Plaga toj lepes

Moisés ikalelhto faraón toj lhaikhajyenhejla toj ihichetʼala lewhay che yachajo toj hiwʼen lham. Mat toj yikatchʼoye faraón, yok: «Che honaj chowej, egipcios leles toj lechunkatsek yʼinhenla, malhyej faraón lhos wet lakawos leles».

Heowa ifwenho israelitas toja: «Waklhat amel ak toj wʼenha lhamej iyhaj. Lan tsonʼataj wok kayla toj nʼeche toj hiwʼen un año, wet lewʼoyis tsayela lepe. Pʼo tʼisan wet tufwila toj lehane pan toj levadura newayej. Is che awakʼalhen, leyʼuche akay wet anisahis. Hop toj honatsina ofwayhthila amel». ¿Ha lenʼalhte chi malhyej (ep hote) pʼante israelitas honatsitso?

Toj honatsi chowej, ángel toj talhe Heowa ihoyehen nilhokej wichi lewʼetes toj ihi Egipto. Wet nʼowʼet che lepe wʼoyis newayej, lhos toj lechunkatsek yʼil. Mat nʼowʼetes toj lepe nʼolanej wʼoyis, ángel ilanhitʼa leles. Nilhokej nʼowʼet lheley toj ihi Egipto, iyhaj toj hiwʼen mʼayek wok iyhaj toj pʼalitses, lhos toj lechunkatsek yʼil. Mat, israelitas leles ihichetʼa elh che yʼil.

Faraón lhos toj lechunkatsek yʼil. Wet lham iwohiyetʼak itelaytej tajtso wet ifwenho Moisés wet Aarón toja: «¡Kelhchetsi! ¡Nukwepha wet nʼokwiyej amel aka Dios! ¡Chaj amchehen alay wet ekhen!».

Honatsitso matche toj isi welʼa. Israelitas inukwepha toj talho Egipto nʼowʼet lheley wet tribus wʼawulhcha toj yikhen. Iche 600.000 hinʼul, hate atsinhay wet naʼtshas. Hate wujpe wichi toj hopkhitʼa israelitas yikche lhamel hopkhilak nʼokwiyej Heowa. ¡Israelitas athana nemhit hopehen esclavos!

Añopej is che lhamel yenlhi lhak toj wʼenha lhamej iyhaj, hopkhilak ihuseklapej toj Heowa ifwaythen lhamel. Lhaktso lhey Pascua.