ǂÂis ǃnâ ūhâ nauna ǀgorebasa

1. Mati da a ǂan sida ǀgoredi Jehovaba a ǂhâǂhâsaba sa?

ǀGORES ge ǀō-aisa ǀkhaeba. Nēs xa ǂâi, Jehovab ge ǀhomǃgaga ǁgaumâide mā hâ. (Psa. 91:11) ǁÎb ge ǁîb ôab tsîna ǂhâǂhâsa ǃereamde ge mā. (Mat. 28:18) Sida ǀgorede ra ǃgâ khoe-eb ǁgâumâi hâ? Hî-î, Jehovab ge aitsama ra ǁhûi ǁnā-e dīsa. Jehovab ‘ǀgoresa ra ǁnâub’ ge sida ra ǃgâ.—Psa. 65:2.

2. Mâ ǀgaugu ǃnâb Apostel Pauluba ǃgâi aiǁgau nauna ǀgorebas ǃnâ?

² Jehovab ǀkha da ge ǂâiǂhâsen kai da ra xūn xa ǃhoa ǁkhā xawe da ge naun tsîna nî ǀgoreba. Apostel Paulub ge ǁnāsa ge dī. Aiǁgause ǁîb ge Efeseǁî ǀhaohâba ǃoa ge xoa: “Tsî ta ti ǀgoredi ǃnâ sadu xa ra ǂâi.” (Efe. 1:16) Paulub tsîn ge nauna ǀguri hâse gere ǀgoreba. Aiǁgause ǁîb ge Timoteuba ge mîba: “Sats ǃaroma ta ge Eloba kai gangansa ra mā . . tsî ta ge hoaǁae ti ǀgoredi ǃnâ ǀû tamase gere ǀgoreba tsi.” (2Tim. 1:3) Paulub tsîn ge ǁîb ǂâiǂhâsende ge ūhâ i ǀgorebab nî te. (2Kor. 11:23; 12:​7, 8) Xaweb ge ǁaeba ǁamaǂui tsî naun tsîna gere ǀgoreba.

3. Tae-i ǃaroma da nauna ǀgorebasa ǀuru ǁkhā?

³ ǀNî ǁaega da ge a ǀuru ǁkhā nauna ǀgorebasa. Tae-i ǃaroma? Xristeǁî ǃgâsas Sabrinaa ti ǀon hâs ge ǀgui ǃaromasa ra mā. ǁÎs ge ra mî: “Nē ǃhūbaib di ûib ge kaise ǃgom. Sida ǃgomsin xa da ge kaise a ǂâiǂhâsen ǁkhā tsî da ge sida ǂhâsigu xa ǀgui ra ǀgore.” Nēsa ǀnî ǁaega sadu ǀkha ra ī? Ti i ga ios ge nē ǁkhāǁkhāǃâsa nî hui da. ǁGuiǃā î ge nî (1) tae-i ǃaroma i a ǂhâǂhâsa sa nauna ǀgorebasa. (2)Hui du î ge nî mati du nēsa dī ǁkhāsa.

TAE-I ǃAROMA DA NAUNA NÎ ǀGOREBA?

4-5. Nau khoena da ga ǀgoreba o i mati ‘ǀgaisa sîsenǂuiba’ nî ūhâ? (Jakobub 5:16)

⁴ Nauna ǀgorebas ge “ǀgaisa sîsenǂuiba ūhâ.” (Khomai re Jakobub 5:16 sa.) Nauna da ga ǀgoreba, o i ǁîn mâsiba nî ǀkharaǀkhara? Îo, īǁkhā i ge a. Jesub ge ge ǂan i Apostel Petrub xab nî ǀūxu-esa tsîb ge ge mî: “Xawe ta ge satsa go ǀgoreba, îts ta ǂgomǀû.” (Luk. 22:32) Paulub tsîn ge ge ǂan-i ǀgores ǀkharaǀkhara-e a dī ǁkhāsa. ǁÎb ge ǃkhōsis ǃnâ Romes ǃnâ hâ-i ob ge Filemona ǃoa ge xoa: “Elob nî sadu hoadu di ǀgoredi ǃnâ-u sado mā-oa te ǃkhaisa ta ra ǃâubasen xuige.” (Flm. 22) Tsî ǁnā-i ge Paulub ǀkha ge ī, ǁîb ge ǃkhōsisa xu ǂoa tsî aoǁnâ sîsen-e ǁkhawa ge dī tsoatsoa.

⁵ Ama as ge nēs ge ǂâibasen tama hâ, Jehovab ǃnās hoasa ǁîba da ra ǂgan xū-e nî dīsa. ǁÎb ge ǁîb ǃoaba-aon ǀgores ǃnâ ra mî-e ra tsâba tsî ǀnî ǁaega ǁîn ra ǂgan xū-e ra ǃeream. Nēsa ǂans ge nî hui da î da Jehovaba ǃoa ǀgore, mâ mâsib ǃnâ ǀgui da ga hâ xawe. Tsî ǂgomǃgâsiba ūhâ ǁîb nēsa ǃgâi ǀgaub ǃnâ nî dīsa.—Psa. 37:5.

6. Nau khoena ǀgorebasa mati ǁîn xa da ra tsâ ǀgausa ra tsâǀkhā? (1 Petrub 3:8)

⁶ Nauna da ga ǀgoreba o i ge nî hui da î da “ǃgâiǂgaoxa.” (Khomai re 1 Petrub 3:8 sa.) ǃGâiǂgaoxa khoe-i ge nau khoe-i ǃgomsi-e mû tsî ǁî-e ra hui ǂgao. (Mrk. 1:​40, 41) Michael ti ǀon hâ ǀhaohâb ǃûi-aob ge ra mî: “Nau khoena da ga ǁîn di ǂhâsigu ǃaroma ǀgoreba, o da ge ǁîn ra ǃkharuǃnâ xūna ǃgāsase ra mû. Tsîs ge ǁnāsa ǁîna da ūba hâ ǀnamma ra ǀgaiǀgai ǁîn ǀgūse ta ge ra tsâ, ǁîn ga nēsa hōǃâ tama i xawe.” Richard ti ǀon hâ ǀhaohâb ǃûi-aob ge ǀnî hâ ǃgâi xū-e ra mî: “Khoe-e da ga ǀgoreba, o da ge ra ǂkhâǃnâ-e ǁnā khoe-e huisa. ǀGoreba da ra khoena da ga ǃkharagagu ǀgaugu ǃnâ hui, o da ge sida ǀgoredi ǁîn ǃaroma da ra ǀgorede ra hui ǃereamhesa.”

7. Nauna ǀgorebasa mati nî hui da î da tā sida ǃgomsin xa ǀgui ǂâi? (Filipeǁîn 2:​3, 4) (Ai-īsiga mû re.)

⁷ Nauna ǀgorebas ge ra hui da, î da sida ǃgomsina ǃgâi ǀgaub ǃnâ mâi. (Khomai re Filipeǁîn 2:​3, 4 sa.) ǁGâuab xa ra ǂgaeǂguihe ǃhūbaib ǃnâ da ûihâ amaga da ge ǃgomsiga ra hōǃâ. (1Jhn. 5:19; J.ǂHa. 12:12) Nauna da ga tsēs hoasa ǀgoreba, o da ge ra ǂâiǂâiǃnâ-e, “nau ǂgomsaben ǃhūbaib ai hân hoan tsîn ra ǁnāti ī tsâgu ǃnâ ǃkharu ǃkhaisa.” (1Pet. 5:9) Aimâba-aos Katherine ti ǀon hâs ge ra mî: “Nauna ǀgorebas ge ra ǂâiǂâiǃnâte ǁîn tsîn ǃgomsina ra hōǃâsa. Nēsa ta ga ǂâihō, o ta ge ti ǃgomsin xa ǀgui ǂâi tama hâ.”

ǁÎN GE SIDA ǀGOREDE ǂHÂ HÂ

8. Aiǁgaude mā re ham-e da nî ǀgorebasa.

⁸ Ham-e da nî ǀgoreba? ǂGui khoena da ge ǀgoreba ǁkhā. Aiǁgause, ǀae hân, ǂkhamkhoen skoli tawa ǁgâiba ra hōǃân tamas ka io ǁnān hîna ǃgomsina ra hōǃân kairasis xa ǃaromahe hâse. Sida ǃgâsan ge ǂgui ǃgomsina ra ǃkharuǃnâ. ǁÎn ge omaridi tamas ka io ǂhanub xa ra ǁgâiǀāhe. (Mat. 10:​18, 36; ǃNǃkh. 12:5) Sida ǃgâsan ǀnîn ge ǁîn omde xu ra ǃkhoebē ǂkhabadīb xa ǃaromahe hâse. ǀNîn ge tsūkeǃgâga ra hōǃâ. Nē ǃgâsana da ge ǀondi ai ǂan tama hâ. ǁÎna da ga ǀgoreba, o da ge Jesub mîmāsa ra ǁnâuǀnam “ǀnamgu re.”—Jhn. 13:34.

9. Tae-i ǃaroma da Jehovab ǀapeǂhomisa ra kōǃgâ ga nî ǀgoreba tsî ǁîgu taradi tsîna?

⁹ Jehovab ǀapeǂhomisa ra kōǃgâgu tsîna da ge nî ǀgoreba. Nēs ge ǂGaeǂguira soros tsî ǁîgu hui-aogu, ǁnâub beros komitegu, ǃnarimâra mûǂam-aogu, ǀhaohâb ǃûi-aogu tsî ǀhaohâb hui-aogu tsîna ǃkhōǂgā hâ. Nē ǃgâsagu ge ǁîgu ǃgomsin tsîna ūhâ tsî ǁkhā ǁaeb ai ǃgārise ra sîsen sida huis ǃaroma. (2Kor. 12:15) Aiǁgause Mark ti ǀon hâ ǃnarimâra mûǂam-aob ge ra mî: “Kaise i ge ǃgombate ǃnūse ti kaira hâ ǁgûra xu hâsa, hoa ra ge ǀaeb ǃgomsiba ūhâ. Ti ausis tsî ǁîs aob tsîn ǁîra ǂhâsiga ra kōǃgâ xawe i ge ra tsûaǂgao kai te ǁîra ǀgūse ta hâ tamasa î ta hui ra.” Hoa xūn nē ǃgarise ra sîsen ǃgâsan ra ǃkharuǃnâna ta ge a ǀū xawe da ge nî ǂâihō ǁîna ǀgorebasa. (1Tes. 5:​12, 13) Nē aogu taradi tsîna da ge nî ǀgoreba, ǁîdi ǂgomǂgomsase ǁîdi aoga ra hui î gu nē ǁgaumâidi ǃnâ aiǃgû.

10-11. Jehovaba a ǂkhî sida ǀgores ǀkha, ǃgâsan ǀonde da ga mî tama i xawes tsîna? ǁGuiǃā re.

¹⁰ ǃHoaǃgao da go khami da ge ǂgui ǃgâsana ǃkharagagu ǃgomsin ǃnâ hâna ra ǀgoreba. Aiǁgause da ga ǀnîsi khoe-e ǂâis ǃnâ ūhâ tamas ka io da ge Jehovaba ǂgan ǁkhā, îb ǁnān ǃkhōsis ǃnâ hâna hui tamas ka io ǁnān ǁîn ǀnamsabena ǁōb ǃnâ ǂoaǃnâna ǂkhâǃnâ. Donald ti ǀon hâ ǀhaohâb ǃûi-aob ge ra mî: “ǂGui ǃgâsana da ge ūhâ ǃgomsiga ra ǃkharuǃnâna tsî da ge ǀnî ǁaega hoaǃnâ-aixase ra ǀgo-re.”

¹¹ Nēti ī ǀgorede Jehovaba ra ǂkhîǂkhî? Îo. Ama as ge sida ǃgâsan hoa ǂhâsiga da a ǀūsa. ǃGâi-i ge a hoaǃnâ-aixa ǀgorede sida ǃgâsana dībasa. (Jhn. 17:20; Efe. 6:18) Nēti ī ǀgoredi ge ra ǁgau ‘ǂgomsabena ǀnamsa.’—1Pet. 2:17.

ǀONDI AI ǂGAI TSÎ DA GE NAUNA NÎ ǀGOREBA

12. ǃGaoǃgâxasa mati nî hui da î da nauna ǀgoreba?

¹² ǃGaoǃgâxa. Sida ǃgâsana ǀguiba ǀgorebas xa da ge ǁîna ǀguiǀguibes ǃnâs tsîna a ǀgoreba ǁkhā. Sadu ǀhaohâb ǃnâ i khoe-e hâ ǂgau-e tama ǀaeba ūhâ-e? ǂKhamkhoe-e sadu ǀhaohâb ǃnâ skoli tawa ǁgâiba ra hōǃâ î-i ǁgai xū-e dī? ǀGuri hâ ǁgû-e ǃgomsiba ra hōǃâ, ǁî-i ǀgôa-e ‘ǃKhūb di ǂâis ǃoa kaikaisa?’ (Efe. 6:4) ǃGaoǃgâxa da ga o da ge nauna ǀnam tsî nî tsâba, nēs ge nî ǂkhâǃnâ da î da ǁîna ǀgoreba.b—Rom. 12:15.

13. Mati da ǁnān ǃgâise da ǂan tamana ǀgoreba ǁkhā?

¹³ Nauna ǀgoreba ǁîn ǀondi ai ra ǂgaise. ǁNān hîna da noxopa ǀhao-ū taman tsîna da ge ǀgoreba ǁkhā. Aiǁgause sida ǃgâsan ǃkhōsis ǃnâ hân xa ǂâi re saora ǃhūgu ǃnâ: Krimea, Eritrea, Russiab tsî Singapores ǃnâ. Internets ǂhaweb jw.orgs ai du ge ǃkhōsis ǃnâ hâ ǃgâsan ǀonde nî hō.c ǃNarimâra mûǂam-aob Briani ge ra mî: “ǃKhōsis ǃnâ hâ ǃgâsa-i ǀonsa xoamâi tsî ta ga ǃgarise ǂgâiǂnui, os ge nēsa ra huite î ta ǁnā ǀonsa ǂâihō ǀgore ta ra ǁaeb ai.”

14-15. Mati da ǂōrisase ǀgore ǁkhā?

¹⁴ ǂŌrisase ǀgore. Micheali ǀnai da go ǃhoaǃgao hâ îb ge ra ǀapemā: “ǃKhōsis ǃnâ hâ ǃgâsan xa ta ge jw.orgs ai ra khomai. Tsî ta ge ra mûnan-ai mati ta ga tsâ hâsa ǁîn mâsib ǃnâ ta ga hōsen hâ o. Tita ge a ǂan ti taras xa ta ga ǂâiǂhânsen hâsa tsî ta ga ǂhâba hâsa is ǁîsa kōǃgâhe. ǁNās ge ra hui te î ta tronkes ǃnâ hâ ǃgâsana ǂōrisase ǀgoreba, ǁnān ǃgamme hân tsîna.”—Heb. 13:3.

¹⁵ ǂÂiǃgâ da ga o matib ûiba sida ǃgâsan ǃkhōsis ǃnâ hâna a ība sa, os ge nēsa nî hui da î da ǀnî hâ xūn xas tsîna ǂâi sida ǃgâsana da a ǀgoreba ǁkhāna. Aiǁgause da ge ǀgore ǁkhā î-i ǃkhō-omsa ra kōǃgâ khoena ǁîna khoexaǃnâse hâ-ū. Tsî ǁnān ǀgapi ǂgaeǂguisa ūhâna ǃgâsana nî mā-amsa în ǃnorasase ǃoaba. (1Tim. 2:​1, 2) Tsî da ge a ǀgore ǁkhā în ǁnān ǀhaohâb ǃnâ hâna ǃkhō-oms ǃnâ hâ ǃgāsan ǂgomǂgomxasib xa ǀgaiǀgaihe. Tamas ka io ǁnān Jehovaba ǃoaba tamana ǃkhōsis ǃnâ hâ ǃgâsan tanisen ǀgaub xa nî ǂgaehesa tsî sida haisi-amsa nî ǃgâsa. (1Pet. 2:12) ǁNās ǁkhās khami da ge ǃgâsana ǀgoreba ǁkhā ǃgomsina ra hōǃâna. ǃGaoǃgâxa, nauna ǀondi ai ǀgoreba tsî da ga ǂōrisase a ǀgore, o da ge ra ǁgau ‘ǃnāǂamsasib ǃnâ da ǀnamgu sa.’—1Tes. 3:12.

ǀNŌSA MÛǂUIBA ŪHÂ ǀGOREDI XA

16. Mati da ǀnōsa ǀgauba nî ūhâ sida ǀgoredi xa? (Mateub 6:8)

¹⁶ ǁKhāǁkhāsen da go khami, khoe-e da ga ǀgoreba o i ge ǀnîsi ǁî-i di mâsiba a dawa ǁkhā. Xawe da ge ǀnōsa mûǂui ǀgauba nî ūhâ. ǂÂis ǃnâ da ge nî ūhâ ǀgore da ga, o da ge Jehovaba ǀnaib a ǀū xū-e mîba tama. Tsîb ge ǁîba sida xa ǀapemāhesa ǂhâ tama hâ. Jehovab ge a ǂan ǁîb ǃoaba-aon tae-e ǂhâ hâsa ǁîn tamas ka io sida nî ǂgans aiǃâ. (Khomai re Mateub 6:8 sa.) ǁNā-amaga tae-i ǃaroma da nauna nî ǀgoreba? Nē ǁkhāǁkhāǃâs ǃnâ da go ǃhoaǃgao ǃaromadi ǂam-ai da ge khoena da ra tsâba amaga ǁîna ra ǀgoreba. ǀNammi tsîn ge ra ǂkhâǃnâ da î da ǀgoreba gu. Nēs ge Jehovaba ra ǂkhî kai mûb ga o ǁîb ǃoaba-aon ǁîb ǀnamma ra ǁgaesa.

17-18. Nauna da ra dība ǀgorede mati a ǂkhō-e ǁkhā?

¹⁷ Sida ǀgoredi ga ǂhâba da ra sîsenǂuiba ūhâ tama-i xawe i ge ra ǁgau sida ǃgâsana da a ǀnamsa. Tsîb ge Jehovaba nēsa ra ǃgaoǃgâ. Nē-e da ge saora ǀgaub ǃnâ a ǂkhō ǁkhā: Mûnana-ai re omaris ǂkham ǀgôarob tsî axaros tsîna ūhâsa. Axarob ge ǀaeǁgoe hâ. Axaros ge dadasaba ra ǀkhoma: “Toxoba xū-e dī re ti ǃgârob ge ǀaesen hâ.” Dadasab ge ǀnai ǁîb ǀgôaroba ra kōǃgâ, ǁîbab a ǀnam tsî ǁîb ǀkhab ǁae hâ amaga. Xawe nēs ge ǁîs dadasaba kaise ra ǂkhî kai, ǁîb tare ǀgôaros kaise ǁîs ǃgarob xa ǁae hâsa. Tsî ǁîs dadaba ra ǀkhoma îb ǁîba hui.

¹⁸ ǁKhā ǀgaub ǃnâb ge Jehovaba ra ǂkhâǃnâ da î da kōǃgâ gu tsî naun tsîna ǀgoreba. Nēsa da ga dī, o da ge ra ǁgau sida xa ǀgui da ǁae tama hâsa tsî da sida ǃgâsana amase a ǀnamsa. Jehovab ge nēsa ra ǃgaoǃgâ. (2Tes. 1:3; Heb. 6:10) ǃHoaǃgao da go khami i ge sida ǀgorede ǀnî ǁaegu ai mâsiba tawa ǁkhā. ǁNās ǀkha hā re î da dītsâ tsî ǀgorebagu.