¿Atsi toj hopehen Dios latayfwas?

Ahottaj (Ahättaj) Satanás hope tachen Dios latayfwa. Lham hope ángel toj tataylho Heowa. Ahottaj kamaj yikchufwi toj tataylho Dios, lham tamenej wujpe wichi lawithoy ihi toj iʼpe honhat. Satanás wuj toj fwitsaj, wʼetahuylhi wet yahemen ilon iñhoj (Juan 8:44).

Iñhoj ángeles lhahipʼajtej Ahottaj toj tataylho Heowa. Dios Lhomtes iwulheyia ahot (ahät) lhayis. Hoteʼiwuye Satanás, hopehen latayfwas wichi toj iʼpe honhat. Ahot lhayis yahemenhenche iwuyneje mʼak toj niʼisa wichi (Mateo 9:32, 33; 12:22). Heowa yikonchila Ahottaj wet laka ahot lhayis yomtilak tiyajʼattsi. Lhamil hiwʼen lhimpaj lawhoy toj iwuye mʼak toj niʼisahen (Revelación 12:12).

Chik iwatlok Dios lhoyfwa isitʼe lawuye mʼak toj Ahottaj iwatlo nawuye. Satanás wet ahot lhayis noyehu Heowa. Hopehen Dios latayfwas wet yahemen che ya hoteʼiwuye lhamil. Toj molhyejtsu, tʼotsan amej: “¿Atsi hope toj ochʼahuhiyela, Heowa wuk Ahottaj?”. Chik yahemen che hiwʼen lewʼatshancheyaj toj tʼun is che iwuye mʼak toj tolhe Dios. Ahottaj yahanej ifwe chenlhi wichi lhoyʼa wujpe lenhayij toj yen. Wujpe wichi imatitche wet nichotʼey lham toj yen (Revelación 12:9).