¿Ha Wichi toj yen lhometa Heowa lhay’uytho religiones iyhaj?

Olhamel Wichi toj yen lhometa Heowa ohumin toj oyomhoplhi wichi toj ihi religiones iyhaj toj oyome m’ayhay toj talhejla n’ot’ekhayhyajay, mat owohiyet’a m’ak toj lhamel iwoye. Mat Biblia ikalelhat toj cristianos toj matchehen lhaip’ajtitwek wet laha ihi che w’awulhcha m’ak toj t’ekhaye (Efesios 4:16; 1 Corintios 1:10; Filipenses 2:2). Ts’ilakhit’a toj lhamel tajlhamet hiw’en wet iwo lahaya n’ohumnhayaj, toj p’altsentses, toj itayhat elh letes, wet n’ochumyajay iyhaj toj malhyejenna. Hop Wichi toj yen lhometa Heowa t’ekhahyajay, italhto t’at m’ak toj kalelhaj toj ihi Biblia wet matche toj itetshan. Che hopkhit’a tajtso olhamel ot’ekhahyaj laha ihihit’a (Romanos 10:2, 3).

Biblia ikalelhat toj che n’oelh lhaip’ajtej religiones iyhaj ikanchi Dios lakawo t’ekhahyaj (2 Corintios 6:14-17). Hop toj tamenej toj Jesús t’uhit’ap’antehlak lechufwenkay lhaip’ajtej lhameltso (Mateo 12:30; Juan 14:6). Hote Ley toj Dios hiw’enho p’ante Israel lhayis yome toj isit’a che lhamel lhaip’ajtej honhatil toj iwhaye toj iwoye len’okhayaj (Éxodo 34:11-14). Toj lhamel t’ifwtiyej m’ak toj Dios ifwenho p’ante, toj paj takawayhla che honhatil toj iwhaye hiw’enho lech’otyaj hop toj lhamel t’alheje che lhay’uytho m’ayhay toj talhe len’okhayaj (Esdras 4:1-3).

¿Ha Wichi toj yen lhometa Heowa tahuyej wichi toj ihi religiones iyhaj?

Nilhok olhamel olhaikajyenej toj otahuyej wichi toj ihi religiones iyhaj. Malhyej p’ante apóstol Pablo, toj owo silota wichi, olhamel ot’uhlak otafwelej m’ak toj «wujpe lhamel» yen tichunhayaja wet m’ak toj t’ekhaye (1 Corintios 9:19-22). Wet malhyej toj Biblia yome, lewhay toj olhamel otahuyej wichi oyenhit’a w’et m’ayeka m’ak toj lhamel t’ekhaye (1 Pedro 3:15).