Septemberi

Elob ge Jesuba ǀgaiba ge mā îb hoa ǃgomsigu khoesib diga ūbe. Jesub ge buruxa dīga gere dī o, ob ge ge ǁgau sida tātsē a ūbe ǁoa ǃgomsigab a ūbe ǁkhāsa. Aiǁgauseb ge ǀgaiba ūhâ, sida ǃgomsiga xu oresa. ǁNāp ge ǀumi da ge ǁoreb tsî hoa xūn hîna ge ǁoreb xa a ǃaromahena, ǀaen tsî ǁōb tsîna ǃkhōǂgā hâse. (Mat. 9:​1-6; Rom. 5:​12, 18, 19) ǁÎb buruxa dīn ge ge ǁgau, ‘hoa ǀaesenainab’ a ǂgauǂgau ǁkhāsa tsî ǁō hân tsîna khâisa nî māsa. (Mat. 4:23; Jhn. 11:​43, 44) ǁÎb ge ǀgaib tsîna ūhâ, ǀgaisa ǂoade ǃnomǃnom tsî khoena demoga xu ores diba. (Mrk. 4:​37-39; Luk. 8:2) Nēs ge ǂgomǃgâsiba ra mā da, ǂansa Jehovab ge ǁnāti-i ǀgaiba ǁîb di ǀgôab ǃomdi ǃnâ a māsa. ǂGomǃgâsiba da ge ūhâ ǁkhā hānîǁaeb ǀkhaeb nî ama kaisa Elob gaosib ǃnaga. Jesub ge ǃhūbaib ai hâ i ob gere dī buruxa dīn ge gere ǁgau, taenab hoa ǃhūbaib ǂhawase nî dīsa. ǁÎb a Elob Gaosib di ǀhomsi gao-ao amaga. w23.04 3 ¶5-7

Sadu di ǀhaohâb ga ǂgui ǃgâsana ūhâ, o du ge ǀnîsi sadu ǃommi mûhe tama khami a tsâ ǁkhā. Tsîts ge ǀnîsi nî ǃâitsâhe tsî nî dītsâ ǀû ǂgao, xawe tā ǀûsen ǃereamsa māsa. Mâ ǀhaos hoas ǃaroma ǂgui ǃereamde aiǂhomi. Xawe du ga ǁkhāǁkhāǃâs tsoatsoas ǃnâ ǁhûihe tama io ǃereamsa mās ǃaroma, o du ge noxopa ǂgui ǃēde nî hō ǀhaos ra aiǃgû khami. ǃKhē xu ǂgō-omma du ra aiǂhomi khami, mâ xoaǀgoras hoas mati xoaǂams ǀkha ra ǃgûǀhao ǀgauba ǂâi re. ǁNāsa du ga dī, o du ge hoa ǁkhāǁkhāǃâs ǃnâ ǃēde nî hō ǃgâi ǃereamsa mās ǃaroma. ǁNās xōǀkhā du ge ǀnîsi a aiǂhumisen ǁkhā î du ǃgam xūna ra ǃhoaǃgao xoaǀgoradi ai ǃeream ǁkhā, hîna ǁguiǃās ǃaroma a ǃgomro ǁkhāga. Tae-i ǃaroma? ǀNîsi i ǀoro khoena ǁnā ǃâb ai nî ǃeream ǂgao amaga. ǀNî ǀhaodi khaoǃgâ du ga ǃereams ǃēsa hō tama ga ī, o du tae-e a dī ǁkhā? ǁNā ǃâba ra dī ǃgâsaba du ge ǀhaos aiǃâ, ǃeream ǂgao du ra dîs xa a mîba ǁkhā. w23.04 21-22 ¶9-10

Josefi ge māsenxase Jehovab di daoǁgausa ge sao. Tsîb ge ǁîba ǁnās xa ge ǃgâi ao-i. ǁÎb ge ǃnona ǃnādi kōse ǁîb omaris ǃaroma daoǁgaude, Eloba xu ge hō. ǃNās hoasab ge ǁîba ǃkhaese gere ǁnâuǀnam nēs ge ǁîba ǃgomba i xawe. (Mat. 1:20; 2:​13-15, 19-21) Elob daoǁgaude saos ǃnâ-ūb ge Josefa, Mariasa mâxōǀkhā tsî ǁîs ǂhâsiga ge kōǃgâ. ǂÂis ǀguisa di re matikōses ge Mariasa, Josefa ǀnam tsî ǃgôasiba ǁgausa ǁîb gere dībasi xūn ǃaroma. Aogu tsîn ge Josefa ǁgae tsî Elobmîs ai ǃgaoǃgaosa ǀapemāde nî ôa, ǁîgu omaride kōǃgâs tawa ī ga hā o. ǀKharaǀkharana dīs ga ǂhâbasa xawe go ga nē ǀapemāsa sîsenū tsî sago tarasa ǀnamma ǁgau o. Ob ge saro ǃgammeba nî ǀgai. ǃGâsas Vanuatub ǃnâ ra hâs hîna 20 kurigu xa ǃnāsase ǃgamme hâs ge ra mî: “Ti aob ga Jehovab daoǁgausa ôa tsî sîsenū, o î ge ǁîba da ūba hâ ǃgôasiba ra kai. Nēs ge kaise ǁkhaubahe ta hâ khami ra tsâkaite. Tsî ta ge ǁîb mîǁguigu ǃnâ ǂgomǃgâsiba ūhâ.” w23.05 21 ¶5

Babilonsa xu ge oa Jodeǁîn ge ga ‘ǃanu khoe’ ha Elob ǃaroma. (Deu. 7:6) ǁNās ge ge ǂâibasen tama ha i Jodeǁîn ǀkharaǀkharana dī dītesa în Jehovaba ǂkhîǂkhî. ǃNāsa Jodeǁîna Babilons ǃnâ ge ǃnaehen ge ǀnîna Babilons ǃnâ î ge xūna gere dīhe ǀgaub tsî khoen di ǂâiǀgaub tsîna ge ǁnaedi. ǃNani kuriga ǃkharu tsîn ge ǂguro Jodeǁîna oa toas khaoǃgâb ge Nehemiab ge buru ǁnâub ge o, Israeli ǃnâ ge ǃnaehe ǀgôan ge noxopa Jodeǁîn di gowaba ǃhoa tama hâ isa. (Deu. 6:​6, 7; Neh. 13:​23, 24) ǁNā ǂkham ǀgôana mati Jehovaba ga ǃoaba hâ, Hebreǁî gowaban ǁnâuǃā tama hâ hîna? (Esr. 10:​3, 44) ǁNā Jodeǁîn ge kai ǀkharaǀkharana ga dī hâ. Xawe î ge ga supu hâ Isreali ǃnâ ǁnā ǀkharaǀkharana dīsa, ama ǃoabas gere hau-oahe ǃās ǃnâ.—Neh. 8:​8, 9. w23.05 15 ¶6-7

Tsûtsûsase matikōse da ga turaba ūhâ tsî xū-e ga dī ǂgao xawe da ge noxopa ǃgomsiba a hōǃâ ǁkhā. Aiǁgause, ǃâubasen tama da hâ “mâsib” ge sida ǁaeb hîna da mîǁguib ai nî sîsenna a ū ǁkhā. (Aoǁn. 9:11) ǂKhabuǂâi kai da ǁkhā a ǃgomsiba da ge a hōǃâ ǁkhā. Tsî da ge nēs xa ǀgaioǃnâse nî tsâ. (ǂKhm. 24:10) ǀOasa kurusa da ūhâ tama hâ amaga, da ge a dīsā ǁkhā. Tsîs ge nēsa a ǃaroma ǁkhā, î da sida mîǁguiba tā sīǃnâ. (Rom. 7:23) Tamas ka io da ge tsau hâse ǀgui a tsâ ǁkhā. (Mat. 26:43) ǃGom tsēsa da ga hōǃâ, o tae-e a hui da ǁkhā? ǂÂis ǃnâ ūhâ re, mîǁguiba du ga sīǃnâ tama i, os ge ǁnāsa ǂâibasen tama î da ǀûsen. Elobmîs ge ra mî, ǁaeb xu ǁaeb ǀkha da ǃgomsiga nî hōǃâsa. Xawes ge ǃgāsa kais tsîna ra di, Jehovab huib ǀkha da a khâimâ ǁkhāsa. ǃGomsina du ga hōǃâ xawe du ga aiǃgû o, o du ge ra ǁgau Jehovaba du ra ǂkhîǂkhî ǂgaosa. Jehovab ge kaise ra ǂkhî, mûb ga o dītsâ da rasa sida di mîǁguiba sīǃnâsa. w23.05 30 ¶14-15

Aimâba-aose sîsens ge ǂkham khoeba a hui ǁkhā, îb ǁkhāǁkhāsen matib ǃkharagaǃnâgu khoen ǀkha nî sîsenǀhao ǀgausa. Tsîb ge ra ǁkhāǁkhāsen matib mari-e nî sîsenū ǀgausa. (Fil. 4:​11-13) ǀOasase ǃoabas di mîǁguibats ga ūhâ, ots ge ǂgurose huiǃnâ ra aimâba-aose a sîsen ǁkhā. Nēs ge nî huitsi its aimâba-aose sîsens ǃaroma aiǂhumisen. Aimâba-aosets ga ǃoaba tsoatsoa, ots ge ǂgui ǃēde ūhâ ǀnî hâ ǀgaugu ǃnâs tsîna Jehovaba ǃoabasa. Aiǁgause oms sîsengu, ǂnûiǃkhuni bēros, tamas ka io Betels tawa. Hoa Xristeǁî ǃgâsagu ge nî dītsâ ǀhaohâb hui-aob, tamas ka io ǀhaohâb ǃûi-aob ǂgaoǀkhāde sīǃnâsa. Elobmîs ge ra mî khoegu hîna ǃereamde ra ǂhâba gu ge, nē “ǃereamsa ra tura.” (1Tim. 3:1) ǃGâsab ge ǂgurose, ǀhaohâb hui-aob ase nî ǁgaumâihe. ǀHaohâb hui-aogu ge ǃûi-aoga ǂgui ǀgaugu ǃnâ ra hui. ǀHaohâb ǃûi-aogu tsî hui-aogu tsîn ge ǃgamǃgamsenxasib ǀkha, ǃgâsana ra hui tsî ǁkhoaǂgaoxases tsîna aoǁnâ sîsenni ǃnâ ra ǁhao. w23.12 28 ¶14-16

Gao-aob Josiab ge 16 kurixab a hîna Jehovaba ge ôa tsoatsoa. ǁÎb ge Jehovab xa ǁkhāǁkhāsen tsî ǁîb ǂâisa gere dī ǂgao. Xaweb ge ǂkham gao-aob ase ûiba ge supu tama hâ i. ǁNā ǁaeb ain ge ǃnāsa khoena ama tama Eloga gere ǃoaba. ǁNā-amagab ge Josiaba ǁkhoaǂgaosiba ge ǂhâ hâ-i, îb ama tama ǃoabate ǀam kai. Tsîb ge ǁnāsa ǁkhoaǂgaose ge dī. ǁÎb ge 20 kurixab nîs aiǃâ ǃhaode xu ama tama ǃoabade ge ūbē tsoatsoa. (2Kro. 34:​1, 2) Kaisets ga ǂkham xawets ge a mîǁgui ǁkhā îts Josiab aiǁgausa ǁgae tsî Jehovaba ôa. Tsî ǃnāsase Jehovab tsî ǁîb di ǀgaugu xa ǁkhāǁkhāsen. Nēsats ga dī, ots ge nî māǁnâsen. Nē māǁnâsensa, sa ûib ǃnâ mâ ǂâibasensa nî ūhâ? Lukab 14 kurixab a hîna ge ǁāǁnâheb ge ra mî: “Nēsisa xu ta ge Jehovaba ǃoabasa ti ûib ǃnâ ǂgurose nî mâi. Tsî ta ge nî dītsâ ǁîba ǂkhîǂkhîsa.” (Mrk. 12:30) Kai ǀkhaeb ase ge nî ība tsi sats tsîn ga ǁkhā turaba ūhâ o. w23.09 11 ¶12-13

Apostel Paulub ge nē sîǂkhanisa xoa, ob ge Tesalonikaǁîn di ǀhaohâba kurib ǀguiba ge hâ i. Tsî ǁnās ǀkha î ge ǁgaumâihe hâ ǃgâsaga ǂansa ge ūhâ tama hâ i tsî gere dīsā. Xawe gu ge ǃgôahesa ge anu hâ i. Kai ǁgâiǀāb ra hā khami da ge sida ǀhaohâb ǃûi-aogu daoǁgausa nēsi da ǂhâhâs xa ǃnāsase nî ǂhâ. ǀNîsi da ge dana bēros tsî ǁnâub berosa xus tsîna daoǁgaude hō tide. ǁNā-amaga î ge ǂhâǂhâsa, nēsi ǀnai ǀhaohâb ǃûi-aoga ǁnâuǀnam tsî ǃgôaǃgâsa. Mâsib ga mati ī xawe a da ǃgāsase hâ ǀgara tsî tā ǁîgu ǂkhabusasigu ai sida ǂâisa ǂnûi. Xawe a da ǂâis ǃnâ ūhâ re Jehovab, Xristub ǃnâ-ū nē ǂgomǂgomsa khoega ra sîsenūsa. Toroǀgapas soldab di danasa ra ǁkhauba khami, î ge sida ǃâubasensa sida ǂâiǀgauba ra ǁkhauba. ǀGaisa ǃâubasens ǀkha da ge ra mûǂan, nē ǃhūbaib a mā ǁkhā xūn hoan ǁgais ǀguisa īsa. (Fil. 3:8) ǃÂubasens ge ra hui da, î da ǃnomsase tsî aiǂhomisen hâse hâ. w23.06 11-12 ¶11-12

ǁNān hîna ‘gâre khoes’ di ǁkhauǂuis xa ra ǁnâun ge nî ǁhûi, nē ǁkhauǂuisan ra ūǃoa tamas ka io ūǃoa tama hâsa. Kaise ǃgâi ǃaroma di ge hâ, î da ǂhanu tama hâ ǁgoe-ūguba xu ǂgōsen. ‘Gâre khaikhoes’ ge ra ǁguiǃāhe nētis ra mîse: “ǃNarihe hâ ǁgam-i ge ra ǁkhoa.” (ǂKhm. 9:17) “ǃNarihe hâ ǁgamna” a tae? Elobmîs ge ǃgamme hâ khoe-aogu ra di ǁgoe-ūguba, khoakhoa ra ǁgammi ǀkha ra ǀgopeǀnō. (ǂKhm. 5:​15-18) ǃGamme hâ khoe-aogu ra ge Elobmîs ǃoagu mā-amhe hâ î ra sorosi ǁgoe-ūguba xu ǃgâiba hō. ǁNā î ge “ǃnarisa ǁgamme” xu a ǀkhara, hîna ǃgâi tama hâ ǁgoe-ūguba ǃoa ra ǁnaeǁgauba. ǁNān hîna ǃgâi tama hâ ǁgoe-ūgu ǀgaugu ǃnâ ra ǃân ge ra sâu, ǃnari-aob hîna ǃnarib go xūna ra sâub khami. ǁNā ‘ǃnarisa ǁgammi’ ge kaise ǂhense ra ǁkhoa, ǁnân hîna nēn ǃnâ ǃâ-e ūhân ǃaroma. ǁÎn ra ǂâi xui-ao, khoen tae-en go dīsa ǂanǂuihō tidesa. Kaise tsûtsû gāxaǃnâ ǂâi ǀgaub ge ǁnāpa, Jehovab ge hoana ra mû. Tsî ǁîb di ǀhōsagusisa ǂoaǃnâs ge kaisa a au. ǁNā î ge tātse ǂhen tamas ka io “ǁkhoaxa” tama hâ.—1Kor. 6:​9, 10. w23.06 22 ¶7-9

Tae-e du nî dī ǂgaoba xu du ra ǀgore ǃkhaisa du ga hōǃâ tama io? Tamas ka io du ga ǃgâiǃgâibasensa aoǁnâ sîsenni ǃnâ hōǃâ tama io ǂguro du gere hōǃâs xa? Nē mâsiga du ga ǁāǁnâs khaoǃgâ hōǃâ, o tā ǂâi re Jehovab gagaba du go ǂoaǃnâ ti. ǀOasa kurusa du ūhâ tama amaga i ge sadu tsâsiga ǁaeba xu ǁaeb ǀkha a ǀkhara ǁkhā. Sadu turaxasib ga ǂkhabu tsoatsoa, o apostel Paulub aiǁgaus xa ǂâi re. Jesub aiǁgausab gere sao ǂgao xaweb ge Pauluba ge ǂan i, ǁaen aib ǂhâb hâ ǀgaisa turaba ūhâ tidesa îb ǁnāsa dī. Paulub ge ǁaposase ge mîǁgui hâ i, îb aoǁnâ sîsen-e dīǀoaǀoa. Mati ǀguib ga ǁnā ǁaeb ai tsâ xawes tsîna. ǁNās ǁkhās khami du ge tā mîǁguiga nî dī tsâ du ra ǀgaugu ai ǀgui a ǃgaoǃgaosa ga. Mîǁgui re ǂhanu xū-e du nî dīsa mati ǀgui du ga tsâ xawes tsîna. ǂHanu xūna du ra dī ǀgara khami i ge ǁaeb ra ǃkharu khami sadu ra tsâ ǀgaub tsîna a dawa ǁkhā.—1Kor. 9:16 w24.03 11-12 ¶12-13

Sida tsîn ge sida ǃgâsana ǀnamma a ǁgau ǁkhā. ǁÎn ǀkha ǀhōsagusisa omkhâis ǃnâ-ū. Tsîn ge ǁîn tsîna sida ǀnamma nî ǁgau. (2Kor. 6:​11-13) ǂGui da âda ge ǀhaohâgu ǃnâ hâ, hîna ǃkharagagu khaoǃhūgu tsî ǀgaugu tsîna ūhâ ǃgâsan hâ ǃnâb ǃnâ. ǁÎna da ūba hâ ǀnamma da ge a ǀgaiǀgai ǁkhā, ǁîn di ǃgâi ǀgaugu ai ǂâisa ǂnûis ǃnâ-ū. Jehovab ǁîna ra mû khami da ga ǁîna mû. O da ge ra ǁgau sida ǁîna a ǀnamsa. Kai ǁgâiǀāb ga tsoatsoa o da mâpa nî ī, î da sâuhe ǁkhā. Kō re Jehovab ge tae-e ǁîb di khoena a mîbasa în dī, Babilons gere ǁnāǂamhe o: ‘Ti khoedo, sadu omdi ǃnâ ǂgâ, î dao-amde sadu ǃgâb ai ǂganam. ǁAero-e gaugausen, Jehovab ǁaib nî toas kōse.’ (Jes. 26:20) ǀNîsi da ge ǁkhā daoǁgaude kai ǂōǂōsib ǃnâ nî sao. w23.07 6-7 ¶14-16

Sado dīgu ǃnâ-ū ǁgau re ǁnâuǃāxa khoe du asa. Dîsen re: ‘Khoena ǁnâuǃāxa khoe-i ase ra mû te? Tamas ka ion khoexaǃnâ tama khoe-i ase ra mû te? Ti da ra ǂhawa xū-i ǀgui-i nî dīhesa da ra ǂgao? Tamas ka io da ǂhâbasa i ga o, naun di ǀapemâde ra ǃgâ?’ ǁNâuǃāxasiba da ga ǁgau, o da ge Jehovab tsî Jesub tsîna ra ǁgae. ǁNâuǃāxasiba da ge nî sîsen-u sida masigu ga dawa o. Nē ǀkharaǀkharan ge ǃâubasen tama da go hâ i ǃgomsina a ǃaroma ǁkhā. ǀNîsi da ge ǁkhōǁkhōsa ǀaeb mâsib tsîna a hōǃâ ǁkhā. Tamas ka io, marisi mâsigu tsî politiks ǃnâ ra ī xūn tsîn ge sida ûiǀgauba a tsâǀkhā ǁkhā. (Aoǁn. 9:11) Kaises tsîna i ge a ǃgom ǁkhā ǀapeǂhumis ga ǂgan da o. Î da Jehovaba ǀkhara ǁgaumais ǃnâ ǃoaba tamas ka io ǃās ǃnâ sī. Mâ mâsib hoab ǃnâ da ge a ǃgâiǃgâ ǁkhā, saora haka xūna da ga dī o: (1) Sadu mâsib go ǀkharasa ūǃoa re, (2) Hānîǁaeba ǃoa kō, (3) ǃgâin xa ǀgui ǂâi, tsî (4) Nauna xūna dība re. w23.07 21-22 ¶7-8

Kēbo-aob Danieli ge ge ǂkhamkhoe-i Babilonǁîn xab ge ǃkhōsisa ǃoa ūhe o, ǁîb ǁgûs ǃhūba xu. ǂKhami ge i xaweb ge Daniela Babilons di ǂamkhoega ge mâǂoaba. ǁÎgu ge ‘ǃaugab īsib ai ge kō,’ Danieli ge ‘sorosi ǃnūbisi-i’ xare-e ūhâ tama hâ isa. Tsîb ge ǂhâǂhâsa omarisa xu gere hāsa. (1Sam. 16:7) ǁNā-amaga gu ge ge ǁkhāǁkhābi îb gao-ommi ǃnâ sī ǁkhāǁkhāsen. (Dan. 1:​3, 4, 6) Jehovab ge Daniela ge ǀnam i, nē ǂkhamkhoeb tae kaib nîsa ǁhûi ǃkhais ǃaroma. Jehovab ge Danieli Noaxi tsî Jobi khami ī ti a mî, ob ge Daniela ǁaubexa 20 kurixas ǀguisa ge ī-i. Xaweb ge Jehovaba ǂkham Daniela, Noaxi tsî Jobi hîna ǁîba ǂgui kuriga ǂgomǂgomsase ge ǃoaba gu khami ǂhanu-aise gere mû. (Gen. 5:32; 6:​9, 10; Job. 42:​16, 17; Ese. 14:14) Tsîb ge Jehovaba Daniela aiǃgû tsî ǁîb di ǂhâǂhâsa ûi kurib hoab ǃnâ ge ǀnam.—Dan. 10:​11, 19. w23.08 2 ¶1-2

Omsa du ga ǁama ǂgao o du ge hoa kamerde aitsâma nî ôaǃnâ ǂgao, taen hoan hâǃnâ ǂgao du ra oms di ǃâ ǃkhaisa. ǁKhā xū-e da ge a dī ǁkhā Elobmîsa da ga khomai tsî ǁkhāǁkhāsen o. Elobmîsa du ga ǃhaese khomai, o du ge ǃgam xūna ǁkhāǁkhāsen tide tsî ‘du ge ǃgaoǃgaob Elobmîs diba ǁkhawa nî ǁkhāǁkhāhe.’ (Heb. 5:12) Oms “ǃnâ” du nî ǂgâ tsî ǃnāsase nî ǂan khami, du ge Elobmîsa ǂōrisase nî ǁkhāǁkhāsen î du ǃnāsase ǁnauǃā. ǃAmku ǀgaub Elobmîsa da a ǁkhāǁkhāsen ǁkhāb ge, mûsa matin ǃkharagagu ǃân Elobmîs dina nau ǃân ǀkha ra ǃgûǀhaosa. Dītsâ re î ǁnauǃā tae-i ǃnâ du ra ǂgomsa tsî ǁkhā ǁaeb ai ǁnauǃā re tae-i ǃaroma du nē xū-i a amasa ra ǂgomsa. Elobmîsa da ga ǀoasase ǁnauǃā ǂgao, o du ge ǀnî xūna ǃgamse nî ǁkhāǁkhāsen. Apostel Paulub ge Xrîsteǁî ǃgâsana ge ǂkhâǃnâ în Elobmîsa ǂōrisase ôaǃnâ, “în amab di ǂhaba, gāxu, ǀgapi tsî ǃgam ǃkhaisa ǃgâise ǁnâuǃā.” ǁNās ge ǁîn di ǂgomsa “ǃnomaǃkhō tsî nî ǃgaoǃgaohe.” (Efe. 3:​14-19) Sida tsîn ge ǁkhā xū-e nî dī. w23.10 18 ¶1-3

Elobmîs ge ǀkhara aiǁgaudi ǃnūǃnâxa ge i khoen din tsîna ūhâ. Kaise i ge nî ǃgâi ǁîn xa du ga ǁkhāǁkhāsen o. Aiǁgause, Davidi ge ǂkhammi a hîna gao-aose ge ǂkhauhe. Xaweb ge ǂgui kuriga ge ǃâu Israeli gao-aoseb nî ǂgaeǂguis âiǃâ. Simeonni tsî Ana hâra ge ǂgomǂgomsase Jehovaba ge ǃoaba ǀgara Mesiaba ra ǃâu hâse. (Luk. 2:​25, 36-38) ǁNāti ī ǃnaeǃkhaidi xa du ra ǁkhāǁkhāsen khami saora dîdi ǃereamde ôa re. Tae-e ǀnîsi nē khoe-e ge hui î-i ǃnūǃnâxasiba ǁgau? ǁÎ-i di ǃnūǃnâxasiba xū i ge mati ǃgâiba hō? Mati ta ǁî-e ǁgae ǁkhā? ǀNîsi du ge ǃgâib tsîna nî hō ǁnān hîna ge ǃnūǃnâxasiba ǁgau tama hâ în xa ôaǃnâs ǃnâ-ū. (1Sam. 13:​8-14) ǀNîsi du ge a dîsen ǁkhā: ‘Tae-e ge ǃaroma în nē khoena tā ǃnūǃnâxa? Tae-e ǁîn ǀkha ge ī ǃnūǃnâxa taman ge ī amaga?’ w23.08 25 ¶15

Apostel Petrub ge ge ǂgomǂgomsa i, mā-am tamab ge ge hâ i, î-i xū-e ǁkhae bi Jesuba saosa xu. Aiǁgauseb ge ǁîb ǂgomǂgomsasiba ge ǁgau, Jesub ge ǁîb ǁkhāǁkhāsabegu ǁnâuǃā tama hâ xū-e mî o. (Jhn. 6:68) ǃAroma-e ǂanǂui tamasen ge ǂgui khoena Jesuba ge sao ǀû. Xaweb ge Petruba aiǃgû tsî Jesuba ge sao. ǁÎb ge ge ǂgomǂgomsa i tsî ge mî Jesub ǀguib ge “mîdi ǀamo ûib dide ūhâo.” Jesub ge ge ǂan î, Petrub tsî nau Apostelgu ǁîba nî ǀūxusa. Xaweb ge Jesuba, Petruba ge mîba ǂgomǃgâsibab ǁîb ǃnâ ūhâsa tsîb ǀguitsē oaǀkhī tsî ǂgomǂgomsase nî hâsa. (Luk. 22:​31, 32) “Gagas ge amase a māsenxa xawes ge sorosa a ǂkhabusa” ǃkhaisab ge Jesuba gere ǁnâuǃā. (Mrk. 14:38) ǁNā-amagab ge Jesuba, Petrub nî ǀūxu bi ǃkhaisab ge ǂan-i xawe ǁîb Aposteli ǃnâ ge ǀûsen tama hâ i. ǁÎb khâis khaoǃgâb ge Jesuba Petrub dawa ge ǂkhai, ǀgurib hâ hîna. (Mrk. 16:7; Luk. 24:34; 1Kor. 15:5) Nēs ge matikōse Petruba a ǀgaiǀgais xa ǂâiǃgâ re tsûaǂgao ge hâ ība, dīb ge xū-i ǃaroma. w23.09 22 ¶9-10

Elob ge ǁnān ǁîb ǃnâ ra ǂgoman di ǁorena ǀûba tamas ka io ra ǃgū-ai. (Psa. 32:​1, 2) ǁÎb ge ǁnā khoena ǁîn ǂgoms ǃgao, ǁore-o tamas ka io ǂhanu-aise ra mû. Abrahammi, Davidi tsî nau ǂgomǂgomsa ǃoaba-aon ge Elob xa ǂhanu-aise gere mûhe xawen ge noxopa ge ǁore-ao i. Elob ge ǁîna ǁîn ǂgoms ǃgao, ǁore-o khoen ase gere mû, ǃgōsase ǁîba ǃoaba tama khoen ǀkhab gere ǀgopeǀnō o. (Efe. 2:12) Romeǁîna ǃoab ge xoa sîǂkhanis ǃnâb ge apostel Pauluba ge ǁguiǃā, Elob ǀhōsa kai ǂgao da ga o da ǂgomsa nî ūhâsa. Tsî Davidi tsîn ge ge Elob ǀhōsa-i ǁîb ge ǂgomsa ūhâ-i amaga. Sida tsîn ge a Elob ǀhōsa kai ǁkhā, ǂgomsa da ga ūhâ o. w23.12 3 ¶6-7

Nētsēn ge hoa Xristeǁîna aiǂhanuba ūhâ, Jehovaba ǁguibana dībasa. ǁÎn ǁaeb, ǀgaib tsî ūn hâ xūna sîsenūsa în Elob Gaosiba ǂkhâǃnâ. Jehovaba da ge ǁgau ǁkhā, aiǂhanub ǁîba ǃoaba tsî koas diba da ra ǃgôaǃgâ ǃkhaisa sida ǁkhāsib ǃnâ hâ-i hoa-e da ga ǁîba ǃoabas ǃnâ dī o. Apostel Paulub ge ǀnî xūn hîna da tātsē Jehovab ǃoabas ǃnâ ǁnāxuǃnâ ǁoana ge mî. (Heb. 10:​22-25) Nē xūn ge hoaǁae Jehovaba ǃoa ǀgores, nauna aoǁnâbas, ǀhaohâb ase ǀhao tsî ǂkhâǃnâgus tsîna ǃkhōǂgā hâ. Jehovab “tsēs ra ǀgū ǃkhaisa” da ra mû xui-ao. ǂHaiǂhais ǀams ǃoagub ge Jehovab ǀhomǃgāba nē xū-e ǀgomǀgomǃgaos ǃaroma ǀgam ǃnāra ra mî: “Eloba ǀgoreǀî!” (J.ǂHa. 19:10; 22:9) Tā da nē Elobmîs ǃgam amab Jehovab gagasi tempeli tsî ǀō-aisa ǀhōsagusis sida kai Eloba ǃoabas dib hîna da go ǁkhāǁkhāsena ǀuru! w23.10 29 ¶17-18

Hoa da ge aiǃgû tsî ra “ǀnamgu” ǂgao. Xawe i ge a ǂhâǂhâsa î da ǂâis ǃnâ ūhâ, Jesub ge mîsa ‘ǂgui khoen di ǀnammi ge nî ǃkhai.’ (Mat. 24:12) Jesub ge ge ǂâibasen tama hâ i, ǁîb di ǁkhāǁkhāsaben nî ǀnamgu ǀûsa. Xawe da ge ǂōrisase ǂkhaikhari nî hâ, î da tā ǃhūbaib khoen di ǀnamoǃnâ ǀgaugu xa ǂgaeǂkhapuhe. Nēs nauna da ra hâ-ū ǀgauba ra tsâǀkhā amaga. ǁNāsa ǂâis ǃnâ ūhâse, hā re î da saora ǂhâǂhâsa dîsa ǃhoaǃgao: Tae-e a huida ǁkhā, î da ǂan sida ǃgâsana da ūba hâ ǀnammi a ǀgaisasa? ǀGui ǀgaub hîna da a kō ǁkhāb matikōse i sida ǀnamma ǀgaisab ge, ûib mâsiga da ra sîsenǂam ǀgauba. (2Kor. 8:8) Nē mâsib xab ge apostel Petruba saorase ge xoa: “Î hoan ǂamai ǀaexase ǀnamgu, ǀnammi ra ǂgui ǁorena ǃgū-ai xuige.” (1Pet. 4:8) ǁNās ǀkha î ge naun di ǂkhabusasiga, sida ǀnamma a ǃâitsâ ǁkhā. w23.11 10-11 ¶12-13

Jesub di mîmāsa da ge ǁnâuǀnam tama hâ, ǀnî khoen ǀguina da ga ǀnamma ǀgau o. Ama i ge Jesub khami da ge ǀnîn ǀgūse a tsâǁkhā. (Jhn. 13:23; 20:2) Xawe apostel Petrub ge ra hōhōǃnâ da î da hoa “ǂgomsabena ǀnam”, sida omaris ǃân a amaga. (1Pet. 2:17) Petrub ge ge ǀkhoma da, î da “ǂgaoba xu ǀaexase ǀnamgu.” (1Pet. 1:22) Nē xoas ǃnâ-i “ǀaexase” ǀnam ti ra mîhe, o î ge ra ǂâibasen î da khoe-e ǀnamma ǁgau kaise î ga ǃgom xawe. Aiǁgause, ǃgâsa-i ga kaise a tsûtsûda o da mati nî dī? Khoe-i ase da ge ra dīǃoa ǂgao, ǁî-e ǀnamma ǁgaus xa. Xaweb ge Petruba Jesuba ge ǁgae, dīǃoas Eloba ǂkhîǂkhî tama ǃkhais ǃaroma. (Jhn. 18:​10, 11) Petrub ge ge xoa: “Tā ǂkhaba-e ǂkhaba-i ama mādawa . . . î du ǁnās ǃoagu ǀkhae.” (1Pet. 3:9) ǀAexa ǀnamma du ga ūhâ, o du ge nî khoexaǃnâ tsî nî ǂâiǃgâ. w23.09 28-29 ¶9-11

Kaise i ge a buruburuxa ǀgôa-i ra kaikhoe kai ǀgauba mûsa. Nē kaisis ge aitsamaba xu hâ. Xawe Jesub aiǁgausa ra sao Xristeǁî kai ǂgao da ga, o da ge ǁguiǂgāsen tsî xū-e nī dī. (1Kor. 13:​11, Heb. 6:1) ǁNā mîǁguiba sīǃnâs ǃaroma da ge Jehovab ǀkha ǀgū ǀhōsagusisa nî ūhâ. ǁÎb ǃanu gagab tsîna da ge ǂhâhâ îb hui da î da ǁîba nî ǂkhîǂkhî ǀgauga omkhâi. Tsî aiǂhumisen hānîǁaeb ǃnâ da nî ūhâ ǃereamdi ǃaroma. (ǂKhm. 1:5) Jehovab ge khoena aore tamas ka io tarese ge kuru. (Gen. 1:27) Supu i ge a mûǃāsa aorekhoegu tsî tarekhoedi tsîn ǃkharagaguse kurusa ǃkhaisa. Xawen ge ǀkhara ǀgaugu ǃnâs tsîna ǃkharagagusiba ūhâ. Aiǁgause, Jehovab ge aob tsî taras tsîna ge kuru i-ī mâ-i hoa-e ǁî-i ǃâba dīǀoaǀoa. ǁNā-amagan ge ǀgaugu tsî ǂans tsîna ǂhâhâ hîna nî hui nîna ǁîn ǃâga dīsa.—Gen. 2:18. w23.12 18 ¶1-2

Jesuba ge ǂhâba hâ i, în naun tsîna ǁîb ǁGûb ǀonsa sîsenū? Amase. ǀNî ǂgomdi ǂgaeǂgui-aon ge ra ǂgom Elob ǀonsa sîsenūs ǃgôasiba ǁgau tamasa. Jesub ge ge mā-am tama hâ i, Elobmîs ai ǃgaoǃgaosa tama ǃhaoǃnâsi ǁnaetiga ǁîb ǁGûb ǀonsa sîsenūsa xu ǁkhae bisa. ǃGaoǃgâ re Jesub ge “ǂkhaba gaga-i xa hâǃnâhe” hâ khoeba Geraseǁîn ǃhūb ǃnâ ǂgauǂgau ǁaeba. Khoen ge ǃaob xa Jesuba ge ǀkhoma îb ǁnā ǀkhariba xu ī. (Mrk. 5:​16, 17) Xaweb ge Jesuba noxopa ge ǂhâba hâ i Jehovab ǀons ǁnāpa nî ǂanhe ǃkhaisa. ǂGauǂgaub ge aobab ge ge mîba îb tā ǁîb ge dī xū-i xa ǃhoa xawe Jehovab ge dī xū-e khoena mîba. (Mrk. 5:19) Jesub tsîn ge sida nētsē ǁîb ǁGûb ǀonsa nî ǂanǂan ǃkhaisa ra ǂhâba. (Mat. 24:14; 28:20) Sada ǃâba da ga dī, o da ge sada Gao-aob Jesuba ra ǂkhîǂkhî. w24.02 10 ¶10

Amase da ge ǀkhaehe hâ ǃgomǁaegu ǃnâ Jehovab ǀapeǂhumis di ǃâ da asa, nē ǀuniga tsēdi ǃnâ. Ûib ge nē ǃhūbaib ǃnâ kaise a ǃgom. Xaweb ge Jehovaba sada ǃgâsana māda hâ în hui da. (Psa. 133:1) ǁÎb ge ra hui da î da ǀgaisa omarise hâ. (Efe. 5:33–6:1) Tsîb ge ǂhâ da hâ gā-aisiba ra mā da, î da ǂâiǂhansende tani ǁkhā tsî ǂkhîba ūhâ. ǃGarise da ge nî sîsen tsî Jehovaba ǂgomǂgomsase nî ǃoaba ǀgara. Tae-i ǃaroma? ǀNî ǁaegu ai da ge naun ǃnūbusigu xa a tsâǀkhāhe ǁkhā. Sada ǃnūbusigu xas tsîna da ge a ǃgombahe ǁkhā, ǃgōsase ǃnās hoasa da ga dīsā o. Jehovab ǃoabas ǃnâ mâǀgaisa da ge ǂhâhâ (1) ǃgâsa-i ga tsûtsû da o, (2) ǃgamme du hâ khoe-i ga ǂkhabuǂâi kai da o tsî (3) aitsama da ga sada dīsan xa ǂkhabuǂâi o. w24.03 14 ¶1-2

ǁAeba xu ǁaeb ǀkha du ge nî ǁnâu ǃgâsan ge mati Jehovab ǃoabas ǃnâ ǁîn di sîsen-e a khoraǂui ǀgausa. ǀNîsin ge Gaosib aoǁnâ-aon skola ǃoa ge ǁkhauǂuihe tamas ka io kai ǂhâsib hâ ǃkhai-e ǃoa ge doe. Sadu mâsigu ga mā-am du, os ge nēsa a ǃgâi mîǁgui. Jehovab ǃoaba-aon ge turaxa tsî ǀgauna ra ôa în ǁîn ǃoabasa khoraǂui ǁkhā. (ǃNǃkh. 16:9) Tae-e du nî dī sadu mâsigu ga nēsi ǁnāsa mā-am tama io? Tā ǂkhari ǂâi tsî ǁnān ǁkhā an ǀkha ǀgopeǀnōsen. ǂHâǂhâsa i ge a, i du hoaǁae mâǀgai. (Mat. 10:22) Tā du ge nî ǀuru Jehovaba du ra ǂkhîǂkhîsa, sadu ǁkhāsib ǃnâ hân hoana du ra dī o ǁîba ǃoabas ǃnâ. ǁNāb ge ǀō-aisa ǀgaub hîna du Jesuba a sao ǀgara ǁkhāba, ǁāǁnâs khaoǃgâ.—Psa. 26:1. w24.03 10 ¶11

ǃHobasen da ga ob ge sida ǀhomsi ǁGûba ra mîmâi ǀûba dab nîsa. (Psa. 86:5) Amase da ga dī da go ǁoren ǃgao ǃhobasen, o da ge ǂgomǃgâsiba ūhâ ǁkhā Jehovab go hoase ǀûba dasa. ǂÂis ǃnâ ūhâ re Jehovab ge kaise ǁnâuǃāxa. ǁÎb ge tātsē sida ǁkhāsib ǂam-ai hâ xū-e ǂgan da tama. ǁKhā da a-e da ra dīsab ge kaise ra ǃgôaǃgâ. Elobmîs aiǁgaude kō re matin khoena ǁîba ǂgomǂgomsase gere ǃoabasa. Aiǁgause apostel Paulub xa ǂâi re. ǁÎb ge ǃgarise aoǁnâ sîsenni ǃnâ gere sîsen tsî ǂgui ǀasa ǀhaohâgu tsîna ge tsoatsoa. Xūn ge ǁîb ûib ǃnâ a dawa tsîb ge ǁkhāb a-e aoǁnâ sîsenni ǃnâ dī tama i, o i gere ǂâibasen Jehovab ge ǁîba ūǃoa tama isa? Hî-î, tātsēs tsîna. ǁÎb ge aiǃgû tsî ǁkhāb a-e ge dī tsîb ge Jehovaba ǁîba ge ǀkhae. (ǃNǃkh. 28:​30, 31) ǁNās ǁkhās khami i ge Jehovaba da ra dība xūna ǁaeb ra ī khami ǀkhara ǁkhā. Xawe Jehovaba a ǂhâǂhâsabas ge ǁkhā da-e dīsa. w24.03 27 ¶7, 9

Jehovaba ǃoa ǀgores ǃnâ-ūb ge Jesuba ǁîb di ǁkhāǁkhāsabega aiǁgau-e ge mā ǁgaegu nîse. ǁÎb di aoǁnâ sîsenni ǃnâb ge Jesuba, hoaǁae gere ǀgore. ǁAebab ge ǀgores ǃaroma ga mâiǂui hâ, ǃnāsa ǁaebab ge khoen ǀkha hâ i amaga. (Mrk. 6:​31, 45, 46) ǁGoagab ge anib gere ā, o gere ǂhai, îb ǁaeba ǀguri ūhâ ǁkhā ǀgores ǃaroma. ǀGui ǃnās aib ge hoa ǃuisa gere ǀgore, ǂhâǂhâsa mîǁguibab nî dīs aiǃâ. (Luk. 6:​12, 13) Tsîb ge Jesuba ǀgore hâse gere hâhâ, ǁōb nî ǃuis aiǃâ. ǁÎb ǂâisab ge ǁîb di ǃgom ǁgaumâis ai a mâi amaga. (Mat. 26:​39, 42, 44) Jesub aiǁgaus ge ra ǁkhāǁkhāda, matikōse da ga ǀhawe xawe da ge ǁaeba nî mâiǂui ǀgores ǃaroma. Jesub khami da ge sida tsîna ǁaeba nî ǁamaǂui ǀgores ǃaroma. Anib ās ai khâimas tamas ka io ǃûia. ǁNāti da ga dī, o da ge Jehovaba ra ǁgau nē ǀō-aisa ǀkhaeba da ra ǃgôaǃgâsa. w23.05 3 ¶4-5

“ǁHōǂûihe” ti hâ mîs ǀgapiga hâsa ǃgaoǃgâ re. ǀGui Elobmîs ge ǀaus ǁgammi ra ǂoa khami ī di ge ǁguiǃāhe. Nē aiǁgaus ge amabes ǃnâ ra ǁgau matikōseb Jehovaba ǂkhauhesana a ǀnamsa. ǂKhauhesan tsîn ge a ǂan ǁîn “Elob ǁGûb xa ǀnamhe” ǃkhaisa. (Jud. 1) Apostel Johanneb ge saorase matin ra tsâ ǃkhâisa ge xoa: “Mû re tarebe ǀnamab ǁGûba sada ra mā ǃkhâisa Elob ôan ti da nî ǂgaihese.” (1Jhn. 3:1) Jehovaba ǂkhauhesan ǀguina a ǀnam? Hâ-â Jehovab ge hoadab a ǀnam ǃkhâisa ge ǁgau. Jehovaba mâ ǀgaub ǃnâ kaiseb ǀnamda ǃkhâisa ge ǁgau? ǁNās ge xoremarib ǃnâ-ūsa. Nēs ǃnâ-ūb ge Jehovaba ge ǁgau, ǃnāsaseb a ǀnam da ǃkhâisa.—Jhn. 3:16; Rom. 5:8. w24.01 28 ¶9-10

ǃAob tsâsigab ge Davida a dansas ge ǀgapiga hâ xoasa ra ǁgau. ǁÎb ûib ge ǃaoǃaosa mâsib ǃnâ hâ i xaweb ge Jehovab tae-e hānîǁaeb ǃnâ nî dība bis xa gere ǂâiǃgâ. Davidi ge ge ǂan i Jehovab ǂhanu ǁaeb ai nî ǁkhaubabi ǃkhaisa. Jehovab ge ge mîmâi hâ i Davidi sao rase nî Israel di Gao-ao kai ǃkhaisa. (1Sam. 16:​1, 13) Davidi ge ge ǂan i Jehovab ra mîmâi xū-i hoa-i nî ama ī ǃkhaisa. Jehovaba tae-eb nî dīsa ge mîmâiba du? Hoa ǃgomsina xub nî ǁkhauba da ǃkhaisa da ge ǃâubasen tama. ǂÂis ǃnâ ūhâ re Jehovab ge nē ǃhūbaib ǃnâ da ra hōǃâ ǃgomsin hoana ǀasa ǃhūbaib ǃnâ nî ūbē. (Jes. 25:​7-9) Sida Kuru-aob ge ǀgaisa tsî ǁōhâna khâisa mā, ǂgauǂgau da tsî mâǃoa da ra khoen hoana nî hîkākā.—1Jhn. 4:4. w24.01 6 ¶12-13

Sadu māǁnâsens tsî ǁāǁnâs tsîn xa ǂâi re. Māǁnâsen tsî du ge ǁāǁnâ kaisen, o du ge ge ǁgau Jehovab ǀkhāb ai du mâsa. ǂÂi-oa re tae-i ge hui du sa î du ǂgom, amaba du ge hōsa. Jehovaba du ge ge ǂan tsoatsoa tsî î ge ǁîba du ūba hâ ǃgôasiba ge kai. Tsî du ge ǁîba sadu ǀnamxaǃnâ ǁgûb ase ge ǀnam tsoatsoa. ǂGomsa du ge ge omkhâi tsî ge ǂkhâǃnâhe î du ǃhausen. Sadu ǂgaob ge ge ǂkhâǃnâ du, î du Elob ǂâis ǀkha ǃgûǀhao tama hâ ǁnaetiga ǁnāxu. ǃGâise du ge ge tsâ Elob ǀûbaba du ge hôǃâ o. (Psa. 32:​1, 2) ǀHaode hâǃnâ tsî du ge ǁkhāǁkhāsen du ra xūna naun ǀkha ge ǀgoragu tsoatsoa. Māǁnâsen tsî ǁāǁnâhe hâ Xristeǁî-i ase du ge nēsi ûib di daob ai ra ǃgû. Tsî du ge ǂgomǃgâsiba ūhâ ǁîba du tātsēs tsîna ǂoaǃnâ tidesa. (Mat. 7:​13, 14) ǁKhā ǀgaub ǃnâ da ga sada ǀgaisa ǂgomsa Jehovab ǃnâ ga ūhâ, o da ge sida tsîna nî mâǀgai ǁkhā. w23.07 17 ¶14; 19 ¶19

Sadu māǁnâsens ǀgores Jehovab ǃoagu du ge dīs xa du ga ǂâiǃgâ, o du ge ǀgaiba nî hō mâ ǃâitsâ-i hoa-e mâǃoasa. Aiǁgause, ǀnî hâ khoe-i aob tamas ka io tarasa du nî dî-am? Amase ī tide. ǀNai du ge Jehovab ǃoagu ge mîmâi ǁnāti ī xū-e du tātsēs tsîna dī tidesa. ǃGâi tama mâsiga du ga nēsi mâǃoa, o du ge ǃgombahe tide ega sī ǁnā ǃgomsiga mâǃoasa. Tsî du ge ‘eloxoresan di daoga’ xu nî ǂgō. (ǂKhm. 4:​14, 15) Jesub aiǁgaus xa ǂâi re, ǁîb ge ge mîǁgui hoaǁae Jehovaba ǂkhîǂkhîsa. Jesub khami du ge nî mîǁgui hoaǁae Jehovaba ǂkhîǂkhî tama xūna ǃkhaese tsî ǁaposase mâǃoasa. (Mat. 4:10; Jhn. 8:29) ǃGomsina hōǃâ tsî du ga ǃâitsâhe ǁaeb ai du ra dī xūn ge ra ǁgau, Jesuba du hoaǁae ra “sao” ǀgara ǂgao ǃkhaisa. Nēsa du ga dī, ob ge Jehovaba a hui du ǁkhā. w24.03 9-10 ¶8-10