ǀHaohâb ǃûi-aoga ǂgai

1. Jehovaba mati ra ǁgau ǁîb khoen a ǀō-aisaba bi ǃkhaisa?

JEHOVAB gūn ge ǁîba a ǀō-aisaba. Jehovab ge ǁîb ǀguise ǃnae hâ ǀgôaba ǁîn ǃaroma ge mā tsî ǀhaohâb ǃûi-aoga ge ǁgaumâi î gu ǁîna kōǃgâ. (ǃNǃkh. 20:28) Elob ge ra ǂhâba î-i ǁîb khoena khoexaǃnâse hâ-ūhe. ǀHaohâb ǃûi-aogu ge Jesub daoǁgausa ra sao î gu gūna hui în Jehovab ǀkha ǀgū ǀhōsagusisa ūhâ ǀgara.—Jes. 32:​1, 2.

2. Esegieli 34:​15, 16 ǃoagub Jehovaba ham-e ra hui?

² Jehovab ge ǁîb gūn ǀkha ǁae hâ xaweb ge ǃgōsase ǁnān hîna ǃgomsina ra hōǃâna ra hui ǂgao. Dīn ge dīsan ǃaroman ge ǀnîn hoana ǃgomsiga ra hōǃâ tsîb ge Jehovaba ǁîna ǀhaohâb ǃûi-aogu ǃnâ-ū ra hui. (Khomai re Esegieli 34:​15, 16 sa.) Mâǁae-i hoa-eb ge Jehovaba hoa da ra hui ǂgao. Jehovab ge ǂhâba tama hâ î da ǁîba ǃoa ǀgui ǀgore xawe “ǁkhāǁkhā-aose tsî . . ǁgauǃnâ-aose” ǁgaumâihe hâ ga xu huiba ǂgan.—Efe. 4:​11, 12.

3. ǀHaohâb ǃûi-aogu ǁgaumâihe hâ ǀgauba xu da mati hoa da nî ǀama?

³ Nē ǁkhāǁkhāǃâs ǃnâ da ge nî ǁkhāǁkhāsen matib Jehovaba ǀhaohâb ǃûi-aogu ǃnâ-ū gagasise ǂkhabu hâna ra hui ǀgauba. Sao ra dîde da ge nî ǃeream: Mâǁae gu ai da ǀhaohâb ǃûi-aogu ai huiba nî ǂgan? Tae-i ǃaroma da ǁnāsa nî dī? ǁÎga mati ra hui da? ǀNîsi î ge nēsi da Jehovab ǀkha ūhâ ǀhōsagusisa ǀgaisa tsî da ǀhaohâb ǃûi-aoga xu huiba ǂhâ tama ti a tsâ ǁkhāsa. Xawes ge nē ǁkhāǁkhāǃâsa nî hui da ǃgôaǃgâsiba ǁgausa Jehovab ǀhâohâb ǃûi-aoga ra sîsenū ǀgausa. Tsî tae-e da nî dīs ǀkha nî hui da, ǀhaohâb ǃûi-aoga xu da ga huiba ǂhâo.

ǀHAOHÂB ǃÛI-AOGA DA MÂǁAEGU AI NÎ “ǂGAI”?

4. Mati da a ǂan Jakobub 5:​14-16, 19, 20 gagasise ǂkhabu hâ khoe-e ǃoa ra ǁnaeǁgausa? (Ai-īsiga mû re.)

⁴ Apostel Jakobub ge ge ǁguiǃā Jehovab mati ǀhaohâb ǃûi-aogu ǃnâ-ū ra hui dasa. ǁÎb ge ge xoa: “Sada xu i ga ǀgui khoe-e ǀaeseno, a i ǀhaohâb ǃûi-aoga ǂgai.” NW. (Khomai re Jakobub 5:​14-16, 19, 20 sa.) Jakobub ge khoe-i hîna ǁî-i ǀhōsagusisa Jehovab ǀkha nî ǃgâiǃgâis xa ra ǃhoa. Jakobub ge ǀaesen hâ khoe-e ra mîba î-i ǀhaohab ǃûi-aogu ai huiba ǂgan ǀaeǃkhō-ao-i ais ose. Jakobub ge ra ǁguiǃā ǀaesen hâ khoe-i ra ǂgausa ǁî-i ǁoren ga ǀgûbaheo. ǀNî mîdi ǃnâ gagasise ǀaesen hâ khoe-e ǀaeǃkhōs ge sorosise ǀaesen hâ khoe-e ǀaeǃkhōs ǀkha a ǀgui. Sorosise da ra ǀaeseno da ge ǀaeǃkhō-aoba ra sari, tsâ da ra ǀgauba ǁîba ra mîba tsî ǁnāpaxu ǁîb daoǁgaude ra sao. ǁNās ǁkhās khami da ge gagasise da ga ǀaeseno ǀhaohâb ǃûi-aogu tawa sī tsî sida mâsiba nî ǁguiǃā tsî ǁnāpaxu māhe da ra daoǁgausa nî sîsenǂui.

5. Mati da a ǂan ǁkhā Jehovab ǀkha da ūhâ ǀhōsagusis ra ǂkhabusa?

⁵ Jakobub 5ǁî danaǃâs ǃnâ da ge Jakobub xa ra ǂkhâǃnâhe, î da sida ǂgoms ra ǂkhabu ǃkhaisa da ga hōǃâo ǀhaohâb ǃûi-aoga ǂgai. ǁNā-amaga î ge kaise a ǂhâǂhâsa î da ǁîgu ai huiba ǂgan Jehovaba da nî tsûtsûs aiǃâ. ǂHauǃnâ-ūsen da ge nî. Xoadi ge ra ǁgau sida gagasi ûib a gaxaǃnâ da ǁkhā ǃkhaisa. (Jak. 1:22) Nēs ge ǀnî Xristeǁîn ǀkha Sardis ti ǀon hâ ǃās ǃnâ ge ī, Jesub ge ǁîna ge mîba Jehovaban ge ǂkhîǂkhî ǀûsa. (J.ǂHa. 3:​1, 2) Mati da a ǂanǂui ǁkhā Jehovab ǀkha da noxopa ǃgâi ǀhōsagusisa ūhâ ǃkhaisa? ǀGui ǀgaub nēsa da a dī ǁkhāb ge dîsensa mati da gere tsâsa ǂguro da ge amaba ǁnâuo. (J.ǂHa. 2:​4, 5) Dîsen ǁkhā da ge a: ‘Elobmîsa khomai tsî ta ǃgamse gere ǂâiǃgâ ǀgaub xa ta noxopa a ǁkhoaxabahe? ǀNî ǀhaodi ǀguide hâǃnâ tsî ta ǀnî di ǃaroma ǀgui ra aiǂhumisen? Ôasase ta aoǁnâ sîsenne ra dī? ǂGuros xa ta nēsi mari-i xa ǀgui ra ǂâi?’ Nē dîdi ǀguisa du ga io ti a ǃeream, o i ge ra ǁgau Jehovab ǀkha du ūhâ ǀhōsagusis ǀnîsi ra ǂkhabusa. Jehovab ǀkha da ūhâ ǀhōsagusisa da ga ǀgaiǀgai tama i tamas ka io da ga ǀnai Jehovab ǃhui hâ xū-e ga dīo da ge ǀhaohâb ǃûi-aogu ai huiba nî ǂgan.

6. Kai ǁoreba go dīna tae-e nî dī?

⁶ ǀNî kai ǁoren ge a ǃaroma ǁkhā î-i khoe-e ǃhausen tama i ga io ǀhaohâba xu ūǂuihe. Nēti-i ǁore-e da ga dī o da ge ǀhaohâb ǃûi-aogu ǀkha nî ǃhoa. (1Kor. 5:​11-13) Khoe-i hîna kai ǁoreba dī hâ i ge ǁî-i Jehovab ǀkha ūhâ ǀhōsagusisa aitsama a ǃgâiǃgâi ǁoa. Jehovab xa da ga xoremarib ǁguibas ǃnâ-ū ǀûbahe ǂgao, o da ge “ǃgâi sîsengu ǃhobasen da go ǃkhaisa ra ǁgauǂûi ga nî dī.” (ǃNǃkh. 26:20) ǀGui ǀgaub nēsa da a dī ǁkhāb ge ǀhaohâb ǃûi-aoga mîbasa ǁoreba da go dīsa.

7. Ham-i tsîna ǀhaohâb ǃûi-aogu huiba ǂhâhâ?

⁷ ǀHaohâb ǃûi-aogu ge kai ǁorena dī hân ǀguina hui tama xawe ǁnān gagasise ǂkhabusan tsîna. (ǃNǃkh. 20:35) Xristeǁî kai du nîs aiǃâ i ge ǀnîsi ge ǃgomba du i nē ǁgai turaga ǃkham ǃoasa. ǀNîsi du ge ǀhubuǀhubusen xūn, ǁgauoǃnâ ǁgoe-ūgub vidiogu tsî ai-īsigu tsîna kōs tamas ka io ǁgauoǃnâ ûiǀgauba gere ûi. Tā ǃao re huiba ǂgansa. ǃGâise ra ǃgâ du ǀhaohâb ǃûi-ao-e du ge a mîba ǁkhā, hui du ǁkhā-e tae ǀkharaǀkharana du a dī ǁkhāsa î du nē ǁgai turaga ǃkhamǃoa. ǁÎb ge nî ǂâiǂâiǃnâ du Jehovab kaise nî ǂkhîsa aiǃgû tsî du ga ǁîba ǁnâuǀnamo. (Aoǁn. 4:12) ǀNîsi du ge ra ǂkhabuǂâi nē ǁgai turaga du ūhâ ǃkhais ǃaroma, ǀhaohâb ǃûi-aogu ge nî ǂâiǂâiǃnâ du Jehovab kaise ra ǃgâiaǂgaosa ǁîb ai du huiba ra ǂgan amaga. Nēs ge ra ǁgau ǃgamǃgamsenxa du asa tsî du sadu ǀgaib ai ǂgomaiǂnûi tamasa xawe du Jehovab xa ǁae hâ tsî ǁîba ra ǂkhîǂkhî ǂgaosa.—1Kor. 10:12.

8. Dī da ra ǁore-i hoa-e da ǀhaohâb ǃûi-aoga nî mîba? ǁGuiǃā re.

⁸ Dī da ra dīsā-i hoa-i ǃaroma da ge ǀhaohâb ǃûi-aoga mîba tama. Aiǁgause du ge ǃgâi tama ǀgaub ǃnâ ǃgâsa-i ǀkha a ǃhoa ǁkhā tamas ka io ǁî-i ǀkha a ǁaixa ǁkhā. Nēs ga īo ǀhaohâb ǃûi-aoga ǃoa du nî īs aiǃâ, Jesub di ǀapemāsa sao tsî ǃgâsa-i ǀkha sī ǃhoa i ǂkhîba kuru. (Mat. 5:​23, 24) Sida ǂkhanin ǃnâ du ge ôaǃnade a dī ǁkhā î du ǃnāsase tsamsiǃnâsib, ǃnūǃnâxasib tsî ǃkhō-oasens tsîna ǁgau. ǃNāsa huiba du ga noxopa ǂhâbao ǀhaohâb ǃûi-aoga ǂgan re. Euodias tsî Syntyches hâra ge ǁîra di ǁnâusāgusa sîsen ai ǁoa i ob ge Pauluba ǀhaohâb ǃnâ hâ ǃgâsaba ge ǂgan îb ǁîra hui, ǁkhā ǀgaub ǃnâ i ge sadu ǀhaohâb ǃûi-ao-e a hui du ǁkhā.—Fil. 4:​2, 3. 

TAE-I ǃAROMA DA ǀHAOHÂB ǃÛI-AOGA NÎ ǂGAI?

9. Dīsā da go xū-i xa da ga tao, o da noxopa tae-i ǃaroma ǀhaohâb ǃûi-aoga sī nî mîba? (ǂKhoamîdi 28:13)

⁹ ǂGoms tsî ǁkhoaǂgaosib tsîna da ge ǂhâ hâ î da huiba ǂgan ǀgaisa ǁore-e da ga dī o tamas ka io da ga ǀgaiba ūhâ tama io nē ǁgai turaga ǃkham ǃoasa. Tā da ge nî mā-am îb taoba ǃkhō-oa da ǀhaohâb ǃûi-aoga mîbasa. Tae-i ǃaroma? Jehovab ge ǀhaohâb ǃûi-aoga ge mā da î gu hui da î da ǁîb ǀkha ǀgaisa ǀhōsagusisa ūhâ ǀgara. ǁNās ǀkha da ge ǀhaohâb ǃûi-aogu ǀkha da ga ǃhoao ra ǁgau Jehovab ai da ra ǂgomaiǂnûisa tsî ǁîba ra ǁnâuǀnamsa. Mûǂan da ge nî Jehovab huiba da ǂhâhasa ǂhanu xū-e da ga dī ǂgao o. (Psa. 94:18) ǂGomǃgâsiba da ge a ūhâ ǁkhā Jehovab nî ǀûba dasa, dīsā da go xū-e da ga ǀhaohâb ǃûi-aoga mîbao tsî ǁnā xū-e a dī ǀûo.—Khomai re ǂKhoamîdi 28:13 sa.

10. Tae-e nî ī sadu ǁorena du ga sâuo?

¹⁰ Dīsā da go ǁorena da ga ǀhaohâb ǃûi-aoga mîba, ob ge Jehovaba nî ǀûba da tsî da ge ǃgâi ǀhōsagusisa ǁkhapa ǁîb ǀkha nî ūhâ. ǀHaohâb ǃûi-aoga da ga mîba tama i, o da ge aiǃgû tsî ǃgomma nî tsâ. Gao-aob Davidi ge ǁaeroba ǁîb di ǁoreb xa khoe-e ge mîba tama hâ i, nēs xa ǃaromahe hâseb ge ge ǂkhabuǂâi tsî ge ǀaesen hâ i. ǁÎb ge ǂan i xui-ao Jehovab ǀkhab ūhâ ǀhōsagusisab go ǁgaiǁgaisa. (Psa. 32:​3-5) Sorosi ǀaeb khami i ge sida gagasi mâsiba a ǁgaiǂoa ǁkhā, ǂhanu ǁaeb ai da ga xū-e dī tama io. Jehovab ge ǂgao tama hâ îs nēsa sida ǀkha ī tsîb ge ra mîba da î da ǀhaohâb ǃûi-aogu ǀkha ǃhoa. ǁÎb ge ǀhaohâb ǃûi-aoga ra sîsenū î gu hui da î da ǁkhapa ǁîb di ǀhōsa kai.—Jes. 1:​5, 6, 18.

11. Tae-e a īǁkhā ǀhaohâb ǃûi-aoga da ga nē ǁgai ǁore-i xa mîba tama io?

¹¹ ǀHaohâb ǃûi-aoga da ga ǀgaisa ǁore-i xa mîba tama ī, on ge nauna ǃgomma nî tsâ. Jehovab ǃanu gagab ge ǀhaohâb ǃnâ sîsen tide tsî da ge ǃgâsan ǁaegu hâ ǂkhîb tsîna a ǀgora ǁkhā. (Efe. 4:30) ǁNās ǁkhās khami du ga ǂano khoe-i go ǁgai ǁore-e a dīsa, o da ge ǁî-e nî mîba i-î ǀhaohâb ǃûi-aogu ǀkha sī ǃhoa.a ǁÎ-i ga ǁnāsa dī tama i, o da ge ǀhaohâb ǃûi-aoga nî mîba. Nēsa da ga dī tama io da ge sida tsîna Jehovab ǃoagu ra ǁore. (Lev. 5:1) Jehovaba da a ǀnam amaga da ge ǀhaohâb ǃûi-aoga nî mîba khoe-i ga ǀgaisa ǁore-e a dīo. ǁNāsa da ga dīo da ge sada ǃgâsan ǀhaohâb ǃnâ hâna ra ǁkhauba tsî ǁore go khoe-e ra hui î-i ǁkhapa ǃgâi ǀhōsagusisa Jehovab ǀkha ūhâ.

ǀHAOHÂB ǃÛI-AOGA MATI RA HUI DA?

12. ǀHaohâb ǃûi-aoga gagasise ǂkhabu hâna mati ra hui?

¹² Elobmîs ge ǀhaohâb ǃûi-aoga ra mîba î gu ǁnān ǀhōsagusisa Jehovab ǀkha ra ǂoaǃnâna ǁkhapa omkhâi. (1Tes. 5:14) ǁOre du gao gu ge ǀhaohâb ǃûi-aoga dîde nî dî du î gu ǁnâuǃā mati du ra tsâsa. (ǂKhm. 20:5) ǀNîsi î ge supu tide ǀhaohâb ǃûi-aogu ǀkha ǃhoasa. Tae-i ge īsa ǁîga mîbasa du ge ǀnîsi nî tao xawe gu ǁîga a hui du ǁkhā sadu ra ǃkharuǃnâ xūna gu ga ǁnâuǃāo. Tā ǂâiǂhansen ‘ǃgâi tama’ xū-e du ga mîo. (Job. 6:3) ǀHaohâb ǃûi-aogu ge ǃkhaese ǀgoraǃgâ du tide mî du ra xū-i ǃaroma. ǁÎgu ge ǂōrisase nî ǃgâ du î gu hoa amaba ǂan, Elobmîsa xu gu ǀapemāsa nî mās aiǃâ. (ǂKhm. 18:13) ǀHaohâb ǃûi-aogu ge a ǂan ǁaeba i ra ūsa khoe-e ǂhâ i hâ huiba māsa, ǁnās ǀkha gu ge ǀguiǃnās ǀguisa khoe-i ǀkha ǀhao tama î gu ǁî-e ǂhâ i hâ huiba mā.

13. ǀHaohâb ǃûi-aogu ga ǀgoreba da tsî ǀapemāsa Elobmîsa xu mā da, os nēsa mati nî hui da? (Ai-īsiga mû re.)

¹³ ǀHaohâb ǃûi-aoga du ga ǂgaio gu ge dī du go ǁgai ǁoren ǂamai ǁgaise tsâ kai du ǂgao tama hâ. ǁÎgu ge nî ǀgoreba du. Jehovab ge ǁîgu ǀgorede nî ǁnâu-am hîna “ǀgaisa sîsenǂuiba” ūhâde. ǁîgu ge “ǃKhūb di ǀons ǃnâ ǀgore tsî ǀkhera-oli-i ǀkhas tsîna ra ǂhau.” (Jak. 5:​14-16) Nē “oli-i” ge Elobmîs amaba ǃoa ra ǁnaeǁgau. ǀHaohâb ǃûi-aogu ge sadu ǀkha Elobmîs xoade nî ǀgoragu, ǁkhaeǂgao tsî nî huide î du Jehovab ǀkha ǁkhapa ǃgâi ǀhōsagusisa ūhâ. (Jes. 57:18) Elobmîsa xu hâ ǀapemās ge nî hui du î du Jehovab ǂhanu a ti ra mî xū-e dī. ǀHaohâb ǃûi-aogu ǃnâ-ūb ge Jehovaba ra hui du, ǁîb di domma ǁnâusa mî rase: “Nēb ge daoba ǁîb ai ǃgû re.”—Jes. 30:21.

14. Galateǁîn 6:1 ǃoagu gu ǀhaohâb ǃûi-aoga ǁnā-i “ǁore i xa gaoǂamhe” hâ-e mati nî huisa? (Ai-īsiga mû re.)

¹⁴ Khomai re Galateǁîn 6:1 sa. Xristeǁî-i ‘ǁore-i xa gaoǂamhe’ i ge Jehovab ǁgaragu ǃoagu ûi tama hâ. ǁOreb xa gaoǂamhes ge gā-ai tama mîǁguiba dī tamas ka io ǁgai ǁoreba dīsa ǃoa ra ǁnaeǁgau hîna Jehovab ǁgaragu ǃoagu hâ ga. Xristeǁî ǀhaohâb ǃûi-aogu ge ǀnammi xa ǂkhâǃnâhe hâse ǁnāti-i khoe-e hui tsî “tsamtsiǃnâsib ǀkha ra daoǁgau.” Grikegowab mîs daoǁgau ti hâs ge ǀaeǃkhō-aob hîna gama ǂkhōba ra ǂhanuǂhanub ǀkha ra ǀgopeǀnōhe î-i ǂgau ǁkhā. ǃGâi ǀaeǃkhō-aob ge ǁnā ǂkhōbab ra ǂhanuǂhanu ǁaeb ai nî dītsâ îb tā ǃnāsa tsûba ǃaroma. ǁNāsa gu ge ǀhaohâb ǃûi-aogu tsîna ra dītsâ î gu ǃgâsa-i tsū xū-e ra dī-e gu ga daoǁgau ǁaeb ai tā ǃnāsa tsûba ǃaroma. ǁKhāgu a-e dītsâ tsî gu ge ǁnā ǃgâsa-e ǃgâi ǀgaub ǃnâ ra ǁnama. Elobmîs tsîn ge ǀhaohâb ǃûi-aoga ra mîba î gu “ǂanbasen.” Khoe-e gu ga hui î-i Elobmîs ǀapemāde sao, o gu ge ǀhaohâb ǃûi-aoga ǂâis ǃnâ nî ūhâ ǁîgu tsîn ra dīsā ǃkhaisa. ǁÎgu ge ǂâis ǃnâ nî ūhâ hui gu ra khoe-i ǂam-ai gu ǂhanu-ai tamasa. Xawe gu ge ǃgamǃgamsenxa tsî khoexaǃnâsiba nî ǁgau.—1Pet. 3:8.

15. Tae-e da nî dī ǃgomsi-e da ga ūhâo?

¹⁵ Sada ǀhaohâb ǃûi-aoga da ge a ǂgomǃgâ ǁkhā. Jehovab ge ǁîga ge ǁkhāǁkhā î da tā sida xa gu ra mîbahe xūna ǀnî hâ khoe-i ǀkha ǀgoragu. ǁÎgu tsîn ge ge ǁkhāǁkhāsen î gu Elobmîsa xu ǀapemāde mā tsî tā ǁîgu ǁnâuǃāb ai ǂgomaiǂnûi hâse ǀapemā. ǁÎgu ge ge ǁkhāǁkhāsen î gu aiǃgû tsî hui da sida ǃgomsin ǀkha. (ǂKhm. 11:13; Gal. 6:2) ǀHaohâb ǃûi-aogu ge ǃkharagagu ǀgauga ūhâ tsî gu ge ǀnî ga naugu xa ǃnāsa ǂansa ūhâ. Xawe da ge ǁîgu ǀgui-i ǀkha a ǃhoa ǁkhā ǃgomsi-e da ga ūhâ. ǂÂis ǃnâ da ge nî ūhâ ǂhâǂhâsa î asa î da tā ǃkharagagu ǀhaohâb ǃûi-aogu ai ǀapemāde ôa, ǃâubasen rase ǁîgu di ǀguib nî mîba dasa tae-e da nî dīsa. ǁNāsa da ga dī, o da ge khoen ǁnâu ǂgaon ra xūn ǀguina ra mîbahen khami nî ī tsî Jehovab mîsa xu ǁkhāǁkhāhe ǂgao tama hâna. (2Tim. 4:3) ǀHaohâb ǃûi-aogu ǀkha da ga sida ǃgomsin xa ǃhoa ob ge ǀnîsi a dî da ǁkhā ǀnai da go ǀnî hâ ǀhaohâb ǃûi-aob ǀkha a ǃhoasa tsîb ge mâ ǀapemādi tsîna a mā dusa. ǃGamǃgamsenxasib ge ǁîba nî ǂkhâǃnâ îb nau ǀhaohâb ǃûi-aogu ai huiba ǂgan.—ǂKhm. 13:10.

SADA NÎ DĪ XŪ-I

16. Sada hoa da tae-e nî dī?

¹⁶ ǀHaohâb ǃûi-aogu ge ǀapemāde ra mā da tsî ra hui da ǃgomsina da ga ūhâo xawe mîba da tama hâ tae-e da nî dīsa. Hoa da ge tsēs hoasa mî tsî da ra dī xūn ǃnâ nî ǁgau Jehovaba da a ǀnam tsî da ǁîba ra ǂkhîǂkhî ǂgaosa. Jehovab ge nî hui da î da gā-ai mîǁgui ga dī tsî ǁîb ǃoagu ǂgomǂgomsase hâ ǀgara. (Rom. 14:12) ǁNā-amaga gu ge ǀhaohâb ǃûi-aoga mîba da tide tae-e da nî dīsa xawe gu ge Elobmîs ǀkha nî hui da, î da ǁnâuǃā Jehovab tae-e nē mâsib xa ra mîsa tsî nî mā-am da î da sida mîǁguiba aitsama dī. ǁÎgu Elobmîsa xu ra mā da ǀapemādi xa da ga ǂâiǃgâ tsî sîsenǂui, o da ge Jehovab ǂâiǀgauba ǁkhāǁkhāsen tsî gā-ai mîǁgui ga dī ǁkhā.—Heb. 5:14.

17. Jehovaba tae-e da nî dīsa ra ǂhâba?

¹⁷ Jehovaba da ge kaise ra gangan tsamtsiǃnâ ǀgaub ǃnâb ra kōǃgâ da ǃkhais ǃaroma ‘ǃgâi ǃûi-aob’ ǁîb gūna ra kōǃgâs ǁkhās khami. Jehovab ge ‘ǃgâi ǃûi-aob’ Jesuba ge sî ǁîb ûiba ge xoremarib ase māba, î da ǀamosib kōse ûi ǁkhā. (Jhn. 10:11) Jehovab ge ǃgâi ǃûi-aogu tsîna ge mā da î gu ǀhaohâb ǃnâ kōǃgâ da. ǁÎb ge ge mîmâi: “Tsî ta ge ti ǂgaob ǃoa hâ ǃûi-aoga nî mā du, tsî gu ge ǁîga ǂans tsî ǁnâuǃāb ǀkha nî ǃûi du.” (Jer. 3:15) Hōǃâ da gao sida ǂgoms ra ǂkhabusa tamas ka io da sida ǀhōsagusis Jehovab ǀkha da ūhâsa nî ǃgâiǃgâisa, o da ge tā nî ǃao ǀhaohâb ǃûi-aogu ai huiba ǂgansa. Mû da ge nî matib Jehovaba ǁîga ra sîsenūsa sida huis ǃaroma.