NʼOCHUFWENYAJ 40
Mʼak toj is che nawoye hopkhilak Dios hiwʼen toj lhachʼohle ihihitʼa
Tichunejlhi nʼoko toj humnhatsaj toj ilejlhi wet iwaklhat lhos hopkhilak ihoye escuela. Lham itetshan che pajche lhos inayne wet lakay toj yʼuyhi hichʼoyhitʼa. Tajtso tamenhiyeja toj hanʼafwaj is wet inʼalthila toj lajcha wet lako yen lelhakliya lham. Heowa toj hope Lhajcha toj ihumnhen namel, hate ihuminchek lhatʼisanis, mʼak toj natichunejlhi, mʼak toj nawoye wet mʼak toj name isitʼak lechʼohle ihi. Naisej toj lhachʼohle ihihitʼa wet hate wichi yamla is toj yome Dios.
1. ¿Chi malhyej (Ep hote) toj lhatʼisanis lechʼohle ihihitʼa?
Heowa ifwel namhohen toja: «Aʼenay otʼamajchetesa» (1 Pedro 1:16). Hopkhilak nahopehen nʼotʼamajchetes, mʼak toj nawoye wet lhatʼisanis is che lechʼohle ihihitʼa. Nanʼalit toj lhatʼisanis lechʼohle ihihitʼa che nanaypej hate che lhakay, lhawʼet wet lhawutey is che nalejwetha wet ihiche lewʼetes. Hate nalejchufwi lhip toj nalehutwekhen. Che lhachʼohle ihihitʼa wichi iyhaj iwoyek iwujyen Heowa (2 Corintios 6:3, 4).
2. ¿Atsi mʼayhay toj is che natekawayhla che natʼuhlak lhachʼohle ihihitʼa?
Biblia ifwel namhohen toja: «Nʼalej lhamchehen yämlek noj nilhokej lhachʼohle tä iyej lhatʼisanis lhäyʼe lhahusey» (2 Corintios 7:1). Hop toj tamenej toj natekawayhla mʼak toj iwoyek iwitʼayen lhatichunhayaj wok lhatʼisan. Wet nam is mʼak toj natichunejlhi hop toj natʼuhlak nakajyenlhi Heowa, nalhaikhajyenej toj natiyej kanhi nʼotichunhayajay toj kokʼachehen (Salmo 104:34). Hate, ihichetʼa lewhay toj name mʼayhay toj kokʼachehen (yahyen Colosenses 3:8).
¿Atsi mʼayhay iyhaj toj iwoyek hichʼoyhen lhatʼisan, lhatichunhayaj, mʼak toj name wet mʼak toj nawoye? Iche mʼayhay toj iwitʼayen lhatʼisan. Hop toj tamenej, nachumyenhilhitʼa yokwas wet natujitʼa coca wet hate nachumyenhilhitʼa drogas wet nam is toj nachumyenlhi kachal. Toj natekawayhla mʼayhaytso, natʼu lhamehen wet nenhitʼa wʼet mʼayeka nʼowʼayhat toj nʼowʼen namhohen toj hope nʼowʼatshancheyaj. Hate, hopkhilak mʼak toj name, nawoye wet natichunejlhi lechʼohle ihihitʼa, is che natekawayhla nʼokey toj kokʼaye malhyej masturbarse wok toj nʼoyahin pornografía (Salmo 119:37; Efesios 5:5).a Iwoyek matche toj atha toj nʼoelh ileyej mʼayhayna, mat Heowa ihuminchek tachʼot namehen (yahyen Isaías 41:13).
NATʼAYHETTSHI TOJ NALECHUFWENEJ
Natetshan chi malhyej (ep hote) toj iwujyen Heowa toj lhachʼohle ihihitʼa wet mʼak toj is che nawoye hopkhilak natumla nʼokeyis toj niʼisahen.
3. Iwujyen Heowa che lhatʼisanis lechʼohle ihihitʼa
Lewhay toj nayahyen leyes toj Heowa hiwʼenho Israel toj pajche, nahanej mʼak toj tamenej toj lham tataye che lhachʼohle ihihitʼa. Yahyen Éxodo 19:10 wet 30:17-19 wet ame mʼayhayna:
Malhyej toj versiculosna yome, ¿chi malhyej (ep hote) Heowa letichunhayaj toj itiyej nʼotʼisan toj lechʼohle ihihitʼa?
¿Atsi nʼokeyis toj isis toj tachʼotla namehen toj nilhok lewhay lhatʼisanis lechʼohle ihihitʼa?
Hopkhilak nʼoelh lechʼohle ihihitʼa is che hiwʼen lewhay wet lhaikhajyen. Mat iwoyek nawoye tajtso lhip at che nehi, tej che napʼalitses wok nawʼen mʼayhay. Yahin VIDEO wet ame mʼayhayna:
Che wichi toj nawo lhometa hiwʼen toj lhaka mʼayhay lechʼohle ihihitʼa, ¿ha iwoyek tajtso tachʼote hopkhilak yenhitʼa wʼet mʼayeka Heowa? ¿Atsi mʼak toj tamenej?
4. Tumla nʼokeyis toj niʼisachehen
Heowa tachʼot namehen toj natumla nʼokey at che hope toj niʼisa.
Che am letuj yokwas, letuj drogas wet lhamhitʼa is toj lechumyenlhi kachal, nʼalej toj lehanej toj matche toj atha toj nʼoelh ileyej mʼayhaytso. Mʼak toj iwoyek tachʼot ame hope toj letichunejlhi atsi mʼak toj iwoyej ame. Yahyen Mateo 22:37-39 wet ame chi malhyej (ep hote) toj yokwas wet toj nʼoyamhitʼa is toj nʼochumyenlhi kachal iwitʼayen nʼoelh toj...
... ise Heowa.
... ise lewʼet lheley wet wichi iyhaj.
En atichunhayaja mʼak toj iwoyek tachʼot ame hopkhilak letumla mʼayhaytso.b Yahin VIDEO.
Yahyen 2 Corintios 4:7 wet ame mʼayhayna:
¿Ha lefwetaj che nʼoelh yen keya toj iwo tʼalhyaja, toj lhaichufwenej Biblia wet toj ihoyepej reuniones iwoyek tachʼote hopkhilak tumla mʼayhaytso? ¿Atsi mʼak toj tamenej toj malhyejtso atichunhayaj?
5. Tatayhla nʼokeyis wet nʼotichunhayajay toj kokʼachehen
Yahyen Colosenses 3:5 wet ame mʼayhayna:
¿Chi malhyej (Ep hote) toj nahanej toj che nʼoyahin pornografía, sextear wet masturbarse hopehen nʼokeyis toj kokʼachehen toj Heowa ihuminhitʼa?c
Heowa tataye che lhatichunhayaj, mʼak toj name wet nawoye isitʼak lechʼohle ihi, ¿ha lefwetaj toj tʼuhawetej tajtso? ¿Atsi mʼak toj tamenej?
Tetshan chi malhyej (ep hote) toj iwoyek nʼotayhla nʼotichunhayajay toj kokʼachehen. Yahyin VIDEO.
Jesús ichumyenlhi pʼante ejemplo hopkhilak ichufwen namejen toj is che pajche kalelhaj mʼak toj natshupiyela che natʼuhlak mʼak toj name, natichunejlhi wet nawoye lechʼohle ihihitʼa. Yahyen Mateo 5:29, 30 wet ame mʼayhayna:
Jesús yomhiyetʼa toj is che nawo latseka lhatʼisanis, mat is che kalelhaj mʼak toj nawohiyela. ¿Atsi mʼayhay toj kalelhaj toj is che natshupiye hopkhilak natekawayhla nʼotichunhayajay toj kokʼachehen?d
Che am letatayhla nʼotichunhayajay toj kokʼachehen, iwoyek lematitche toj Heowa kajejlhi mʼak toj lewoye. Yahyen Salmo 103:13, 14 wet ame mʼayhayna:
Che am letatayhla nʼokey toj kokʼaye, ¿ha lefwetaj toj versiculosna iwoyek hiwʼen amho akhajyhayaj hopkhilak letumla? ¿Atsi mʼak toj tamenej?
¡Yej alekwefwhatcha! Che lechatho nʼokey toj isitʼa hopkhitʼa che ikalh amhi
Nʼoelh iwoyek ilafwel toj itichunejlhi «Yachajo toj ochatho nʼokeytso; iwohiyetʼak okalhi». Mat tichunejlhi toja. Che iche nʼoelh toj ikoyej maratón ichaten tajtso hopkhitʼa toj lham ikalhihitʼa carrera wet hopkhitʼa toj is che iwo tesa toj inu alhoho. Malhyej iwoye, toj nʼoelh ikoyej maratón. Che am lechatho nʼokey toj isitʼa hopkhitʼa toj lekalhihitʼa mʼak toj letatayhla. Che nʼoelh yachajo toj nichatho nʼokey toj isitʼa lhamyaj tʼat, hope toj nʼoelh is che iwoye che tʼuhlak ikalhi mʼayhaytso. Hop toj tamenej ¡yej alekwefwhatcha! Heowa tachʼotla ame, hopkhilak letumla nʼokeytso toj kokʼaye.
IYHAJ WICHI YOME TOJA: «Hope mʼak toj ohumin toj owoye, iwohiyetʼak oleyej».
¿Atsi texto toj ihi Biblia iwoyek lepayne nʼoelhtso, toj iwoyek tumla mʼak toj ihumin toj iwoye isej Heowa lechʼotyaj?
MʼAYHAY TOJ LETETSHANNE
Nakajyenlhi Heowa che lhatʼisanis, lhatichunhayajay wet mʼak toj nawoye lechʼohle ihihitʼa.
Mʼayhay toj nalechufwenejne
¿Atsi mʼak toj tamenej toj laha ihi che lhachʼohle ihihitʼa?
¿Atsi mʼak toj is che nawoye hopkhilak lhatʼisanis lechʼohle ihihitʼa?
¿Atsi mʼak toj is che nawoye hopkhilak lhakey wet lhatichunhayajay nilhokej lewhay lechʼohle ihihitʼa?
IWOYEK LEWʼEN IYHAJ MʼAYHAY:
Tej toj napʼalitses, ¿atsi mʼayhay toj athahitʼa toj iwoyek nakalhi toj nawoye hopkhilak lhachʼohle ihihitʼa?
Yahyen mʼayhay iyhaj toj iwoyek tachʼot ame toj leleyej toj letuj yokwas.
«Chi malhyej (Ep hote) toj nʼoleyej yokfwas» (¡Despertad!, mayo toj 2010)
Tafwelej mʼak toj pornografía iwoyek iwoyeje nʼoelh.
«Pornografía: ¿ha is wok iwitʼayen nʼoelh?» (La Atalaya, 1 toj agosto toj 2013)
Yahin mʼak toj iwoye hinʼu hopkhilak ileyej toj yen keya toj iyahin pornografía.
«Wujpe lewhayis toj ochatho nʼokeyna pajtha okalhi» (La Atalaya, núm. 4 2016)
a Nʼolhomet masturbarse hope toj hinʼu wok atsinha itsiteylhi lhamej. Nʼolhomet pornografía yʼaje videos, nʼopeykas toj inʼalit nʼowanyajay, mensajes, audios wet música toj iwoyek ichaje hinʼu wok atsinha hopkhilak itsiteylhi lhamej.
b Toj ihi lhip toj lhey «Iwoyek lewʼen iyhaj mʼayhay» toj ihi nʼochufwenyajna, toj ichufwi título «¿Chi malhyej (Ep hote) toj nʼoelh ileyej toj tuj yokwas?», ifwel nʼofwonyajay toj isis toj iwoyek tachʼote nʼoelh toj tʼuhlak ileyej tajtso.
c Sextear wok sexting hope mensajes toj nʼothattshi nʼopeykas wok videos toj kokʼachehen toj nʼochumyenlhi celular.
d Masturbación hope mʼak toj isitʼa, hopkhilak lehanej chi malhyej (ep hote) toj letumla, yahin nʼochufwenyaj 25 toj ihi libro Lo que los jóvenes preguntan. Respuestas prácticas (volumen 1), lhey «¿Ha iwohiyelak otumla masturbación?».