Iwoyek natafwelej Elh toj yenlhi pʼante nilhokej mʼayhay

Martín matche toj lekajyaj ihi toj lhaichufwenej mʼak toj ­Heowa yome pʼante toj yenhilhila, mat tayʼotshan lhamej toj che hope elh toj matche toj takhajay hopkhilak yenwetha mʼayhayna. Pedro ifwenho pʼante toj che ihuminchek ihanej chihla iwoyneje Heowa hopkhilak yenlhi nilhokej mʼayhay toj yome pʼante toj yenhilhila, is che yen tichunhayaja toj nilhokej mʼayhay toj iche, iche mʼak toj tamenej toj iche.

Yome pʼante toj mʼayhayna Dios Lhomtes hote yome wet inʼaltej pʼante versículona:

• “Hup chik häpe tä õyenlhi, nʼolhenek tʼat” (Hebreos 3:4).

—Wʼawulhitche matche —Martín nichulho pʼante—. Ihichetʼa nʼowukwe che tajlhamet lham toj lhayenlhi.

—Matche, wet malhyej iwoye nʼolhokhi toj nʼolhok ihi, is che iche nʼoelh toj iwaklhat.

Toj malhyejtso Pedro yome toj nilhokej mʼayhay toj iche matche toj isis wet atha che nʼoyenlhi, inuʼpe toj nʼoyenlhi nʼowukwe. —Yahin halʼo lhawol matche toj isis, chenhas toj atoschepha, lewomekitas wet universo toj newache lepes. Tsi che nawatlak nenlhi lhawukwe nawatla nʼoelh toj yen tichunhayaja chihla iwoyneje wet toj paj yenlhi. Hote che nawatlak nawaklhat lhalhok nawatla nʼoelh che takatay. Toj malhyejtso, toj nʼoyenlhi p’ante universo ¿ha iche pʼante Nʼoelh toj yenlhi?¿Ha iche pʼante Nʼoelh che itetshan nilhokej mʼayhay toj ikapha chi iwoyneje toj yenlhi?

Martín yen letichunhayaja toj tajtso hope mʼak toj matche.

—Dios Lhomtes yome toj nilhokej mʼayhay toj iche, ichehen hop toj iche pʼante nʼoelh toj ichun toj itichunejlhi chi iwoyneje mʼayhaytso toj yenlhi wet nechʼe yenlhi pʼante —Pedro yikchufwi pʼante toj yomlhi—. Wet nʼoelhtso is che hope pʼante elh toj matche toj takhajay. Hop toj tamenej toj nʼoyok Dios, nʼolhomtes toj lhamenya toj nʼolesayneji pʼante Biblia, nʼolhometna Dios, hope toj nʼoyok “Takhajay”. Ifwalasna wichi hiwʼen wujpe laka “dioses”, mat nilhokej pʼante mʼayhay toj Heowa yenlhi pʼante. Toj malhyejtso, tajlhamet lham toj iwoyek nen lheya hop Dios toj inuʼpe iyhoj toj takhajay.

Martín iseltej pʼante toj Dios Lhomtes yome wujpe mʼayhay wet lhayʼe lhip toj isis toj Heowa yenlhi pʼante. Hop toja nʼolhomtes toj Pedro inʼaltej pʼante Martín:

• “Tä nechʼenyaya Dios yenlhi pule lhäyʼe honhat” (Génesis 1:1).

• “Täfwelayej tä Lhawuk häpe tʼat Dios, tsi lham tä lhenek nʼamel wet Lhawuk tʼat” (Salmo 100:3).

• “Pule hinʼälit tʼat Dios lewujyaj, wet matche tä isilataj takwey lhenek” (Salmo 19:1).

• “Lhawuk iti puleye häp lham Lewʼet, wet yenlhi lakawayhi tä tumejlä honhat. Lham tʼäne inät tä ihi lewomekitaj wet itsäype honhat. Lhey tʼat Lhawuk” (Amós 9:6).

Matche, Heowa Dios yenlhi pʼante nilhokej mʼayhay. Mat hote hiwʼenho pʼante nilhokej mʼayhay toj iloyhiche lewʼatshancheyaj. Malhyej toj yome Lhomtes, “Tsi iʼamej inät tä tsʼifwik tä häpe nʼowʼatshancheyaj” (Salmo 36:9). Lham hope Nʼowʼatshancheyajwuk, Elh toj yenlhi pʼante nilhokej mʼayhay. Lham, Heowa, toj hiwʼen namhomche pʼante lhawʼatshancheyaj, hop toj tamenej toj hope Lhajcha. Toj malhyejtso, Lhomtes yok: “¿Hä nilhokayej nʼamel tä Lhajcha Dios? Häpe, tsi nʼalhenhay” (Malaquías 2:10).

—Matche amet —Martín yomlhi pʼante—, athana nechʼe ohanej toj che nawʼen nilhokej mʼayhay toj iche wet nen lhatichunhayaja, hopkhitʼa mʼak che atha che namatitche toj iche mʼak toj tamenej toj iche, iche Elh toj itichunejlhi chi iwoyneje toj yenlhi mʼayhay wet hope Nʼowʼatshancheyajwuk.

—Che isej pʼante lakhajyhayaj hopkhilak yenlhi nilhokej mʼayhay —akojlhi toj yomlhi pʼante Cristina—, hote hiwʼen lakhajyhayaj hopkhilak inʼalit mʼak toj Lhomtes yome pʼante toj yenhilhila.

Nilhokej mʼayhay toj Martín wet Cristina ilate pʼante ifwalatso, lhamel yen letichunhayaja toj hope mʼak toj is alhoho, mat ihuminche pʼante che yʼayhetsi toj itafwelej hop Elh toj yenlhi pʼante nilhokej mʼayhay toj matche toj takhajay.