NʼOCHUFWENYAJ 30
¡Iyhaj toj lehumnhen pʼante iwoyek yachajo toj ilayhiche!
Nʼotʼilek ichaje mʼak toj aytaj wet lefwitajayaj wichi. Hop toj tamenej toj Biblia yome toj nʼotʼilek hope wichi letayhfwa (1 Corintios 15:26). Toj ihi nʼochufwenyaj 27 am alechufwenejne toj Heowa itayhtila nʼotayhfwana. Mat, ¿atsi mʼak toj iyej wichi toj pajche yʼinhen? Toj ihi nʼochufwenyajna letafwnhiyeja mʼak elh toj lhayʼe lhip toj isilataj toj Heowa ifwel: Lham inuhikwephala millones wet millones wichi, hopkhilak lepes ihihitʼa toj yen kajyaja lewʼatshancheyaj. ¡Yachajohla toj ilayhiche! ¿Ha matche toj iwoyek nʼokalhi tajtso? ¿Ha lhamel ihihla pele wok Honhat lewhay che yachajo toj ilayhiche?
1. ¿Atsi mʼak toj Heowa tʼuhlak iwoyeje lhaiyhaj toj nahumnhen toj pajche yʼinhen?
Heowa wuj toj ikelej che yachaje lewʼatshancheyaj wichi toj pajche yʼinhen. Job, hinʼu toj matche pʼante toj letʼekhayaj ihi, lham imatitche pʼante toj Dios ihichetʼala lewhay toj hipʼethatla lham lewhay che yʼil, tej toj che ihi «honhat tä nʼopʼitseyhay lewʼet». Lham ifwenho pʼante Dios toja, yok: «Che letʼan nʼoye wet ochulh tʼat» (Job 14:13-15, NWT).
2. ¿Chi malhyej (Ep hote) toj nahanej toj nʼopʼitsheyhay yachajohla toj ilayhiche?
Lewhay toj Jesús ihi pʼante Honhat, Dios hiwʼenho lakhajyhayaj hopkhilak ilaythiche wichi toj yʼinhen. Hop toj tamenej toj Jesús ikalhi pʼante toj yachaje lewʼatshancheyaj lhutsha toj hiwʼen 12 nekchomis wet atsinha tesa lhos (Marcos 5:41, 42; Lucas 7:12-15). Toj paj lakalayʼi Lázaro hate yʼil. Wet, tej toj cuatro ifwalas toj nʼopoʼpe pʼante wet toj yʼil, Jesús ilayhat lham. Toj ileyej toj iwo tʼalhyajaye Dios, tajlhamet tʼan toj iyahin lhip toj Lázaro ihi pʼante: «¡Lázaro, [...], nuphä!». Wet «hinʼo tä pajche yʼil inuphä tʼat», wet ¡ilay! (Juan 11:43, 44). ¿Ha iwoyek lehanej, chi malhyej (ep hote) toj ilat lhamehen Lázaro lewʼet lheley wet lakalayʼis?
3. ¿Ha yachajohla toj ilayhiche aiyhaj toj lehumnhen toj yʼinhen pʼante?
Biblia yome toja: «Tä Dios inuhthichephäla nʼopʼitseyhay» (Apóstoles Lhenhay 24:15). Wichi toj Jesús ilaythi pʼante ihohiyetʼa pele (Juan 3:13). Lhamel ihumin pʼante toj ilayhi Honhat. Malhyej toj iche pʼante lewhayistso, lewhay toj tatay alhoho Jesús ilaythichela miles wet millones wichi hopkhilak iwo kajyaja toj lepes ihihitʼa toj ilayhiche Honhat che wʼatshan wet isilataj. Lham yome pʼante toj nilhokej iyhaj toj ihi Heowa letichunhayaj inuhikwephala, hate wichi toj ihichetʼa iyhaj toj ihusekchʼoye (Juan 5:28, 29).
NATʼAYHETTSHI TOJ NALECHUFWENEJ
Natetshan mʼayhay toj ikalelhat namhohen toj Biblia yome toj nʼopʼitseyhay iwoyek ilayhiche wet toj mʼak toj nʼoyometso nʼoyamla matche. Wet natetshan chi malhyej (ep hote) toj nʼochufwenyaj toj yome toj wichi yachajohla toj ilayhiche hiwʼen namhohen lhaniwhayaj wet ikhajyen namel.
4. Jesús inʼalit pʼante toj iwoyek ilaythiche wichi toj yʼinhen
Tafwelej mʼayhay iyhaj toj Jesús iwoye pʼante toj ilayhat lakalayʼi Lázaro. Yahyen Juan 11:14 wet 38-44 wet ame mʼayhayna:
¿Chi malhyej (Ep hote) toj nahanej toj Lázaro yʼil pʼante? (Tetshan versículo 39).
Che Lázaro ihoye pʼante pele, ¿ha lefwetaj toj Jesús inityenej pʼante lham hopkhilak yaple Honhat?
5. ¡Wujlape wichi toj yachajohla toj ilayhiche!
Yahyen Salmo 37:29 wet ame mʼayhayna:
¿Atsi lhip toj ihihla miles wet millones wichi toj yachajohla toj ilayhiche?
Jesús tsʼilakhitʼa toj ilaythichela iyhaj toj nʼokwiyej Heowa, yachajiyela lewʼatshancheyaj wichi iyhaj. Yahyen Apóstoles Lhenhay 24:15 wet ame mʼayhayna:
Che ichate lewhaytso toj nʼolaythiche wichi, ¿atsi elh toj lehuminchek lewʼen?
En atichunhayaja toja: Jesús athahihotʼa che yachajohla toj ilaythichela wichi malhyejla iwoye che nʼojcha inomatlhi hop lhos.
6. Toj ilaythichehla wichi ikhajyen namel wet hiwʼen namhohen lhaniwhayaj
Toj Biblia yome Jairo lhase, tachʼote wet ikhajyen wujpe wichi toj iche elh toj yʼil. Yahyen historiana toj matche pʼante toj iche, ihi Lucas 8:40-42 wet 49-56.
Toj kamaj Jesús yachajiyetʼa lewʼatshancheyaj Jairo lhase ifwenho pʼante toja: «Yej nuhat amho, mat chaye» (Tetshan versículo 50). ¿Chi malhyej (Ep hote) toj iwoyek tachʼot ame nʼoniwhayajna toj wichi yachajohla toj ilayhiche...
... che yʼil elh toj am lehumin?
... lewhay che lhehi awitʼay?
Yahin VIDEO wet ame mʼayhayna:
¿Chi malhyej (Ep hote) toj ikhajyen wet tachʼote Phelicity lajcha wet lako nʼoniwhayaj toj wichi yachajohla toj ilayhiche?
IYHAJ WICHI YOME TOJA: «Wuj toj atha nʼoho toj omatitche toj nʼopʼitsheyhay yachajohla toj ilayhiche toj ihi Honhat».
¿Atsi mʼak toj am atichunhayaj?
¿Atsi texto toj iwoyek lechumyenlhi hopkhilak lekalelhat toj wichi toj yachajohla toj ilaythiche, ihihla Honhat?
MʼAYHAY TOJ LETETSHANNE
Biblia ikalelhat toj wujlape wichi yachajohla toj ilayhiche. Heowa tʼuhlak yachajo toj ilayhiche wet hiwʼenho Jesús lakhajyhayaj hopkhilak ilaythiche.
Mʼayhay toj nalechufwenejne
¿Chi malhyej (Ep hote) toj nahanej toj Heowa wet Jesús tʼuhlak yachaje lewʼatshancheyaj iyhaj toj yʼinhen pʼante?
¿Atsi lhip toj ihihla wichi toj ilayhichehla: ihi pele wok ihihla Honhat? ¿Atsi mʼak toj tamenej toj malhyejtso atichunhayaj?
¿Atsi mʼak toj ikalelhat amho toj iyhaj toj lehumnhen yachajohla toj ilayhiche?
IWOYEK LEWʼEN IYHAJ MʼAYHAY:
Yahyen mʼayhay iyhaj hopkhilak tachʼot ame lewhay che aytaj atichunhayaj.
«Nʼochʼotyaj toj hiwʼen iyhaj toj nechʼene toj yʼil elh» (¡Despertad!, núm. 3 2018)
¿Ha Biblia iwoyek tachʼote nʼoelh toj nechʼene toj yʼil elh?
Yahin chi malhyej (ep hote) toj iwoyek tachʼote hanʼafwaj toj iche elh toj ihumin yʼil.
¿Ha ihichela nʼoelh che nʼolaythi toj ihi pele? ¿Ha ihichela nʼoelh che yachahijotʼa toj ilayhi?
«¿Atsi toj hope toj nʼopʼitseyhay yachajohla toj ilayhiche?» (Nʼochufwenyaj toj ihi jw.org)