Nʼokwiyej Heowa ayʼe hawʼet lheley

Malhyej toj lewʼen toj ihi librofwajna, hop Dios Lhomtes wujpey mʼayhay toj matchehen toj ihi toj iwoyek tachʼot ame wet hawʼet lheley. Heowa iwatlak amel akajyaj ihiche. Lhayʼe toj hitʼunhatche lhomtes toj yome toj ikopfwayhla amehen che amel lechunkat toj lenʼokwiyej Dios wet itihla «amejen nilhokej mʼayhay» toj amel lewatla (Mateo 6:33). Dios iwatlak ahope lakalayʼi. Is che leteskanej lewhay at che hope toj tʼuhawetej hopkhilak lechiyhelit toj ahope Dios lakalayʼi, hop toj hope nʼonʼohyaj toj matche toj laha ihi (Mateo 22:37, 38).

1 AM TAKHAJAY TOJ AISLA HEOWA

MʼAK TOJ BIBLIA YOME: «Ohäpkhila amel Ajcha, wet amel ahäpkhihena oles tä hinʼol lhäyʼe tä atsinhay» (2 Corintios 6:18). Dios iwatlak hope akalayʼi toj is, wet iwoyek lechumyenlhi nʼotʼalhyaj hopkhilak lhamwhoye Lham. Heowa tʼalh namehen toj yok: «Yej leyayej tä lewopej alhyaja» (1 Tesalonicenses 5:17). Lham ihumin toj lefwenho mʼayhay toj lhen alhakliya wet atichunhayajay toj matche toj lewo lahaya toj ihi ahusek (Filipenses 4:6). Wo tʼalhyaja ayʼe hawʼet lheley wet lhamel ihanhiyeja toj Dios matche toj iche.

Mat tsʼilakhitʼa toj is che tajlhamet toj lhamhoplhi Dios, hate is che letachʼahuye ¿Chi is che lewoyneje hopkhilak lekalhi tajtso? Lakalhihla che alechufwenej Dios Lhomtes wet iyhaj mʼayhay toj talho librotso (Salmo 1:1, 2). En atichunhayaja mʼak toj alechufwenej (Salmo 77:11, 12). Che lewatlak letachʼahuye Dios, hate is che lehoye reuniones (Salmo 122:1-4).

Elh lenʼayij hopkhilak lekhajyen toj aisla Heowa, hope toj is che lhame Lham toj lefwenho iyhaj wichi. Che letʼayhettsi toj lewoyepej tajtso, tʼaytsipej toj lhamwhaye Lham (Mateo 28:19,20).

MʼAK TOJ IWOYEK LEWOYE:

• Is che letiyej kanhi iyhaj mʼayhay hopkhilak lewo tʼalhyajaye Heowa wet leyahyen mʼak toj ihi Biblia ifwalapej

• Chʼote hawʼet lheley toj is che ichunkat toj iwoye mʼayhay toj talhe Dios, inuhatpe iyhaj mʼayhay toj yen lekajyaja toj iwoye

2 EN AKAJYAJA TOJ ALEHUTWEK TOJ LENʼOKWIYEJ DIOS AYʼE HAWʼET LHELEY

MʼAK TOJ BIBLIA YOME: «Hoyaye Dios wet lham ihohla amehen» (Santiago 4:8). Is che lelesayen toj lekalelhat ifwala wet hora toj lechumyenhilhila toj am wet hawʼet lheley alehutwek toj lenʼokwiyej Dios, wet is che lhachajo toj lewoyepej nilhok semanas (Génesis 18:19). Tsʼilakhitʼa tajtso toj is che lewoye, hate isitʼa che lepʼethatla Dios che lewoye mʼak at che hope wet khajyen hawʼet lheley hopkhilak isla Dios. Mʼak toj ihi Biblia yok: «En ämeta [Heowa] chik lhehi haw’et, wok lenukwe n’äyij, wok häp lewhäy tä lemä wok lenephä» (Deuteronomio 6:6, 7). Is che atichunhayaj kalelhaj malhyej iwoye Josúe letichunhayaj pʼante toj yok: «Olham, lhäyʼe owʼet lheley, olhamel oyen häpeya oka Dios [Heowa]» (Josué 24:15).

MʼAK TOJ IWOYEK LEWOYE:

• Is che lelesayen toj lekalelhat ifwala wet hora toj am is che lechufwenej hawʼet lheley nilhok semanas mʼak toj iwatlak ihanej weihalhapej