ǃGâiǂhôas ǃnâ ǃgâiǃgâibasensa ūhâ khoena ǃhaese hui

1. Khoena ǀnîsi mati a tanisen ǁkhā, aoǁnâ ba nî da gao? (ǃNaeǃkhaidi 13:​47, 48; 16:​14, 15)

ǂGUROKAM ǁaeb ǃnân ge khoena amaban gere ǁnâu khami gere ūbasen. (Khomai re ǃNaeǃkhaidi 13:​47, 48; 16:​14, 15 sa.) ǁNās ǁkhās khamin ge ǀnî khoena kaise ra ǃgâiaǂgao ǃgâiǂhôasan ga ǂguroǃnās ase ǁnâuo. ǀNîn tsîn ge ǀnîsi ǂguron ge ǃgâiǂhôasa a ǁnâuo ge ūǃoa ǂgao tama hâ i. Xawen ge ega nēs xa sī ǁkhāǁkhāsen tsî Eloba ge ǃoaba tsoatsoa. Tae-e da nî dī “ǂgaimâisana” da ga aoǁnâ sîsenni ǃnâ ǀhao-ūo?

2. Mâ ǀgaub ǃnâ i sida ǁkhāǁkhāsabedī sîsenne ǃhanaǂgā-aob di i ǀkha a ǀgui?

² Sida aoǁnâ sîsen-e da ge ǃhanaǂgā-ao-i ǀkha a ǀgopeǀnō ǁkhā. ǀNî ǁaega i ge ǀnî haide ǃhaese a ǂûtani ǁkhā nau haidi xa. ǁNās ǀkhab ge ǃhanaǂgā-aoba ǁnā ǂûna nî ǀhaoǀhao. Xaweb ge noxopa nî aiǃgû nau haide ǂnâ tsî kōǃgâsa î di ǁîdi tsîna ǂûtani ǁkhā. ǁNās ǁkhās khami da ga ǃgâiǂhôasa māsenxase ra ūǃoa khoe-e ǀhao-ū, o da ge ǁî-e ra hui ǂgao î-i ǃhaese Xristub di ǁkhāǁkhāsabe kai. Xawe ǃgâiǂhôasa ūǃoas ǃaroma ǂhanu tama hâna da ge aiǃgû tsî ra hui ǂgao în mû tae-i ǃaroma i a ǃgâisa Elob xa ǁkhāǁkhāsen tsî Elobmîsa ǂansa (Jhn. 4:​35, 36) Xūn ǁaegu ǀgorasa ūhâs ge nî hui da ǂansa khoe-i a ǂhanu tamas ka io ǂhanu tama hâsa ǃgâiǂhôasa ǁnâusa. Tsîs ge nēs tsîna nî hui da î da ǂan mati da ǁî-e a hui ǁkhāsa. Hā re î da nēsi ǃhoaǃgao tae-e da a dī ǁkhāsa. ǂGuro ǁgamǀhaos ǃnâ i ga khoe-e ǃgâiǂhôas ǃnâ ǃgâiǃgâibasensa a ǁgauo. ǁNās ǂamais tsîna da ge nî ǃhoaǃgao mati da ǁîna a hui ǁkhāsa în aiǃgû tsî Jehovaba ǃoa ǀgū tsî ǁîb di ǃoaba-ao kai.

ELOBMÎS ǃNÂ ǃGÂIǃGÂIBASENSA ŪHÂ KHOENA HUIS

3. Tae-e da nî dī Elobmîs ǃnâ ǃgâiǃgâibasensa ūhâ khoe-e da ga aoǁnâ sîsenni ǃnâ ǀhao-ūo? (1 Korinteǁîn 9:26)

³ ǃGâiǃgâibasensa ūhâ khoe-e da ga aoǁnâ sîsenni ǃnâ a ǀhao-ū, o da ge ǁkhā ǁaeb ai ǁî-e ra hui ǂgao î-i Jehovab xa ǁkhāǁkhāsen tsî ǁîba ǃoa ǀgū tsoatsoa. Nēti ī mâsib ǃnâ da ge tā nî ǃhō-oasen. ǁÎ-e ǂguro ǁgamǀhaos ǃnâ Elobmîs ǁkhāǁkhāsa mâi-aiǃâ tsî ǀhaode ǃoa ǁkhausa.—Khomai re 1 Korinteǁîn 9:26 sa.

4. Aiǁgau-e mā re Elobmîs ǁkhāǁkhās ǃgao ge ǁkhā ǁaeb ai aiǂhumisa khoe-i disa.

⁴ Elobmîs ǁkhāǁkhāsa mâi-aiǃâs. ǀNî khoen ǃhoa-ū da ran ge a ǂhumisa ǁkhā ǁaeb ai Elobmîs ǁkhāǁkhāsa ūǃoasa. Aiǁgause ǀgui Donertaxtsēs ais ge ǂkhamkhoesa Kanadab ǃnâ trolis tawa sī tsî ǀAmosib kōse ǃgâiaǂgao re ti ǀon hâ ǂkhaniba ge ū. Nē trolis tawa ge mâ i ǃgâsas ge ǁîsa ge mîba ǂkhanibas ga ū, os Elobmîs ǁkhāǁkhās tsîna hō ǁkhāsa. Nē khoes ge ǃgâiǃgâibasensa ge ūhâ i tsî ra ge ǃgôade ge mā gu. ǁNā tsēs ǂûs ais ge nē khoesa ǃgâsasa smsa ge xoaba tsî ge dî mâǁae ra Elobmîs ǁkhāǁkhāsa nî tsoatsoasa. ǃGâsas ge naweks ǃnâ ti a mî, os ge ǂkhamkhoesa ge dî: “Mâti io du ǁari hā tama?” Tsî ra ge Fraitaxtsē Elobmîs ǁkhāǁkhās ǀkha ge tsoatsoa. ǁNā ǂkhamkhoes ge ǁîs ǂguro ǀhaosa wekheb ǀams ai ge hâǃnâ tsî ge aiǃgû Jehovab ǀkha ǀgū ǀhōsagusisa omkhâisa.

5. Elobmîs ǁkhāǁkhāsa mâi-aiǃâs ǀkha î tae-e hui da ǁkhā? (Ai-īsiga mû re.)

⁵ Ama as ge hoa khoen ǀhao-ū da ran ǁnā ǂkhamkhoes khami Elobmîs ǁkhāǁkhāsa ūǃoa tidesa. ǀNî khoen ge ǁaeroba ǂhâ hâ în ǃgâiǃgâibasensa omkhâi tsoatsoa. ǀNîsi da ge khoe-i ǃgâiǃgâibasensa ūǃnâ hâ xū-i xa nî ǁgam tsoatsoa. Xawe da ga ǃgâi mûǂui ǀgauba ǁnā khoe-i ǃnâ ūhâ tsî ǃgâiǃgâibasensa ǁgau ǀgara, o i ge ǁî-e ǁaerob khaoǃgâ Elobmîs ǁkhāǁkhāsa a tsoatsoa ǁkhā. Tae-e da a mî ǁkhā Elobmîs ǁkhāǁkhāsa da ga mâi-aiǃâo? Hā re î da kō Elobmîs ǁkhāǁkhāsa mâi-aiǃâs ǃnâ ǃgâi ǂansa ǃgâsan tae-e ra mîsa.

6. Tae-e da a mî ǁkhā î da khoe-e hui î-i mûǂan Elobmîsa ǁkhāǁkhāsens ǁî-i ǃaroma a ǃgâisa?

⁶ Aoǁnâ-aon tsî aimâba-aon dîhe ge Elobmîs ǁkhāǁkhāde tsoatsoas xan ge ra ǁguiǃā, ǀnî ǃhūgu ǃnâ î sao ra mîde sîsenūhe tamasa Elobmîs ǁkhāǁkhāsats ga mâi-aiǃâo. Aiǁgause “ǁkhāǁkhās,” “Elobmîs ǃhoaǀhaodi” tamas ka io “ǁkhāǁkhā du.” Xawen ge ra mî sao ra mîdi ǃgâi sîsenǂuiba ūhâsa aiǁgause “ǁgamǀhaos,” “ǃhoaǀhaos” tsî “Elobmîsa ǂans.” Khoe-i sadu ǀkha ǁkhapa nî ǃhoasa du ga ǂhâbao du ge ǀnîsi sao ra xū-e a mî ǁkhā: “Kaise î ge a buruxa Elobmîs ǃnâ î ûib di ǂhâǂhâsa dîde ra ǃereamhesa. Tamas ka io Elobmîs ge gagasi ǂkhanis ǀguisa ī tama hâ xawe hoaǃnâ-aixa huib tsîna ūhâ.” Tsî du ge a ǀaro ǁkhā: “ǃNubu ǁaeb ǃnâ du ge (10-15 haigu) sadu ûib ǃnâ hui du ǁkhā xū-e a ǁkhāǁkhāsen ǁkhā.” “Mâ wekheb hoaba hâ” ti hâ mîsa sîsenūs ge ǂhâbasa tama hâ, nēs khoena ǁgarihen ra khami a tsâ kai ǁkhā xui-ao.

7. ǀNîna ǂgurose Elobmîs amaba mâǁae ge ǁnâuǃā? (1 Korinteǁîn 14:​23-25)

⁷ ǁÎna ǀhaosa ǃoa ǁkhau. Apostel Paulub ǁaeb ǃnân ge ǀnîna Elobmîs amaba ge ǁnâuǃā, Xristeǁî ǀhaoden ge hâǃnâ tsoatsoao. (Khomai re 1 Korinteǁîn 14:​23-25 sa.) ǁKhā xū-i ge nētsēs tsîna a ī ǁkhā. ǂGuin ge ǀhaoden ga hâǃnâo, ǃhaese ǀgū ǀhōsagusisa Jehovab ǀkha ra omkhâi. Mâǁae du ǁîna nî ǁkhau? ǀAmosib kōse ǃgâiaǂgao re ti ǀon hâ ǂkhanis ge 10ǁî ǁkhāǁkhāǃâs ǃnâ ra ǁgau mâǁae du ǁîna a ǁkhau ǁkhāsa. Xawe î ge ǂhâbasa tama hâ ǁnā ǁaeb kōse du nî ǃâusa. ǂGuro ǁgamǀhaosa xu du ge khoe-e wekheb ǀams ai hâ ǀhaosa ǃoa a ǁkhau ǁkhā. Tsî du ge ǀnîsi ǁî-e māhe nî ǃhoas xoaǂams tamas ka io ǃKhē xu ǂgō-omma xu ra mâǂoaba du xū-e a mîba ǁkhā.

8. Khoe-e da ga ǁkhau, o da tae-e sida ǀhaodi xa nî mîba? (Jesajab 54:13)

⁸ ǃGâiǃgâibasensa ra ǁgau khoe-e du ga ǀhaode ǃoa ǁkhauo, ǁî-e ǁguiǃāba re mati i sida ǀhaode ǁî-i ǁnaeti hâ kerkhegu di ǀgauba xu ra ǀkharasa. Elobmîsa ra ǁkhāǁkhāsen khoes ge ǃKhē xu ǂgō-ommi ǁkhāǁkhāǃâsa ǂguroǃnās ase hâǃnâ os ge ǁîsa ra ǁkhāǁkhā ǃgâsasa ge dî, “ǃKhē xu ǂgō-omma ra ǃhoaǃgao ǃgâsaba hoa khoen ǀonde a ǂan?” ǃGâsasa ge ge ǁguiǃā sida hoa da ra dītsâsa naun ǀonde ǀhaohâb ǃnâ ǂansa, sida omaris ǁanin ǀonde da a ǂan khami. Elobmîsa ra ǁkhāǁkhāsen khoes ge ge mî, ǂgui khoen ǁîs kherkheb ǃnâ ǀondi ai ǂangu tamasa. ǁNās khami î ge sida ǀhaode ǂgui khoena a ǀasaba. (Khomai re Jesajab 54:13 sa.) ǀHaode da ge ra hâǃnâ î da Jehoavaba ǃoaba, ǁîba xu ǁkhāǁkhāsen tsî ǂkhâǃnâgu. (Heb. 2:12; 10:​24, 25) ǁNās ǀkha î ge sida ǀhaode ǃamku ǀgaub ǃnâ ra dīhe î da ǁkhāǁkhāsen ǁkhā tsî î ge ǃhaoǃnâbe ǁnaetiga ǃkhōǂgā tama hâ. (1Kor. 14:40) Sida ǃoaba ǃkhaigu ge ǀgui ǃgupu tsî ǃamku ǀgaub ǃnâ omhe hâ î da ǂhanihe tama hâse ǁkhāǁkhāsen ǁkhā. ǀKhā-e da ǁhûi tama amaga da ge ǂgīǂgōsi xūn xa ǃhoa tsî ǂkhaba ǃhoa ǀgaugu ǃnâ ǁhao tama hâ. Kaise î ge nî ǃgâi Elobmîsa du ra ǁkhāǁkhā khoe-e Tae-e gaosib ǀhû-omi tawa ra ī? ti ǀon hâ vidioba ǁaeb aiǃâ ǁgausa. ǁNā ǀgaub ǃnâ î ge ǁî-e a ǃâubasen ǁkhā tae-i nî īsa.

9-10. Khoe-e da ga sida ǀhaode ǃoa ǁkhau, o da tae-e ǁî-e a mîba ǁkhā î-i tā ǃao? (Ai-īsiba mû re.)

⁹ ǀNî khoen ge ǀhaode hâǃnâsa xu ra ǃkhō-oasen, ǃaon ra xui-ao, sida ǀnîsi nî ǂgansa în Jehoavab ǃoaba-ao kai. ǁÎ-e mîba re sari-aona ǃkhōǃoas xa da kaise ǃgâibahesa. Xawe da ǁî-e ǁgari tama hâsa î-i sida ǀapeǂhumis di ǃâ kai tamas ka io ǀhaos ǃnâ ǁhao. Omaridi tsîn ge ra ǁkhauhe, ǀgôaron tsîna ǃkhōǂgā hâse. Sida ǀhaodi tawan ge ǀgôana ǀguri ǁkhāǁkhāhe tama hâ. Xawen ge ǁgûn tsî ǀgôan tsîna ǀguipa ǂnû tsî ra ǁkhāǁkhāsen. Nē ǀgaub ǃnân ge ǁgûna a ǂan ǀgôan ham-i ǀkha hâsa tsîn tae-e ra ǁkhāǁkhāsensa. (Deu. 31:12) Sida ǀhaodi tawa î ge mari-e aohe tama hâ. Xawe da ge Jesub mîmāsa ra sao mî rasa: “Matare-i ose go ge hō xuige matare-i ose mā.” (Mat. 10:8) Khoe-i tsîna du ge nî mîba ǁî-i ǀgapi marisa ra ǂgan sarana ana tsî nî hās ǂhâbasa tama hâsa. Elob ge khoe-i di ǂgaoba a ǂan tsî khoe-i ǃauga ra mûsen ǀgaub ai kō tama hâ.—1Sam. 16:7.

¹⁰ Khoe-i ga sida ǀhaode hâǃnâo, ǁkhā du a i hoa-e dī re î-i ǁkhoreǁharesase tsâ. ǁÎ-e du ge ǀhaohâb ǃûi-aogu tsî nau ǃgâsan ais tsîna a mâi-aiǃâ ǁkhā. ǃGâsan ǁî-e khoexaǃnâsiba ra ǁgausa î ga hōǃâ os ge nēsa ǀnîsi a ǂgae î ǁkhā î-i ǁkhapa oaǀkhī. ǀHaos tawa î ga Elobmîsa ūhâ tama io du ge ǁî-e hui tsî ǁgau ǁkhā mati i ǃhoa-aob ra mā xoade sao-ai ǁkhā ǀgauba.

ELOBMÎS ǁKHĀǁKHĀS GA TSOATSOAHE OS?

11. Mati du ǁgau ǁkhā Elobmîsa du ra ǁkhāǁkhā khoe-i ǁaeba du ra ǃgôaǃgâsa?

¹¹ Tae-e da ǂâis ǃnâ nî ūhâ khoe-i ǀkha da ga Elobmîs ǁkhāǁkhāsa dīo? Elobmîsa du ra ǁkhāǁkhā khoe-i ǁaeb tsî dī î ra xūna du ra ǃgôaǃgâsa ǁgau re. Aiǁgause Elobmîs ǁkhāǁkhāsa du nî dī ǁaeba du ga mîǁguio, ǁnā ǁaeb ai sī re, khoen ga sadu ǁanǁhuib ǃnâ ǁaeba ǃgôa tama ī xawe. ǂGuroǃnās ase du ga Elobmîs ǁkhāǁkhāsa dī, o nēsa ǃnubuse ūhâ re. Elobmîs ǁkhāǁkhāde ǂgui khoen ǀkha ra dī ǃgâsan ge ra mî kaise i a ǃgâisa Elobmîs ǁkhāǁkhāsa ǃnubuse ūhâsa. Khoe-i ga ǃnāsase ǁnâu ǂgao xawe. Kaise a ǂhâǂhâsa xū-i ge, tā kaise ǃhoa. Mā-am re î-i Elobmîsa du ra ǁkhāǁkhā khoe-e ǁgâiǂuisen.—ǂKhm. 10:19.

12. Elobmîs ǁkhāǁkhāsa da ga tsoatsoa, o da tae-e nî mîǁgui?

¹² Khoe-e da ga Elobmîs ǁkhāǁkhāsa mā tsoatsoa, o da ge tsoatsoasa xu ǁî-e nî hui î-i Jehovab tsî Jesub tsîna ǂan tsî ǁîkha ǀnam tsoatsoa. Nēsa dīs ǃnâ-ū da ge ǁîna ra ǁgau Elobmîs tae-e ra mîsa tsî sida ra ǂâi ǀgaub ose. (ǃNǃkh. 10:​25, 26) Apostel Paulub ge ǃnāsa ǁaeba ǁkhāǁkhāb gere o ǁîb ǁkhāǁkhāsa Jesub Xristub ai gere ǃgaoǃgao. ǁNāb hînab ge Jehovaba a sîb î da ǁîba ǂan tsî ǀnam. (1Kor. 2:​1, 2) Paulub tsîn ge ǃgâsana ge hui în ǁnâuǃā, ǃgâi ǀgauga omkhâis kaise a ǂhâǂhâsasa tsîb ge nēsa “ǃhuniǀurib, ǀhaiǀurib tsî ǃgomǀgausa ǀuidi” ǀkha ge ǀgopeǀnō. (1Kor. 3:​11-15) Nē îsa xūn ge ǂgoms, gā-aisib, xūn ǁaegu ǀgoras ǁkhāsiba ūhâs tsî eloǃaoǃgâxasiba ūhâs tsîna ǃkhōǂgā hâ. (Psa. 19:​9, 10; ǂKhm. 3:​13-15; 1Pet. 1:7) Paulub ǁkhāǁkhā ǀgauba ǁgae tsî Elobmîsa du ra ǁkhāǁkhā khoe-e hui re î-i ǀgaisa ǂgomsa omkhâi tsî ǀgū ǀhōsagusis tsîna sida ǀhomsi ǁGûb ǀkha ūhâ.—2Kor. 1:24.

13. Mati da ǃnūǃnâxasib tsî ǁnâuǃāxasib tsîna nî ǁgau, Elobmîs ǃnâ ǃgâiǃgâibasensa ūhâ khoena da ga huio? (2 Korinteǁîn 10:​4, 5) (Ai-īsiba mû re.)

¹³ Jesub ǁkhāǁkhā ǀgauba ǁgae re ǃnūǃnâxasib tsî ǁnâuǃāxasib tsîna ǁgaus ǃnâ-ū. Tā khoe-e nî tao kai dîna dî. ǁÎ-i ga ǃgombaheo xū-e ǁnâuǃāsa o tā nēs xa ǃhoa ǀgara xawe ǁkhāǁkhāǃâs ǀkha aiǃgû tsî ǀams ai ǁî-i go ǁnâuǃā tama hâ i ǃâba ǁkhapa ǃhoaǃgao. Tā ǁî-e ǁgari î-i Elobmîs amaba ǁnā ǁaeb ai ūǃôa. Xawe ǁî-e ǁaeba mā re î-i nēs xa ǂâiǃgâ tsî ǁî-i ǂâiǀgauba dawa. (Jhn. 16:12; Kol. 2:​6, 7) Elobmîs ge ǂhumi ǁkhāǁkhāde ǀgaisa ommi hîna da ra dīkākā î ǀkha ra ǀgopeǀnō. (Khomai re 2 Korinteǁîn 10:​4, 5 sa.) Elobmîsa da ra ǁkhāǁkhā khoe-i ge gaxuse i gere ǂgom xūna supuse ǁnāxu tide. ǁNā-amaga da ge ǁî-e nî hui î-i ǀasa omsa om. Nēs ge ra ǂâibasen ǁî-e da ge nî hui î-i ǂgomsa Jehovab ǃnâ omkhâi. Nēs ge khoe-e nî hui î-i ǀnai î gere ǂgom xūna ǁnāxu.—Psa. 91:9.

ǀASASE ǀHAODI DAWA RA SĪ KHOENA DA HUI ǁKHĀ ǀGAUB

14. Mati da sida ǀhaodi tawa ǀasase ra ǀkhī khoena nî ǃkhōǃoa?

¹⁴ Jehovab ge ra ǂhâba î da hoa khoena ǀnamxaǃnâ ǀgaub ǃnâ hâ-ū, nēsin ga ǃkharagagu ǃhaodi, matikō mari-en ūhâs tamas ka io ǃkharagagu khaoǃhūga xun ga hā xawe. (Jak. 2:​1-4, 9) Mati da ǀnama ǁnān ǀasase sida ǀhaode ra hâǃnâna a ǁgau ǁkhā?

15-16. Mati da ǀasase ǀhaodi tawa ra hāna hui ǁkhā în ǁkhoreǁharesase tsâ?

¹⁵ ǀNî khoen ge sida ǀhaode ra hâǃnâ în mû tae-i ǁnāpa ra īsa. Tamas ka ion ge ǀkharaba ra hâ khoe-i xa ge ǂkhâǃnâhe în ǀhaosa hâǃnâ. ǁNā-amaga du ga ǀhaos tawa ǀasa khoe-e mûo ǁî-i ǀkha ǃhoa. ǁÎna khoexaǃnâse ǁkhoreǁhare xawe tā ǁîna nî taotao ǀgaub ǃnâ ǁnāsa dī. ǁÎna ǁkhau în sadu ǀkha ǂnû. Sadu Elobmîs tsî ǁkhāǁkhāsen ūhe ra ǂkhanina ǁîn ǀkha ǀgoragu tamas ka io sîsenūn nî ǂkhanina mā nî. Tsî ǀgaugu xa ǂâi ǁî-e du mati sâsase a tsâ kai ǁkhāga. Saali tawa ge sari sī khoeb ge tawede bi ge ǃgâsaba ge mîba nau khoen khamib ana tama amagab ra taosa. ǃGâsab ge ǁîba taotao tamase ge mîba ǀhaode ǃoa da ti ra ana xawe da khoes ǀguisa isa. Nē khoeb ge ǁaerob khaoǃgâ ge ǁāǁnâhe xawe ge ǀuru tama hâ i matib ge ǁnā ǃgâsaba hâ-ū bi ǀgausa. ǂÂis ǃnâ da ge nî ūhâ ǀasase ǃgâiǃgâibasensa ra ǁgau khoen ga ǀhaodi tawa sīo da ge tā ǁîna ra tao kai dîde nî dî.—1Pet. 4:15.

¹⁶ Sida ǀhaodi tawa ra sari khoena da ge ǁkhoreǁharesase ra tsâ kai ǂgao. Aiǁgause da ge ǁîn ǀkha da ga ǃhoa, ǃereamde da ga mā tsî da ga ǀhaodi ǃâga ūhâ tsî Jehovaba ǃoaba tama khoen tamas ka io ǁîn ǂgomdi xa ǃhoa, o da ge nēsa ǃgôasib ǀkha nî dī. ǁÎna nî ǃnôa kai tamas ka io ǁgaise nî tsâ kai mîna da ge sîsenū ǂgao tama hâ. (Tit. 2:8; 3:2) Aiǁgause da ge ǁîn ǂgom ǀgauba ǃgôasiba nî ǁgau. (2Kor. 6:3) ǀHaodi tawa ǃhoade ra mā ǃgâsagu ge ǃgōsase nēsa nî ǃgaoǃgâ. Aiǁgause gu ge Jehovaba ǃoaba tama hâ khoen ǁnâuǃā tama hâ mîdi tamas ka io ǃhoa ǀgauba nî ǁguiǃā.

17. Tae-e da nî dī amab ǃoa “ǂgaimâisana” da ga aoǁnâ sîsenni ǃnâ ǀhao-ūo?

¹⁷ Tsēs hoas ra ǃkharu khami î ge ǁkhāǁkhāsabedīsa kaise a ǂhâǂhâsa, ǁnā-amaga aiǃgû tsî ǁnān ǀamo ûib ǃaroma “ǂgaimâisana” ôaǀgara. (ǃNǃkh. 13:48) ǁNāsa da ga dīo da ge tā nî ǃkhō-oasen ǁîna Elobmîs ǁkhāǁkhāsa mâi-aiǃâ tamas ka io sada ǀhaode ǃoa ǁkhausa. Nēsa dīs ǃnâ-ū da ge ǁîna ra hui “daob ûib ǃoa” garub ai ǃgû tsoatsoasa.—Mat. 7:14.