Meib

ǃKharuge ǁaeb Xristeǁîn ge, ‘hoaraga ǃhūbaib ǃnâ kai ǃâtsūǀkhāba’ ge hōǃâ. Amase gu ge oms di danaga mati gu ǁîgu omaride nî kōǃgâs xa gere ǂâiǂhansen. Tsî ǂkhamkhoen hîna ǃnāsase gere aoǁnâ ǂgaona mati nēs xa ge tsâǀkhāhe? ǀNîsin ge gere ǂâi ǁnā mîmâiden ǃâtsūǀkhāb ga toa o ǀgui nî sīǃnâsa. Mâsib ge mati ǀgui-i ī xawen ge ǁnā Xristeǁîna ǁnā mâsiga ge ūǃoa. ǁÎn ge ǁkhān a ǀgaub ǃnâ ge aoǁnâ ǀgara. Tsî ǂkhî ǂgaob ǀkha ūn ge hâ i xūna, Judeab ǃnâ ge ǁan hâ i ǃgâsan ǀkha gere ǀgoragu. (ǃNǃkh. 11:​29, 30) ǁNān hîna ge huiba a hōn ge Jehovab di ǃomma ge mû. (Mat. 6:​31-33) Tsî ǁnān hîna ge ǂhâsib xūna gere mān. Tamas ka io ǀkhara ǀgaugu ǃnâ gere huin ge mâs ra ǃaroma ǂkhîba ge hōǃâ.—ǃNǃkh. 20:35. w23.04 16 ¶12-13

ǀNî ǁaegu aib ge Jehovaba ǁîba ǃoaba tama hâ khoen ǃnâ-ū ǁîb ǃoaba-aon di ǀgorede ra ǃeream îb ǁîna hui ǁkhā. Aiǁgauseb, ge Gao-aob Artaxerxesa ge ǂkhâǃnâ, îb Nehemiaba mā-am îb Jerusalemsa om oas ǀkha sī hui. (Neh. 2:​3-6) Nētsēs tsînab ge Jehovaba ǁîba ǃoaba tama hâ khoena a sîsenū ǁkhā, în ǂhâsib ǃnâ da ga hâ o hui da. ǁAeba xu ǁaeb ǀkha da ge mâ tsî Jehovab sida ǀgorede ra ǃeream ǀgaub xa nî ǂâiǃgâ. (Psa. 66: 19, 20) Jehovaba ǃoa ǀgui ǀgores ǃnâ-ū da ge ǂgomsa ǁgau ǂgao tama hâ. Xawe sida ǀgoredeb da ǃeream ǀgausa ūǃoas ǃnâ-ūs tsîna ǃeream ami ra ǀgau-i hoa i ǃnâ.—Heb. 11:6. w23.05 11 ¶13; 12 ¶15-16

Jehovab ǃoagu da ga māǁnâsen, o da ge ra mîmâi ǁîba ǃoaba tsî ǁîb ǂâisa dīsa. ǁNā mîmâisa da ge nî ǃkhōǀgara. Sada di māǁnâsens ǃoagu ûis ge ǃgom tama hâ. Jehovab ge ǁîb ǂâisa da nî dīse a kuru da amaga. (J.ǂHa. 4:11) ǁÎb ge sada ǁîba ǂan tsî ǃoabas turab ǀkha ge kuru. Tsî ǁîb īsib ǃoas tsîna ge kuru da. ǁNās xa ǃaromahe hâse da ge ǁîba a ǀgū ǁkhā tsî ǃgâiǃgâibasensa ǁîb ǂâisa dīs ǃnâ ra hō. Elob ǂâisa dī tsî da ga ǁîb di ǀGôaba sao, os tsîna da ge aitsama ‘khoakhoasensa nî hōbasen.’ (Mat. 11:​28-30) Jehovaba da ūba hâ ǀnamma da ge aiǃgû tsî nî ǀgaiǀgai ǀgara. Hoa ǃgâi xūn dīb ran xa ǂâiǃgâs ǃnâ-ū. Eloba da ūba hâ ǀnammi ǃnāsase ra kai khami, î ge nî supuba da ǁîba ǁnâuǀnamsa. (1Jhn. 5:3) Jesuba ǁgae, ǁîb ge Elob ǂâisa ge dīǀoaǀoa Jehovaba ǃoab ge huib ǃaroma ǀgore tsî ǁîb mādawa-ams ai ǂâisa ǂnûi hâ-i amaga. (Heb. 5:7; 12:2) Jesub khami Jehovaba ǃoa ǀgaib ǃaroma ǀgore tsî ǀamo ûib ǃâubasensa ǂâis ǃnâ ǃgāsase ūhâ ǀgara re. w23.08 27-28 ¶4-5

Hoa da ge ǃnūǃnâxa khoena kaise ra ǃgôaǃgâ. Tae i ǃaroma? Khoen hîna xū-e ǁaixa tamase a ǃâu ǁkhāna da ge ra ǃgôaǃgâ. Dīsā da ga, o da ge ra ǃgôaǃgâ naun ga sida ǀkha ǃnūǃnâxa o. Tsî da ge kaise ge gangan Elobmîsa gere ǁkhāǁkhā da khoe-i ge sida ǀkha ǃnūǃnâxa i amaga. Aiǃgû tsî da ge Elobmîsa xu da gere ǁkhāǁkhāsen xūna ūǃoa tsî ǁaeb ai gere ûiǂui. Hoan ǂamai ta ge kaise ra ǃgôaǃgâ Jehovab sida ǀkha a ǃnūǃnâxa amaga. Nau khoen di ǃnūǃnâxasiba da ge kaise ra ǃgôaǃgâ, xawe da ge sida a ǃgombahe ǁkhā ǃnūǃnâxasa. Aiǁgause da ge ǃgombahe ǁkhā ǃnomsase hâsa, gaxuse da ga ǃkhai-i tawa ǃâu o. ǀNîsi da ge a ǁaixa ǁkhā ǂhanihe da ga o. Tsî ǀnî ǁaegu ai da ge a ǃgombahe ǁkhā Jehovab di mîmâis ǀasa ǃhūbaib xa hâsa ǃgâu ǀgarasa. ǁNās ǀkha da ge hoan ǂam-ai ǃnūǃnâxasiba ǂhâhâ. w23.08 20 ¶1-2

Jehovab ge Gideonna ge ǂgan, îb ǁîb di khoega 99 persents ǀkha ǀoroǀoro. ǁÎb ge ǀnîsi gere ǂâi: ‘Nē ǀkharaǀkharana amase ǂhâbasa-e? Sîsen-i nî?’ Xawe Gideonni ge ge ǁnâuǀnam. ǀHaohâb ǃûi-aogu tsîn ge nētsē Gideonna ra ǁgae, ǁîgu ga ǀapeǂhomis ga daoǁgaude dawa xawe sao-ais ǀguisa di o. (Heb. 13:17) Gideonni ge Jehovaba ge ǁnâuǀnam, ǁgaumâis ge ǃkhōǂgā hâ i xūnab gere ǃao xawe. (ǂHǂh. 9:17) Jehovaba xub ge ǂkhâǃnâ ra mîsa a hō toas khaoǃgâb ge Gideonna ge ǂan-i, Jehovab nî hui bisa ǁîb di khoenab ra ǁkhauba ǁaeb ai. Sida sîsenni mā-amhe tama hâ ǃhūgu ǃnâ ra ǁan ǀhaohâb ǃûi-aogu ge Gideonna ra ǁgae. ǁÎgu ge ǁkhoaǂgaoxase aiǁgausa, aoǁnâ sîsenni tsî ǀhaodi dawa ra ǁgau. ǁÎgu ge a ǂan ǀnîsi gu nî ǂganamǂgāhe, ǂnauhe tsî ǁîgu sîsen-e nî ǂoaǃnâ ǃkhaisa. Kai ǁgâiǀāb ǃnâ gu ge ǀhaohâb ǃûi-aoga ǁkhoaǂgaosiba nî ǂhâ, î gu ǀapeǂhumisa xu gu ra hō daoǁgaude sao. Matikōseb ga ǁnā mâsiba a ǁkhōǁkhōsa xawe. w23.06 5-6 ¶12-13

Jehovab ge ge īǁkhā kai, î da Jojadab xa khomai tsî ǁîb aiǁgausa xu ǁkhāǁkhāsen. (Rom. 15:4) ǁŌb ge ob ge Jojadaba ǀō-aisa aiǂhanuba māhe tsîb ge “gao-aogu di ǀhobadi ǃnâ Davidi ǃās ǃnâ ge ǁkhōhe. ǁÎb ge Israelǁîn, Elob tsî Tempeli tsîna gere dība ǃgâi ǃoabadi ǃaroma.” (2Kro. 24:​15, 16) Jojadab aiǁgaus ge hoa da nî hui, î da eloǃaoǃgâxasiba omkhâi. ǀHaohâb ǃûi-aogu ge hoaǁae Jojadaba a ǁgae ǁkhā, ǀgauga ôa tsî ǀhaohâba ǁkhaubas ǃnâ-ū. (ǃNǃkh. 20:28) Kairan ge Jojadab aiǁgausa xu ǁkhāǁkhāsen ǁkhā, Jehovaban ga ǃaoǃgâxasiba ūhâba o. Tsî ǁîb ǃoagun ga ǂgomǂgomsase hâ, ob nî sîsenūnîsa în ǁîb ǂâibasensa dīǀoaǀoa. ǂKhamkhoen ge a ǃgaoǃgâ ǁkhā, matib ge Jehovaba Jojadaba hâ-ū ǀgausa. Tsîn ge Jehovaba ǁgae tsî ǁkhara khoena ǃgôasiba a ǁgau ǁkhā. ǃGōsase ǁnān hîna Jehovaba gaxuse ǃoaba hâna. (ǂKhm. 16:31) Hā re î da ǂgomǂgomsase, sida ‘aiǃgû-aoga’ ǂkhâǃnâ tsî aiǃgû ǁîga ǁnâuǀnamsa.—Heb. 13:17. w23.06 17 ¶14-15

ǀHaodi tawa, matikōǃnâde du nî ǃereams ǃaroma, sadu di ǁnâuǃāba sîsenū re. ǂGuiǃnâde da ga sida di ǃomma ūkhâi, o da ge ǀnîsi ǃgâsaba a ǁgari ǁkhā îb sida ǂgai naun noxoba ǃēsa hō tama hîna. Nēs ge nî ǃaroma în nauna ǃereamsa xu ǃkhō-oasen. (Aoǁn. 3:7) ǂGui ǃgâsan ga ǁîn di ǃomma ǃhoaǀhaos ǁaeb ai ûkhâi, o da ge ǀnîsi ǂhâba ta ra khami ǃēsa hō tide ǃereamsa. ǀNî ǁaegu aib ge ǃgâsaba sida ǂguiǃnâde ǂgai hō ǁkhā tide. ǁNās ge ǂkhabuǂâi kai da ǁkhā. Xawe da ge nî dītsâ î da tā ǁnās xa ǁaixa. (Aoǁn. 7:9) ǂHâba du hâ khami du ga ǃnāsa ǁaeba ǃeream tama io. Tae-i ǃaroma du ǃgâise naun ra ǃeream ǀgauba ǃgâ tama hâ. Tsî ǀhaos khaoǃgâ ǁîna, ǁîn di ǃereams ǃaroma gangan tama hâ? Sadu ǃgasan ge ǁîna gangans xa kaise ǂkhâǃnâs ase a ībahe ǁkhā, ǃeream du ga has ǁkhās khami. w23.04 23-24 ¶14-16

Elobmîsa ǁkhāǁkhāsen tsî da ga ǁîs xa ga ǂâiǃgâ. O da ge sida ǂgomsa ra ǀgaiǀgai tsî ra ǂgomǃgâ Elob xūna ra dī ǀgaub a ǃgâisa. (Kol. 2:​6, 7) Jehovab ge ǃkharuge ǁaeb ǃnâ mati ǁîb khoena ǁkhāǁkhā, daoǁgau tsî ǁkhauba ǀgaus xa ǂâiǃgâ re. Aiǁgause, Esegieli ge ǂōrisase gere kō ǀhomǃgāb ge ǁhapos ǃnâ tempela gere ǀē-o. Nē ǁhapos ge Esegiela ge ǀgaiǀgai. Tsî î ge ǀgauga ra ǁgauda, mati da Jehovab di ǂhanuga ama ǃoabas ǃnâ a sao-ai ǁkhā ǀgausa. (Ese. 40:​1-4; 43:​10-12) Sida tsîn ge ǃgâiba ra hō ǁaeba ǁamaǂui, tsî da ga Mîs di ǃgam xūn xa ǁkhāǁkhāsen tsî ǂâiǃgâ o.—Psa. 112:7. w23.07 18 ¶15-16

Elobmîs ge ǂkhamkhoegu a ǁgae ǁkhā ǃgâi aiǁgaude ūhâ. Nē khoegu Elobmîs ǃnâ hâ gu ge Eloba ge ǀnam i tsî ǃkharagagu ǃereamde ge ūhâ i Elob di khoena kōǃgâs ǃnâ. Sadu omaris tsî ǀhaohâb ǃnâs tsîna du ge ǃgâi aiǁgaude ūhâ, Xristeǁî-aogu hîna Jehovaba a ǀnam ga. (Heb. 13:7) Tsî go ge ǀoasa kurusa ūhâ khoeb Jesu Xristub aiǁgausa xu a ǁkhāǁkhāsen ǁkhā. (1Pet. 2:21) Nē aiǁgaude gu ǃgâise ra ǁkhāǁkhāsen ǀgaub xa mâǂoa ra ǀgauga ǃgaoǃgâ re. (Heb. 12:​1, 2) Tsî mîǁgui re mati du nē aoga nî ǁgae ǀgausa. ǂUru gā-aisiba ūhâ aorekhoeb ge ǃkhaese xū-e dī tama hâ xawe ǃgâise ra ǂâiǃgâ dīb nîs aiǃâ. ǁNā-amaga ǃgarise sîsen re i ǁnā ǁkhāsiba hō tsî ǃkhōǀgara. ǂGurose, Elobmîsa xu Jehovab mati tsâ tsî ra ǂâisa ǁkhāǁkhāsen re. Tsî ǁnāpaxū ǂâi re tae-i ǃaroma i ǁîb ta mî xūna sats ǃaroma a ǃgâisa. ǁNās khaoǃgâ ǁkhāǁkhāsents go xūna sîsenū tsî Jehovaba ra ǂkhîǂkhî ǃgâi mîǁguiga dī re. (Psa. 119:9) Nē ǀgaub ǃnâ ǂâisats ga ǁkhāǁkhāsen, o i ge kaise nî supu gagasise ǀgaisa Xristeǁî-ao kaisa.—ǂKhm. 2:​11, 12; Heb. 5:14. w23.12 24-25 ¶4-5

ǁGûn ge ǀgôana nî ǁkhāǁkhā matin nî ǃnomsa ǀgaub ǃnâ ǃereamsa, ǁîn ra ǂgomǃnâ xūn ga ǃâitsâhe o. (Jak. 3:13) ǀNî ǁgûn ge nēsa omaris ǃoabas ǃnâ ra dī. Skoli ai a ǃhoaǃgaohe ǁkhā xūn xan ge ra ǂâi. Tsîn ge dramas ǃnâ-ū ra ǁgau matits a ǃeream ǁkhāsa. ǁNāpaxūn ge ǀgôana ra ǁkhāǁkhā matin ǃnomsa tsî îxa ǀgaub ǃnâ nî ǃeream ǀgausa. ǁAeb aiǃâ aiǂhumisens ge ǂkhamkhoena hui ǁkhā, în ǁguiǃā tae-i ǃaroman ǁnā xū-e ra ǂgomsa. “Young people ask” ti hâ ǃâb jw.orgs ai hâb ge ǂkhamkhoen nî ǃâitsâsen dîron tsîna ūhâ. ǂGui xūn ge ǂkhamkhoen ǃaroma māǂui-e hâ în ǂkhamkhoena hui tsî ǁîn ǂgomsa ǀgaiǀgai, în aiǂhumisen tsî ǃereamde mā. Sida ga nē xūna omaris ase ǁkhāǁkhāsen, o da ge nî mû mati da sida di ǂgomsa ǃnomsa tsî îxa ǀgaub ǃnâ a ǁkhauba ǁkhāsa. w23.09 17 ¶10; 18 ¶15-16

Gagasi mîǁguiba du dītsâ hâ xawe nēsa sīǃnâs ǀkha ǃgomsiba ge ūhâ i? ǁNāti î ga ī, o du ge ǂâis ǃnâ nî ūhâ ǀuri du hâ tamasa. Aiǁgause, Filipi ge ǃnāsase ǁîb ǀgoresa gere ǃgâiǃgâi ǂgao. Xaweb ge ǀgores ǃaroma ǁaeba ǁamaǂuis ǀkha ǃgoma gere hōǃâ. Erikas ge mîǁguiba ge dī, îs aoǁnâ sîsenni ǀhaodi tawa ǁaeb aiǃâ sī ǁkhā. Xawes ge hoaǁae ǀhoadi ǃgao gere ǃonkhao. Mîǁguiba du ga ūhâ o hîna du sīǃnâ tama hâba, o tā ǂkhabuǂâi. ǂKhari mîǁguib tsîna sīǃnâs ge ǃnāsase ǁaeb tsî ǃgarise sîsens tsîna ǂgaoǀkhā hâ. Sadu mîǁguiba du ra sīǃnâ ǂgao ǃkhais ge ra ǁgau, Jehovab ǀkha du ūhâ ǀhōsagusisa du ra ǃgôaǃgâsa. Tsî du sadu ǁkhāsib ǃnâ hâ-i hoa-e ǁîba ra mā ǂgaosa. Jehovab ge sadu dītsâde ra ǃgôaǃgâ. Ama as ge sadu a mā ǁkhā xū-i xab ge ǃnāsa-e ǂgaoǀkhā tama hâ. (Psa. 103:14; Mix. 6:8) Sadu di mîǁguigu ge nî ǁnâuǃāxa i, mâsib ra ǂgaoǀkhā khami. w23.05 26 ¶1-2

ǁKhoaǂgaoxa khoen tsîn ge ǃaoba ra hōǃâ. Xawen ge ǁnāsa mā-am tama hâ î-i ǁîna ǁkhae ǃgâi xūna dīsa xu. Danieli ge Elob kēbo-aogu di xoade gere ǁkhāǁkhāsen. Nēs ge Jeremiab di kēbode ǃkhōǂgā hâ. ǁNā ǁkhāǁkhāsa xub ge Daniela ge ǁnâuǃā, Jodeǁîn hîna ge Babilons ǃnâ ǃkhōsis ǃnâ hâ în ǀgūǁae nî ǃnorakaihesa. (Dan. 9:2) Danieli ge mû o Elobmîs kēbodi mati ra dīǀoaǀoahesa, os ge ǁnāsa ǁîb Jehovab ǃnâ ūhâ ǂgomǃgâsiba ge ǀgaiǀgai. Tsî ǁnān hîna Jehovab ǃnâ ǀgaisa ǂgomsa ūhân ge kai ǁkhoaǂgaosiba nî ūhâ. (Romeǁîn 8: 32, 37-39 sa ǀgopeǀnō re.) Xawe hoan ǃnâb ge Daniela, ǁîb di ǀhomsi ǁGûba ǃoa hoaǁae gere ǀgore. (Dan. 6:10) ǁÎb di ǁorebab ge Jehovaba ge mîba tsî ǁîb ra tsâ ǀgaub tsîna ge ǀgoragu. Tsîb ge Daniela huiba ge ǂgan. (Dan. 9:​4, 5, 19) ǁÎb ge sida khami khoes ǀguisa ge ī-i tsî ǁkhoaǂgaosib ǀkha ge ǃnaehe tama hâ i. Xaweb ge ǁnā ǀgauba ǁkhāǁkhāsens, ǀgores tsî ǂgomǃgâsiba Jehovab ǃnâ ūhâsa xu ge omkhâi. w23.08 3 ¶4; 4 ¶7

ǂHanuba da ga ǁnâuǀnam, o da ge hoa da ǃgâiba ra hō. Mâ ǀgaub ǃnâ? ǀGui xū i ge, ǂhanuba ra ǁnâuǀnamoǃnâ khoen di ǁkharaba xu da ge ra ǂgōsen. (Rom. 13:​1, 4) ǂHanuba da ga ǁnâuǀnam, on ge khoena nî mû Jehovab di ǃoaba-aon a ǃgâisa. Aiǁgause, ǂgui kuriga ǃkharu tsî i ge Nigeriab ǃnâ toroǃkham-aoga ǀhaos ǁaegub ǃnâ, ǀhaohâb tawa ge sī tsî ǁgui-ai marisa mataresa gere mâǃoa khoena gere ôa. Xawe i ge toroǃkham-aoga ra mûǂam-aoba ge mî, Jehovab ǃoaba-aon ge hoaǁae ǁîn ǁgui-ai marisa ra matare ti. ǂHanuba du ga ǁnâuǀnam, o du ge Jehovab di ǃoaba-aona ǃgâi ǀonsa ra dība. Tsî i ge nē ǃgâi ǀonsa dībasensa, ǀguitsē ǃgâsana a ǁkhauba ǁkhā ǂhâsib ǃnâ. w23.10 9 ¶13

ǀNî ǃoaba-aon Jehovab din ge nē ǃhūbaib di xūn ǀamsa gaxuse ǃâuhâ. ǀNî khoen ge ra ǂâi ǀams hās gaxuse ra ūsa. Xawe Jehovab ge a ǂan matin ǁîb ǃoaba-aona ra tsâ ǀgauba. ǁNā-amagab ge ǁîb kēbo-aob Habakuka ge mîba: “ǂHaiǂhais ge mîmâisa ǁaeba nî ǃâu, xawes ge ǃhaese nî hā tsîs ge nî ǂgomǂgomsa. Tsîs ga ǀhabe xawe ǃnūǃnâxasib ǀkha ǃâu, amases nî hā tsîs ǃonkhao tide xuige.” (Hab. 2:3) Eloba ǁnā ǂgomǂgomsa mîde Habakuki ǃgâib ǃaroma ǀgui ge mā? Tamas ka io ǁîb mîde nētsē î sida tsîna ǂâibasensa ūba hâ? Jehovab ge apostel Pauluba ge mîba îb ǁnā mîde Xristeǁîn hîna turaxasib ǀkha ǀasa ǃhūbaiba ǃâuhân ǃoagu sîsenū. (Heb. 10:37) ǂGomǃgâ ǁkhā da ge a Jehovab di mîmâis sada ores dis ga ǀhabe ǁaeba ga ra ū dīǀoaǀoahesa xawes ‘amase nî hā tsîs ǃonkhao tidesa.’ w23.04 30 ¶16

Israelǁaes ge Jehovab ge Moseba gere sîsenūs ǁgauǁgaude ge ǃharaxu. (Num. 14:​10, 1) ǃNās hoasan ge ǁîna ge ūǃoa ǂgao tama hâ i, Jehovab ge Moseba gere sîsenūsa îb ǁîna daoǁgau. ǁNās xa ǃaromahe hâseb ge Jehovaba ge mā-am tama hâ i în mîmâisa ǃhūb ǃnâ ǂgâ. (Num. 14:30) ǀNîn Israelǁaes din ge ge hâ i, Jehovab daoǁgausa gere saona. Aiǁgauseb ge Jehovaba ge xoa kai: “Xawe ti ǃgāb Kaleb ge ǀkharati ǂâi tsî ǂgomǂgomsa.” (Num. 14:24) Elob ge Kaleba ǀkhae tsî ge mā-am îb ǁhûi mâpab ra hâ ǂgaosa mîmâisa ǃhūb ǃnâ. (Jos. 14:​12-14) Israelǁaes hîna ge mā-amhena în mîmâisa ǃhūb ǃnâ ǂgân ge ǃgâi aiǁgausa ge ǁgau, Jehovab di daoǁgausa saos ǃnâ. Josuab ge Moseb khaoǃgâ a ǁgaumâihe o îb Israelǁaesa ǂgaeǂgui, on ge ǁîna ǁîba “kai ǃgôasiba ge mā” ǁîb ge ûi hâ i kurigu hoaga. (Jos. 4:14) ǁNās xa ǃaromahe hâseb ge Jehovaba ǁîna ge ǀkhae tsî ǁîna mîmâisa ǃhūb ǃnâ ge ûi kai.—Jos. 21:​43, 44. w24.02 21 ¶6-7

ǀAeǃkhō-aob ga sida ǂgaob mati ra ǂnausa kō toas khaoǃgâb ge a, mû ǁkhā ǂgaob mâsib mati hâsa. ǁNās ǁkhās khami da ge sada tsîna nî ôaǃnâsen, î da kō Elob tsî khoen tsîna da ūba hâ ǀnammi matikōse a ǀgaisasa. ǃGâsana da ūba hâ ǀnammi go ǂkhabusa da ga mûǂan, os ge nēsa ra ǁgau Eloba da ūba hâ ǀnammi tsîn ra ǂkhabusa. Xawe da ga hoaǁae nau ǃgâsana ǀnamma ǁgau, o î ge ra ǁgau Eloba da ūba hâ ǀnammi kaise ǀgaisasa. Sida ǃgâsana da ūba hâ ǀnammi ga ǂkhabu, os ge ǁnāsa kaise ǁkhōǁkhōsa ǃgomsiba ra ǁgau. Tae-i ǃaroma? ǁNās ra ǁgau amaga, Jehovab ǀkha da ūhâ ǀhōsagusis ra ǂkhabusa. Apostel Paulub ge ǁnāsa ra ǃgāsa kai, nētib ra ǂâiǂâiǃnâ da o: “ǁNā-i hîa ǁî-i di ǃgâsa-i hîa i ra mû-e ǀnam tama i ge Elob hîa i mû tamaba a ǀnam ǁoa.” (1Jhn. 4:20) Nēsa xu da tae-e ǁkhāǁkhāsen ǁkhā? Jehovab ge kaise ra ǂkhî, ‘sada ga ǁnāti ǀnamgu’ o.—1Jhn. 4:​7-9, 11. w23.11 8 ¶3; 9 ¶5-6

Gao-aob Joasi ge ǂkham i, xaweb ge gā-ai mîǁguiba ge dī. Joasi dadab ge ǁîb a ǂkham hîna ge ǁō tsîb ge ǀgapi pristeri Jojadaba ǁîba Jehovab xa ge ǁkhāǁkhā. Joasi ge ge gā-ai i, Jojadab ge mābi ǀapemāsab ge ǂgomǂgomsase a sao amaga. Jojadab di ǃgâi aiǁgaus xa ǃaromahe hâseb ge Joasa ge mîǁgui, îb Jehovaba ǃoaba tsî naun tsîna hui în Jehovaba ǃoaba. Joasi ge xū-e ge dī î-i Jehovab di tempela dī-ūnuhe. (2Kro. 24:​1, 2, 4, 13, 14) Sa ǁgûn tamas ka io khoe-i ga huitsi o, its Jehovaba ǀnam tsî ǁîb ǂgaoǀkhādi ǃoagu ûi, ots ge ǀō-aisa ǀkhaeba ra māhe. (ǂKhm. 2:​1, 10-12) Sa ǁgûra ge ǂgui ǀgaugu ǃnâ a ǁkhāǁkhā tsi ǁkhā. Sa ǁgûra ge nî ǂkhî, ǁîra xats ra māhe Elobmîs ǀapemādets ga ǃgâ o. Tsî kaise a ǂhâǂhâsas ge Elobats ge nî ǂkhîǂkhî, o î ge ǁîb ǀkhats ūhâ ǀhōsagusisa nî ǀgai. (ǂKhm. 22:6; 23:​15, 24) Nēsa ǃgâi ǃaromasa mâ tsi tama, Joasi ge ǂkham i ǁaeb di aiǁgausa ǁgaesa? w23.09 8-9 ¶3-5

Jehovab ge ra mîmâi sida ǀgoredeb nî ǃgâ tsî ǁnâusa. Sida di Elob ge ǁîb ǂgomǂgomsa ǃoaba-aona a ǀnam tsîb ge tātsē ǁîna ǃnōxu tide. (Psa. 10:17; 37:28) Xawes ge nēsa ǂâibasen tama ǂgan da ra xūn hoanab nî māda ǃkhaisa. ǀNî xūn ǂgan da ra na da ge ǀnîsi ǀasa ǃhūbaib kōse nî ǃâu ǁîna da nî hōs aiǃâ. Jehovab ge ǁîb ǂâibasensa ǂâis ǃnâ ūhâse sida di ǀgorede ra ǃgâ. (Jes. 55:​8, 9) ǀGui xū-i ǁnā ǂâibasens di ǃâ i ge Jehovab ge ra ǂhâba îb hoa ǃhūbaib khoena ǁîba ǁhûi, ǁîn ǂgaeǂgui-aob ase. Xaweb ge ǁGâuaba ra mî khoen ge kaise nî ǂkhî ǁîn ga aitsama ǂgaeǂguisen o. (Gen. 3:​1-5) ǁGâuab ta mî xū-e ǂhumib ase ǁgauǂuis ǃaromab ge Jehovaba khoena ge mā-am în aitsama ǂgaeǂguisen. Xawe i ge khoesib di ǂgaeǂguisa nētsē da ra hōǃâ ǂgui ǃgomsina ǃaroma hâ. (Aoǁn. 8:9) ǁNâuǃā da ge ra Jehovab nē ǃgomsin hoana nēsi ūbē tidesa. Nē ǃgomsin hoanab ga nēsi ūbē, o i ge Elob ǃnâ ǂgom tama khoena nî ǂgom, khoen ǃgâise a ǂgaeǂguisen ǁkhāsa. Tsîn khoena ǁîn ǃgomsina, aitsama a ǀam kai ǁkhā ǃkhaisa. w23.11 21 ¶4-5

Jehovab ge ge mîmâi Abrahammi ǃnâ-ūb ‘hoaraga ǃhaode’ nî ǀkhaesa. Abrahammi ūhâ buruxa ǃâubasens xa mûnan-ai re. Abrahammi ge 100 kurixa-i tsîs ge Sarasa 90 kurixa-i xawe ra ge noxopa mîmâihe ge ǀgôaba ge hō tama hâ i. Khoesi mûǂuiba xu î ge Abrahammi tsî Saras tsîn ǀgôaba nî hōs ī tide xū-i khami ge mûsen ǁkhā. Nēs ge Abrahamma kaise gere ǃâitsâ. Abrahammi ge ‘ǂgui ǁaedi di îseb’ nî hō mîmâis ai gere ǂgomǃgâ. (Rom. 4:​18, 19) Tsî î ge Abrahammi ge ūhâ-i ǃâubasensa ge dīǀoaǀoahe. ǁÎb ge ge Isaki di ǁgû kai, ǂgui kurigab ge ǃâubasen hâ-i ǀgôaba. (Rom. 4:​20-22) Sida tsîn ge Abrahammi khami Elob xa ūǃoahe tsî ǂhanu-ai khoen ase mûhe ǁkhā. Paulub ge nēs xa ge ǀgomǀgomǃgao saorase: “Tsî di ge mîdi “Elob ge Abrahamma ǂhanu-ai kai” ti ra mîde ǁîb ǃaroma ǀgui ge xoahe tama hâ i, xawe sada hîa nî ǂhanu-ai kaihe da ǃaromas tsîna. Sada hîa ǁnāb, Jesub sada ǃKhūba ǁō hâna xu ge ǂkhaiǂkhaib ǃnâ ra ǂgomda.” (Rom. 4:​23, 24) Abrahammi khami da ge Jehovab ǃnâ ǂgomsa nî ūhâ, ǃgâi sîsenga nî dī tsî ǂgomǃgâsiba nî ūhâ Jehovab ge mîmâi xūn nî ama īsa. w23.12 7 ¶16-17

ǃAo kai du ra ǃgomsi-e du ga hōǃâ, o ǂâis ǃnâ ūhâ re Jehovab ge sadu ra hōǃâ xū-e ra ǃgaoǃgâ ǁnā i mati sado ra tsâ kaisa. Aiǁgauseb ge Jehovaba Israelǁaes ge Egipteb ǃnâ gere hōǃâ xūna, mûs ǀguisa ge hî tama hâ i. Xawe ǁîn gere ‘hōǃâ tsûb’ tsîna gere ǃgaoǃgâ. (Eks. 3:7) ǃAoǃaosa ǃgomsi-e du ga hōǃâ, o du ge ǀnîsi mû tide Jehovab mati ra hui dusa. ǂGan re îb hui du, i du ǁîb ǂkhâǃnâsa mû. (2Gao. 6:​15-17) ǁNāpaxu dîsen re: ǀHaohâb tawa ra māhe ǃhoas tamas ka io ǃereamde ǂkhâǃnâ du tsâ hâsa? ǂKhani-i, vidio-i tamas ka io ǁnae-amdi xa du ǂkhâǃnâ-e tsâ hâ? Khoe-e ǂkhâǃnâ ra xoasa sadu ǀkha ǀgoragu tsâ hâ? ǀNî ǁaega da ge sida ǃgâsan tsî Elobmîsa xu da ra hō huiba a ǀuru ǁkhā. Xawe ǁnān ge ǂoaǂamsa ǀkhaen Jehovaba xu ra hāna. (Jes. 65:13; Mrk. 10:​29, 30) ǁNān ge ra ǁgau ǁîb sadu ǀkha ǁae hâsa. (Jes. 49:​14-16) ǁÎb sida xa ǂgomǃgâhesa anu hâs tsîna i ge ra ǁgau. w24.01 4-5 ¶9-10

ǀHommi ǃoab nî oas aiǃâb ge Jesuba ǁîb ǁkhāǁkhāsabega ǁîgu ǁgaumâis xa ge ǂâiǂâiǃnâ. Îgu ǁîb xa “hoaraga khoen Jerusalems, Judeab, Samariab tsî hoaraga ǃhūbaib ǃnâ hâna . . ǀhûǀguiba.” (ǃNǃkh. 1:8; Luk. 24:​46-48) ǁAeroba ǃkharu tsî î ge Jodeǁî ǂgaeǂgui-aoga, apostel Petrub tsî Johaneb tsîkha ǂganamǂgā tsî ǀapemāǃnans aiǃâ ge sī-ū. Nē ǀapemāǃnans ge ǁîga ge mîba, î gu aoǁnâ ǀû. Tsî ǁîga ǃaoǃaos tsîna ge di. (ǃNǃkh. 4:​18, 21) Pertub tsî Johaneb tsîkha ge Jodeǁîn ǂgomdi ǂgaeǂgui-aoga nēti ge ǃeream: “Eloba i kha a ǃgâiba sikhom nî Elob ǃgâ-ai sago ǁnâuǀnam ǃkhaisa? Sago aitsama ǀgoraǃgâ. Tātsē khom ge sikhoma sikhom ge mû tsî ǁnâu ǃgâina khoena ǃhoabaǀû ǁoa.” (ǃNǃkh. 4:​19, 20) Petrub tsî Johaneb tsîkha ge ǃkhōsisa xu a ǂoa o, on ge ǁkhāǁkhāsabena Jehovaba ǃoa ge ǀgore în ǁîb di ǂâisa dīǀoaǀoa. Jehovab ge ǁnā ǀgores hîna ge ǂgaob ǃgamsiba xu a dīhesa ge ǃeream.—ǃNǃkh. 4:31. w23.05 5 ¶11-12

ǂGui kurina i ge Jehovab tsî ǁîb ǀnamǀnamsa ǀgôab tsîna ǀguiba ge hâ i. ǁNā ǂgui kurigu ǃnâ kha ge kai ǀnamma ge omkhâiba gu. Nētsēs xoas ǃnâ da ra khomai khamib ge Jehovaba ǃgāsase Jesubab ǀnamsa ge mî. Jehovab ge ǀnîsi ga mî hâ, ‘nēb ge ǃgâiǃgâibasensa ta ūǃnâ hâba.’ Xaweb ge ge ǂhâba hâ i, i da ǂan matikōseb Jesuba ǀnamsa tsî ǁîba ti “ǀnamǀnamsa ǀgôab” ti ge ǂgâi. Jehovab ge Jesub ai ge ǂnīsa i ǃgōsase ǁîb ûibab ge māsenxase gere mā ǃkhâis ǃaroma. (Efe. 1:7) Jesub ge ǁîb dadasab a ǀnambi ǃkhâisa ǃgāsase ge ǂan i. Jehovab di ǀnammi ge Jesuba kaise ge amaba i tsîb ge ǁîb di ǂganagab ǃnâ ǁnāsa gere hōǃâ. ǂGomǃgâsib ǀkhab ge ǃnākōrobe ǁîb ǁGûb a ǀnambi ǃkhâisa gere mî.—Jhn. 3:35; 10:17; 17:24. w24.01 28 ¶8

Kaise du a ǀnam khoe-i ge sadu xa ǁgai xū-e ra mî tsî du ge a ǂan ǂhumib asa xawe i ge ǁî-e ǀnîn xa ra ǂgom-e. ǁNās ǂam-ai i ge nauna ǁnā ǂhumib xa ra mîba tsîn ge ǂguin tsîna ǁnāsa ra ǂgom. Mati du ǁnās xa nî tsâ? ǁNā ǂhumib ge nî tsûtsû du. Nē aiǁgaus ge ra hui da î da ǁnauǃā, Jehovab ge mati a tsâsa ǁîb ǀons gere ǁgaiǁgaihe o. ǁÎb ǀhomǃgān di ǀguib ge ǂguro khoes Evasa ge ǂhumiba tsîs ge ǁnā ǂhumiba ge ǂgom. ǁNā ǂhumib xa ǃaromahe hâse ra ge Adammi tsî Eva hâra tsîna Jehovab ǃoagu ge ǁore. Tsîn ge ǁnās xa ǃaromahe hâse hoa khoena ǁore tsî ra ǁō. (Gen. 3:​1-6; Rom. 5:12) ǃHūbaib ǃnâ da ra mû ǁōb, torogu, ǃgomsin tsî ǂkhîoǃnâsib tsîn ge ǁGâuab ge Edenni ǃhanab ǃnâ dī ǁoreb xa ra ǃaromahe. Jehovaba tsûba ra hōǃâ nē ǂhumib tsî ǃgomsin ge ǃaroma xūn xa? Îo. Xaweb ge Jehovaba ǁaixa tsî ǀkhaoǂgaoxa tama. ǁÎb ge “ǂKhîb di Elob” ase ra hâ ǀgara.—1Tim. 1:11. w24.02 8 ¶1-2

Mati du Josefa ǁgae tsî Elob ǃoa ǂgomǂgomsase nî hâ tsî ǂhanu xū-e nî dī ǃâitsâhe du ga o? Nēsi du ge ǀnai a mîǁgui ǁkhā tae-e du nî dīsa ǃâitsâga du ga hōǃâ o. ǁKhāǁkhāsen ǁnâ ǁaeb ai Jehovab ǃhûi hâ xūna ǂkhā tsî ǁîna xu ǂgōsensa. (Psa. 97:10; 119:165) ǁNā ǀgaub ǃnâ du ge ǃâitsâhe du ga o ǁore tide. ǀNîsi du ge a ǂan amaba du ge hōsa. Jehovaba du ge sadu ǂgaob hoab ǀkha ra ǃoaba ǂgao xawe i ge xū-e ra ǃkhō-oa du māǁnâsen tsî ǁāǁnâ kaisensa. Gao-aob Davidi ge dī xū-e du ge a dī ǁkhā. Jehovaba du ge a ǀkhoma ǁkhā: “Ôaǃnâǃganu te re ǃKhūtse, î ti ǂgaoba ǂan re! ǃÂitsâ te re î ti sâoǃnâ ǂâide ǂan re, i mû ise i tsū dao-e tita tawa hâsa, î ǀamo daob ai ǂgaeǂgui te re.” (Psa. 139:​23, 24) Jehovab ge “ǁîba ra ôana ra mādawa-am.” Māǁnâsen tsî ǁāǁnâs mîǁguib ǃoagu du ra sîsens ge ra ǁgau ǁnāsa du ra dīsa.—Heb. 11:6. w24.03 6 ¶13-15

ǀGapipristeri ge khoena Elob aiǃâ gere ǂnûǁkhaeba. Israelǁîn di ǂguro ǀgapi pristeri Aronni ge Jehovab xa ge ǁgaumâihe tabernakeli ge māǁnâhe tsēs ai. Xaweb ge apostel Pauluba ge ǁguiǃā: “ǂGui ǃgôab ǃnâ hâ pristergu ge ge mâihe, ǁōb xa ǃaromahe hâse gu ge pristerse hâhâ ǁoa i xui-ao.” (Heb. 7:​23-26) ǁNā ǀgapi Pristergu ge ǀaosa kurusa ūhâ tama hâ i amaga gu ge ǁîgu ǁōren ǃaroma ǁguibade gere dī. Nēb ge kai ǃkharagagusiba Israelǁîn di ǀGapipristeri tsî kai ǀGapipristeri Jesu Xristub ǁaegu. ǀGapipristeri aseb ge Jesuba “Hoan xa ǃAnu ǃKhaib, Tentommi hîa khoe-i xas ose, xawe ǃKhūb xa aitsama kuruhe hâb ǃnâ ra ǃoaba.” (Heb. 8:​1, 2) “Jesub ge ǀamose ûi hâ tsî ǁîb di pristersis ge māǃkhuniguhe ǁoa” tib ge Pauluba ge ǁguiǃā. ǀAro tsîb ge ge mî Jesub ge ‘ǃanu, ǀhapio, ǁoreo tsî ǁore-aona xu ǀgorahe hâ.’ Tsî ‘Israeli ǀgapipristergu ge tsēkorobe aibe ǁîgu di ǁoren ǃaroma ǁguibagu, khamib ge Jesuba ǁguibasa dīsa ǂhâbasa tama.’ w23.10 26 ¶8-9

“ǂGuro ǀhommi” ge ǂgīǂgōsi ǂgaeǂguis hîna ǁGâuab tsî ǁîb demongu xa ra ǂgaeǂguihena ǃoa ra ǁnaeǁgau. (Mat. 4:​8, 9; 1Jhn. 5:19) Elobmîs ǃnâ i ra sîsenūhe khami i ge “ǃhūbaib” ti hâ mîsa, ǃhūbaib ǃnâ ǁan hâ khoena ǃoa ra ǁnaeǁgau. (Gen. 11:1; Psa. 96:1) ǁNā-amaga i ge “ǂguro ǃhūbaib” ti i ra mîhe o, nētsē ûihâ eloxoresa khoena ǃoa ra ǁnaeǁgau. Jehovab ge nēsi hâ “ǀhommi” tsî “ǃhūbaib” tsîna ǃgâiǃgâis ǀguisa di tide xaweb ge hoase hîkākā tsî nî ǀasaǀasa. Nēsi hâ ǀhommi tsî ǃhūbaib tsînab ge “ǀasa ǀhommi tsî ǀasa ǃhūbaib” ǀkha nî ǃkhōǃkhuni. ǁNās ge ra ǂâibasen ǀasa ǂhanub nî ǂgaeǂgui tsoatsoasa ǂhanu-ai khoen ǂam-ai. Jehovab ge ǃhūbaib tsî khoen tsîna nî ǂgauǂgau în ǀoasasib kōse sī. Jesajab ge kēbo khamib ge Jehovaba hoa ǃhūbaiba îsase nî dī Edens ǃhanab khami. Mâ khoe-i hoa-i tsîn ge nî ǀasaǀasa-e, ǃhoran, ǂgīn, ǂganaǂgaehân tsî ǁōhân tsîn ge khâisa nî hō.—Jes. 25:8; 35:​1-7. w23.11 4 ¶9-10

“Kai ǂōǂōsib” (ǁgâiǀāb) ge ǂgui khoen ǃâubasen tama hâ hîna nî tsoatsoa. (Mat. 24:21) Xawe Kai ǂōǂōsib ge nau tsūkēǃgâga xu nî ǀkhara, hā-i nî sa da a ǂan amaga. Jesub ge 2 000 kuriga ǃkharu hâse, ǁîb saosabena ge ǃkhâikhom în ǁnā tsēs ǃaroma aiǂhomisen. Aiǂhumisen da ga, o î ge nî supu ǁnā ǃgom ǁaeba ûiǃkharusa. Tsî nau khoen tsîna nî hui în ǁkhā xū-e dī. (Luk. 21:36) Mâǀgaisa da ge ǂhâhâ, î da Jehovaba ǁnâuǀnam tsî ǂgomǃgâ ǁîb sida nî ǁkhaubasa. Tae-e da nî dī sada ǃgâsan ga ǀnî xūn tamas ka io hoa xūn hînan ūhâna ǂoaǃnâ o? (Hab. 3:​17,18) ǀKhomxaǂgaosib ge nî ǂkhâǃnâ da, î da ǁîna hui. Mati da nî tanisen ǀguiba mâǀhao hâ ǁaedi xa ǃaromahe hâ ǁnāǂamdi xa da ga, sada ǃgâsan ǀkha ǁaerob di ǀgaiba hâ ǀhao o? (Ese. 38:​10-12) ǁÎna da ge ǀgaisa ǀnamma nî ūhâba, î da ǁnā ǃgomǁaeba ǀguiba mâǃkharu. w23.07 2 ¶2-3

ǃGamme hâ khoen ge Akwilab tsî Priskilas di aiǁgausa xu a ǁkhāǁkhāsen ǁkhā. ǁÎra ge ǂgurokham ǁaeb Xristeǁîn xa kaise ge ǀnamhe ī. (Rom. 16:​3, 4) ǁÎra ge ǀguiba sîsen, aoǁnâ tsî nau khoena ǀguiba gere hui. (ǃNǃkh. 18:​2, 3, 24-26) Akwilab tsî Priskilas tsîn ge Elobmîs ǃnâ ǀguiba xūna ra dī ǃgamme hâ khoera ase ǂansa. ǃGamme hâ khoena mati ǁîra ǁgae ǁkhā? ǃGamme hâ khoero ase ro ǀguiba a dī ǁkhā ǂgui xūn xa ǂâi re. ǀNî xūna ro ǀnîsi ǀguiba a dī ǁkhā, mâ-i hoa-i ǀguri nî dīs xa? Aiǁgause, Akwilab tsî Priskilas tsîn ge ǀguiba gere aoǁnâ. Saro tsîna ǁnāsa a dīǁkhā? Akwilab tsî Priskilas tsîn ge ǀguiba gere sîsen. ǃGamme hâ khoero ase ro ge ǀnîsi ǀgui sîsen-e dī tama hâ. Xawe tae-i ǃaroma ro omsi hâ sîsenna ǀguiba dīǁoa? (Aoǁn. 4:9) ǀGuiba ro ga xūna dī, o ro ge sîsenǁare-ao-i khami ra tsâ. Tsîs ge nēs tsîna ǃēsa ra mā îro ǃhoaǂgao ro ra xūn xa ǃhoa. w23.05 22-23 ¶10-12

Hoa da ge ǀnî ǁaegu ai ra ǃao. Aiǁgause, Gao-aob Sauli ge ǁîba gere ǃgam ǂgao, ob ge Davida Filisteǁîn ǃās Gats ti ǀon hâsa ǃoa ge ǃkhoe. Gats ti gao-aob Akisi ge kaise ǃhae ǁaeb ǃnâ ge ǂanǂui, “Davidi ge ǁîb disiǀoadisiga ge ǃgam” ti hâ ams ǃnâ ra ǁnae-amhe ǀgaisa ǃkham-aosa. Davidi ge ge “ǃao” tsoatsoa. (1Sam. 21:​10-12) ǁÎb ge Akisi a tsûtsûbi ǁkhās xa gere ǂâiǂhansen. Davida mati ǁnā ǃaoba dansa ge hōba ǁkhā i? Davidi ge Psalms 56 ǃnâ hâ mîde Gats ǃnâb hâ hîna ge mî. ǁNā Psalmdi ǃnâb ge Davida ra ǁguiǃā tae-i ǃaromab ra ǃaosa. Xawes tsînab ge ra ǁguiǃā tae-i ge ǁîba a huisa îb ǃao ǀû. Davidi ge ǃaob gere ǁaeb ai Jehovab ai ge ǂgomâiǂnûi. (Psa. 56:​1-3, 11) ǁÎb ge ǃgâi ǃaromasa ge ūhâ i Jehovab ǃnâ ǂgomǃgâsa. Jehovab huib ǀkhab ge Davida hoaǁae ī tama xū-e ge ǀape, ǁîb ge ǃkhauhâ khoe-i khami ge tanisen tsoatsoa. Akisi ge nēsa a mû, ob ge gere ǂhâba îb Davida ī. Nēs ge ge ǃaroma Davidi ǁnā ǃāsa xu ǃnorasase nî īsa.—1Sam. 21:13–22:1. w24.01 2 ¶1-3

Hamna nētsēs mîs ǃnâ ra mîhena? ǁÎn ge khâisa māhe hâ ǂkhauhesa Xristeǁîna. Kai ǁgâiǀāb nî toas aiǃâ ǀhomma ǃoa nî ī ǂkhauhesan ge ǂguro ǁgaumâis ase, Jesuba nî ǃkham hui. ǀHommi khâisan ga hōs khoaǃgân ge Xristub tsî ǀhomǃgāgu tsîn ǀkha ǀuniga torob ǃnâ nî ǁhao, Elob di khākhoen ǃoagu. Sao ra î xa ǂâi re: ǃHūbaib ai hâ ǂkhauhesa Xristeǁîn ge nēsi kaira hâ. Xawen ga ǀhomma ǃoa ī tsî Xristub ǀkha ǀguiba sī ǂgaeǂgui, on ge ǁîna nî ǁō ǁoa gagasi kurusabe kai. ǁÎn ge amase ǃgâsana ǃnāǂamsase nî hui ǀhomma xu. w24.02 6-7 ¶15-16

ǀNîn hîna māǁnâsen tsî ǁāǁnâ kaisens ǃaroma ǂhanun ge ra îganǀgē. ǁÎn ge ǀnîsi ra ǃao ǁāǁnâs khaoǃgân tsū ǁoreba dī tsî nî ǂnûiǂuihesa. ǁNāsa du ga ǃao, o ǂgomǃgâsiba ūhâ re Jehovab ge ǂhâ du hâ xūn hoana nî mā du “î du ǃKhūba anu hâse ûi, ǁîba ǃgâiba ǀgaus hoas ai.” (Kol. 1:10) ǁÎb ge ǀgaiba nî mā du, î du ǂhanu xū-e dī, ǂguinab ge ǀnai ge hui în ǂhanu xū-e dī. (1Kor. 10:13) ǁNās ge ǀgui ǃaromas kaise ǀoro khoen ǀhaohâba xu ra ǂnûiǂuihesa. Jehovab ge ǁîb khoena ra hui în ǂgomǂgomsase hâ ǀgara. ǀOasa kurusa ūhâ tama khoen hoan ge tsū xū-e dīs ǀkha ra ǃâitsâhe. (Jak. 1:14) Xawe du ge ra ǁhûi tae-e du nî dīsa ǃâitsâhe du ga o. Mati du nî ûisa du ge sadu ǀguido a mîǁgui ǁkhā. ǀNî khoen ge ra mî tsâ du ra ǀgaub tsî dī du ra xūn tsîna du aitsama ǃkhō-oa ǁoasa. Xawe ǁnās ge ama tama, ǁkhāǁkhāsen ǁkhā du ge a ǃgâi tama turaga ǃkhō-oasa. Tsî du ge ǃâitsâhe du ga, o ǁhûi ǁkhā ǁgai xū-e du dī tidesa. w24.03 5 ¶11-12