iche n’ot’ilek lhäy’e n’olhakli, n’olhafwyhayaj, n’oteläythayaj» (Isaías 25:8; Apocalipsis 21:4). Toj malhyejtso, n’anhila Dios lenech’ethayaj toj nech’enyaya toj itiyej p’ante Honhat. ¡Lhay’e lhip toj isilataj n’oniwhayajtso toj tatay alhoho!

Is che lhekatchufwi toj let’ayhettsi ekhahyaj

¿Atsi wichi toj Dios ikopfwahiyela hopkhilak ihi Honhat toj isilataj? Wichi toj hiw’en n’ot’ekhahyaj toj matche.

Yej p’ethatla toj n’ot’ekhahyajtso talhe n’otafwnhayaj toj imalhewek toj talho Dios Lhomtes. Toj malhyejtso, yej leyej toj alechufwenej atsi toj hope Dios wet Jesús.

N’ot’ekhahyaj toj matche ihi toj ihi hop toj isej m’ayhay toj ische alhoho. Dios Lhomtes yok: «[N’ot’e]chayaj y’il t’at che newache [le]chumtes» (Santiago 2:26). Che lewoye m’ayhay toj isen, len’althila Dios lechumyajay toj lhay’e lhip toj isis malhyej: lekhajyhayaj, le’isyaj, lehanyaj wet lehumnhayaj. Is che lhekatchufwi toj alekajyenej toj lewoye toja hopkhilak lekalhi n’ochumyahaytso toj talhe Dios.

Che lechiyhelit n’ot’ekhahyaj toj matche ichajla ame wuj m’ayhay toj aisejla. Toja hope lepe toj ihan ame akajyaj athana wet pajla’tha tiyaj’attsiy.