Mʼak toj is che lewoye hopkhilak aisla hawʼet lheley wet hachʼefwa lewʼet lheley

Wichi toj tawhayeyhen nechʼe toj iwo tesa toj hopehen wichi toj lewʼet lheley ihi. Tej toj ihichetʼala lewhay che leleyej toj lehumnhen wet lewo haya ajcha wet ako, athana hachʼefwa hope elh toj matche toj is che lewo lahaya, inuʼpe elh at che hope. N’alej toj iche iyhaj hawʼet lheley toj athaho che tachumla tajtso. Mʼayhay toj matchehen toj ihi Biblia iwoyek tachʼot ame hopkhilak ihi toj ihi atamsek toj iyejla lhamel wet hate ikhajyen toj ais lhamehen toj lhewek.

1 IS CHE IS ALHOHO MʼAK TOJ LEWOYEJE HAWʼET LHELEY

MʼAK TOJ BIBLIA YOME: Is che lewo lahaya «ajcha lhäyʼe ako» (Efesios 6:2). Nekchom at che hope toj lewʼen, nilhok lewhay is che lewo lahaya hawʼet lheley wet isitʼa che lhen wʼet mʼayeka lhamel. Mat is che letichunla toj hachʼefwa hate is che itetshan lajcha wet lako. Nʼohumnhayaj «tek tʼischeneje elh mʼak at chik häpe», hop toj tamenej toj isitʼa che lhen atichunhayaja toj awitʼay ihihila che hachʼefwa isla lewʼet lheley (1 Corintios 13:4; Gálatas 5:26).

MʼAK TOJ IWOYEK LEWOYE:

• Yej chʼatchehen amtes che lhok: «Hawʼet lheley nilhok lewhay toj yennʼo wʼet mʼayeka» wok lhok «Ako hanhiyejtʼak akajejlhi mʼak toj owoye»

• Is che letafwelej letichunhayaj hachʼefwa

2 IS CHE ALHEN LEWOYA TOJ LETETSHAN TOJ AMEL LHEWEK

MʼAK TOJ BIBLIA YOME: «Hinʼo yikchʼoye lajcha lhäyʼe lako wet lhaipʼajtej lechʼefwa, wet lhamel täkwfwasna hätet iwoyek hätefwajni» (Génesis 2:24). Toj tafwaytshi toj letawhayey, nʼalej toj ajcha wet ako kamaj ilate toj iwatlak yikchufwi toj aitetshan wet iwatlak inuhatpe lewʼet toj lhayʼuytho amel toj lhewek.

Amel toj letsupyenhiyela atsi mʼayhay toj hawʼet lheley iwoyek lhayʼuytho toj iamejen wet atsi toj iwohiyetʼa, mat lewhay toj lefwenho is che letʼamajej. Iwoyek lechumyenlhi amtes toj isen lewhay che lefwenho lhamel mʼak toj matche (Proverbios 15:1). Iwoyek matche toj aisla haw’et lheley che ahope elh toj lhaknichajalhi, letamsek ihi wet itelaytej mʼak at che hope, che lewoye tajtso «[le]teläytej tʼat aelh che häpe» (Efesios 4:2).

MʼAK TOJ IWOYEK LEWOYE:

• Che am lhen alhakliya toj hawʼet lheley wet hachʼefwa lewʼet lheley matche toj lhayʼuytho toj lhewek, is che amel lhame mʼayhayna lewhay che atamsekis ihi

• Che iche mʼayhayna, is che wʼawulhcha amel atichunhayaj lewhay che letatayhla awitʼayna