David wet Saúl

Toj tafwaytshi toj David ilan Goliat, niyat Saúl yen hopeya elh toj lhaitumtej laka ejército. Wujpe wichi toj itafwelej David hop toj ikalhi wujpe batallas. Toj nampej toj talhe guerra, atsinhay iyahinla lham, iwo kajyaja wet ichoywetha: «Saúl ikalhi wujpe letayhfwas, mat David inuʼpe lham». Hop toj tamenej toj Saúl iwo tesa toj tʼischene (sentir celos) wet tʼuhlak ilan lham.

David wuj toj ihanej pʼante toj ichumyenlhi arpa. Iche ifwala, toj David ihi Saúl lewʼet yʼaji arpa wet Saúl ithatej laka lanza. Mat David iwo nʼayija wet lanza imalhehi hup. Toj paj, Saúl tʼukwepej lenʼayij toj ilan lham. Toj lepes, David yik wet lhaiskat toj ihi desierto.

Toj malhyejtso Saúl tʼukwe lham lhayʼe 3.000 soldados. Iche ifwala toj Saúl hanhitʼahlak tiyajchufwi lhip toj David wet laka hinʼul ihi toj lhaiskathen. Hinʼul toj lhayʼe David yomhitʼa aytaji lepak toj yomwetha wet yok: «Hope lewhay toj is che lelan Saúl». David ihowhaye Saúl wet yisit lewuy lhip, Saúl ihanhiyejtʼa mʼak toj iche. Mat toj paj David aytaj letichunhayaj hop toj yen wʼet mʼayeka niyat toj Heowa tatshupiye. Hop toj tamenej toj iwathitʼahlak laka hinʼul ilan Saúl. Toj Saúl inupha, David tʼan toj yok: «Iwoyenek toj olan am, mat owohiyetʼa». ¿Ha lefwetaj toj Saúl iwo tesa toj iwoyeje mʼak toj is hop David?

Kha. Saúl kamaj ihanlhi lham. Iche honatsi, toj David wet laka sobrino Abisay tiyajchufwi lhip toj Saúl ihi toj ima. Hate Abner, elh toj tʼuye Saúl, ima tʼat. Abisay ifwenho David: «¡Athana hope lewhay! Chʼanlha nʼoye toj olan Saúl». Mat David nichulho: «Heowa toj lhaitumthiyeja lham. Chuma laka lanza wet laka jarra wet nekhen».

Toj paj, David ihoʼpe chenaj. Toj ikapha iwoyek hiwʼene lhip toj Saúl ihi. David tʼan: «¡Abner! ¿Atsi mʼak toj tamenej toj letʼuhiyetʼa niyat? ¿Atsi lhip toj ihi laka jarra wet laka lanza?». Saúl itafwelche David lepak wet yok: «Am iwoyenek lelannʼo mat lewohiyetʼa. Owʼen tʼat toj ahopkhila niyat elh toj ihi Israel». Toj paj Saúl yaple lewʼet. Mat nilhokhiyejtʼa Saúl lewʼet lheley toj nayijo David.