Tabernáculo hopkhilak nʼonʼokwiyej Dios

Lewhay toj Moisés iʼpe chenaj Sinaí, Heowa ifwenho toj is che yenlhi tabernáculo. Hop tabernáculo hopkhila lhip toj laha ihi toj israelitas iwohiyelak nʼokwiyej Dios, hate iwohiyelak ichaj tabernáculo lhip at che ihoye.

Heowa yok: «Alhe wichi che ihan ame mʼak toj ikalhi toj yenlhi tabernáculo». Hop israelitas ichaje oro, plata, cobre, tuntey toj isis wet joyas. Hate ichaj lana, lino, itshatay tʼahes wet mʼayhay iyhaj. Tʼunhihotʼa lhamel toj ihane Moisés laka mʼayhay, hop toj tamenej toj Moisés ifwenho toja: «Naya tʼat, yej tujlhache toj lehan kana aka mʼayhay».

Wujpe hinʼul wet atsinhay toj ihanej toj yenwetha mʼayhay tachʼote toj nʼoyenlhi tabernáculo. Heowa hiwʼenho lehanyaj lhamel hopkhilak lechumet is tʼat alhoho, iche iyhaj toj yenlhi hilos, tejidos wet bordados, iyhaj toj ihanej toj ichumyenlhi oro, tuntey wet halʼoy toj yenwetha mʼayhay.

Wichi yenlhi pʼante tabernáculo malhyej toj Heowa tʼalhe pʼante lhamel. Yenlhi cortinas toj isis toj hiwʼenhat Santo wet Santísimo. Toj ihi Santísimo iche arca toj nʼotʼamajchet, toj nʼoyene halʼo toj lhey acacia wet oro. Toj ihi lhip toj lhey Santo iche nʼochakwhis toj oro, mesa, altar toj nʼowun incienso. Toj ihi lhip toj iseye, iche fuente wok inat lehi toj cobre wet altar toj wuj. Israelitas ifwenho pʼante Heowa toj tachʼahuhiyela. Arca toj nʼotamajchet ihusekyenla israelitas laka promesa toj laha ihi toj itiyej Heowa.

Heowa tatshupiye pʼante Aarón wet leles hopkhilak hopehen sacerdotes wet tachumwetha toj ihi tabernáculo. Is pʼante che lhamel tʼuye wet hiwʼenho nʼowʼayhtes hop Heowa. Tajlhamet sacerdote toj lhamya, Aarón, iwoyek tiyajchufwi Santísimo. Añopej yenlhi sacrificio toj tʼiskanejʼpe lechʼisukyaj, lewʼet lheley lechʼisukyaj wet Israel lhayis lechʼisukyaj.

Hop israelitas noj toj yenlhi tabernáculo toj tafwaytshi un año toj talho Egipto. Athana nechʼe toj lhamel hiwʼen lhip toj nʼokwiyej Heowa.

Heowa wuj toj kajejlhi tabernáculo wet itiʼpe pele. Che peletso iʼpe tabernáculo, Israel lhayis imalhehi lhiptso. Mat che pele iho kapha, lhamel ihanej toj is che yikhen, inachʼu tabernáculo wet ihan pele.