Ana tʼalhe lhos hop Heowa

Elcana hope pʼante israelita toj hiwʼen dos lechʼefwas: Ana wet Penina. Mat, lechʼefwa toj lhayʼe lhip toj ihumin hope Ana. Penina hiwʼen pʼante wujpe leles, wet Ana hiwʼenhitʼa. Hop toj tamenej, toj Penina ilakwlhipej Ana. Nilhokej años, Elcana ichajepej lewʼet lheley hop Silo hopkhilak nʼokwiyej Heowa toj ihi tabernáculo. Iche lewhay, toj lhamel ihi lhiptso, Elcana hiwʼen toj lechʼefwa toj ihumin Ana matche toj lefwitajayaj ihi. Toj malhyejtso yok: «Ana, yej tafwlhi. Lewʼenho wet ahope elh toj lhayʼe lhip toj ohumin».

Toj paj, Ana unofwaj toj yik hopkhilak iwo tʼalhyaja. Iwohiyetʼak ileyej toj tafwlhi wet tʼalhe Heowa che tachʼote lham. Ikalelhat toja: «Heowa che lewʼen nʼoho olhos oyachajla ame hopkhilak tachumhoplhi am nilhok lewhay toj ilay».

Hop sacerdote toj lhamya Elí hiwʼen toj Ana tafwlhi wet lhomtes tʼalhichetʼa lakaj toj ilayhatlhi wet fwetaj toj hope atsinha toj wʼoknaj. Ana ifwenho lham: «Kha, iwuk malhnhiyejatso. Matche toj wuj ofwitajayaj wet tajtso ofwenho tʼat hop Heowa». Elí hiwʼen toj Ana matche lhomet wet yok: «Is che Heowa hiwʼen amho mʼak toj letʼalhenne». Ana nechʼe letamsek ihi wet yikchʼoye lhiptso. Toj paj lham lhos ihi, wet yen lheya Samuel ¿Ha lenʼalte Ana lekajyaj?

Ana ihusekchʼoye mʼak toj ifwenho pʼante Heowa. Toj Samuel nemhit tip, Ana ichaje tabernáculo lham hopkhilak tachumhoplhi Dios. Lham ifwenho toja Elí: «Owohte tʼalhyajaye Heowa che hiwʼen nʼoho hanʼafwajna. Athana ochaj kana hopkhilak tachumhoplhi lham nilhok lewhay toj ilay hanʼafwaj». Elcana wet Ana nilhokej años toj ihoye Samuel wet ichajepej lakay toj nechʼayhes. Toj tafwaytshi lewhay, Ana hiwʼen tres leles toj hinʼul wet dos toj atsinhay, isej Heowa.