Mʼak toj wichi iseltej toj ihi mar Rojo

Toj faraón ihanej toj israelitas pajche inukwepha toj talho Egipto, yʼulhanche toj iwahintsi lhamel. Tʼalhe laka soldados wet yok: «Waklhathen nilhokej kaletas, wet nahan lhamel. Isitʼa pʼante toj nawahintsi lhamel». Lham wet laka soldados ihan israelitas.

Heowa inuhyenkwe tʼat laka wichi lenʼayij, ichumyenlhi pele toj ifwala wet toj honatsi ichumyenlhi itaj. Ichaje lhamel mar Rojo wet tʼalhe che imalhehi lhiptso.

Toj paj, israelitas hiwʼen toj faraón wet laka soldados ihan lhamel. Israelitas ihanhiyejtʼa lhip toj tiyaje, hop toj iche mar wet faraón laka soldados. Lhamel tʼanwetha wet ifwenho Moisés toja: «¡Nayʼinhenla! ¿Atsi mʼak toj tamenej toj letompha pʼante olhamel toj oihi Egipto?». Hop Moisés ichulho lhamel: «Yej nʼowayhen. Taytha wet nawʼenla mʼak toj Heowa iwoye toj ifwayhat namel». ¿Ha matche toj Moisés ichaye pʼante Heowa?

Toj paj, Heowa ifwenho israelitas toj is che lhaiwaklhathen. Honatsitso, Heowa itihi pele egipcios wet israelitas lechowej. Lhip toj egipcios ihi honatsi wuj, mat lhip toj israelitas ihi iche isi.

Toj paj, Heowa tʼalhe Moisés che itiʼpe lakwey mar. Toj malhyejtso, honatsitso iche ihwok toj aytaji. Mar lhaychʼenhi, wet nechʼe iche nʼayij. Nilhokej israelitas toj tiyajche lhiptso hiwʼen toj inat matche toj tojpha wet nʼayij tamchay tʼat pajtha ichate lhip elh.

Faraón ka soldados ihan israelitas toj tiyajche nʼayijtso. Mat Heowa itiyej lewitʼayhyaj lhamel. Kaletas namhiche lakalay. Soldados tʼanwetha: «¡Mah, napilche lhanʼayij! Heowa tʼat toj tʼuye laka wichi».

Heowa yachajo toj tʼalhe Moisés toja: «Tiʼpe akwey mar». Toj malhyejtso, inat ichatʼpe tʼat egipto ka soldados. Faraón wet nilhokej laka soldados yʼinhen. Ihichetʼa elh che imalhnhi.

Toj israelitas ichate lhip elh, lhamel nʼokwiyej Heowa wet ichoywetha: «Otenla otenek toj owunit Heowa, hop toj lhainʼalit toj matche toj nehit katsi wʼawulhi. Ikalhi toj letayhfwas wet ichʼanthen yelʼatas toj ihi mar lhayʼe hinʼul toj takhajayhen toj icheʼpe». Toj wichi ichoywetha, atsinhay tachuma panderetas wet yaji wet iwo kajyaja. Nilhokej lhamel matche toj lekajyaj ihi pʼante hop toj nechʼe toj lhamel nemhit hope esclavos.