Sadu ǀgorede du ǃgâiǃgâi ǁkhā ǀgaub

1-2. (a) ǀGore da ga o tae-e ǁkhae da ǁkhā Jehovaba mîbasa mati da ra tsâsa? (b) Mati da a ǂan Jehovab ǂōrisase sida ǀgorede ra ǃgâsa?

ǀNÎSI du ra tsâ sadu ǀgores ǃnâ du ǁkhā xū-i ǀgui-e ra mîsa tsî Jehovaba tsâ du ra ǀgauba mîba tamasa? Nēs ge hoa da ǀkha a īǁkhā. Sada ûib ǃnâ da ǂgui xūna ra dī amaga da ge ǀnî ǁaega ǃnubu ǀgoredi ǀguide ra dī tsî ra ǀuru gaxu ǀgorede dīsa. Tamas ka io i ge ǀnî ǁaega ǃgomba da Jehovaba mîbasa mati da amase ra tsâsa. Tsâ ǁkhā da ge a anu tama da hâsa ǁîb ǀkha ǃhoasa.

² Elobmîs ge ra ǁkhāǁkhā da Jehovab ǃoa ǂhâǂhâsa i ge ǂgaoba xu ǀgoresa, sida ra ǁgâiǂuisen ǀgaub ose. ǁÎb ge “ǃgamǃgamsensan di ǀgoresa” ra ǁnâu. (Psa. 10:17) ǁÎb ge ǃgaoǃgâxase sida ra mî xun hoana ra ǃgâ sida ǀkhab ǁae hâ amaga.—Psa. 139:​1-3.

3. Mâ dîde da nē ǁkhāǁkhāǃâs ǃnâ nî ǃhoaǃgao?

³ Tae-i ǃaroma da hārase nî tsâ Jehovaba ǃoa da ga ǀgore o? Mati da Jehovaby ǀgūse nî hā-u da ǀgaub ǃnâ nî ǀgore? Tae-e da Jehovab ǃoaba-aon ǀgoredi Elobmîs ǃnâ xoamâisade xu ǁkhāǁkhāsen ǁkhā? Tsî ǁnā ǀgorede mati hui da ǁkhā î da sida ǀgorede ǃgâiǃgâi? Tae-e da nî dī ǂâiǂhânsen tsî da ga ǀū o mati da Jehovaba ǀgores ǃnâ nî mîbasa? Hā re î da ǁnā dîdi ǃereamde ǃhaoǃgao.

TĀ ǃAO JEHOVABA ǃOA ǀGORESA

4. Tae-e hui da ǁkhā î da ǂgomǃgâsib ǀkha Jehovaba ǃoa ǀgore? (Psalmdi 119:145)

⁴ ǁNâuǃā da ga o Jehovab ǃgâi ǀhōsa, ǃgâiba sida ra ǁkhoreba o da ge hārase ǁîba ǃoa nî ǀgore. Tsî ǁîba tsâ tsî da ra ǂâi ǀgauba nî mîba. Psalmdi 119 xoa-aob ge dītsâ tsî ǃgâi ǀhōsagusisa Jehovab ǀkha ge ūhâ i. ǁÎb tsîn ge ǃgomsina gere hōǃâ. ǀNî khoen ge ǂhumiba ǁîb xa gere mî. (Psa. 119:23, 69, 78) ǀNî ǁaenab ge gere ǂkhabuǂâi dīsāb gere o. (Psa. 119:5) ǁÎb ge ge ǃao tama hâ i, ǁîb ǂgaoba Jehovaba ǃoa ǁkhowa-amsa.—Khomai re Psalmdi 119:145 sa.

5. Tae-i ǃaroma da tā ǃgâi tama mâsiga nî mā-am î gu ǁkhae da ǀgoresa xu? ǁGuiǃā re.

⁵ Jehovab ge ra ǂhâba în ǁnān hîna ǁgai xūna ge dīn tsîna ǁîba ǃoa ǀgore. (Jes. 55:​6, 7) Tā da ge nî mā-am î-i ǃgâi tama tsâsiga ǃkhō-oa da ǀgoresa xu. Aiǁgause du ge ǃāba ra ǃgâu ǂgao sadu ra hâ ǀkhāba ǃoa. O du khoe-i ai huiba ǂgan tide î du huihe? Tao tsî du nî ǁnāxu, sadu huiba ǂhâ hâsa du ǁgau ǂgao tama amaga? Hî-î. ǁNās ǁkhās khami da ga ǀnî ǁaega gā hâse tsâ tamas ka io ǁore, o da ge ǂgomǃgâsib ǀkha Jehovaba ǃoa nî ǀgore.—Psa. 119:​25, 176.

MATI DU SADU ǀGOREDE NÎ ǂHÂǂHÂSA KAI

6-7. Tae-e hui da ǁkhā î da Jehovaba ǀgores ǃnâ tsâ da ra ǀgauba mîba? Aiǁgausa mā re. (ǀGamirosa mû re.)

⁶ Jehovaba da ga ǀgores ǃnâ tsâ tsî ǂâi da ra ǀgauba mîba o da ge ǁîb ǀgūse nî hâ. Tae-e hui da ǁkhā î da nē ǀgaub ǃnâ ǀgore?

⁷ Jehovab ǀgaugu xa ǂâi.a Jehovab ūhâ ǃgâi ǀgaugu xa da ga ǂâiǂâiǃnâsen, o i ge nî supuba da ǁîba tsâ tsî ǂâi da ra ǀgauba mîbasa. (Psa. 145:​8, 9, 18) Kristines aiǁgausa ǃgaoǃgâ re, ǃgâsas ǂkhabaxa dadasaba ge ūhâ isa. ǁÎs ge ra ǁguiǃā: “Jehovab ǀkha ǁgûb ase ǃhoas ge ge supuba te tama hâ. ǀNî ǁaegas ge xu tamase gere tsâ tsî Jehovab ǁîsa nî ǀnam ǀûsa ǁîs dīsān ǃaroma.” Mâǀgaub Jehovab diba ǁîsa ge hui? ǁÎs ge ra mî: “Jehovab ǂgomǂgomsa ǀnammi ge tita ǂgomǂgomsase ra tsâ kai. Tita ge a ǂan ǁîb ge ti ǃoma ǁnāxuǃnâ tide. ǀNî dīsāte ta ga dī xawes tsînab ge ǀnam te tsî nî hui te. Jehovab a ǀnamxaǃnâ ǀgaub xa ta ga ǂâi, o i ge supuba te ǁîb ǀkha ǂkhî kai te ra tsî ǂâiǂhânsen kai te ra xūn xa ǃhoasa.”

8-9. Tae-i ǃgâiba du nî hō, ǀgore du nîs aiǃâ ǂâiǃgâsa? ǁGuiǃā re.

⁸ Mî du nî i xa ǂâi. ǀGore du nîs aiǃâ du ge ǀnî dîde nî dîsen. Aiǁgause: ‘Mâ ǃgomsiga ta nēsi ra hōǃâ? Khoe-e hâ ǀûba ǁkhā ta a-e? ǀAsa ǃgomsiba ta ra hōǃâ Jehovab huiba da ǂhâhâsa î ta mâǀgai?’ (2Gao. 19:​15-19) ǂÂi-oa matib ge Jesuba ǁkhāǁkhāda sa î da ǀgore tsî ǂâi tae-e da nî mîsa ǀgores ǃnâ.—Mat. 6:​9, 10.

⁹ Aliska ti ǀon hâ ǃgâsas ge ǁnâuo ǁîs aob ǂkhûs kankersa ūhasa, o i ge ǁîsa ge ǃgomba i ǀgoresa. ǁÎs ge ra ǂâihō: “ǀGore tsoatsoas gere o tae-es nî ǂâi tsî mîsa.” Tae-e ǁîsa ge hui? ǁÎs ge ra ǁguiǃā: “Tita ge ǀoro ǁaeba ū tsî ti ǂâide ra ǀguiǀgui, nē i ge ge hui te î ta tā tita xa ǀgui ǀgore. Nēsa ta ga dī, o i ge ra huite î ta ǃnomsa tsî Jehovaba ǃkharagagu xūn xa mîba.”

10. Tae-i ǃaroma da gaxuse ǀgoresa nî dītsâ? (Ai-īsiga mû re.)

¹⁰ ǀGore du ga o ǁaeba ū. Ama as ge ǃnubu ǀgores Jehovab ǀgūse a ǀkhī-ū da ǁkhāsa. Xawe gāxu ǀgores ǃnâ da ge ǀnîsi Jehovaba ǃnāsa xūna a mîba ǁkhā, tsâ da ra ǀgaub xa.b Aliskas aob Eliab ge ra ǃkhō-am: “Xawe ta ge Jehovab ǀgūse ra tsâ gāxuse da ga ǀgore o. Jehovab ge ǃnuǃnâxasib ǀkha ra ǃâu, î ta ǀgore toa ǁnās ǀkha ta ge ti ǁaeba a ū ǁkhā.” Nēsa dītsâ: ǁAeb tsî ǃkhais ǀgore ai ǁkhāts asa ôa re ǂhani-e tamase. ǀNîsits ge gaxuse tsî ǃgarises tsîna a ǀgore ǁkhā. Nē ǀgaub ǃnâ ǀgoresa da ge tsēs hoasa dītsâ ǁkhā.

ELOBMÎS ǃNÂ HÂ ǀGOREDI ǂGAOBA XU GE HÂ-I DI

11. Mati da ǃgâiba nî hō Elobmîs ǃnâ ǂgaoba xu hâ ǀgorede da ga ǂâi-oa o? (Boksis “ǁÎn ra tsâ khami du ra tsâ?” ti hâsa mû re.)

¹¹ ǃGâiba du ge ǀama ǁkhā ǂâi-oa du ga ǂgaoba xu hâ ǀgoredi, ǃanu ǁnaetsanadi tamas ka io Elobmîs ǃnâ xoasa Psalmdi xa. ǂÂi-oa du ga matin ge Elob ǃoaba-aona gere ǁgâiǂuisensa ǁîn ama ǂâidi tsî tsâsiga, o i ge sadu tsîna hui ǁkhā ǁnā ǀgaub ǃnâ ǀgoresa. ǁÎn ǀgoredi ge a hui du ǁkhā, ǀasa ǁgâiǂuisen ǀgaub hîna du a sîsenu ǁkhāba hōsa. ǀNîn ǀgoredi Jehovab ǃoaba-aon gere ǁgâiǂuisendi ge sada tsâsigu tsî ǂan ǂgao da ra xūn ǀkha ǀgui.

12. Mâ dîde da dîsen ǁkhā Elobmîs ǃnâ xoasa ǀgorede da ga khomai o?

¹² Elobmîs ǃnâ hâ ǀgorede du ga khomai, o dîsen re: ‘Ham-e nē ǀgoresa ge ǀgore? ǁÎ-i ûiba mati ge ī-i? Tae-i ǃaroma i ge nē ǀgaub ǃnâ gere ǀgore? Nē ǀgores ǂâis ǀkha ta a ǀgopeǀnōsen ǁkhā? Tae-e ta nē ǀgoresa xu ra ǁkhāǁkhāsen?’ Ôaǃnâde dīs ge ǂhâbasa nē dîdi ǃereamde hōsa. Hā re î da haka ǀgorede kō.

13. Tae-e da Hannas ǀgoresa xu ǁkhāǁkhāsen ǁkhā? (1 Samueli 1:​10, 11) (Tsoatsoas ai hâ ai-īsib mû re.)

¹³ Khomai re 1 Samueli 1:​10, 11 sa. Hannas ge nēti ǀgore, os ge ǀgam ǃgomsiga ge ūhâ-i. ǁÎs ge ǀgôa-e ge hō ǁoa-i tsî î ge ǁîs aob nau tarasa ǁîs ûiba gere ǃgomǃgom. (1Sam. 1:​4-7) Sadu ûiba ra ǃgom kai ǃgomsi-e du ga hōǃâ, o du tae-e Hannas ǀgoresa xu ǁkhāǁkhāsen ǁkhā? ǁÎs ge ǁaeba ge ū, Jehovaba ǃoa ǀgore tsî ǁîs ǂâiǂhansende ǁîba mîbasa. Tsîs ge nēs khaoǃgâ ǃgâise ge tsâ. (1Sam. 1:​12, 18) Sada tsîn ge ǃgâise a tsâ ǁkhā, hōǃâ da ra ǃgomsiga da ga Jehovab ai ǃnao o.—Psa. 55:22.

14. (a) Tae-i tsîna da Hannas aiǁgausa xu ra ǁkhāǁkhāsen? (b) Elobmîsa khomai tsî ǂâiǃgâsa mati a hui da ǁkhā î da ǀgores ǃnâ da nî mî xūna ǂan? (ǀGamirosa mû re.)

¹⁴ ǀOro kuriga ǁnās khaoǃgâs ge Hannasa, Samuel tis ge ǀon ǂgai ǀgôaba ge hō tsîs ge ǁîba ǀGapi pristeri Elib tawa ge sī-ū. (1Sam. 1:​24-28) ǂGaoba xu ǀgore tsîs ge Jehovaba ge gangan, mûs ge amaga Jehovab ǂgomǂgomsa khoena ǁkhauba tsî ra kōǃgâsa.c (1Sam. 2:​1, 8, 9) ǁÎs ûib ǃnâs ge noxoba ǃgomsina ge ūhâ i xawes ge Hannasa ǁnā ǃgomsin xa ǀgui ǂâi tama-i tsî Jehovab ǁîsa ra ǀkhae ǀgaub xa ge ǂâi. Tae-e da ra ǁkhāǁkhāsen? ǃGomsina da ge nî tani hō, Jehovab nēsis kōse ra hui da ǀgaub ai da ga ǂâisa ǂnûi o.

15. ǂHanuoǃnâsiba da ga hōǃnâ, o da tae-e Kebō-aob Jeremiab ǀgoresa xu ǁkhāǁkhāsen ǁkhā? (Jeremiab 12:1)

¹⁵ Khomai re Jeremiab 12:1 sa. Kēbo-aob Jeremiab ge ge ǂkhabuǂâi, ǁgai xūna ra dī khoen ge ǀoro ǃgomsina ūhâ-i khami gere mûsen amaga. Israelǁî khoen ge ǁîb ǀkha gere hâ ǀgaub xas tsînab ge ǁgaise gere tsâ kaihe. (Jer. 20:​7, 8) ǁÎb gere tsâ ǀgauba da ge ra ǁnâuǃā, sida tsîn ǃhō-e tsîn ǁgai xūna ra dī khoena ǀoro ǃgomsina ūhâ amaga. Jeremiab ge Jehovaba gere mîba nē xūn ǁîba ǁgaise ra tsâ kaisa xaweb ge Jehovab a ǂhanuoǃnâ ti ge mî tama hâ i. ǁÎba ra mâǃoa khoenab Jehovaba ra ǂhanuǂhanu ǀgaubab ge Jeremiaba mû, o i ge Jehovab ǂhanu-aisib ǃnâb ūhâ ǂgomǃgâsiba ge ǀgai. (Jer. 32:19) Sida tsîn ge ǂgaoba xu Jehovaba a mîba ǁkhā, khoen ra dī ǂhanuoǃnâ xūn ga tsûtsu da o. Tsî da ge ǁkhā ǁaeb ai ǂgomǃgâsiba ra ūhâ Jehovab ǂhanu ǁaeb ai ǂhanuoǃnâsiba nî dī-ūnusa.

16. Sida mâsib ga ǀnî xūna xū ǃkhō-oa da, o tae-e da Leviǁîb ǀgoresa xu a ǁkhāǁkhāsen ǁkhā? (Psalmdi 42:​1-4) (Ai-īsiga mû re.)

¹⁶ Khomai re Psalmdi 42:​1-4 sa. Nē ams ge Leviǁîb nau Israelǁîn ǀkha ge tempeli ǃnâ ǃoaba ǁoa îb xa ge xoa-e. ǁÎb ge xoa Psalms ge tsâb gere ǀgausa ge ǁgau. ǀNîsi da ge ǁîb khami ra tsâ sida omsa xu da ga ǀaeb xa ǃaromahe hâse īǁoa tamas ka io sida ǂgoms ǃgao ǃkhōsis ǃnâ a ǂganamǂgāhe o. ǀNî ǁaegu ai da ge ǃgâise tsâ tsî nau ǁaegu ai ra ǂkhabuǂâi. Mati ǀgui da ga tsâ xawe î ge a ǃgâi Jehovaba mîbasa. Nēs ge nî hui da î da tsâ da ra ǀgauba ǁnâuǃā tsî tae-i ǂhâǂhâsa sa mûǂan. Aiǁgause, Leviǁîb ge ge mûǂan ǁîb ǀasa ǃēde nî hōsa îb Jehovaba koa. (Psa. 42:5) Jehovab ra kōǃgâ bi ǀgaub xas tsînab ge ge ǂâi. (Psa. 42:8) ǂGaoba xu da ga Eloba ǃoa ǀgore, o da ge a ǁnâuǃā ǁkhā mati io da ǀnî tsâsiga ūhâsa. Tsî da ge ǂkhîba hōǃâ tsî ǀgaib tsîna nî hō î da mâǀgai.

17. (a) Kēbo-aob Jonab ǀgoresa xu da tae-e ra ǁkhāǁkhāsen? (Jonab 2:​1, 2) (b)ǃGom ǁaega da ga hōǃâ, o i tae-i ǃaroma a ǃgâi î da Psalms ǁgâiǂuisen ǀgauga ǂâihō? (ǀGamirosa mû re.)

¹⁷ Khomai re Jonab 2:​1, 2 sa. Kēbo-aob Jonab ge kai ǁaub ǃnāba xu ge ǀgore. Jehovabab ge ǁnâuǀnamoǃnâ xaweb ge Jonaba ge ǂan-i Elob ǁîba nî ǁnâusa. ǁÎb ǀgores ǃnâb ge Jonaba ǂgui mîdi Psalms ǃnâ xoasade ge mî.d Īǁkhā î ge a ǁîb ge nē Psalmde ǃgâise ǂan-isa. Nē xoade ǂâihō tsî ǁîdi xa ǂâis ge ǁîba ge hui, îb ǂgomǃgâsiba ūhâ Jehovab nî huisa. ǁKhā ǀgaub ǃnâ da ga Elobmîs xoade ǂâihō, o di ge ǁîde nî ǁkhaeǂgao da Jehovaba ǃoa da ga ǃgom ǁaegu ǃnâ ǀgore o.

AIǃGÛ TSÎ ǀGORES ǃNÂ ELOBA ǀGŪ

18-19. ǀNî ǁaega da ga ǀū tae-e da Jehovaba nî mîbasa, os Romeǁîn 8:​26, 27 sa mâ ǂgomǃgâsiba ra mā da? Aiǁgau-e mā re.

¹⁸ Khomai re Romeǁîn 8:​26, 27 sa. ǀNî ǁaega da ge kaise ra ǂâiǂhansen tsî da ge a ǀū mati da Jehovaba tsâ da ra ǀgauba nî mîbasa. Xawe da ge huib ose hâ tama hâ. ǁNāti ī ǁaeb ǃnâ î ge Elob ǃanu gagaba ra ǀkhomaba da. Nēsa tae-e ra ǂâibasen? Jehovab ge ǁîb gagaba ge sîsenū îb Elobmîs xoa-aoga ǂkhâǃnâ î gu ǂgui ǀgorede xoaǁnâ. Sada ǂâide da ga ǁgâiǂui hō tama-i, ob ge Jehovaba ǀnîsi ǁnā Elobmîs ǀgoredi ǃnâ hâ xūn mî ǂgao da ra na hō tsî ǀgorede nî ǃeream.

¹⁹ Nē ǂâis ge Russiab ǃnâ ra hâ ǃgâsas Yelen ti ǀon hâsa ge hui. ǁÎs ge ǀgore tsîs Elobmîsa ra khomai amaga ge ǃkhō-e. Yelenas ge kaise gere ǂâiǂhansen tsî ge ǃgombahe-i ǀgoresa. ǁÎs ge ra mî: “ǂÂihō ta ge ra, kaise ta ge ǂâiǂhansen tsî ge ǀu-i tae-e ta ǀgores ǃnâ nî mîsa. Jehovab ge ǂgurokham ǁaeb ǃoaba-aon ǀgorede gere ūǃoa. Tsî di ge nē ǀgorede tita ra mî ǀgoredi khami ge ī-i. . . . Nēs ge kaise gere ǁkhaeǂgaote ǃgom ǁaegu ǃnâs tsîna.”

20. ǂÂiǂhansen du ga ǁaeb ai du tae-e nî dī ǀgore du nîs aiǃâ?

²⁰ Kaise ǂâiǂhansen tsî da ga ǀgore tsoatsoa, o da ge ǀnî hâ xūn xa ǂâi ǁkhā. Sida ǂgaoba aiǂhomis ǃaroma da ge Psalmdi xoade ǃgarise a khomaiǂui ǁkhā. Sida tsâsiga da ge xoamâi ǁkhā, Gao-aob Davidi ge dī khami. (Psa. 18, 34, 142) Amase î ge ǁgaraga a ǀkhai, mati da ǀgoreda nîs aiǃâ nî ǂhomisensa. (Psa. 141:2) Sado ra sîsenba ǀapemāsa sao re.

21. Tae-i ǃaroma da sida ǂgaoba xu ǀgore ǁkhā?

²¹ Kaise i ge ra ǁkhaeǂgao da ǂansa, Jehovab sida tsâsiga ra ǁnâuǃāsa xū-e da nî mîs aiǃâ. (Psa. 139:4) Xaweb ge ǁîba ra ǁnâu ǂgao, mati da ra tsâsa tsî matikōse da ǁîb ǃnâ ra ǂgomǃgâsa. Tā ǃkhō-oasen sadu ǀhomsi ǁGûba ǃoa ǀgoresa. ǁÎb Mîs ǃnâ xoamâisa ǀgorede xu ǁkhāǁkhāsen. ǂGaoba xu ǀgore. Jehovaba ǂkhî kai tamas ka io tsûaǂgao kai du ra xūna mîba. Ama ǀhōsa-i khamib ge Jehovaba amase nî kōǃgâ da.