Khoena ǃgôasiba ǁgau

1. Tae-i ǃaroman khoena ǃgâibahe ǃgôasiban ga ǁgauheo? (ǂKhoamîdi 22:1)

ǃGÂIBAHE î du a khoe-i ga ǃgôasiba ǁgau du o? ǃGôaǃgâ du ra. Hoa khoen ge ǃgôahen rasa ra tsâ ǂgao. Naun ga ǃgôasiba ǁgau da, os ge nēsa ra ǂkhî kai da. ǁNās ǃaromas ge Elobmîsa ra mî ǃgôahes ge “ǀhaiǀurib tsî ǃhuniǀurib tsîkha xa a ǃgâi.”—Khomai re ǂKhoamîdi 22:1 sa.

2-3. Mâ mâsigu ǃnâ da nau khoena ǃgôasiba a ǁgau ǁkhā?

² ǀNî ǁaegu ai i ge supu tama nauna ǃgôasiba ǁgausa. Aiǁgause da ge naun di ǀoasa-oǃnâsiba ra mû. Tsî i ge sida ǂnamipe hâ khoena nauna ǃgôa tama. Xawe da ge sida tā ǁnā khoen khami nî ī. Tae-i ǃaroma? Jehovab ge ra ǂhâba î da “mâ i hoa-e ǃgôa.”—1Pet. 2:17.

³ Nē ǁkhāǁkhāǃâs ǃnâ da ge nî ǁkhāǁkhāsen nauna ǃgôasiba ǁgaus tae-e ra ǂâibasensa. Tsî mati da ǃgôasiba (1) omaris ǁanin, (2) sada ǃgâsan tsî (3) ǀhaohâb ǃauga hâ khoen tsîna nî ǁgausa. ǃGōsase da ge nî ǁkhāǁkhāsen mati da ǃgôasiba ǃgom ǁaegu ǃnâ a ǁgau ǁkhā ǀgausa.

NAU KHOENA ǃGÔASIBA ǁGAUSA TAE-E RA ǂÂIBASEN?

4. Nau khoena ǃgôasiba ǁgausa tae-e ra ǂâibasen?

⁴ ǃGôasib ge khoen xa da ra ǂâiǀgaub tsî ǁîna da ra hâ-ū ǀgauba ǃoa ra ǁnaeǁgau. Khoe-i di ǃgâi ǀgaugu tamas ka io ǃgâi xūn ǁîn ra dīn, khoe-i ga sida xa ǀgapi ǃkharosa ūhâsa da ga ǂan, o da ge ǁîna ǃgôasiba ra ǁgau ǀgaub ǃnâ ra hâ-ū. Tsî i ge a ǂhâǂhâsa nēsa da ra ǂhâba amaga da ra dī ǂgaosa.—Mat. 15:8.

5. Tae-e nî hui da î da nau khoena ǃgôasiba ǁgau?

⁵ Jehovab ge ra ǂhâba î da nau khoena ǃgôasiba ǁgau. Aiǁgauseb ge ra mîba da î da “ǂhanuba” ǃgôa. (Rom. 13:​1, 7) Xawe ǀnîn ge ra ǂâi “tita ge ǂhanu ǀgaub ǃnâ ǀguin ga taniseno ǃgôasiba nî ǁgau.” ǁNā ǂâiǀgauba ǃgâi-e? Jehovab ǃoaba-aon ase da ge ra mûǂan khoena ǃgôasiba ǁgaus ǁîn tanisen ǀgaub ai ǃgaoǃgaosa tamasa. Xawe i ge ǁnās xa a ǃnāsa. Jehovab ge ra ǂhâba î da nauna ǃgôa ǁîba da ra ǂkhîǂkhî ǂgao amaga.—Jos. 4:14; 1Pet. 3:15.

6. Īǁkhā-e sida ǃgôasiba ǁgau tama khoe-e ǃgôasa? ǁGuiǃā re. (Tsoatsoas ai hâ ai-īsib.)

⁶ ǀNîn ge ra dîsen ǃgôasiba ǁgau da tama khoe-e da ǃgôasiba nî ǁgau? Îo. Saora aiǁgaude ǃgaoǃgâ re. Gao-aob Sauli ge ǁîb ǀgôab Jonatanna nau khoen aiǃgâ ge taotao. (1Sam. 20:​30-34) Xaweb ge Jonatanna dadasaba noxopa ǃgôasiba ge ǁgau ǁōb nîs kōse. (Eks. 20:12; 2Sam. 1:23) ǀGapi pristeri Elib ge Hanasa ǀhoros hâ ti ge ǂgāri-am. (1Sam. 1:​12-14) Xawes ge Hanasa ǃgôasib ǃnâ Elib ǀkha ge ǃhoa. Israels ǃnâ hâ khoen hoan ge Elib ge ǁîb ǀgôaga mî-ūnuba tama hâ isa ǂan-i xawe. ǁÎb ge nēsa ǀgapi pristeri ase ga dī hâ. (1Sam. 1:​15-18; 2:​22-24) Atenes ǃnâ ge hâ i khoegu ge apostel Pauluba “kai ǃhoa-aob” ti gere ǂgai. (ǃNǃkh. 17:18) Nēs ǂam-aib ge Pauluba ǁîgu ǀkha ǃgôasib ǃnâ gere ǃhoa. (ǃNǃkh. 17:22) Nē aiǁgaudi ge ra ǁgau Jehovaba ǃgam ǀnammi tsî Eloǃaoǃgâxasiba ūhâbas nî ǂkhâǃnâ dasa î da ǃgôasiba ǁgau supu tama i ga ī xawe. Hā re î da ǃhoaǃgao ham-i sida ǃgôasiba anu hâsa tsî tae-i ǃaroma.

OMARIS ǁANINA ǃGÔASIBA ǁGAU

7. Tae-e a ǃgom kai ǁkhā omaris ǁanina ǃgôasiba ǁgausa?

⁷ ǃGomsigu. ǃNāsa ǁaeba da ge sida omaris ǁanin ǀkha ra hâ. ǁNās xa ǃaromahe hâse da ge ǁîn ǀgaisa ǀgaugu tsî ǂkhabusasigu tsîna a ǂan. ǀNîn ge ǁîna kōǃgâsa ra ǃgom kai ǀaega ūhâ. Tamas ka ion ge kaise ra ǂâiǂhansen. ǀNîn ge tsûtsû da ra ǀgaub ǃnâ ǃhoa tsî ǃgâi tama ǀgaugu ǃnâ ra tanisen. ǀNîn ge ǂkhîb ǃnâ hâ-ū gu tama i tsî omaris ǃnâ ǃgôasiba ǁgaugu tama hâ. ǁNās xa ǃaromahe hâses ge omarisa ǃgâise sîsenǀhao tama hâ. ǂKhōn ǀaeb soros ǃâga ǃgâise sîsenǀhao kai tama, khami i ge ǃgôasib ga omaris ǁanin ǁaegu a ǀkhai o ǀguiǃnâxase sîsenǀhao tama. ǂGui ǀaegu a ǂgauǂgauhe ǁkhā khami i ge omaris ǁanina ǁkhāǁkhāsen ǁkhā în ǃgôasiba ǁgaugu.

8. Tae-i ǃaroma i a ǂhâǂhâsa omaris ǁanina ǃgôasiba ǁgausa? (1 Timoteub 5:​4, 8)

⁸ Tae-i ǃaroma da ǃgôasiba nî ǁgau? (Khomai re 1 Timoteub 5:​4, 8 sa.) ǂGuro sîǂkhanis Paulub ge Timoteuba ǃoa a xoas ǃnâb ge Pauluba matin omaris ǁanina nî kōǃgâgusa ge ǃhoaǃgao. ǁÎb ge ge ǁguiǃā omaris ǁanina da ǃgôasiba nî ǁgausa, ǁnāsa da nî dīs ǀguis ose xawe ‘elosi ǁgui-ais’ a amaga. Nēs ge ra ǂâibasen nēsa da ra dīsa Jehovaba da a ǀnam amaga. Jehovab ge ǁîb omarisa ge ǂnûiǂgā. (Efe. 3:​14, 15) Sida omaris ǁanina da ga ǃgôasiba ǁgau, o da ge omaris ǂnûiǂgā-aob Jehovaba ǃgôasiba ra ǁgau. Nēs ge ǂhâǂhâsa ǃaromasa î da sida omaris khoena ǃgôasiba ǁgau.

9. Aob tsî taras tsîna mati ǃgôasiba nî ǁgaugu? (Ai-īsiga mû re.)

⁹ ǃGôasiba da a ǁgau ǁkhā ǀgaus. ǁÎb tarasa ra ǃgôa aob ge ǀguri ra ga hâs tamas ka io khoen ǁaegu ǃgôasiba ra ǁgau. (ǂKhm. 31:28; 1Pet. 3:7) ǁÎb ge ǁîsa ǂnau, nau khoen aiǃâ taotao tamas ka io ǂhâǂhâsa tamas ha ti ǂâi kai tama. Argentinab ǃnâ ra hâ ǃgâsab Ariela ti ǀon hâb ge ra mî: “Ti taras ge ǀaeb xa ǃaromahe hâse ǃnāsa ǁaeba tsûtsûte ra xūna ra mî. Nēs ga ī o ta ge ra hōhōǃnâsen, ǁîs ra mî xūnas ge ǂâibasen tama. Tsî ta ge 1 Korinteǁîn 13:5 ra ǂâi-oa, hui te rasa î ta ǃgôasib ǃnâ ǁîs ǀkha ǃhoa tsî tā ǁaixa hâ ǀgaub ǃnâ ǁîs ǀkha ǃhoa.” (ǂKhm. 19:11) Taras ge ǃgôasiba ǁîs aoba ra ǁgau, naun ǀkhas ra ǃhoa ǁaeb ai ǃgâi xūna ǁîb xa mîs ǃnâ-ū. (Efe. 5:33) ǁÎs aobas ge ǁgai ǀgaub ǃnâ mî tama hâ tamas ka io ǃgâi tama ǀonde ǂgaibi tide. Tsîs ge ǁîba mîǁgaiǁgai tama. ǁÎs ge ra ǁnâuǃā, ǁnāsas ga dī os ǁîs ǃgammeba khôa ǁkhāsa. (ǂKhm. 14:1) Italib ǃnâ ra hâ ǃgâsas kaise ra ǂâiǂhansen ǃgâsaba ǃgamme hâs ge ra mî: “ǀNî ǁaega ta ge ti aob kaise ra ǂâiǂhansen ti ra ǂâi. ǂKharuge ǁaeb ǃnâ i ge ǃnāsa ǁaeba mî ta gere xūn tsî ais ǁgâiǂuisen ǀgaub tsîna gere ǁgau ǁîba ta ǃgôa tamasa. Xawe ta ge ge hōǃnâ nau khoen xa ǃgôasib ǃnâ ra ǃhoa ǀhōsan ǀkha hâs ge ge huite î ta ti aoba ǃgôasiba ǁgau.”

10. ǂKhamkhoena mati ǁgûna ǃgôasiba nî ǁgau?

¹⁰ ǂKhamkhoedo sadu ǁgûn ra mā du ǁgaraga ǁnâuǀnam. (Efe. 6:​1-3) Sadu ǁgûn ǀkha du ra ǃhoa ǀgaub ǃnâ ǃgôasiba ǁgau re. (Eks. 21:17) Kairan ra khamin ge sadu ǁgûna ǃnāsa huiba sado xu nî ǂhâ. Dī ǁkhā du an hoana dī tsî ǁîna kōǃgâ. Marias aiǁgausa ǃgaoǃgâ, ǁîs dadasab ge Jehovaba ǃoaba tama. ǁÎs dadasab ge ǀaesen ob ge ǁîba ǁîsa ǃgâi tamase gere hâ-ū. Nēs ge gere ǃgom kai îs Mariasa ǁîba kōǃgâ ǁkhā. ǁÎs ge ra mî: “ǀGore ta ge gere, î ta ti dadaba ǃgôasiba ǁgau, dī ta gere xūn ǃnâ-ūs tsîna. Mîbasen ta ge ge Jehovab ga ǂgante î ta ti ǁgûra ǃgôa, ob ge ǀgaiba nî māte. ǁAeb ra ǃkharu khami ta ge ge mûǂan, ti dadasaba ta ǃgôasiba nî ǁgausa ǀkharaǀkharasen tamab ga ī xawe.” ǃGom i ga xawe da ga omaris ǃnâ nauna ǃgôasiba ǁgau, o da ge Jehovab ǂnûiǂgās omaris disa da ra ǃgôaǃgâsa ra ǁgau.

SADU ǃGÂSANA ǃGÔASIBA ǁGAU

11. Tae-i ǃaroma i ǀnî ǁaegu ai a ǃgom sida ǃgâsana ǃgôasiba ǁgausa?

¹¹ ǃGomsigu. Sida ǃgâsan ge Elobmîs daoǁgaudi ǃoagu ûisa ra dītsâ. Xawen ge ǀnî ǁaegu ai ǃgâi tamase hâ-ū da, ǂhanuoǃnâse ǀgoraǃgâ da tamas ka io ra ǁgaixa kai da. Sida ga ǃgâsa-i ǀkha ǃgomsi-e ūhâ o i ge a ‘ǃgom’ ǁkhā, ǁî-e ǃgôasiba ǁgausa. (Kol. 3:13) Tae-e hui da ǁkhā î da ǃgôasiba ǁgau ǀgara?

12. Tae-i ǃaroma i a ǂhâǂhâsa ǃgâsana ǃgôasiba ǁgausa? (2 Petrub 2:​9-12)

¹² Tae-i ǃaroma da ǃgôasiba nî ǁgau? (Khomai re 2 Petrub 2:​9-12 sa.) ǁÎb ǀgamǁî sîǂkhanis ǃnâb ge Petruba ge mî, ǁnā ǁaeb ain ge ǀhaohâb ǃnâ ge hâ i Xristeǁîna ‘Elob xa ra ǃgôahen’ xa ǁgaise gere ǃhoa. ǁNā gu ge ǀhaohâb ǃûi-aoga. ǂGomǂgomsa ǀhomǃgāgu nē xūna ge mû ga tae-e ge dī? ‘Jehovaba ǃgôasiba ǁgaus ǃaroma’ gu ge ǁnā tsūdī-aona ǃoa tsū xū-e ge mî tama hâ i. ǁNās ge kaise a buruxa. ǀOasa kurusa ūhâ ǀhomǃgāgu ge ǁkhā gu an hoana ge dī tsî ǀgapiǂâixa khoen xa ǁgai xū-e ge ǃhoa tama hâ i. Xawen ge hoa xūna Jehovab ǃomǁae ge ǁnāxū, îb ǁîba ǁîga ǀgoraǃgâ tsî ǁkhara. (Rom. 14:​10-12; ǀgopeǀnō re Judab 9.) ǀHomǃgāga xu da ge a ǁkhāǁkhāsen ǁkhā. ǀHomǃgāgu ge mâǃoa-aon ǀkha ǃgôasioǃnâse ge tanisen tama hâ i. ǁNā-amaga da ge sida tsîna ǂgui ǃaromade ūhâ, î da sida ǃgâsan Jehovaba a ǀnamna ǃgôasiba ǁgau. ǁKhā da a-i hoa-e da ge nî dī î da nauna ǃgôasiba ǁgau. (Rom. 12:10) ǁNāsa da ga dī o da ge ra ǁgau Jehovaba da ra ǃgôasa.

13-14. ǀHaohâb ǃnâ hâ ǃgâsana da mati ǃgôasiba nî ǁgau? Aiǁgaude mā re. (Ai-īsiga mû re.)

¹³ ǃGôasiba da nî ǁgau ǀgaus. ǀHaohâb ǃûi-aogu ge nauna gu ga ǁkhāǁkhā ǁaeb ai ǁnāsa ǀnamxaǃnâ ǀgaub ǃnâ nî dī. (Flm. 8, 9) Khoe-e da ga ǁnama, o da ge nēsa khoexaǃnâse nî dī, ǁaixa da hâ ǁaeb ais ose. ǃGâsadi ge ǁkhā di a-i hoa-e nî dī î di ǀhaohâb ǃnâ ǃgôasiba ǁgau, ǁîdi ge tā nî ǀhoe tamas ka io tā naun xa ǁgai ǀgaub ǃnâ nî ǃhoa. (Tit. 2:​3-5) Hoa da ge ǀhaohâb ǃûi-aoga da ra ǃgôasa a ǁgau ǁkhā, ǁîgu ǀkha sîsenǀhao tsî ganganxasiba ǁgaus ǃnâ, ǀhaodi tsî aoǁnâ sîsenni tsîna gu ra mûǂam ǀgaub ǃaroma. Tsî mati gu “khoe-i ga ǀnî khami ī ǁore-i xa a gaoǂamheo” gu ra hui ǀgaub ǃaromas tsîna.—Gal. 6:1; 1Tim. 5:17.

¹⁴ Roseo ti ǀon hâ ǃgâsas ge ǀapemāsi ge ǀhaohâb ǃûi-aoba ǃgôasiba ǁgaus xa ge ǃgombahe i. ǁÎs ge ra mî: “Kaise ta ge ge ǁaixa ǁîb ge tita ǀkha ǀnamxaǃnâ ǀgaub ǃnâ ǃhoa tama hâ i amaga. Oms ai ta ge ǁîb xa ǃgâi tama ǀgaub ǃnâ gere ǃhoa. ǁÎb xa ǃgâibahesa ta ge ge dītsâ. Tita ge ǁîb ǁae ūte tama hâ khami gere tsâ tsîb ǁîb ǀapemāde ge ǃgâ tama hâ i.” Tae-e Roseosa ge hui? ǁÎs ge ra ǁguiǃā: “Ti Elobmîs khomais ǃnâ ta ge 1 Tesalonikaǁîn 5:​12, 13 sa ge khomai. Mûǂan ta ge o nē ǃgâsaba ta ǃgôasiba ǁgau tama hâsa, os ge ti ǃgâiǂâisa ge ǂhanite tsoatsoa. Jehovaba ǃoa ǀgore tsî ta ge sida ǂkhanin ǃnâ ôaǃnâde ge dī huite nî te î ta ti tanisen ǀgauba ǀkharaǀkhara. Nēs ge ge huite î ta ǁnâuǃā, nē ǃgâsab ge ǃgomsi tama hâ isa xawe ti ǀgapiǂâixasib ge ge ī. Nēsi ta ge ra ǁnâuǃā ǃgamǃgamsenxa ta ga o, da ge nauna ǃgôasiba nî ǁgau. Noxopa ta ge ǃgarise ra sîsen nauna ǃgôasiba ǁgausa. Tsî ta ge ra tsâ Jehovab kaise a ǂkhîsa nēsa ta ra dī amaga.”

ǀHAOHÂB ǃAUGA HÂNA ǃGÔASIBA ǁGAU

15. Tae-i ǃaroma i a ǃgomba da ǁkhā Jehovaba ǃoaba tama khoena ǃgôasiba ǁgausa?

¹⁵ ǃGomsigu. Aoǁnâ sîsenni ǃnâ ta ge khoe-i hîna Elob tamas ka io ǁîb mîs ǀkha ǁae tama hâna ra ǀhao-ū. (Efe. 4:18) ǀNî khoen ge sida haisi-amsa ǃgâ ǂgao tama. Sîsenǁare-aon tamas ka io ǁgauǃnâ-aon ge ǃgâi tama ǀgaub ǃnâ a ǃhoa-ū da ǁkhā. Tsî da ge ǃgâi tamase a hâ-ūhe ǁkhā sida sîsenni mûǂam-aob tamas ka io skol ǀhōsan xa. Nēs ge nî ǃaroma î da ǃgôasiba ǁîna ǁgau ǀû tsî ǃgâi tama ǀgaub ǃnâ hâ-ū tsoatsoa.

16. Tae-i ǃaroma i a ǂhâǂhâsa Jehovaba ǃoaba tama khoena ǃgôasiba ǁgausa? (1 Petrub 2:12; 3:16)

¹⁶ Tae-i ǃaroma da ǃgôasiba nî ǁgau? ǂÂis ǃnâ ūhâ Jehovab ge hoaǁae ra ǃgaoǃgâ mati da ǁîba noxopa ǃoaba tama khoena ra hâ-ū ǀgauba. Apostel Petrub ge Xristeǁîna ge hōhōǃnâ, ǁîn ǃgâi tanisen ǀgaub ǃaroman khoena ‘Eloba nî kare’ ǃkhaisa. ǁNā-amagab ge ǁîna ra ǀkhoma în ǁîn ǂgomsa “tsamtsiǃnâsib tsî ǃgôasib tsîkha ǀkha” ǁkhauba. (Khomai re 1 Petrub 2:12; 3:16 sa.) Xristeǁî-i ga ǁî-i ǂgomsa ǀgoraǃgâ-ao-i aiǃâ tamas ka io ǀnî hâ khoe-i aiǃâ ǁguiǃā tamas ka io ǁkhauba on ge nēsa hoaǁae ǃgôasib ǃnâ nî dī. Jehovab ge mû tsî ra ǃgâ tae-e da ra mîs tsî mati-i ǀgaub ǃnâ da ra mîsa. ǁNās ge ǃgâi ǃaromasa Jehovaba ǃoaba tama khoena noxopa ǃgôasib ǃnâ hâ-ūsa.

17. Jehovaba noxopa ǃoaba tama khoena da mati ǃgôasiba nî ǁgau?

¹⁷ ǃGôasiba da nî ǁgau ǀgaus. Aoǁnâ sîsenni ǃnâ da ge khoena ǃgôaǁnā ǂgao tama, ǀnîsin Elobmîs xa ǀoro ǂansa ūhâ tamas ka io Elobmîsa ǀū amaga. Xawe da ge ǂâis ǃnâ ra ūhâ ǂgao, ǁîn Elob tsî sida ǃoa a ǂhâǂhâsa ǃkhaisa. (Hag. 2:7; Fil. 2:3) Khoen ga sadu ǂgoms ǃaroma mîǁgaiǁgai du, o dī ǃoasa xu ǃkhō-oasen. Aiǁgause da ge sida gā-aise mûsen kai tsî ǁîna nî ǁaixa kai xūna mî tama hâ. (1Pet. 2:23) Mûǂan da ga, tsū xū-e da go mîsa o da ge ǁkhā ǁaeb ai ǀûbaba nî ǂgan. Mati du sîsenū du ra khoena ǃgôasiba a ǁgau ǁkhā? ǃGâi sîsen-ao kai tsî sîsenba du ra khoen ǃoagu ǃgâise tanisen. (Tit. 2:​9, 10) ǂHauǃnâ tsî ǃgâi sîsen-ao kai du ga, o du ge ǀnîsi khoena ǂkhîǂkhî tide xawe du ge ǃgōsase Eloba nî ǂkhîǂkhî.—Kol. 3:​22, 23.

18. Tae-i ǃaroma i a ǃgâi ǃgôasiba omkhâi tsî nauna ǁgausa?

¹⁸ ǂGui ǃaromade da ge ūhâ ǃgôasiba omkhâi tsî nauna ǁgausa. Mû da ge go sida omaris ǁanina da ga ǃgôasiba ǁgauo, da sida omaris danab Jehovaba ǃgôasiba ra ǁgausa. Sida ǃgâsana da ga ǃgôasiba ǁgauo, da ge sida ǀhomsi ǁGûba ǃgôasiba ra ǁgau. Tsî da ga noxopa Jehovaba ǃoaba tama khoena ǃgôasiba ǁgauo, da ge ǁîna ǃēsa ra mā în ǂkhaisib tamas ka io ǃgôasiba sida kuru-aoba mā. ǃGôasiba da ga nau khoena xū ǃkhōǃoa tama ī xawe i ge a ǂhâǂhâsa î da ǁîna ǃgôasiba ǁgau. Tae-i ǃaroma? Jehovab ge nî ǀkhae da. ǁÎb ge ra mîmâi: “Tita ge tita ra ǃgôana nî ǃgôa.”—1Sam. 2:30.