Moisés tatshupiye toj nʼokwiyej Heowa

Toj kamaj ihi Egipto, wichi toj talhe Jacob lewʼet lheley nʼoyen lheya Israel lhayis. Toj paj toj Jacob wet José yʼinhen, iche faraón toj nechʼayek toj iwo tesa toj iwo leniyatyaja. Faraonna nowaye pʼante Israel lhayis hop toj lhayam wujpe inuʼpe egipcios. Hop toj tamenej toj yen hopeya esclavos. Inityenej lhamel toj tachumwetha wet yenlhi ladrillos. Israel lhayis lhayam wujpey, tej toj egipcios iwoyeje mʼak toj niʼisa. Toj faraón ihuminhitʼa tajtso, neʼtek nʼolanhen Israel leles toj nechʼe toj iche toj hinʼul, mat imanthi iyhaj toj atsinhay. Israel lhayis nowache pʼante tajtso.

Atsinha toj israelita toj lhey Jocabed, lhos ihi wet matche toj isilataj. Wet hopkhilak tʼuye lhos, ithatho canasta wet itichufwi halʼoy toj ihi tewok Nilo. Miriam, hanʼafwaj lechita, tofwitʼanla lham wet itetshan mʼak toj iyej.

Faraón lhase ihowhaye tewok lhip wet toj inay hiwʼen canasta. Ifwoyenpe wet hiwʼen hanʼafwaj toj tafwlhi, wet hipʼaltsen. Miriam yʼatshane: «¿Ha lewatlak otʼukwe atsinha toj itipyen hanʼafwaj?». Lham yok: «Woye». Wet Miriam tʼukwe lako. Faraón lhase ifwenho Jocabed: «Chaj hanʼafwaj, uye wet olham owʼenla amho chinaj tʼoj».

Toj hanʼafwaj lhaichiyhelit, Jocabed yachaje faraón lhase. Lham yen lheya Moisés wet ichiyhelit malhyej che lhos. Moisés hope príncipe wet iwoyek hiwʼen mʼak at che hope. Mat ihichetʼa lewhay che hipʼethatla Heowa. Moisés ihanej pʼante toj lham hope israelita, hopkhitʼa egipcio, wet tatshupiye toj nʼokwiyej Heowa.

Toj hiwʼen 40 años, Moisés tʼuhlak tachʼote laka wichi. Iche ifwala, toj hiwʼene toj egipcio itasin israelita toj esclavo. Toj hiwʼene tajtso, Moisés yʼaj egipcio wet ilan, wet hipʼoʼpe toj ihi holo. Toj faraón ihanej, tʼuhlak ilan Moisés, mat lham tiyaje Madián. Toj ihi lhiptso Heowa tʼuye lham.