Niyat David lechʼisukyaj

Toj tafwaytshi toj Saúl yʼil, David hope niyat toj nechʼayek. Hiwʼen pʼante 30 años. Toj tafwaytshi wujpe años, iche honatsi toj David iʼpe lhip toj ikapha toj ihi lewʼet, hiwʼene atsinha toj matche toj isilataj. David yʼatshanlhi atsinhatso lhey wet ihanej toj lhey Betsabé wet lechʼefwa hope soldado toj lhey Urías. Toj malhyejtso David tʼalhe che nʼohane hop Betsabé, lham imayej atsinhatso, wet toj paj hichʼotshan. David tʼupʼantehlak hipʼoʼpe mʼak toj iwoye. Toj malhyejtso ifwenho elh toj lhaitumtej ejército che itihi Urías lhip toj ichun toj ihi batalla, wet toj paj nʼoyikchʼoya lham wet tsʼilak. Urías yʼil toj ihi batallatso, wet toj paj David yen chʼefwaya hop Betsabé.

Mat Heowa hiwʼen nilhokej mʼayhay toj niʼisa toj iche. ¿Atsi mʼak toj Heowa iwohiyela? Ichene David hop profeta Natán hopkhilak tahuyej. Natán yok: «Iche pʼante hinʼu toj niyat toj hiwʼen wujpe lelay tsonʼatas, wet iche hinʼu elh toj pʼelitsaj toj hiwʼen tajlhamet unofwaj tsonʼataj toj matche toj ihumin. Elh toj niyat isoyej hop elh toj pʼelitsaj tsonʼataj toj hiwʼen». David wuj toj lewak ihi wet yok: «¡Is che yʼil niyattso!». Toj malhyejtso Natán yok: «¡Am ahope hinʼutso toj niyat!». David wuj toj lefwitajayaj ihi wet ifwenho Natán toja: «Matche toj isitʼa ochʼisukyaj toj otayhtejla Heowa». Nʼochʼisukyajtso ichaje wujpe nʼowitʼayhyajay hop David wet lewʼet lheley. Heowa itiyej lewitʼay hop David, mat inuhitʼahla toj kamaj ilay hop toj yampej matche mʼak toj yome wet lhaichajlhihitʼa.

David tʼupʼantehlak yenlhi Heowa lewʼet. Mat Heowa tatshupiye Salomón, David lhos, hopkhilak yenlhi. Hop toj tamenej toj David iwo tesa toj iwaklhatla mʼayhay hop Salomón wet yok: «Heowa lewʼet is che matche toj isilataj. Salomón kamaj mamse, mat olham ochʼotiyela toj owaklhat nilhokej mʼayhay». David iwo wʼayhata wujpe chinaj tʼoj hopkhilak nʼoyenhilhila Heowa lewʼet. Tʼukwe iyhaj toj ihan mʼakejen, ihutwek oro wet chinaj, wet ichaje wujpe halʼoy toj talhe Tiro wet Sidón. Lewhay toj tatay lhimpaj toj David yʼil, hiwʼenho Salomón dibujo toj chihla malhyej (ep hotehla) Heowa lewʼet wet yok: «Heowa hiwʼen nʼoho instruccionesna hopkhilak olesayen wet owʼen amho, lham tachʼotla ame. Yej noway, is che atʼotle tʼun wet woye achumet».