Jonatán hope elh toj tʼotle tʼun wet tʼifwtintsaj

Niyat Saúl lhos toj talakw lhey Jonatán, wet hope pʼante guerrero toj tʼotle tʼun. David yome pʼante toj Jonatán matche toj ilafwel, malhyej iwoye águila wet matche toj khajay, malhyej león. Iche ifwala, toj Jonatán hiwʼene filisteos toj iʼpe chenaj. Hop toj tamenej toj ifwenho lechʼotfwa toj ichajlhi laka mʼayhay: «Tajlhamet che Heowa hiwʼen namhohen nʼotetnek natayhlahla lhamel. Che filisteos yok hoʼpe chenaj, nahanhiyeja mʼak toj is che nawoye». Filisteos tʼanhen: «¡Ho kana hopkhilak natataywek!». Toj malhyejtso, Jonatán wet lechʼotfwa ihoʼpe chenaj wet ilanhen 20 soldados.

Toj Jonatán hope Saúl lhos toj talakw, tʼuhawetej che lham hope niyat toj tiyajo lajcha lewʼet che yʼil. Mat Jonatán ihanej toj Heowa pajche tatshupiye hop David hopkhilak hope niyat elh toj ihi Israel, wet lham itihiyejtʼa letʼischenyaj. Jonatán wet David hopehen amigos toj lhamya. Lhamel ikalelhat lhamhohen toj tʼuhla lhamehen wet tachʼothiyela elh. Hopkhilak inʼalit lhamejen toj hopehen amigos, Jonatán hiwʼenho David lewuy, laka espada, laka arco wet laka cinto.

Toj David lhaiskatla Saúl, Jonatán ihoye lham wet ifwenho toja: «Is che atʼotle tʼun wet alekhajyen. Heowa pajche tatshupi ame hopkhilak ahope niyat. Ojcha hate ihanej tʼat tajtso». ¿Ha lehuminchek lewʼen aka amigo toj matche toj is malhyej iwoye Jonatán?

Jonatán wujpe lewhayis toj lhaiwompe laka amigo. Lham ihanej toj lajcha, niyat Saúl, tʼupʼantehlak ilan David, hop toj tamenej toj yok: «Che lelan David, lewohla hachʼisukyaja. Lham iwohiyetʼa mʼak toj niʼisa». Saúl matche toj fwitsaje hop Jonatán. Toj paj, Saúl wet Jonatán yʼinhen toj ihi guerra.

Toj Jonatán yʼil, David tʼukwe Jonatán lhos, Mefi-boset. Toj nilhoke, yok: «Otʼuhla ame hop toj ajcha hope pʼante oka amigo toj matche toj is. Lhehihla oka palacio wet letʼeklaʼpe oka mesa». David hipʼethathitʼahla laka amigo Jonatán.