Líder toj nechʼayek wet dos atsinhay toj tʼotle tʼunhen

Josué wujpe nekchomis toj inuhyenkwe lenʼayij hop Heowa laka wichi wet toj hiwʼen 110 años yʼil. Hop israelitas nʼokwiyej Heowa toj Josué kamaj ilay. Mat, toj yʼil lhamel iwo tesa toj nʼokwiyej dioses iyhaj, malhyej wichi toj ihi Canaán. Toj Israel lhayis ileyej toj tachʼahuye Heowa, lham inuhitʼahla toj Canaán laka niyat, Jabín, iwo lewitʼayhyaja lhamel. Hop toj tamenej, wichi tʼalhe Heowa che tachʼote lhamel. Heowa hiwʼenho lhamel líder toj nechʼayek toj lhey Barac. Lham tachʼothiyela wichi hopkhilak yachajo toj nʼokwiyej Heowa.

Débora hope pʼante profetisa (profetisa wok profeta hope elh toj yome mʼak toj Heowa tʼuhlak yome) wet tʼalhe che nʼochaje Barac. Lham ifwenho Heowa lhomtesna: «Hoye tewok toj lhey Kisón wet chaj amche 10.000 hinʼul hopkhilak tatayhla Jabín laka ejército. Toj ihi lhiptso lekalhihila Sísara, elh toj lhaitumtej ejercitotso». Barac nichulho hop Débora: «Ohohiyela, mat che am lenek nʼokwe». Lham yok: «Oyikhila amche, mat is che lehanej toj amhitʼahlak lelan Sísara. Heowa pajche yome toj ihichela atsinha toj ilanla lham».

Débora, Barac wet laka ejército ihoʼpe chenaj Tabor hopkhilak lhaiwaklhathen toj tatayhla letayhfwas. Toj Sísara ihanej, ihutwek kaletas lhayʼe laka sipʼalis wet ihoye lhip toj tumcha. Débora ifwenho Barac toja: «Ifwalana Heowa yachaj ame atayhfwas». Toj malhyejtso, Barac wet 10.000 hinʼul toj lhayʼe, inukwehcha toj talhʼpe chenaj hopkhilak tatayhla Sísara laka ejército.

Toj paj, Heowa iwoyeje toj inat toj ihi tewok Kisón tʼulhʼpe honhat, wet Sísara kaletas imalhehi iyhat. Sísara inuhcha toj ihi kaletaj wet inu alhoho. Barac wet hinʼul toj lhayʼe ikalhi Sísara laka ejército, mat Sísara yam, wet tiyajchufwi carpa toj atsinha toj lhey Jael ihi. Jael hiwʼenho leche wet ipoyejʼpe wesaj. Sísara wuj toj yʼel wet ima. Toj malhyejtso Jael yok tam toj ihowhaye lham, ilanhi estaca toj chinaj toj tselhaj toj carpa tʼak, ikajejo lhetek, wet Sísara yʼil.

Toj paj, nam Barac toj tʼukwe hop Sísara. Jael inupha toj talhchufwi laka carpa wet yok: «Tiyajchufwi oka carpa, wet opayenla ame hinʼu toj am letʼukwe». Barac tiyajchufwi carpa wet hiwʼen toj Sísara ihi honhat, wet yʼil. Toj malhyejtso, Barac wet Débora iten nʼotenek toj iwujyen Heowa hop toj tachʼote toj ikalhi letayhfwas. Wichi toj ihi Israel 40 años toj ihi nʼotamsek.