ǂHanuoǃnâsib ǃoagu du tanisen ǁkhā ǀgaub

1-2. ǂGuina ǂhanuoǃnâsib ǃoagu mati ra tanisen tsî tae-e da nî ǃhoaǃgao?

ǂHANUOǃNÂ ǃhūbaib ǃnâ da ge ûi hâ. ǂGui khoen ge nētsē ǃgâi tama ǀgaub ǃnâ ra hâ-ūhe. ǁÎn ge ǃgâi tamase ra hâ-ūhe ǀgâsan a amaga, hā xūn ra ǃkhaib, mûsenan ra ǀgaub tamas ka io ǀnî hâ ǃaroma di ǃgao. ǂGui khoen ge ǃgoma ra tsâ ǃhū hâ ǁamaxū-aon tamas ka io ǂhanub ǂgaeǂgui-aon mari-e kurus xa ǀgui ra ǂâi amaga. Nēti ī ǂhanuoǃnâsigu ge ra ǃaroma î-i sida tamas ka io ǀnî hâ khoena ǃgoma tsâ.

² ǂGui khoen ge a ǂkhîoǃnâ nau khoen ǃgâi tamase ra hâ-ūhesan ra mû amaga. Hoa da ge ǃgâi ǀgaub ǃnâ hâ-ūhe tsî ǂkhîb ǃnâ ra ûi ǂgao. ǀNî khoen ge ǃhūbaib tamas ka io ǁîn ǃhūb ǃnân ra mû ǃgomsiga ra ǀam kai ǂgao. ǁÎn ge ǂhanub ǃoagu khâikhâisen tamas ka io ǁîn ǃgomsiga nî ǀam kai ti ra mîmâi ǂgaeǂgui-aona ra ǁhûi. Xawe da ge Xristeǁîn ase ra ǁkhāǁkhāhe î da tā nē ‘ǃhūbaib di ǃâ’ kai tsî Elob Gaosiba ǃâu îb hoa ǂhanuoǃnâsiba ūbē. (Jhn. 17:16) Xawe da ge ǀnî ǁaegu ai tsûaǂgao tsî ǁgaixas tsîna ra hî, nau khoen ǂhanuoǃnâse ra hâ-ūhesa da ga mûo. ǀNî ǁaegu ai da ge dîsen ǁkhā: ‘Mati ta nî ǃeream? ǂHanuoǃnâsib ǃaroma ta nēsi dī ǁkhā xū-e hâ?’ Nē dîde ǃereams ǃaroma hā re î da ǁkhāǁkhāsen, Jehovab tsî Jesub ǂhanuoǃnâsib xa ra tsâ ǀgauba.

JEHOVAB TSÎ JESUB TSÎN GE ǂHANUOǃNÂSIBA ǃHUI HÂ

3. ǂHanuoǃnâsib ǃaroma ǁaixasa tae-i ǃaroma ǁnâuǃāxa? (Jesajab 5:7)

³ Elobmîs ge ra ǁguiǃā tae-i ǃaroma da ǂhanuoǃnâsiba ǃhui hâsa. Jehovab ge ǁîba ǁgaes ǁkhāsib ǀkha kuru da amaga tsîb ge “ǂhanub tsî ǂhanu-aisiba a ǀnam.” (Psa. 33:5; Gen. 1:26) ǁÎb ge ǁgai ǀgaub ǃnâ khoena hâ-ū tama tsîb ge ǂgao tama khoen ǁgai ǀgaub ǃnâ nî hâ-ūhesa. (Deu. 32:​3, 4; Mix. 6:8; Sax. 7:9) Aiǁgause kēbo-aob Jesajab di ǁaeb ǃnâb ge Jehovaba ǂgui Israelǁîn ge nau Israelǁîn xa ǁgaise gere hâ-ūhe ǀgausa ge ǁnâu. (Khomai re Jesajab 5:7 sa.) Jehovab ge ǁîb ǂhanuba ǁnâuǀnam tama i tsî ge nauna ǁgaise gere hâ-ū khoena ge ǁkhara.—Jes. 5:​5, 13.

4. Jesuba mati ra tsâ khoe-i ga ǂhanuoǃnâsiba hōǃâo? (Ai-īsiba mû re.)

⁴ Jehovab khamib ge Jesuba ǂhanu-aisiba a ǀnam tsî ǂhanuoǃnâsiba ǃhui hâ. ǀGuitsēb ge Jesuba ǃhora ǃomsa ūhâ khoeba ge mû tsîb ge ǁnā khoeba ǀkhom tsî ge ǂuruǂuru. Xawe gu ge ǂgomdi ǂgaeǂgui-aoga nēsa mûo gu ge kaise ge ǁaixa. ǁÎgu ge gere mî Jesub ge Sabattsēs ǂhanuba gere khôasa tsî gu ge nē khoeb ge ǂgau ǃkhais ǀkha ge ǁae tama hâ i. ǁÎgu ge tanisen ǀgaub xab ge Jesuba mati gere tsâ? ǁÎb ge “ǁkhāti ǁîn di ǃgariǂgaoxasib xa kaise ge ǃoa.”—Mrk. 3:​1-6.

5. Tae-i ǃaroma da ǁaixa tide ǁgai xūn ga ī o?

⁵ Jehovab tsî Jesub tsîn ge khoen ga ǂhanuoǃnâse hâ-ūhe o ra ǁaixa. ǁNā-amaga î ge tsū tama hâ sida tsîna ǁaixasa. (Efe. 4:26) Xawe da ge sida ǁaiba nî ǃkhō-oa tsî ǂâis ǃnâ nî ūhâ ǃgomsiga da ūbē ǁoasa. Gaxuse da ga ǁaixao da ge ǂâiǂhansen tsî ǀaesen ǁkhā. (Psa. 37:​1, 8; Jak. 1:20) Tae-e da a dī ǁkhā ǂhanuoǃnâsiba da ga hōǃâo? Jesub aiǁgausa xu ta ge ǃnāsa-ē a ǁkhāǁkhāsen ǁkhā.

JESUB GE ǂHANUOǃNÂSIB ǃOAGU GERE TANISEN ǀGAUB

6. Khoena mâ ǂhanuoǃnâsiga gere hōǃâ Jesub ge ǃhūbaib ai hâ io? (Ai-īsiba mû re.)

⁶ Jesub ge ǂgui ǂhanuoǃnâsiba ǃhūbaib aib ge hâ io ge mû. ǁÎb ge ge ǂan i ǂgomdi ǂgaeǂgui-aogu ge ǂgui ǁgaraga gere ǀarosa, khoen ûiga gere ǃgomǃgom ga. (Mat. 23:​2-4) Romeǁî ǂgaeǂgui-aogu khoena ǁgaise ra hâ-ūs tsînab ge ge ǂan-i. ǂGui Jodeǁîn ge Romeǁîna xu gere ǃnora ǂgao. ǀNîn ge Romeǁîn ǃoagu ǃkhams ǃnande ge tsoatsoa. Xaweb ge Jesuba ǂhanuba ǀkharaǀkharas ǃnandi ǃnâ ge ǃâ tamas ka io nauna ge mîba tama hâ i în ǁnāti ī ǃnandi ǃnâ ǃâ. Khoen ra gao-ao kai bi ǂgao ǃkhaisab ge ǂan, ob ge ǁîna xu ge ūbēsen.—Jhn. 6:15.

7-8. ǃHubaib aib ge hâ i ob ge Jesuba tae-i ǃaroma ǂhanuoǃnâsiba ǀam kai tama hâ i? (Johaneb 18:36)

⁷ ǃHūbaib aib ge hâ i ob ge Jesuba ǂgīǂgōsi xūn ǃnâ ge ǃâ tama hâ i, ǃhūbaib aib gere mû ǃgomsiga ǀam kais ǃaroma. Tae-i ǃaroma? ǁÎb ge ge ǂan-i khoe-i ǂgaeǂguis di ǂhanub tamas ka io ǁkhāsiba ūhâ tamasa. (Psa. 146:3; Jer. 10:23) Tsî khoen ge tātsē ǃūru ǂâibasen ǂhanuoǃnâsib disa ūbē ǁoa. Nē ǃhūbaib ge ǁGâuab xa ra ǂgaeǂguihe, ǁîb ge ǃgariǂgaoxa tsîn ge ǂgui khoen ǃhūbaib ǃnâ hâna ǁîba ra ǁgae. (Jhn. 8:44; Efe. 2:2) ǀOasaoǃnâsib ge ra ǃaroma în ǃgâi khoen tsîna tā nē ǃhūbaib ǃnâ hoaǁae ǃgomsin ǃoagu ǃgâise tanisen.—Aoǁn. 7:20.

⁸ Jesub ge ge ǂan i Elob Gaosib ǀguib ǀoasase hoa ǂhanuoǃnâsiga nî ūbēsa. ǁNā-amagab ge ǁîb ǁaeb tsî ǀgaib tsîna “ǃGâiǂhôas Elob Gaosib disa” aoǁnâs ai gere sîsenū. (Luk. 8:1) Nē ǀgaub ǃnâb ge “huib ǃaroma ǁîba ra ǂgaiǀîna” ǂgomǃgâsiba ge mā nē ǃhūbaib ǃgomsin tsî ǂhanuoǃnâsib nî ǀam ǃkhaisa. (Mat. 5:6; Luk. 18:​7, 8) Khoesi ǂhanu i ge nē ǀkharaǀkharana dī tide, Elob Gaosib ‘nēpa xu hâ tama hâb’ ǀguib ge nēsa nî dī.—Khomai re Johaneb 18:36 sa.

JESUBA ǁGAE ǂHANUOǃNÂSIBA DU GA MÛO

9. Tae-e ǂgomǃgâsiba ra mā du Elob Gaosib ǀguib hoa ǂhanuoǃnâsiba nî ūbēsa?

⁹ Jesub ge ǃhūbaib aib ge hâ io a mû ǂhanuoǃnâsib xa da ge nētsē ǃnāsase ra mû. Xawe nē “ǀuni tsēdi” ǃnâ ǂhanuoǃnâsiba ra aiǃgû kaib ge ǁGâuab tsî ǀoasa kurusa ūhâ tama khoen ǁîb ǂgaeǂguis ǃnaga hâna. (2Tim. 3:​1-5, 13; J.ǂHa. 12:12) Jesub khami da ge sida tsîna a ǂan Elob Gaosib ǀguib ǂhanuoǃnâsiba ra ǃaroma ǃgomsiga ǀoasase nî ūbēsa. Elob Gaosiba da ǀoasase ra ǂkhâǃnâ amaga da ge nē ǃhūbaib di ǁgūtsâdi ǂhanuoǃnâsiba ǀariǂuis di di ǃnâ ǃâ tama. Stacya ti ǀon hâ ǃgâsas ge hōǃâ xū-e ǃgaoǃgâ re. Amabas nî ǁkhāǁkhāsens aiǃâs ge ǂhanuoǃnâsiba ūbēs di xūn ǃnâ gere ǃâ. Xawes ge ǁae i khaoǃgâ ge îganǀē tsoatsoa, dīs ra xūn khoena hui tsî ǃgomsiga ra ūbēsa. ǁÎs ge ra mî: “ǀNî ǁaegu ai ta ge gere dîsen ǂhanu xū-e ta ra ǃkhambasa. Xawe ta ge nēsi a ǂan Elob Gaosib hoa ǃgomsina nî ūbēsa. Tsî ta ge ra ǂgomǃgâ Jehovab hoa ǂhanuoǃnâsiba nî ūbēsa, tita ga ǁnāsa dī ǁoa xawe.”—Psa. 72:​1, 4.

10. Mateub 5:​43-48 ǃoa gu da tae-i ǃaroma ǂhanuga ra dawa ǂgao khoen xūn ǃnâ ǃâ tama? (Ai-īsiba mû re.)

¹⁰ ǂGui khoen ge nētsē ǂhanuba ra dawa ǂgao ǃnandi ǃnâ ra ǃâ. Xawen ge ǂguina kaise ǁaixa, ǂhanuga ǁnâuǀnamoǃnâ tsî nau khoena ra tsûtsû xūna ra dī. Jesub ge nē xūna dīsa ge ǁkhāǁkhā da tama hâ i. (Efe. 4:31) Jefrib ge ra mî: “khoen ga mâǃoa, on ge ǃkhaese ǁaixa, ǃnari, xūna hîkākā tsî nau khoen tsîna ra tsûtsû.” Xawe Jesub ge ge ǁkhāǁkhā da î da hoa khoena ǀnam sida ǀkha ǀguiti ǂâi tama tamas ka io ra mâǃoa dan tsîna. (Khomai re Mateub 5:​43-48 sa.) Xristeǁîn ase da ge ǁkhā da a-i hoa-e ra dī î da Jesub ge ǁkhāǁkhā da xūn ǃoagu ûi.

11. Tae-i ǃaroma i Jesuba ǁgaesa a ǃgom ǁkhā?

¹¹ Elob Gaosib ǂhanuoǃnâsiba ǀamose nî ūbēsa da a ǂan xawe î ge a ǃgom ǁkhā Jesuba ǁgaesa, ǂhanuoǃnâse da ga hâ-ūheo. ǀGui ǃgâsas Jania ti ǀon hâs ge sao rase gere tsâ, khoen ge ǃgâi tamase gere hâ-ūsio. ǁÎs ge ge mî: “Khoen gere mî xūn ge kaise ge tsûaǂgao kai te tsî ta ge ǁaixa tsî gere ǂhâba în ǁnā khoena ǁkharahe. Tsî ta ge ge ǂâi î da ǃhaosi ǀgoras tsî khoen ǁaegu ǀgorasa ra dī khoena ra mâǃoa ǃnansa ǂkhâǃnâ. Nēsa ta ga dīo ta ǃgâise nî tsâ, ti ta ge gere ǂâi.” Xawes ge Janiasa ge mûǂan ǁîs ǀkharaǀkharana nî dīsa. ǁÎs ge ra mî: “Jehovaba ta nî ǂgomǃgâs xa ta ge khoen ra mî xūn ǃnâ ge ǂgom tsoatsoa. ǁNā-amaga ta ge ǁnā ǃnande xu ge ǂoa tsî ǁnāti i xūn ǃnâ ge ǃâ ǀû.” ǃGâi tamase da ga hâ-ūhe tamas ka io da ga nau khoen ǃgâi tamase ra hâ-ūhesa mû, xawe da ge sida ǁaiba nî ǃkhō-oa tsî tā nē ǃhūbaib di xūn ǃnâ nî ǃâ.—Jhn. 15:19.

12. Tae-i ǃaroma da nî ǂanbasen khomai, kō tamas ka io da ra ǃgâ xūna?

¹² Tae-e a hui da ǁkhā î da ǃnomsase hâ sida tamas ka io naun ra ǂhanuoǃnâsiba hōǃâsa da ga mûo? ǂGuin ge ge huihe în ǁîn ra khomai, ǃgâ tsî kō xūna ǂanbasen. Internets ai ra mîhe xūn ge khoena ra ǃhuri kai tsîn ge ǁnās ǀkha ǂhanub ǃoagu ra khâikhâisen. ǃNāsa ǁaeba î ge ǂhôan ǃnuri-aona ǁîn ra ǂâi xūna ra mî ama xūn ose. ǁNâu da ra xūn ga ama xawe da ge īra xūna aiǃgû tsî khomais ǃnâ-ū ǁnā mâsiga ǃgâiǃgâi ǁoa. ǁNā-amaga da ga ǁnāti i ǂhôana aiǃgu tsî ǃgâ tamas ka io khomai, o da ge ǂâiǂhansen, tsûaǂgao tsî a ǁaixa ǁkhā. (ǂKhm. 24:10) ǁNās xa ǃaromahe hâse da ge Elob Gaosiba ǂgurose sida ûigu ǃnâ mâi ǀû tsî nî ǀuru Elob Gaosib ǀguib hoa ǃgomsiga nî ūbēsa.

13. Elobmîsa tsēs hoasa khomaisa mati ra hui da, khoen ǂhanuoǃnâse ra hâ-ūhesa da ga mûo?

¹³ Elobmîsa tsēs hoasa khomai tsî ǂâiǃgâs ge nî hui da, î da ǂan tae-e da nî dīsa nau khoen tamas ka io sida ǂhanuoǃnâse ra hâ-ūhesa da ga mûo. Alias ge kaise gere tsûaǂgao nau khoen ǁgaise ra hâ-ūhesas gere mûo. ǁÎs ge kaise gere ǁaixa, ǁnā ǁgai xūna ra dī khoen ge ǁkharahe tama hâ i amaga. ǁÎs ge ra mî: “Mûǂan ta ge ge Jehovab nē ǃgomsina nî ǀkharaǀkharasa ta ga ǂgom, o ta ge ti ǂâiǀgauba nî dawa. ǁNā ǁaeb ǃnâ ta ge Job 34:​22-29 sa ge khomai. ǁNā ǁaraǃādi ge ge hōhōǃnâ te, Jehovab hoa xūna ra mûsa. ǁÎb ǀguib ge a ǂan matib khoena nî ǀgoraǃgâsa tsîb mati ǃgomsina hoa khoen ǃaroma nî ǀam kaisa.” Xawe Elob Gaosib hoa ǃgomsina nî ūbē ǁaeba da ǃâu hâ hîna da tae-e nēsi a dī ǁkhā?

TAE-E DA NĒSI A DĪ ǁKHĀ?

14. Tae-e da nēsi a dī ǁkhā î da tā nē ǃhūbaib di ǂhanuoǃnâsib ai ǀaro? (Koloseǁîn 3:​10, 11)

¹⁴ Nau khoen ra hâ-ū gu ǀgauba da ge tātsē dawa ǁoa. Xawe da ge nî dītsâ î da nauna ǃgâise hâ-ū. ǁKhāǁkhāsen da go khami da ge Jesuba a ǁgae ǁkhā nauna ǀnamma ǁgaus ǃnâ-ū. ǁNā-amaga da ge ra dītsâ î da hoa khoena ǃgâise hâ-ū, ǁnan ǁgâiǀā da ran tsîna ǃkhōǂgā hâse. (Mat. 7:12; Rom. 12:17) Jehovab ge a ǂkhî hoa khoena da ga ǃgâi tsî ǀgora-e ūhâ tama ǀgaub ǃnâ hâ-ūo.—Khomai re Koloseǁîn 3:​10, 11 sa.

15. Elobmîs amaba khoena mati ra tsâǀkhā?

¹⁵ ǂHâǂhâsa ǀgaub khoena da a hui ǁkhāb ge ǁîna Jehovab xa ǁkhāǁkhāsa. Tae-i ǃaroma? Khoen ga Jehovab xa ǁkhāǁkhāsen tsî ǁîba ǂkhîǂkhî ǂgao, on ge ǀkharaǀkharana dī tsî ra ǁkhāǁkhāsen khoena ǃgâi ǀgaub ǃnâ hâ-ū tsî ǀnamma ǁgausa. (Jes. 11:​6, 7, 9) Amabab nî ǁkhāǁkhāsens aiǃâb ge Jemala ǂhanuba dawasa ra ǃkhamǃoa ǃnansa ge ǁhao, ǂhanub ǃgâi tamase ra ǂgaeǂgui khami gu gere tsâ xui-ao. ǁÎb ge ra mî: “Khoenats ge a ǁgari ǁoa în dawa. Xawen ga Elobmîsa ǁkhāǁkhāsen on ge a dawa ǁkhā. Tita ge ǁnā ǀgaub ǃnâ ǀkharaǀkharana ge dī.” Jemali ge ǁkhāǁkhāsen xūn ge ge hui bi îb ǃkham ǀû. Khoena da ga Elobmîs amaba ǁkhāǁkhā, o da ge ǁîna ra hui în khoena ra tsûtsû xūna dī ǀû.

16. Tae-i ǃaroma du khoena Elob Gaosib xa ra mîba ǂgao?

¹⁶ Jesub khami da ge khoena ra mîba Elob Gaosib ǀguib hoa ǃgomsiga ǀamose nî ūbēsa. Tsîs ǃâubasensa ǃgâise hâ-ūhe tama khoena ra ǂkhâǃnâsa. (Jer. 29:11) Ais ai da go ǃhoaǃgao ǃgâsas Stacy ti ǀon hâs ge ra mî: “Elob Gaosib hoa ǃgomsiga nî ūbēsa ta a ǂan amaga ta ge ǃnomsase a hâ ǁkhā, ǃgâi tamase ta ga hâ-ūhe tamas ka io ta ga naun ǃgâi tamase ra hâ-ūhesa mûo. Jehovab ge Elobmîsa ra sîsenū îb ǁkhaeǂgaosa mā da. Hoaǁae da ge nî aiǂhumîsa Elobmîs mîmâidi ǀkha khoena ǁkhaeǂgaosa.” Elobmîs ǃgoma tsâs xa tae-e ra mîsa da ga ǃgâise ǂan, o da ge nē ǁkhāǁkhādi ǃnâ ǂgomǃgâsiba nî ūhâ. Tsî da ge nauna a ǁkhāǁkhā ǁkhā tae-i ǃaroma da ǃgoma ra tsâsa, skoli tamas ka io sîsenni tawa. Tsî Jehovab tae-e nî dīsa nē ǃgomsiga ǀam kais ǃaroma.b

17. Jehovaba mati ra hui da î da nēsi da ra hōǃâ ǂhanuoǃnâsiba dan?

¹⁷ ǂHanuoǃnâsiba da aiǃgû tsî nî hōǃâsa da ge a ǂan, ǁGâuab nē ‘ǃhūbaib di danaǂgaeǂgui-aos’ kōse. Xawe da ge ǃgâi ǁaega ǃoa ra mûǂui Jehovab mîmâi hâ amaga nēsib nî hui dasa tsîb ǁGâuab tsî ǁîb eloxoresasib tsîna nî ūbēsa. (Jhn. 12:31) Aiǁgauseb ge Elobmîs ǃnâ ǀgui mîba da tama hâ tae-i ǃaroma i ǁnātikō ǂhanuoǃnâsiba hâsa xaweb ge ǁnās xab mati ra tsâs tsîna ra mîba da. (Psa. 34:​17-19) ǁÎb ǀGôab ǃnâ-ūb ge Jehovaba ra ǁkhāǁkhā da, mati da nēsi da ra hōǃâ ǂhanuoǃnâsib ǃoagu a tanisen ǁkhā ǀgausa. Tsî mati ǁîb Gaosiba ǀgūǁae nē ǂhanuoǃnâsiba ǀamose nî ūbēsa. (2Pet. 3:13) A da aiǃgû tsî ǃgâiǂhôas Gaosib disa ôasasib ǀkha aoǁnâ tsî ǁnā ǁaeb “ǂhanub tsî ǂhanu-aisib” tsîn nē ǃhūbaib ai nî ǀoaba ǃoa mûǂui.—Jes. 9:7.