Heowa laka ejército toj wujpe

Hop niyat Ben-hadad toj talhe Aram inuyepej hop Israel. Mat profeta Eliseo ifwenhopej hop Israel laka niyat hopkhilak iwoyek tafway. Hop toj tamenej toj Ben-hadad tatshupiye toj iskat hop Eliseo. Yʼatshanchʼoya lhip toj ihi wet ihanej toj ihi ciudad toj lhey Dotán wet ichene laka ejército hopkhilak itsoklhi.

Aram lhayis nichate Dotán toj honatsi. Toj nechʼe fwala Eliseo lechʼotfwa inupha wet hiwʼen toj ejército ilunej hop cuidad. Matche toj noway wet tʼan toj yok: «Eliseo, ¿atsi mʼak toj nawohiyela?». Eliseo nichulho: «Lhachʼotfwas inuʼpe iyhaj toj lhaitatche lhamel». Lewhaytso, Heowa ifwoyenche Eliseo lechʼotfwa letey wet hiwʼene chenhas toj ilunej ciudad toj tapoyej yelʼatas lhayʼe kaletas toj nʼokaʼtshayajchal toj hate iwoye itaj.

Lewhay toj sipʼalis toj talhe Aram tʼuhlak itsoklhi Eliseo, lham iwo tʼalhyaja: «Heowa, otʼalh ame che lham asnamis wichina». Yofwajkwet toj sipʼalis ihanhiyejtʼa lhip toj ihi tej toj lhamel hiwʼenche honhat. Toj malhyejtso Eliseo ifwenho lhamel: «Hopkhitʼa ciudadna toj is che lehoye. Hannʼo, ohanla amehen hinʼu toj amel letʼukwe». Lhamel ihan Eliseo pajtha nichate Samaria. Israel laka niyat ihi pʼante lhiptso.

Toj lepes wichi toj talhe Aram ihanej tʼat lhip toj ihi, mat tafwaytshi lewhay. Niyat toj ihi Israel yʼatshane Eliseo: «¿Ha olanhen?». Hop wichi toj talhe Aram tʼupʼantehlak iwoyeje mʼak toj niʼisa hop Eliseo, ¿ha ichumyenlhi tajtso hopkhilak ilanhen wichi toj tʼuhlak ilan lham? Kha. Lham nichulho hop niyat: «Yej lanhen. Wʼenho lhak wet che paj chen lhamel». Toj malhyejtso niyat iwaklhat nʼolhak toj wuj wet toj paj ichen lhamel hopkhilak yaple lewʼetes.