Elob ǀnammi ge ra mâǀgai

1-2. Mâ ǃgomsinan ge ǂgui Xristeǁîna hōǃâ?

MÛNAN-AI re ǂgaus ǁgaoǁgaosa hurib ǃgabigu ǁaegu hâsa. ǁGao hâ hurib ǃgabigu ǂgausa ra ǂhā mâ ga. ǁNā ǂgaub ge hurib ǃgabigu ra ǂhā ǃkhai-i hoa-e ǃoa nî ī. ǂGaub ai hâ khoe-i ga ankera aoǁnâ tama is kōse. Anker-i ge ǂgausa nî hui is mâǀgai tsî tā ǀgaisa ǂoab ǀkha ǃgombehe.

² ǃGomsiga du ga ǃkharuǃnâ, o du ge sadu tsîna ǀnîsi ǁnā ǂgaub khami a tsâ ǁkhā. Sadu tsâsigu ge ǁaeba xu ǁaeb ǀkha a dawa ǁkhā. ǀNî tsēde du ge Jehovab ǀnammi tsî ǁîb ra hui du sa ra hōǃâ. Xawe du ge saora tsēs ai ra îganǀgē, Jehovaba sadu ǀkha ra ī xū-e ra mûsa. (Psa. 10:1; 13:1) ǀNîsi i ge ǀhōsa-e ǂkhâǃnâ du ra xū-e ra mî tsî du ge ǁaeroba ǃgâise ra tsâ. (ǂKhm. 17:17; 25:11) Tsî du ge ǁaero i khaoǃgâ ǁkhawa ra îganǀgē Jehovab hui du tama hâsa. Tsî du ge ǀnîsis tsîna tsâ ǁkhā Jehovab ǀnam du tama hâsa. Aiǁgause nēti ī mâsib ǃnâ du ga hōsen, o du mati ǁnā ankera a mâi ǁkhā? ǀNî mîdi ǃnâ, mati du ǂgomǃgâsiba nî ūhâ Jehovab ǀnam du tsî nî hui du sa?

3. Psalmdi 31:7; 136:1 ǃnâ ra mîhe ‘hâhâ ra ǀnamma’ tae-e ra ǂâibasen tsî tae-i ǃaroma da mî ǁkhā Jehovab ge ǃgâi aiǁgau ǁnās xa? (Ai-īsiba mû re.)

³ ǀGui ǀgaub ge ǃgomsib ǃnâ du ga hâ, o Jehovab ǂgomǂgomsa ǀnamma ǂâihōsa. (Khomai re Psalmdi 31:7; 136:1 sa.) ǂGomǂgomsa ǀnammi ge nau khoe-e du ūba hâ ǃgam ǀnamma ǃoa ra ǁnaeǁgau. Jehovab ge a ǃgâi aiǁgau ǀnammi tsî ǂgomǂgomsasib diba. Elobmîs ge Jehovaba “ǃnāǂamsa” ǀnamma ūhâse ra ǁguiǃā. (Eks. 34:​6, 7) Elobmîs tsîn ge ra mî Jehovab ‘ǃnāǂamsa hâhâ ra ǀnamma’, ǁnān ǁîba ǀnamna ūba hâsa. (Psa. 86:5) ǂÂiǃgâ re nē xoadi tae-e ra mîsa: Jehovab ge tātsē ǁîb ǂgomǂgomsa ǃoaba-aona ǁnāxuǃnâ tide. ǃGom ǁaegu ǃnâ du ga hâ, o Jehovab ǂgomǃgâsib xa ǂâi re.—Psa. 23:4.

ǂÂIHŌ JEHOVAB GE A ǀNAM

4. Elobmîs ǀnōsa ǁkhāǁkhādi aiǁgaude mā tsî ǁguiǃā re tae-i ǃaroma da ǁîde ra ǂgomsa?

⁴ ǃGomsiba du ga hōǃâ, o du ge Jehovab ǀnammi xa nî ǂâi nēs ge ǀnōsa Elobmîs ǁkhāǁkhāsa tsî î ge nî hui du î du mâǀgai. ‘ǀNōsa Elobmîs ǁkhāǁkhāde’ tae-e ra ǂâibasen? ǀNîsi du ge Elobmîs ǃnâ du gere ǁkhāǁkhāsen amab xa ra ǂâi. Aiǁgause du ge ge ǁkhāǁkhāsen Elob ǀons a Jehovasa. Tsîb Jesuba Elob ǀguise ǃnae hâ ǀgôasa, ǁōhân xu-e a ǀusa, ǃhūbaib nî paradais kais tsî khoen ǀamose ǁnāpa nî ûisa. (Psa. 83:18; Aoǁn. 9:5; Jhn. 3:16; J.ǂHa. 21:​3, 4) Nē ǁkhāǁkhādi amasa du ge ǂgom, o î ge ge supu tama hâ i khoe-i xa ǂkhāhesa nē xūn ǃnâ ǂgomsa. Tae-i ǃaroma? ǁNâuǃā du ge amaga nē ǁkhāǁkhādi a amasa. Jehovab sida mû tamas ka io sida ǀkha ǁae tama ti da ga ǂâi tsî ǁîb ǀnamma ǀnōsa ǁkhāǁkhāsa ase a mû, o i tae-e nî hui da sa hā re î da ǃhoaǃgao.

5. ǁGuiǃā re mati i khoe-e ama tama ǂgomde xu a ǂgōsen ǁkhā ǀgausa?

⁵ Elobmîsa du ge ǂgurose ǁkhāǁkhāsen tsoatsoa, o i ge tae-e hui du î du ama tama ǁkhāǁkhāde xu ǂgōsen? ǀNîsi du ge sadu kerkheb tae-e ra ǁkhāǁkhās tsî Elobmîs tae-e ra ǁkhāǁkhās tsîna gere ǀgopeǀnō. ǀGui aiǁgausa ǃgaoǃgâ re, ǀnîsi du ge gere ǂgom Jesub a Hoaǀgaixa Elosa. Elobmîsa du gere ǁkhāǁkhāsen khami du ge gere dîsen ‘ǁnā ǁkhāǁkhāsa a ama?’ Elobmîs amaba du ge ôaǃnâs khaoǃgâ o du ge hî-î ti ge ǃeream ǁkhā i. Ama tama ǁkhāǁkhās xa du ge nēsi Elobmîs amaba ra ǂgom: Jesub “hoaraga kurus di ǂguroǃnaesab” tsî “ǀguise ǃnāe hâ ǀGôab Elob” disa. (Kol. 1:15; Jhn. 3:18) Ama as ge ǂhommi ǁkhāǁkhādi ge a ǀgaisa tsî i ge a ǃgom ǁkhā ǁîde ǁnāxusa. (2Kor. 10:​4, 5) Xawe du ge ǂhommi ǁkhāǁkhāde ǁnāxū ǁkhā-i, o du ge ǁîde ǃoa ge oa tama hâ i.—Fil. 3:13.

6. Tae-i ǃaroma du ǂgomǃgâsiba ūhâ Jehovab ‘ǂgomǂgomsa ǀnammi’ ǀamosib kōse nî hâhâ sa?

⁶ ǁKhā xu-e du ge a dī ǁkhā Elobmîs Jehovab ǀnammi xa tae-e ra ǁkhāǁkhās ǃaroma. ǃGomsiga du ga hōǃâ tsî Jehovab ǀnam du sa îganǀgē o dîsen re, ‘Ti ǂâiǀgauba a ǃgāsa? Jehovab ǀnam dusa du ga îganǀgē o Psalmdi 136:1 tae-e ra ǁkhāǁkhāda sa sadu ǂâiǀgaub ǀkha ǀgopeǀnō re. Jehovaba tae-i ǃaroma ǁîb ǀnamma ǂgomǂgomsa tamas ka io hâhâ ra ti ra ǁguiǃā? Tae-i ǃaroma i ǁîb hâhâ ra ǀnamma Psalmdi ǃnâ 26 ǃnāde ra ǁguiǃâ-e? ǃHoaǃgao da go khami Jehovab ǂgomǂgomsa ǀnammi ǁîb ǃoaba-aon ǃoagub ūhâb ge ǀnōsa Elobmîs ǁkhāǁkhā. Nēs ge a ǀgui, supuse du ge ǂgurose a ūǃoa ǁkhāǁkhādi ǀkha. Jehovab xū tama tamas ka io ǀnam du tama ti hâ ǂâiǀgaub ge ama tama. ǂHommi ǁkhāǁkhāde xu du ge ǂgōsen khami ǁnati ī ǁgai ǂâiǀgauba xu ǂgōsen.

7. Jehovab ǀnam du ǃkhaisa ra ǁgau xoadi aiǁgausa mā re?

⁷ Elobmîs ge ǂgui ǁgauǁgaude ūhâ ǁgau ra de Jehovab ǀnam dasa. Aiǁgause Jesub ge ǁîb saosabena ge mîba: “Sago ge ǂgui ǀhomaniron xa ǃnāsase a ama-ai.” (Mat. 10:31) Jehovab ge ǁîb khoen ǃoa ge mî: ‘Tita ge ǀgaiǀgai tsî nî hui tsi, tita ge ti ore ra amǀkhāb ǁôab ǀkha nî ǁkhauba tsi.’ (Jes. 41:10) Nēba ra sîsenūhe mîdi a ǃgāsa ǀgausa ǃgaoǃgâ re. Jesub ge mî tama nēs xa du ge ‘ǀnîsi a ǀō-aisa.’ Tsî Jehovab ge mî tama hâ ‘tita ge ǀnîsi nî huitsi’ ti. Xawe ǁîkha ge ra mî: ‘Sats ge ǀō-aisa tsî tita ge nî huitsi.’ Jehovab ūba du hâ ǀnamma du ga îganǀgē o ǃgomsiba du ra hoǃâ ǁaeb ai, o di ge nē xoade ǂgomǃgâsiba nî mā du Jehovab kaise a ǀnam dusa. Nē xoadi ge amaba ra ǁgau, ūdu hâ îganǀgēn xa du ga Jehovaba ǃoa ǀgore tsî ǂōrisase nē xoadi xa ǂâiǃgâ, o du ge saora mîde a ǃkhō-am ǁkhā 1 Johaneb 4:16: “Tsî da ge sida ǂan tsî ge ǂgom, ǀnammi Elob sida ūba hâba.”a

8. Tae-e du a dī ǁkhā Jehovab ǀnam du sa du ga îganǀgē o?

⁸ Tae-e du a dī ǁkhā ǀnî ǁaegu ai du ga îganǀgē o Jehovab a ǀnam dusa? ǁNā tsâsiga Jehovab xa du a ǂan-i ǀkha ǀgopeǀnō re. Amab ge ra hâhâ xawe tsâsigu ge ra dawa. Jehovab ūba da hâ ǀnammi Elobmîs ǃnâ da ra ǁkhāǁkhāsen i ge a ama. ǂGom tama da ga i Jehovab ǀnam dasa, o da ge ǁîb di ǂhâǂhâsa ǀgauba mûǂan tama hâ, nēb ge ǁîb ǀnamma.—1Jhn. 4:8.

JEHOVAB ŪBA DU HÂ ǀNAMMI XA ǂÂI

9-10. Johaneb 16:​26, 27 ǃnâb ge Jesuba “ti Îb sago a ǀnam” ti a mî, ob ge tae-i xa gere ǃhoa? (Ai-īsiba mû re.)

⁹ Jehovab ǀnammi xa da ge ǃnāsase a ǁkhāǁkhāsen ǁkhā. Jesub ge ǁîb saosabena mîba mîde ǃgaoǃgâsa xu: “Ti Îb sago a ǀnam.” (Khomai re Johaneb 16:​26, 27 sa.) Jesub ge nē mîde ge mî tama hâ i, îb ǁîb ǁkhāǁkhāsabega ǃgâise tsâ kai. Nē mîdi aiǃâ hâ ǁaraǃāde da ga khomai, o da ge ra ǁkhāǁkhāsen Jesub ge ǁîb ǁkhāǁkhāsabe gu ra tsâ ǀgausa ǃhoaǃgao tama hâ isa. Xawe Jesub ge ǀgores xa gere ǃhoa.

¹⁰ Jesub ge ǁîb ǁkhāǁkhāsebega ge mîba î gu ǁîb ǃnâ-ū ǀgore, ǁîb ǃoas ose. (Jhn. 16:​23, 24) Kaise î ge ge ǂhâǂhâsa-i ǁîna ǁnāsa ǂansa. ǁÎb khâis khaoǃgâ gu ge ǀnîsi ǁkhāǁkhāsabega gere tsâ Jesuba ǃoa ǀgoresa. Jesub ge ǁîgu ǀhōsa-i amaga gu ge ǀnîsi ti gere tsâ. ǁÎgu ge ǀnîsi ga ǂâi hâ ǁîb ǀnam gu, amagab ǁîgu ǀkhomade ǃgâ tsî ǁîb ǁGûb ai ǁîga huiba nî ǂganba sa. Xaweb ge Jesuba ǁîga ge mîba îgu tā ǁnā ǀgaub ǃnâ ǂâi. Tae-i ǃaroma? ǁÎb ge ǁîga ge mîba: “Ti Îb sago a ǀnam.” ǁNāb ge Elobmîs ǀgores xa ra ǁkhāǁkhā amab di ǃâba. Nēs mati sado a tsâǀkhā ǁkhā ǀgaub xa ǂâi. Sadu Elobmîs ǁkhāǁkhās ǃnâ du ge Jesuba ǂan tsî ǁîba ge ǀnam tsoatsoa. (Jhn. 14:21) ǂGurokham ǁaeb ǁkhāǁkhāsaben khami ǂgomǃgâsib ǀkha du Eloba ǃoa a ǀgore ǁkhā, ‘ǁîb sado a ǀnam’ ǃkhaisa du a ǂan amaga. Nē mîdi ǃnâ du ra ǂgomsa du ge ra ǁgau, ǃnās hoasa du ga Jehovaba ǃoa ǀgore o.—1Jhn. 5:14.

TAE-I RA ÎGANǀGĒ KAI DU SA ÔAǃNÂ

11. ǁGâuaba tae-i ǃaroma nî ǂkhî Jehovab ǀnam dasa da ga îganǀgē tsoatsoa o?

¹¹ Tae-e a ǃaroma ǁkhā îganǀgēsa Jehovab a ǀnam dasa? ǀNîsi du ge a ǃeream ǁkhā ǁGâuaba xu ra hā tsîs ge ǁnā ǃereamsa ǀnî amaba ūhâ. ǁGâuab ge “mâ-eb nî hapu ǃkhaisa ra ôa” tsîb ge ra ǂhâba î da Jehovab a ǀnam da ǃkhaisa îganǀgē. (1Pet. 5:8) ǁNās ǂam-aib ge Jehovab ǀnamma ǁîba ge ǂkhâǃnâ îb xoremariba mā. ǁGâuab ge ra ǂhâba î da nē ǀkhaeba da anu tama khami tsâ. (Heb. 2:9) Jehovab ǀnamma da ga îganǀgē, o ham-e nî ǂkhî? ǁGâuab ge nî ǂkhî. Tsî ham-e nî ǃgâiaǂgao ǃgomsin ǃnâ da ga mâǁnâsen tsî da ga Jehovaba ǃoaba ǀû-o? ǁGâuab ge nēsa ra ǂhâba. ǁGâuab ge ra ǂhâba î da ǂâi Jehovab ǀnam da tama hâsa. Xawe ǁnās ge ama tama. Jehovab ge ǁGâuaba ǀnam tama. ǁGâuab mâǂoa ra ‘ǀhôagao ǀapedi’ ǁîb ra sîsenu di ge, Jehovab ǀnam da tama tsî ūǃoa da tamasa. (Efe. 6:11) Mûǂan da ga o sida khākhoeb tae-e ra dī ǂgaosa, o da ge a mîǁgui ǁkhā “ǁGâuaba mâǃoasa.”—Jak. 4:7.

12-13. ǀOasa kurus ǀkha da ǃnaehe tamasa mati a ǃaroma ǁkhā Jehovab ūba da hâ ǀnamma îganǀgēsa?

¹² ǀNî xū-i tsîn ge hâ îganǀgē kai da ǁkhā a-e Jehovab a ǀnam dasa. ǁNā-e a tae? ǀUmi da ge ǁoreb. (Psa. 51:5; Rom. 5:12) ǁOreb ge khoen tsî Elob ǁaegu hâ ǀhōsagusisa ge khôa. Nēs ge sida ra ǂâi, tsâ ǀgaub tsî sida ǂurusib tsîna ge ǁgaiǁgai.

¹³ ǁOreb ge sida tsâsiga ǁgai ǀgaub ǃnâ ge tsâǀkhā. Nēs ge ra ǃaroma î da ǀhapitsâsen, ǂâiǂhânsen, ǃnora-ose tsâ tsî taob tsîna hōǃâ. ǁOreba da ga dī o da ge ǁnā tsâsiga a hoǃâ ǁkhā. Nē tsâsigu ge a tsoatsoa ǁkhā ǁore-ao da asa da ga mûǂano. Elob ge khoen nî nē ǀgaub ǃnâ īse ge kuru tama hâ i. (Rom. 8:​20, 21) Audos ǀnūs ga khôa, o i ge kurubahes ge ǃaromasa sîsenǂui tama. ǁNās ǁkhās khami da ge ǀoasa kurusa ūhâ tama tsî da ge kurus di ǃaromasa dīǀoaǀoa tama hâ. ǁNās ǀkha da ge buru tama hâ ǀnî ǁaegu ai da ga Jehovab a ǀnam dasa îganǀgē o. ǁNās ga ī o da ge ǂâis ǃnâ nî ūhâ, Jehovab ge ‘kai tsî ǃaohesa anu . . ǁîba ǀnam tsî . . mîmāde’ ra ǁnâuǀnamnab ǂgomǂgomsase nî hâ-ū.—Neh. 1:5.

14. Xoremarib xa ǂâiǃgâsa mati a hui da ǁkhā î da îganǀgē ǀû Jehovab a ǀnam da ǃkhaisa? (Romeǁîn 5:8) (Boksis “‘ǁOreb di ǂgaeǂhapus’ ǃoagu ǁkhaubasen” ti hâsa mû re.)

¹⁴ ǀNî ǁaega da ge Jehovab ǀnamma da anu tama khami ra tsâ. Ama as ge Jehovab ǀnamma da anu tamasa, nēs ǀkha i ge ǁîb ǀnamma ra ǀō-aisa kaihe. Sida ǁkhāsiba xu da ge Jehovab ǀnamma hō tama hâ. Xaweb ge Jehovaba xoremarib ǁguibasa ge mā, îb sida ǁorena ǀûba ǁkhā. (1Jhn. 4:10) ǂÂihō re Jesub ge ǁore-aonab nî sâuse ge hā, ǀoasa kurusa ūhâ khoen ose. (Khomai re Romeǁîn 5:8 sa.) Khoe-i xare i ge xū-e ǂhanuse dī hō tide tsîb ge Jehovab ǁnā-e da nî dīsa ǃâubasen tama hâ. ǁNâuǃā da ga sida ǀoasaoǃnâ kurus Jehovab ūba da hâ ǀnammi xa ra îganǀgē kai dasa, os ge ǁnāsa nî hui da î da nē ǂâiǀgaub ǃoagu ǃkham.—Rom. 7:​24, 25.

ǂGOMǂGOMSASE HÂSA ǁHÛI

15-16. Jehovab ǃoagu da ga ǂgomǂgomsase hâ, o da mâ ǂgomǃgâsiba nî ūhâ? (2 Samueli 22:26)

¹⁵ Jehovab ge ra ǂhâba î da ǃgâi mîǁguiga dī tsî ‘ǁîb ǃoa ǂgomǂgomsase’ hâ. (Deu. 30:​19, 20) Nēsa da ga dī o da ge ǂgomǃgâsiba a ūhâ ǁkhā, ǁîb sida ǃoagu ǂgomǂgomsase nî hâsa. (Khomai re 2 Samueli 22:26 sa.) Jehovab ǃoa da ga ǂgomǂgomsase hâ ǀgara, o da ge ǂgomǃgâsiba ūhâ ǁîb nî hui da sa î da ǃgomsiga mâǃkharu.

¹⁶ ǃHoaǃgao da go khami da ge ankeri khami nî tsâ ǃgomsina da ga nēsi tsî hānîǁaeb ǃnâ hōǃâ o. ǂAn da ge a Jehovab a ǀnam da tsî nî hui da sa. Elobmîs ge ǁnāsa ra ǁkhāǁkhā. Jehovab uba da hâ ǀnamma da ga îganǀgē xawe da ge tā ǁnā ǁaeb ai da ra tsâ ǀgaub ai ǂâisa nî ǂnûi. Xawe da ge ǁîb ǀnammi xa da a ǂan-e nî ǂâihō. Elobmîs da mî khami da ge Jehovab ǂgomǂgomsa ǀnammi ǃnâ ǂgomǃgâsiba nî ūhâ ǀgara.